Sapit 18

Fixe Lobzektif pu Servi Bondye pu Tuletan

1, 2. Ki kitsoz ki neseser apart zis ena konesans Bondye?

FER kuma dir, u devan enn laport ferme akle ki amenn ver enn lasam kot ena enn gran kantite trezor. Sipoze enn dimunn responsab finn donn u lakle laport la, ek li finn dir u pran seki u anvi dan sa bann trezor la. Lakle la pa pu rann u okenn servis si u pa servi li. Kumsa mem, pu nu profit konesans, fode nu servi li.

² Li parey pu konesans Bondye usi. Enn konesans egzak lor Bondye Zeova ek Zezi Kris vedir lavi pu tuletan. (Zan 17:3) Me, li pa sifi gayn zis konesans pu kapav konn sa lavenir la. Parey kuma u ti pu servi enn lakle ki ena valer, u bizin met konesans Bondye an pratik dan u lavi. Zezi ti dir ki bann ki fer volonte Bondye pu “rant dan rwayom.” Zot pu ena privilez pu servi Bondye pu tuletan!—Matye 7:21; 1 Zan 2:17.

3. Ki volonte Bondye pu nu?

³ Apre ki u finn fini aprann volonte Bondye, li inportan ki u fer li. Dapre u, ki volonte Bondye vedir pu u? Nu kapav rezim sa an detrwa mo: Fer parey kuma Zezi. Premye Pyer 2:21 dir nu: “Finn apel zot dan sa [simin] la, parski Kris finn sufer pu zot, li finn kit enn model pu ki zot mars lor so bann tras.” Donk, pu fer volonte Bondye u bizin, otan ki posib, swiv byin pre legzanp Zezi. Ala, ki manyer u met konesans Bondye an pratik.

KUMA ESKI ZEZI TI SERVI KONESANS BONDYE

4. Kifer eski Zezi ti konn byin Zeova, ek kuma eski li finn servi so konesans?

⁴ Zezi Kris konn Bondye plis ki lezot. Avan ki li ti vinn lor later, li finn viv ek li finn travay ar Bondye Zeova pandan buku letan. (Kolosyin 1:15, 16) Ki Zezi finn fer avek tu sa konesans la? Li pa ti kontant li avek sa konesans la. Me, li finn viv an akor avek so konesans. Akoz sa, li ti tret bann dimunn avek bonte, pasyans ek lamur. Donk, Zezi ti imit so Papa ki dan lesyel, ek li ti pe azir dapre konesans ki li ena lor personalite ek manyer azir Zeova.—Zan 8:23, 28, 29, 38; 1 Zan 4:8.

5. Kifer eski Zezi ti pran batem, ek kuma eski li finn viv an akor avek sinifikasyon so batem?

⁵ Konesans ki Zezi ti ena finn usi pus li pu fer enn pa byin inportan. Li finn sorti Galile pu vinn ziska larivyer Zurdin, kot Zan finn batiz li. (Matye 3:13-15) Ki batem Zezi ti reprezante? Pwiski li ti enn Zwif, li finn ne dan enn nasyon ki ti deza angaze ar Bondye. Donk, Zezi ti fini angaz li ar Bondye depi so nesans. (Egzod 19:5, 6) Par so batem, Zezi ti pe prezant li mem pu fer travay ki Bondye ti anvi li fer lor later. (Ebre 10:5, 7) Ek li finn viv an armoni avek sinifikasyon so batem. Li finn donn li net dan servis Zeova pu partaz konesans Bondye ar bann dimunn dan tu lokazyon. Zezi ti telman kontan fer volonte Bondye ki sa ti kuma dir enn manze pu li.—Zan 4:34.

6. Kuma eski Zezi finn dir non ar li mem?

⁶ Zezi ti byin kone ki si li fer volonte Zeova sa pu kut li byin ser—sa pu mem kut li so lavi. Me kan mem sa, Zezi finn dir non ar li mem, ek li finn met so bann dezir personel dan dezyem plas. Fer volonte Bondye finn tuletan pas avan. Kuma eski nu kapav swiv Zezi so legzanp parfe dan sa domenn la?

