Proverb
3 Mo garson, pa bliye mo lansegnman, ek ki to leker obeir mo bann komannman. 2 Parski gras-a sa, to pou viv lontan ek dan lape. 3 Pa les lamour fidel ek fidelite kit twa. Atas zot otour to likou, ek ekrir zot lor tablet to leker. 4 Lerla, to pou gagn enn bon repitasion ek faver devan lizie Bondie ek bann zom. 5 Fer Zeova konfians avek tou to leker, ek pa kont lor to prop lintelizans. 6 Dan tou seki to fer, mazinn li, ek li pou fer to bann sime vinn drwat. 7 Pa kont lor to prop sazes. Ena enn gran respe pou Zeova ek res lwin ar seki move. 8 Sa pou geri to lekor ek pou donn lafors to bann lezo. 9 Donn Zeova loner avek to bann kitsoz ki ena valer ek avek seki pli bon dan tou seki to rekolte. 10 Lerla to bann stor pou bien ranpli, ek to bann barik pou deborde ar nouvo divin. 11 Mo garson, pa rezet disiplinn Zeova, ek pa ankoler kan li koriz twa. 12 parski Zeova koriz bann ki li kontan, parey kouma enn papa koriz so garson ki li kontan. 13 Ere enn kikenn ki trouv lasazes, ek enn kikenn ki gagn disernman; 14 li pli bon ki enn dimounn gagn sazes ki li gagn larzan, ek li pli bon ki enn dimounn gagn sazes kouma profi ki li gagn lor. 15 Li ena plis valer ki bann koray; pa kapav konpar li ar okenn lezot kitsoz ki to anvi gagne. 16 Li kapav fer enn kikenn viv lontan, ek li kapav fer li vinn ris ek gagn laglwar. 17 Se enn plezir pou mars lor so bann sime, ek lor tou so bann sime ena lape. 18 Li enn pie ki donn lavi pou bann ki trap li, ek bann ki trap li bien for pou ere. 21 Mo garson, pa bliye sa bann kitsoz-la. Pa perdi lasazes ek protez to kapasite pou reflesi. 22 Zot pou donn twa lavi ek zot pou kouma enn bizou pou to likou. 23 Lerla, to pou mars an sekirite lor to semin, ek to lipie zame pa pou fer twa tonbe. 25 To pa pou per okenn maler ki arive san ki to atann, ni okenn siklonn ki pe vinn lor bann move dimounn. 27 Pa refiz ed bann dimounn ki bizin led. Ed zot si to kapav fer li. 28 Pa dir to prosin, “Ale; revini plitar! Mo pou donn twa li demin,” Si to kapav fer li aster-la mem. 31 Pa zalou enn dimounn violan, ek pa swazir pou fer parey kouma li, 32 parski Zeova deteste enn dimounn sournwa, me Li vinn enn kamarad bien pros avek bann dimounn ki drwat.