Sapit 17
Truv Sekirite Parmi Lepep Bondye
1, 2. Kuma eski sityasyon limanite parey kuma sityasyon bann dimunn ki viv dan enn rezyon ravaze par enn siklonn?
FER kuma dir enn siklonn byin vyolan finn kraz landrwa kot u reste. U lakaz finn kraze, ek u finn perdi tu seki u ti ena. Pena ase manze. Sityasyon la paret dezespere. Lerla, san ki u atann, sekur arive. Pe gayn manze ek linz an abondans. Finn ranz enn nuvo lakaz pu u. Sirman, u pu rekonesan anver dimunn ki finn donn u tusala.
2 Zordi, enn kitsoz inpe parey kumsa pe arive. Parey kuma sa siklonn la, dezobeisans Adan ek Ev finn fer enn gran domaz lor ras imin. Paradi, kot limanite ti pu reste finn perdi. Depi sa, bann guvernman imin pa finn reysi protez bann dimunn kont lager, krim, ek linzistis. Akoz fos relizyon, buku pena manze spirityel ki fortifye zot pu zot viv. Me, lor plan spirityel, Bondye Zeova pe donn manze, linz, ek proteksyon. Kuma eski Li pe fer sa?
“ESKLAV SAZ EK FIDEL”
3. Kuma eski Zeova fer bann laranzman pu limanite, ek ki legzanp montre sa?
3 Normalman, sekur vinn atraver enn lorganizasyon, ek Zeova usi servi enn lorganizasyon pu fer bann laranzman spirityel pu so pep. Par egzanp, bann Izraelit ti “kongregasyon Zeova” pandan preske 1,500 banane. Bondye ti pe servi sertin parmi zot pu anseyn Lalwa. (1 Kronik 28:8; 2 Kronik 17:7-9) Dan premye syek A.N.L., Zeova finn etabli lorganizasyon Kretyin. Ti form bann kongregasyon, ek zot ti pe fonksyone anba direksyon enn konsey direkter kot ti ena bann zapot ek bann ansyin. (Akt 15:22-31) Zordi usi parey, Zeova diriz so pep atraver enn grup byin organize. Kuma eski nu konn sa?
4. Kisannla “esklav saz ek fidel” dan lepok modern ek kuma eski nu profit bann laranzman spirityel Bondye?
4 Zezi ti dir ki, kan li ti pu prezan dan pwisans Rwayom, li ti pu truv “esklav saz ek fidel” pe donn So bann disip “manze dan ler ki bizin.” (Matye 24:45-47) Kan Zezi finn vinn Lerwa dan lesyel an 1914, kisannla ki ti sa “esklav” la? Byinsir, pa bann pret Swadizan Kretyin. Lapliparditan, zot ti pe nuri zot trupo avek bann lide pu sutenir zot prop guvernman nasyonal dan Premye Lager Mondyal. Me, enn ti grup vre Kretyin ki Bondye finn swazire avek lespri sin ek ki fer parti dan seki Zezi ti apel “ti trupo,” ti pe donn bon manze spirityel dan ler ki bizin. (Lik 12:32) Sa bann Kretyin swazire la ti pe pres Rwayom Bondye, olye guvernman zom. Grasa zot predikasyon, pandan bann lane ki finn pase, plizir milyon “lezot muton” ki byin dispoze finn zwenn sa “esklav” swazire la pu pratik vre relizyon. (Zan 10:16) Bondye pe servi so “esklav fidel” ek so Konsey Direkter zordi, pu diriz so pep organize pu ki zot prepar manze, linz ek proteksyon lor plan spirityel pu tu bann ki ule profit sa bann laranzman la.
“MANZE DAN LER KI BIZIN”
5. Dan ki kondisyon spirityel lemond ete zordi, ek ki Zeova pe fer pu sa?
5 Zezi ti dir: “Zom bizin viv, pa zis avek dipin, me avek sak parol ki sorti dan labus Zeova.” (Matye 4:4) Me malerezman, mazorite dimunn pa pran kont bann parol Bondye. Parey kuma profet Amos ti anonse, “pena enn lafaminn dipin, ni enn swaf delo, me pu tann parol Zeova.” (Amos 8:11) Mem bann dimunn byin relizye pena manze lor plan spirityel. Purtan, Zeova anvi ki “tu sort kalite dimunn sape ek zot gayn enn konesans egzak lor laverite.” (1 Timote 2:3, 4) Akoz sa, Li pe donn manze spirityel an abondans. Me ki kote kapav gayn sa manze la?