BANN PA KI AMENN VER LAVI PU TULETAN

7. Ki bann pa enn kikenn bizin fer pu li kalifye pu pran batem?

⁷ Nu pa parey kuma Zezi parski nu inparfe. Donk pu nu pran batem, ena bann lezot pa inportan ankor ki nu bizin fer avan. Dabor, nu bizin gayn enn konesans egzak lor Bondye Zeova ek Zezi Kris dan nu leker. Kan nu gayn sa konesans la, sa pu pus nu pu ena lafwa ek enn profon lamur pu Bondye. (Matye 22:37-40; Romin 10:17; Ebre 11:6) Kan nu obeir bann lalwa, bann prinsip ek bann lord Bondye, sa amenn nu pu repanti, setadir gayn enn tristes ki an akor avek volonte Bondye pu bann pese ki nu finn fer avan. Lerla, nu konverti, seki vedir nu returne ek nu aret amenn move lavi ki nu ti ena avan ki nu gayn konesans Bondye. (Akt 3:19) Byinsir, si nu pe kontiyn fer pese an kasyet olye ki nu fer seki drwat, sa montre ki nu pa finn vremem turn ledo avek seki move; dayer nu pa kapav anbet Bondye. Zeova rekonet fasilman bann dimunn ipokrit.—Lik 12:2, 3.

8. Ki u bizin fer si u anvi pran par dan travay predikasyon Rwayom?

⁸ Asterla ki u pe gayn konesans Bondye, eski u pa panse ki li bon u konsider bann kitsoz spirityel lor enn plan inpe pli personel? Kitfwa, u anvi rakont u bann fami, u bann kamarad ek lezot, seki u pe aprann. Kitfwa u finn mem fini kumans fer li, parey kuma Zezi ti profit bann lokazyon pu donn temwanyaz okazyonel. (Lik 10:38, 39; Zan 4:6-15) Sirman asterla, u anvi fer plis. Bann ansyin dan kongregasyon pu kontan koz ar u pu gete sipa u kalifye ek kapav partisip regilyerman dan travay predikasyon Rwayom bann Temwin Zeova. Si u ranpli bann kondisyon pu kapav prese, bann ansyin pu fer bann laranzman pu u akonpayn enn Temwin dan predikasyon. Bann disip Zezi ti swiv so bann instriksyon pu ki zot kapav fer zot minister enn fason byin organize. (Mark 6:7, 30; Lik 10:1) U’si, u pu gayn mem led amezir ki u fer konn mesaz Rwayom atraver predikasyon lakaz-lakaz, ek bann lezot form predikasyon.—Akt 20:20, 21.

9. Kuma eski enn dimunn angaz li ar Bondye, ek ki lefe so langazman ena lor so lavi?

⁹ Pres bon nuvel avek tu sort kalite dimunn dan bann teritwar kongregasyon, sa li enn mwayin pu truv bann ki dispoze pu aksepte laverite, ek li usi parmi bann bon aksyon ki montre ki u ena lafwa. (Akt 10:34, 35; Zak 2:17, 18, 26) Kan u asiste regilyerman bann reynion ek u partisip byin dan predikasyon, sa montre ki u finn repanti ek u finn konverti, ek ki asterla u byin deside pu viv an akor avek konesans Bondye. Alor normalman, ki lot pa u bizin fer ankor? Ebyin, u bizin angaz u ar Bondye Zeova. Sa vedir ki, dan enn lapriyer sinser, u dir Bondye ki avek tu u leker u pe donn Li u lavi volonterman pu fer so volonte. Kumsa mem ki u angaz u avek Zeova ek u aksepte sarye sarz Zezi Kris ki pa lur ditu.—Matye 11:29, 30.

