Montre ki Ou Ena Vre Lafwa!

BONDIE ti dir so bann serviter ki zot pou gagn bann leprev ki pou teste zot lafwa. Dan so Parol li dir: “Res lor zot gard. Zot adverser, Lediab, pe fer letour kouma enn lion ki pe kriye ek ki pe rod devor kikenn.” (1 Pier 5:8) Ki Satan pe fer pou esey fer ou perdi ou lafwa?

Satan kapav servi lezot dimounn, mem bann manb ou fami ouswa ou bann kamarad pou met presion lor ou pou ki ou pa konn seki ena dan bann Lekritir Sakre. Konsernan sa lide-la, Zezi ti dir: “Bann lennmi enn zom pou trouv dan so prop lakaz.” (Matie 10:36) Sa bann fami ouswa bann kamarad la kapav ena bann bon lintansion kan zot pe fer sa. Me zot pa konn laverite ki ena dan Parol Bondie, ouswa kitfwa zot per seki dimounn pou dir. Me bann Lekritir Sakre dir: “Tranble devan bann zom samem ki met nou dan piez, me enn dimounn ki met so konfians dan Zeova pou gagn proteksion.” (Proverb 29:25) Si ou aret aprann seki ena dan bann Lekritir Sakre zis pou fer bann dimounn plezir, eski ou panse Bondie pou kontan? Non! Parkont, kan nou montre ki nou ena vre lafwa, Bondie pou ed nou. “Nou pa sa kalite dimounn ki rekile pou gagn destriksion la, me nou enn kalite dimounn ki ena lafwa pou prezerv nou lavi.”​—Ebre 10:39.

Eski ou rapel zistwar Dumas ki nou ti gete dan Leson 3? Dan koumansman, so madam ti pe boufonn li akoz li ti pe etidie bann Lekritir Sakre. Me plitar, li osi li’nn koumans aprann seki ena dan Parol Bondie. Ou osi ou pou kapav ed ou bann kamarad ek ou bann fami pou fer parey, si ou pa bes lebra ek kontign fer seki drwat. Dan plizir sitiasion, bann ki’nn montre ki zot ena vre lafwa inn ed zot fami pou gagn vre lafwa zot osi gras-a “enn bon kondwit” ek “enn profon respe.”​—1 Pier 3:1, 2.

Satan anvi esey fer bann dimounn krwar ki zot tro okipe pou aprann plis lor bann Lekritir Sakre. Li ti pou kontan ki bann traka ki enn dimounn ena, kouma kas ek bann lezot kitsoz personel, “touf mesaz-la” ek ki li perdi so lafwa. Satan ti pou kontan fer sa avek ou osi. (Mark 4:19) Pa tom dan piez Satan. Mazinn seki pe atann ou dan lavenir! Bann Lekritir Sakre dir: “Ala seki vedir lavi eternel: ki zot aprann konn twa, sel vre Bondie, ek sa kikenn ki to finn avoye la, Zezi Kris.” (Zan 17:3) Wi, kontign fer zefor pou aprann plis lor Bondie ek lor Zezi, Lemesi, pou ki ou kapav viv pou touletan dan Paradi!

Reflesi lor Moiz, ki ti enn manb dan fami rwayal dan Lezip. Li ti kapav rod larises, laglwar, ek pouvwar. Me selman, Moiz ti swazir pou “gagn maltrete ansam avek pep Bondie olie ki li profit plezir tanporer ki gagne dan pese.” Kifer? “Li ti kontign tini ferm, koumadir li ti pe trouv sa Kikenn ki invizib la.” (Ebre 11:24, 25, 27) Wi, Moiz ti ena enn gran lafwa dan Bondie. Olie ki li ti fer bann kitsoz ki li ti anvi fer pas an-premie, li ti fer bann kitsoz ki Bondie ti demann li pou fer. Ek Bondie ti beni li boukou. Si ou osi ou fer parey, Bondie pou beni ou osi.

Kitfwa Satan pou esey atak ou dan diferan fason. Me fode pa ki ou tom dan so piez. Parol Bondie dir: “Opoz zot ar Lediab, ek li pou sove pou al lwin ar zot.” (Zak 4:7) Kouma ou kapav opoz ouswa reziste kont li?

Kontign etidie bann Lekritir Sakre. Lir Parol Bondie toulezour, etidie bann lansegnman ki ena ladan, ek swiv so bann konsey. Kan ou fer sa, ou pou met “lekipman lager ki konple ki Bondie done,” ki pou ed ou pou reziste kont bann latak Satan.​—Efezien 6:13.

Pas letan ar bann dimounn ki ena vre lafwa. Rode kisann-la ki lir, etidie, ek swiv bann Lekritir Sakre. Sa bann dimounn-la interes zot ar sakenn zot kamarad, zot motiv sakenn pou montre lamour ek pou fer bann bon aksion, ek zot ankouraz sakenn zot kamarad. Zot pou ed ou pou ena enn lafwa pli for.​—Ebre 10:24, 25.

Vinn pros ar Zeova. Priye Bondie pou demann li so led, ek fer li konfians. Zame pa bliye ki Bondie anvi ed ou. Bann Lekritir Sakre dir: “Zet tou zot traka lor li, parski li gagn zot traka.” (1 Pier 5:6, 7) “Bondie li fidel, ek li pa pou les zot gagn enn tantasion ki zot pa kapav siporte, me avek sa tantasion-la, li pou osi donn zot enn mwayin pou sorti ladan, pou ki zot kapav andir sa.”​—1 Korintien 10:13.

Satan dir ki personn pa pou kontign servi Bondie si sa pou fer sa dimounn-la gagn bann difikilte ek soufer. Kan Satan pe dir sa, li pe insilte Bondie. Me ou ena posibilite pou montre ki Satan enn manter! Bondie dir: “Montre ki to ena sazes ek fer mo leker kontan, pou ki mo kapav reponn sa kikenn ki pe insilte mwa la.” (Proverb 27:11) Wi, kontign fer tou pou montre ki ou ena vre lafwa!