6. Kuma eski lontan, Zeova ti pe nuri so pep lor plan spirityel?
6 Tutlong listwar, Zeova finn nuri bann dimunn an grup lor plan spirityel. (Izai 65:13) Par egzanp, bann pret Izraelit ti rasanble bann zom, bann fam, ek bann zanfan pu anseyn zot Lalwa Bondye an grup. (Deteronom 31:9, 12) Grasa direksyon konsey direkter, bann Kretyin premye syek ti organiz bann kongregasyon ek bann reynion pu anseyn ek ankuraz tu dimunn. (Romin 16:5; Filemon 1, 2) Bann Temwin Zeova swiv mem model. Zot invit u salerezman pu asiste tu zot bann reynion.
7. Ki rapor ena ant asiste regilyerman bann reynion Kretyin, avek konesans ek lafwa?
7 Byinsir, devet u finn deza aprann buku kitsoz grasa u letid Labib personel. Kitfwa enn Temwin finn ed u. (Akt 8:30-35) Me u lafwa parey kuma enn plant ki pu sek ek pu mor, si u pa pran li swin kuma bizin. Donk, u bizin byin nuri u lor plan spirityel. (1 Timote 4:6) Bann reynion Kretyin donn enn program lanseynman permanan pu nuri u lor plan spirityel ek pu ed u kontiyn grandi dan u lafwa amezir ki u ogmant u konesans Bondye.—Kolosyin 1:9, 10.
8. Kifer eski nu ankuraze pu asiste bann reynion Temwin Zeova?
8 Bann reynion zwe enn lot rol inportan. Pol finn ekrir: “Anu reflesi ki manyer pu pus nu kamarad pu ena lamur ek pu fer bann bon travay, san ki nu abandonn nu rasanbleman.” (Ebre 10:24, 25) Tradiksyon mo Grek “pu puse” vedir usi “pu fite.” Enn proverb Labib dir: “Feray fit feray. Pareyman, enn zom fit figir enn lot zom.” (Proverb 27:17) Nu tu, nu bizin kontiyn ‘fit’ nu mem. Bann presyon ki nu gayne tulezur dan lemond kapav fer nu lafwa vinn enn lafwa ki pa fite. Me, kan nu asiste bann reynion, nu ankuraz nu kamarad. (Romin 1:11, 12) Bann manb kongregasyon swiv konsey Pol ki dir, “kontiyn sulaz zot kamarad ek konstrir sakenn parmi zot.” Sa bann kitsoz la fit nu lafwa. (1 Tesalonisyin 5:11) Kan nu asiste regilyerman bann reynion Kretyin, sa montre usi ki nu kontan Bondye ek sa donn nu bann lokazyon pu donn Li glwar.—Psom 35:18.
“KUVER U AR LAMUR”
9. Kuma eski Zeova finn donn bon legzanp an seki konsern montre lamur?
9 Pol finn ekrir: “Me, apart tu sa bann kitsoz la, kuver u ar lamur, parski li enn lyin linite parfe.” (Kolosyin 3:14) Avek bonte, Zeova finn donn sa labiyman la pu nu met lor nu. Kuma? Bann Kretyin kapav montre lamur parski li enn frwi lespri sin Bondye Zeova. (Galat 5:22, 23) Zeova Li mem finn montre pli gran lamur kan Li finn avoy so sel Garson ki finn kre direk par Li pu ki nu kapav gayn lavi pu tuletan. (Zan 3:16) Sa demonstrasyon siprem ki Bondye finn fer pu montre so lamur, li enn model pu nu fer parey. Lapot Zan finn ekrir: “Si kumsa mem ki Bondye finn kontan nu, alor nu oblize kontan nu kamarad.”—1 Zan 4:11.
10. Ki profi nu kapav tire kan nu frekant “fami antye nu bann frer”?
10 Si u asiste bann reynion dan Lasal Rwayom, u pu ena enn bon lokazyon pu montre lamur. Laba, u pu zwenn plizir kalite dimunn. Sirman, deswit u pu santi u atire par buku parmi zot. Byinsir, mem parmi bann ki servi Zeova ena ki ena diferan personalite. Kitfwa lontan u pa ti pe frekant sertin dimunn zis parski zot pa interese ar mem kitsoz ki u, uswa zot pena mem kalite ki u. Me, bann Kretyin bizin “kontan lafami antye bann frer.” (1 Pyer 2:17) Alor, fer u enn devwar pu abitye u ar tu bann ki vinn Lasal Rwayom—malgre ki zot laz, zot personalite, zot ras ek zot nivo ledikasyon pa parey kuma u. Sirman, u pu truve ki sak dimunn ena enn pwin for ki atir u.