KI BATEM SINIFI PU U

10. Kifer eski u bizin pran batem apre ki u finn fini angaz u ar Zeova?

¹⁰ Dapre Zezi, tu bann ki vinn so disip bizin batize. (Matye 28:19, 20) Kifer eski sa li neseser apre ki u finn fini angaz u avek Bondye? Depi ki u finn angaz u avek Zeova, Li kone ki u kontan Li. Me pena dut, u pu anvi fer enn lot kitsoz pu montre lezot u lamur pu Bondye. Zisteman, batem donn u lokazyon pu montre an piblik u langazman avek Bondye Zeova.—Romin 10:9, 10.

11. Ki vedir batem?

¹¹ Batem li enn sinbol ki ena buku sinifikasyon. Kan pe “plonz” u dan delo, li parey kuma dir u pe mor uswa u pe anter u ansyin manyer viv. Kan u sorti dan delo, kuma dir u pe pran enn nuvo lavi, enn lavi ki pa dirize par u volonte, me par volonte Bondye. Byinsir, sa pa vedir ki asterla u pu nepli fer pese, non, akoz nu tu inparfe, tulezur nu fer pese. Me, pwiski u enn serviter batize ki finn angaze ar Zeova, u pu kapav rant dan enn relasyon spesyal avek Li. Parski u finn repanti ek u finn aksepte avek imilite pu batize, Zeova dispoze pu pardonn u bann pese atraver sakrifis ranson Zezi. Alor, batem fer u ena enn konsyans prop devan Bondye.—1 Pyer 3:21.

12. Ki vedir batize (a) “onon Papa”? (b) ‘onon Garson’? (c) ‘onon lespri sin’?

¹² Zezi ti donn lord so bann disip pu batiz bann nuvo disip “onon Papa, onon Garson ek onon lespri sin.” (Matye 28:19) Ki Zezi ti pe ule dir par la? Batize “onon Papa” vedir ki sa dimunn ki pe batize la aksepte avek tu so leker ki Bondye Zeova li Kreater ek Li ena drwa pu gayn tit Suverin liniver. (Psom 36:9; 83:18; Eklezyast 12:1) Batize ‘onon Garson’ vedir ki sa dimunn la aksepte Zezi Kris—ek sirtu so sakrifis ranson—kuma sel mwayin ki Bondye finn done pu sap nu. (Akt 4:12) Batize ‘onon lespri sin’ vedir ki sa kikenn ki pe batize la rekonet lespri sin, uswa lafors aktif Zeova, kuma enn zuti ki Bondye servi pu realiz so bann proze ek pu fortifye So bann serviter pu fer So volonte an akor avek So lorganizasyon ki zisteman pe dirize par so lespri sin.—Zenez 1:2; Psom 104:30; Zan 14:26; 2 Pyer 1:21.

ESKI U FINN PARE PU BATEM?

13, 14. Kifer eski nu bizin pa tik-tike pu swazir servi Bondye Zeova?

¹³ Pwiski batem ena buku sinifikasyon ek sa mem pa ki pli inportan dan lavi enn dimunn, eski sa vedir ki u bizin tik-tike pu fer sa pa la? Non, byinsir! Li vre ki fode pa konsider desizyon pran batem lao-lao, me selman, sa mem desizyon pli saz ki u kapav pran dan u lavi.

¹⁴ Batem montre ki u finn swazir pu servi Bondye Zeova. Mazinn bann dimunn ki u kone. Dan enn sertenn fason, eski sak dimunn pa pe servi enn met? Ena ki esklav larzan. (Matye 6:24) Lezot pe swiv enn karyer uswa zot pe servi zot mem parski zot fer tu pu satisfer zot prop dezir. Ena ankor lezot ki pe servi bann fos bondye. Me u, u finn swazir pu servi vre Bondye, Zeova. Personn pa kapav montre bonte, konpasyon ek lamur parey kuma Bondye. Bondye respekte dinite bann dimunn, Li donn zot enn travay ki ena enn bi ek ki pu fer zot prezerv zot lavi. Li rekonpans so bann serviter avek lavi pu tuletan. Wi, swiv legzanp Zezi ek donn u lavi pu Zeova, li pa enn simin ki u bizin tik-tike pu pran. Avredir, sa mem sel simin ki fer Bondye plezir ek ki rezonab.—1 Lerwa 18:21.

