Vre Lafwa Permet Nou pou Viv Ere pou Touletan

BANN Lekritir Sakre dir: “Sa kikenn ki drwat la pou viv akoz so lafwa.” (Romin 1:17) Nou trouv enn zoli promes dan sa bann parol-la ek sa konsern ou. Kouma?

Apre ki Zezi, Lemesi, ti fini travay ki Bondie ti donn li lor later, li ti mont dan lesiel pou al kot Bondie. So bann disip ti trouv li “mont dan lesiel, ek enn niaz ti anvlop li ek zot ti nepli trouv li.” (Zistwar Bann Zapot 1:9) Plitar, Bondie ti fer li vinn enn Lerwa bien pwisan dan lesiel. Biento, Zezi pou vini “dan so laglwar, ek tou so bann anz avek li, lerla li pou asiz lor so tronn ki ranpli ar laglwar. Tou bann nasion pou rasanble devan li, ek li pou separ bann dimounn sakenn ar so kamarad, parey kouma enn berze separ bann mouton ar bann kabri.” (Matie 25:31, 32) Me kan sa pou arive?

Bann Lekritir Sakre dir ki pou ena enn lepok kot pou ena bann problem partou lor later, ek sa ti pou enn sign ki biento Lemesi pou ziz tou bann pep. Zezi ti explike ki kitsoz pou form parti sa sign-la. Li ti dir: “Nasion pou lager kont nasion ek pei kont pei. Pou ena bann gran tranbleman-de-ter, ek dan enn landrwa apre lot pou ena lafaminn ek bann lepidemi; pou ena bann kitsoz ki fer bien per.”​—Lik 21:7, 10, 11.

Azordi, nou kapav trouve kouma sa bann parol ki Zezi ti dir la pe realize. Biento li pou vini pou detrir tou bann move dimounn, ek apre sa li pou detrir Satan. Lerla, later antie pou vinn enn Paradi. Tou dimounn pou viv dan lape avek sakenn zot kamarad ek mem avek bann zanimo. “Enn loulou pou res inpe letan avek enn ti mouton, ek enn leopar pou dormi avek enn ti kabri, ek enn ti toro, enn zenn lion, ek bann zanimo ki bien nouri, zot tou pou ansam; ek enn ti garson pou diriz zot. Personn pa pou fer okenn ditor ni okenn dega.” (Izai 11:6, 9) “Okenn abitan pa pou dir: ‘Mo malad.’” “Sa lepok-la lizie sa kikenn ki aveg la pou ouver, ek zorey sa kikenn ki sourd la pou debouse.” (Izai 33:24; 35:5) Mem bann dimounn ki’nn mor pou resisite. “Zeova pou souy larm lor tou bann figir,” ek “lamor pou nepli existe, pou nepli ena ni dey, ni plore, ni douler.” (Izai 25:8; Revelasion 21:4) Lerla, proze ki Bondie ti ena o-koumansman pou later pou realize. Enn zoli lavenir, pa vre?

Kontign Fer Ou Lafwa Vinn Pli For

Ki bann dimounn Bondie pou swazir pou viv dan Paradi? Bann dimounn ki ena lafwa​—vre lafwa!

Pa bliye ki vre lafwa baze lor enn konesans exakt lor Parol Bondie. Alor kontign fer zefor pou aprann konn Bondie ek Zezi pli bien!

Kan nou ena vre lafwa nou pou osi fer bann bon kitsoz. Parol Bondie dir : “Lafwa san bann aksion, li mor.” (Zak 2:26) Alor, kan ou pou fer bann bon kitsoz, ou pou montre ki ou ena bann zoli kalite ki Bondie ena, kouma par exanp pwisans, lazistis, sazes, ek lamour. Kontign fer bann zefor pou ena sa bann zoli kalite la!

Si ou kontign fer zefor pou ena vre lafwa ou pou gagn bann gran benediksion ek se samem ki pou permet ou pou viv ere depi aster-la mem ek pou touletan!