11. Kifer eski fode pa nu agase par diferan personalite ki egziste parmi lepep Zeova?
11 Malgre ki ena diferan personalite dan kongregasyon, fode pa ki sa deranz u. Anu pran enn legzanp: Fer kuma dir enn kantite veykil pe rule ansam avek u lor enn simin. Pa tu ki pe rul mem vites, ek pa tu moter ki dan mem kondisyon. Ena finn fini rul plizir kilomet, alor ki lezot kuma u, finn fek kumans rule. Me, malgre sa bann diferans la, tu pe rul lor mem simin. Li parey avek bann manb dan enn kongregasyon. Tu bann Kretyin pa devlop bann kalite mem vites. Anplis, lasante ek moral tu dimunn pa parey. Ena pe servi Zeova depi plizir banane, me lezot finn fek kumanse. Purtan, tu pe vwayaz lor simin ki al ver lavi pu tuletan, “zot [pe] res byin dan linite, dan mem lespri ek dan mem panse.” (1 Korintyin 1:10) Alor, pa aret u lor febles bann manb kongregasyon, me get plito zot bann pwin for. Si u fer sa, sa pu fer u leker kontan, parski u pu rekonet ki Bondye vremem parmi sa bann dimunn la. Ek sirman isi mem ki u ti pu kontan ete.—1 Korintyin 14:25.
12, 13. (a) Si enn kikenn dan kongregasyon ofans u, ki u kapav fer? (b) Kifer eski pa bon gard rankinn?
12 Pwiski tu dimunn inparfe, defwa enn kikenn dan kongregasyon kapav dir uswa fer enn kitsoz ki ofans u. (Romin 3:23) Dayer, disip Zak ti ekrir: “Nu tu, suvan nu fer erer. Si enn kikenn pa fer erer par parol, sa kikenn la li enn dimunn parfe.” (Zak 3:2) Kuma eski u pu reazir si enn kikenn ofans u? Enn proverb dan Labib dir: “Lintelizans enn zom vremem ralanti so koler, ek li montre so bote kan li pa pran kont bann erer.” (Proverb 19:11) Ena lintelizans vedir analiz enn sityasyon dan so profonder, pu konpran ki bann fakter ki finn pus enn dimunn pu koz uswa pu azir dan tel u tel manyer. Preske nu tu, nu servi nu lintelizans kan nu bizin exkiz nu prop fot. Be, kifer eski nu pa servi nu lintelizans pu konpran ek pu pas lor erer lezot?—Matye 7:1-5; Kolosyin 3:13.
13 Fode ki zame nu bliye ki nu bizin pardonn lezot pu ki Zeova pardonn nu. (Matye 6:9, 12, 14, 15) Si nu pe pratik laverite, nu pu tret lezot avek lamur. (1 Zan 1:6, 7; 3:14-16; 4:20, 21) Donk, si u gayn problem avek enn kikenn dan kongregasyon, lite pu pa gard sa dan leker. Si u kuver u ar lamur, u pu fer zefor pu regle problem la, ek u pa pu ezite pu demann pardon si u antor.—Matye 5:23, 24; 18:15-17.
14. Ar ki bann kalite nu bizin kuver nu?
14 Dan nu labiyman spirityel, bizin ena usi lezot kalite ki asosye direkteman ar lamur. Lapot Pol ti ekrir: “Kuver zot ar konpasyon, bonte, imilite, duser ek pasyans.” Sa bann kalite la fer parti dan lamur, ek zot form “nuvo personalite” ki Bondye demande. (Kolosyin 3:10, 12) Eski u pu fer zefor pu kuver u ar sa bann kalite la? Si u kuver u sirtu ar lamur pu u frer, u pu ena mark bann disip Zezi, parski li ti dir: “Par sa zot tu pu kone ki zot mo bann disip, si zot ena lamur ant zot.”—Zan 13:35.
ENN PLAS SEKIRITE
15. Kuma eski kongregasyon li enn plas kasyet?
15 Kongregasyon usi kuma dir enn refiz, enn plas kot nu gayn proteksyon ek kot nu santi nu an sekirite. Dan kongregasyon, u pu truv bann dimunn ki ena enn leker onet ek ki pe fer latet-lipye pu fer seki bon devan lizye Bondye. Buku parmi zot finn reysi debaras zot ar bann move pratik ek latitid ki u kitfwa, u ankor pe lite. (Tit 3:3) Zot kapav ed u, parski Labib ankuraz nu pu “kontiyn sarye fardo nu kamarad.” (Galat 6:2) Byinsir, selman u ki pran responsabilite pu swiv simin ki amenn ver lavi pu tuletan. (Galat 6:5; Filipyin 2:12) Me, Zeova finn met kongregasyon Kretyin kuma enn bon mwayin pu ed u ek sutenir u. Kan mem ki kantite grav u bann problem kapav ete, u ena enn resurs gran valer—enn kongregasyon ki kontan u ek ki pu tuletan la kan u dan problem uswa kan u bizin bann kitsoz neseser.—Konpar ar Lik 10:29-37; Akt 20:35.