15. Ki bann kitsoz ki kapav anpes u pran batem?

¹⁵ Me fode pa ki lezot dimunn fors u pu pran batem. Sa li enn zafer personel ant u ek Zeova. (Galat 6:4) Amezir ki u progrese lor plan spirityel, u kapav demann u mem: “Ki pe anpes mwa pran batem?” (Akt 8:35, 36) U kapav kestyonn u mem, ‘Eski lopozisyon dan fami pe blok mwa? Eski mo sityasyon li tuzur pa an akor avek Labib, uswa eski mo ankor pe fer pese? Eski mo per pangar bann dimunn ki mo kone ayir mwa? Ala bann fakter ki u bizin pran an konsiderasyon, me reflesi lor zot avek enn lespri pozitif.

16. Ki profi u tire kan u servi Zeova?

¹⁶ Li pa lozik si u zis aret u lor bann problem ki u pu gayne, san ki u pran kont profi ki u gayne kan u servi Zeova. Pran par egzanp lopozisyon dan fami. Zezi ti promet so bann disip ki mem si zot perdi zot bann fami akoz li, zot pu gayn enn pli gran fami spirityel. (Mark 10:29, 30) Wi, sa bann adorater la pu ena lamur pu u, ek zot pu ed u pu siport persekisyon, ek zot pu sutenir u lor simin ki amenn ver lavi. (1 Pyer 5:9) Bann ansyin dan kongregasyon sirtu kapav ed u pu byin regle bann problem ek bann sityasyon difisil. (Zak 5:14-16) Asterla, si u panse ki u pu perdi faver lemond, u kapav demann u mem, ‘Ki kitsoz ki kapav ena plis valer ki sa: mo kone ki Kreater liniver aksepte mwa, ek ki manyer ki mo pe marse fer Li plezir?’—Proverb 27:11.

VIV AN AKOR AVEK U LANGAZMAN EK U BATEM

17. Kifer eski u bizin konsider batem kuma enn kumansman, olye ki enn lafin?

¹⁷ Li inportan ki u rapel ki, kan u pran batem, u progre pa fini la. Okontrer, u pe kumans enn long lavi dan servis Bondye kuma enn minis kalifye ek enn Temwin Zeova. Mem ki batem li byin inportan, li pa enn garanti ki u pu sape. Zezi pa finn dir: ‘Tu seki batize pu sape.’ Li finn dir plito: “Seki pu andire ziska lafin ki pu sape.” (Matye 24:13) Alor, li inportan ki u rod Rwayom Bondye avan ek u fer li vinn premyer kitsoz dan u lavi.—Matye 6:25-34.

18. Apre batem, ki bann lobzektif u kapav fixe?

¹⁸ Pu persevere dan u servis pu Zeova, u pu kontan fixe bann lobzektif spirityel pu u mem. Ogmant u konesans Bondye atraver u letid personel so Parol parski sa li enn lobzektif ki vo lapenn. Fer enn program pu lir Labib tulezur. (Psom 1:1, 2) Asiste bann reynion regilyerman, parski bann dimunn ki u pu zwenn laba pu fortifye u lor plan spirityel. Personelman, kifer eski u pa fixe u mem lobzektif pu donn komanter dan bann reynion, pu ki kumsa u donn Zeova laglwar ek u fortifye lezot? (Romin 1:11, 12) U kapav fixe usi lobzektif pu amelyor kalite u lapriyer.—Lik 11:2-4.

