Azordi, Kisann-la Ena Vre Lafwa?

AZORDI, boukou dimounn dir ki zot ena lafwa. Me Zezi ti dir ki enn tigit dimounn mem ki pou ena vre lafwa. Li ti dir: “Semin ki larz amenn ziska destriksion, ek boukou pe pas par la; parkont laport ki tipti ek semin ki sere amenn ziska lavi, ek bien tigit pe trouv li.”​—Matie 7:13, 14.

Kouma bann dimounn azordi montre ki zot ena vre lafwa? Zezi ti dir: “Zot pou rekonet bann-la par zot frwi.” “Tou bon pie donn bann bon frwi, me tou pie ki pouri donn bann frwi ki pena valer.” (Matie 7:16, 17) Vre lafwa prodir bann “bon frwi.” Alor, sa ankouraz bann dimounn pou montre bann zoli kalite ki Bondie kontan, kouma par exanp pwisans, lazistis, sazes, ek lamour. Kouma eski zot fer sa?

Zot Servi Zot Lotorite Kouma Bizin

Bann dimounn ki ena vre lafwa servi zot pwisans, kouma par exanp zot lotorite, pou donn loner Bondie ek pou ed lezot. Zezi ti dir ki “si kikenn anvi vinn gran parmi zot, li bizin vinn zot serviter.” (Mark 10:43) Alor, bann zom ki ena vre lafwa pa pou azir kouma bann diktater dan zot lakaz ek andeor zot lakaz. Zot kontan zot madam, zot donn bann-la loner, ek avek lamour zot donn bann-la seki zot bizin. Bann Lekritir Sakre dir: “Zot, bann mari, kontign kontan zot fam ek pa vinn amer ar zot.” (Kolosien 3:19) “Bann mari, dan mem fason, kontign viv ar zot fam an-akor avek konesans. Donn bann-la loner parey kouma zot ti pou pran swin enn resipian ki pli frazil, parski zot fam osi pou erit lavi avek zot gras-a bonte extraordiner Bondie ek pou ki nanye pa blok zot lapriyer.”​—1 Pier 3:7.

Aster-la, enn madam ki ena vre lafwa, li “bizin ena enn profon respe pou so mari.” (Efezien 5:33) Bann madam bizin “kontan zot mari” ek “kontan zot zanfan.” (Tit 2:4) Bann papa ek bann mama ki ena vre lafwa pas letan avek zot bann zanfan ek ansegn zot bann lalwa ek bann prinsip Bondie. Zot montre respe anver bann dimounn, ki li dan zot lakaz, dan travay, ouswa ninport kotsa zot ete. Zot swiv konsey ki ena dan bann Lekritir Sakre ki dir: “Zot bizin touzour premie pou onor sakenn zot kamarad.”​—Romin 12:10.

Bann serviter Bondie swiv sa lord ki ena dan bann Lekritir Sakre la: “Fode pa ki to aksepte enn brayb.” (Exod 23:8) Ek zame zot servi zot lotorite pou zot lintere personel. Me plito, zot rod bann lokazion pou ed lezot, sirtou bann seki bizin led. Zot swiv sa konsey-la: “Pa bliye fer dibien ek partaz seki zot ena avek lezot, parski se bann sakrifis koumsa ki Bondie bien kontan.” (Ebre 13:16) Kan zot fer sa, zot trouve ki seki Zezi ti dir li vre: “Ena plis lazwa kan done ki kan resevwar.”​—Zistwar Bann Zapot 20:35.

Zot Swiv Bann Prinsip Bondie lor Lazistis

Bann dimounn ki ena lafwa swazir pou obeir bann lalwa Bondie, ek pou zot, “so bann komannman pa lour.” (1 Zan 5:3) Zot kone ki “lalwa Zeova li parfe.” “Bann lord Zeova zot drwat, zot fer leker kontan; komannman Zeova li pena okenn tas, li fer lizie briye.”​—Psom 19:7, 8.

Vre lafwa osi pous zot pou rezet tou kalite prezize. Zot pa panse ki enn dimounn ki sorti dan enn ras, enn pei, ouswa ki ena enn sertin ran sosial pli siperyer ki enn lot. Me okontrer, zot imit Bondie. “Bondie pa fer preferans, me dan tou nasion dimounn ki ena enn gran respe pou li ek ki fer seki drwat gagn so faver.”​—Zistwar Bann Zapot 10:34, 35.

Vre lafwa pous bann dimounn pou “azir dan enn fason onet dan tou kitsoz.” (Ebre 13:18) Enn kikenn ki ena vre lafwa pa pou fer palab ek koz manti pou gat repitasion lezot. Get seki David ti ekrir konsernan bann dimounn ki Bondie aksepte: “So lalang pa koz manti pou gat repitasion personn, li pa fer okenn ditor so prosin.”​—Psom 15:3.

Zot Imit Sazes Ki Sorti kot Bondie

Bann dimounn ki ena vre lafwa swiv zis seki ena dan bann Lekritir Sakre. Zot sir ki “tou Lekritir inspire par Bondie, ek li itil pou ansegne, pou korize, pou redres bann kitsoz, pou disipline an-akor avek seki drwat.” (2 Timote 3:16) Dan fason ki zot koze ek azir ar lezot, zot montre ki zot ena “sazes ki sorti lao,” ek sa sazes-la li “san tas, apre sa li kontan lape, li rezonab, li dispoze pou obeir, li ranpli ar mizerikord ek ar bann bon frwi.” (Zak 3:17) Zot rezet bann pratik demoniak, bann tradision ki pa fer plezir Bondie, ek zot “res lwin ar bann zidol.”​—1 Zan 5:21.

Zot Montre Vre Lamour

Profet Moiz ti dir: “To bizin kontan Zeova to Bondie avek tou to leker, tou to lavi, ek tou to lafors.” (Deteronom 6:5) Bann dimounn ki ena vre lafwa montre ki zot kontan Bondie dan sa fason-la. Zot respekte nom Bondie, Zeova. Zot “dir Zeova mersi” ek avek lafwa zot “loue so nom.” (Psom 105:1) Bann serviter Bondie swiv sa komannman-la osi: “To bizin kontan to prosin kouma tomem.” (Levitik 19:18) Zot rezet laviolans, ek zot fer zefor pou “viv anpe avek tou dimounn.” (Romin 12:18) Se koumadir zot ‘fer zot lepe vinn bann zouti ki travay later, ek zot fer zot bann lans vinn bann sizay.’ (Izai 2:4) Parski zot fer sa, “zot ena lamour ant zot” ek zot form parti dan enn fami internasional. (Zan 13:35) Eski ou konn bann dimounn ki azir koumsa azordi?