16. Ki led bann ansyin dan kongregasyon done?
16 Parmi bann ki pu la pu ed u, pu ena bann “don zom”—bann ansyin ki finn nome dan kongregasyon, uswa bann sirveyan, ki pran swin trupo volonterman, ek avek plezir. (Efezyin 4:8, 11, 12; Akt 20:28; 1 Pyer 5:2, 3) Dan so profesi, Izai ti anons konsernan sa bann ansyin la: “Sakenn bizin kuma enn plas kasyet kont divan, enn refiz kont siklonn, parey kuma bann ti larivyer dan enn peyi kot pena delo, parey kuma lonbraz enn gro ros dan enn later fatige.”—Izai 32:2.
17. (a) Ki kalite led sirtu Zezi ti anvi done? (b) Ki laranzman Bondye finn promet Li pu fer pu so pep?
17 Kan Zezi ti lor later, malerezman bann sef relizye pa ti pe diriz trupo avek lamur. Zezi ti gayn buku pitye kan li ti truv kondisyon sa pep la, ek li ti anvi ed zot sirtu lor plan spirityel. Li ti gayn pitye pu zot parski “zot pa ti ena nanyin ek zot ti fane inpe partu-partu parey kuma bann muton ki pena gardyin.” (Matye 9:36) Sa deskripsyon la aplik byin ar kondisyon buku dimunn zordi, ki pe sufer akoz bann problem byin grav, me ki pena personn pu sulaz zot ek pu donn zot led spirityel! Me, lepep Zeova pe gayn led spirityel parski Bondye ti promet: “Mo pu plas bann berze lor zot pu pran zot swin; ek zot pu nepli gayn per, ni sezisman pu pran zot, ek nanyin pa pu manke.”—Zeremi 23:4.
18. Kifer eski nu bizin apros ar enn ansyin si nu bizin led spirityel?
18 Abitye u ar bann ansyin dan kongregasyon. Zot ena buku lexperyans an seki konsern aplik konesans Bondye, parski zot finn kalifye dapre Labib pu vinn sirveyan. (1 Timote 3:1-7; Tit 1:5-9) Pa bizin ezite pu apros enn sa bann ansyin la, si u bizin led spirityel pu aret enn move labitid, uswa pu sanz enn vilin defo ki pa an akor avek seki Bondye demande. U pu truve ki bann ansyin swiv konsey ki Pol ti done, setadir: “Konsol bann nam ki deprime, siport bann feb, pran pasyans avek zot tu.”—1 Tesalonisyin 2:7, 8; 5:14.
ZWIR SEKIRITE ANSAM AVEK LEPEP ZEOVA
19. Ki benediksyon Zeova finn donn bann ki rod sekirite dan so lorganizasyon?
19 Malgre ki zordi nu pe viv dan bann kondisyon inparfe, Zeova pe donn nu manze, linz ek proteksyon lor plan spirityel. Byinsir, pu nu profit bann kondisyon enn vre-vre paradi, nu pu bizin atann nuvo lemond ki Bondye finn promet. Me, bann ki fer parti dan lorganizasyon Zeova pe zwir depi asterla mem sekirite dan enn paradi spirityel. Konsernan sa bann dimunn la, Ezekyel finn anonse: “Zot pu vremem res an sekirite, san ki personn fer zot tranble.—Ezekyel 34:28; Psom 4:8.
20. Kuma eski Zeova pu rekonpans nu pu bann sakrifis ki nu kapav fer pu ador Li?
20 Nu byin rekonesan anver Zeova ki avek lamur, finn fer bann laranzman spirityel atraver so Parol ek so lorganizasyon. Vinn pros ar lepep Bondye. Pa bizin u rekile par per ki u bann kamarad uswa u fami pe panse lor u parski u pe gayn konesans Bondye. Kitfwa, ena pa pu dakor parski u pe frekant bann Temwin Zeova ek u pe asiste bann reynion dan Lasal Rwayom. Me, Bondye pu rekonpans u pu tu bann sakrifis ki u pe fer pu ador Li. Anplis, Zezi ti dir: “Personn pa finn kit lakaz, uswa frer, uswa ser, uswa mama, uswa papa, uswa karo akoz mwa ek akoz bon nuvel san ki li gayn san fwa plis asterla, lakaz, ek frer, ek ser, ek mama, ek zanfan, ek karo, avek persekisyon, ek lavi pu tuletan dan nuvo sistem ki pe vini.” (Mark 10:29, 30) Wi, ninport ki u finn kite deryer uswa ninport ki sityasyon u pe bizin siporte, u kapav zwir enn bon lamitye ek sekirite spirityel parmi lepep Bondye.
TESTE U KONESANS
Kisannla “esklav saz ek fidel”?
Ki bann laranzman Zeova finn fer pu nuri nu lor plan spirityel?
Kuma eski bann manb kongregasyon Kretyin kapav ed nu?
[Zimaz paz 165]