19. Ki bann kalite lespri sin kapav devlop dan u?

¹⁹ Pu viv an akor avek u batem, u pu bizin vey byin seki u fer ek les lespri sin Bondye devlop dan u bann kalite kuma lamur, lazwa, lape, pasyans, bonker, bonte, lafwa, duser, ek metriz. (Galat 5:22, 23; 2 Pyer 3:11) Mazine ki Zeova donn so lespri sin tu so bann serviter fidel ki obeir li ek ki demann Li sa dan lapriyer. (Lik 11:13; Akt 5:32) Alor, priye Bondye pu gayn so lespri ek demann Li led pu ki u kapav montre bann kalite ki fer Li plezir. Amezir ki lespri Bondye inflyans u, u parol ek u kondwit pu reflekte sa bann kalite la. Byinsir, tu dimunn dan kongregasyon Kretyin pe fer latet-lipye pu devlop “nuvo personalite” pu resanble plis Kris. (Kolosyin 3:9-14) Kan nu fer sa, sakenn parmi nu truv nu dan diferan sityasyon difisil, parski nu tu nu progre pa parey. Pwiski u inparfe, u bizin travay dir pu ena enn personalite parey kuma Kris. Me pa dekuraze, u pu kapav reysi avek led Bondye.

20. Ki manyer eski u kapav imit Zezi dan u minister?

²⁰ Parmi u bann lobzektif spirityel, fixe lobzektif pu gard otan ki posib lazwa ki Zezi ti tuletan ena. (Ebre 12:1-3) Li ti kontan so minister. Si u ena privilez pu partisip dan travay predikasyon Rwayom, pa les sa travay la vinn enn rutinn. Sey truv lazwa pu anseyn lezot Rwayom Bondye parey kuma Zezi ti fer. Met an pratik bann linstriksyon ki u gayne dan kongregasyon pu amelyor u fason anseyne. U kapav sir ki Zeova pu donn u kuraz pu kontiyn u minister.—1 Korintyin 9:19-23.

21. (a) Kuma eski nu kone ki Zeova ena buku lestim pu bann dimunn batize ki res fidel? (b) Ki montre ki batem li inportan pu nu sape kan Bondye pu ziz sa move sistem ki egziste la?

²¹ Bondye ena buku lestim pu enn kikenn batize ki finn angaze ar Li ek ki pe fer zefor pu swiv Zezi kuma bizin. Zeova egzaminn leker bann milyar dimunn ek Li kone kuma li rar pu truv bann dimunn kumsa. Li konsider zot kuma bann trezor, “bann kitsoz dezirab.” (Agai 2:7) Bann profesi Labib montre ki Bondye konsider sa bann kalite dimunn la kuma bann ki finn gayn mark pu sape kan Li pu ziz sa move sistem ki egziste zordi la. (Ezekyel 9:1-6; Malaki 3:16, 18) Eski u “anvi kalifye u pu viv pu tuletan”? (Akt 13:48) Eski u ena dezir pu gayn enn mark kuma kikenn ki pe servi Bondye? U langazman ek u batem fer parti sa mark la, ek zot inportan pu u sape.

22. Ki bann kitsoz “gran laful” pe atann?

²² Apre Deliz ki ti ena lor later antye, Noe ek so fami ti sorti dan lars ek zot ti poz lipye lor enn later prop. Zordi usi parey, “enn gran laful” ki pe met an pratik konesans Bondye dan zot lavi ek ki Zeova apruve, ena lespwar pu sape kan sa move sistem ki egziste zordi la pu detrir ek lerla zot pu zwir lavi pu tuletan lor enn later prop. (Revelasyon 7:9, 14) Kuma eski sa lavi la pu ete?

TESTE U KONESANS

Kuma eski Zeova anvi u servi konesans ki u finn gayne lor li?

Ki bann pa ki amenn ziska batem?

Kifer eski batem pa enn lafin me enn kumansman?

Kuma eski nu kapav viv an akor avek nu langazman ek nu batem?

[Zimaz paz 172]

Eski u finn angaz u ar Bondye dan lapriyer?

[Zimaz paz 174]

Ki pe anpes u pu pran batem?