Neemi

9 Ek lor 24em zour sa mwa-la, bann garson Izrael ti rasanble; zot ti pe gard karem ek zot ti met bann latwal sak goni ek later lor zot. 2 Bann desandan Izraelit inn separ zot ar bann etranze, zot inn debout ek zot inn konfes zot prop pese ek bann erer zot bann anset. 3 Lerla, zot ti debout dan zot plas ek zot ti lir liv Lalwa Zeova zot Bondie for pandan enn kar lazourne; ek pandan enn lot kar lazourne, zot ti konfese ek zot ti prostern devan Zeova zot Bondie. 5 Lerla bann Levit, setadir Zesoua, Kadmiel, Bani, Asabneya, Serebia, Odia, Sebania, ek Petaya ti dir: “Leve ek beni Zeova zot Bondie pou touletan. Ek ki zot beni to gran nom, ki pli ot ki tou benediksion ek louanz. 6 “To tousel ki Zeova; to’nn fer lesiel, wi, pli gran lesiel ki kapav ena ek tou zot larme, later ek tou seki lor la, bann lamer ek tou seki ena ladan. Ek to gard zot tou vivan, ek larme ki dan lesiel pe prostern devan twa. 7 Tomem Zeova, vre Bondie ki’nn swazir Abram, ek ki’nn fer li sorti dan Our, pei bann Kaldeen, ek ki’nn apel li Abraam. 8 To’nn trouve ki so leker fidel devan twa, alor, to’nn fer enn lalians avek li pou donn li pei bann Kananeen, ... pou donn sa so desandans; ek to’nn tini parol, parski to zis. 9 “Alor to ti trouve kouma nou bann anset ti pas mizer dan Lezip, ek to ti tann zot kriye kot Lamer Rouz. 10 Lerla, to ti fer bann sign ek bann mirak kont Faraon ek tou so bann serviter ek tou lepep dan so pei, parski to ti kone ki zot ti azir avek lorgey kont to pep. To’nn fer zot tou konn to nom, ek zot tou ankor konn sa azordi. 11 Ek to ti ouver lamer devan zot, pou ki zot kapav travers lamer lor later sek. Me bann ki ti pe pourswiv zot, to ti fer zot tom dan bann profonder, parey kouma enn ros dan bann delo ki move. 13 To ti desann lor Montagn Sinai ek depi lesiel to ti koz avek zot. Apre, to ti donn zot bann zizman zis, bann lalwa laverite, bann prinsip ek bann komannman ki bon. 17 Zot ti refiz ekoute, ... Me to enn Bondie ki pre pou pardone, ki ena konpasion ek mizerikord, ki pa ankoler vit ek ki ena lamour fidel an-abondans, ek to pa ti abandonn zot. 19 mem sa, twa, dan to gran mizerikord, to pa ti abandonn zot dan dezer. ... 20 To’nn donn zot to bon lespri pou fer zot gagn bon zizman, ... 21 Pandan 40 an to ti donn zot manze dan dezer. Zot pa ti mank nanye. Zot linz pa ti ize ek zot lipie pa ti anfle. 24 Alor, zot bann garson ti rantre ek ti pran pei-la. Ek to ti fer bann Kananeen, ki ti bann abitan sa pei-la, soumet devan zot, ek to ti livre bann-la dan zot lame, bann lerwa ek lepep sa pei-la toulede, pou tret bann-la kouma zot anvi. 25 Ek zot ti pran bann lavil ki antoure ar bann miray ek enn later fertil, zot ti pran bann lakaz ki ti ranpli ar tou sort kalite bon kitsoz, bann rezervwar ki ti deza fouye, bann karo rezin, bann plantasion pie zoliv ek bann pie an-abondans. Alor, zot ti manze vant plin ek zot ti vinn gro, ek zot ti profit lavi gras-a to gran bonte. 28 “Me deswit kouma zot ti gagn trankilite, zot ti rekoumans fer seki move devan twa. Ek to ti abandonn zot dan lame zot bann lennmi ki ti fer dominer ar zot. Lerla zot ti retourne ek zot ti sipliy twa pou ed zot. Ek twa to ti tann zot depi lesiel, ek dan to gran mizerikord, plizir fwa to ti delivre zot. 30 To ti ena boukou pasians avek zot pandan plizir lane ek to ti kontign averti zot par to lespri, par mwayin to bann profet, me zot pa ti anvi ekoute. Finalman, to’nn livre zot dan lame bann nasion ki ti dan sa bann pei-la. 32 “Ek aster-la, A! nou Bondie, Bondie ki grand, ki for, ek ki fer nou ena lakrint, ki’nn gard so lalians ek ki’nn montre lamour fidel, pa pran bann problem ki nou’nn gagne kouma enn ti kitsoz, nou, nou bann lerwa, nou bann prins, nou bann pret, nou bann profet, nou bann anset, ek tou to pep depi lepok bann lerwa Lasiri ziska zordi. 33 To’nn montre ki to zis konsernan tou seki’nn ariv nou, parski to’nn azir avek fidelite; me nou, nou’nn fer seki move. 36 Akoz sa, ala zordi nou bann esklav, wi, esklav dan pei ki to ti donn nou bann anset pou ki zot manz so bann frwi ek so bann bon kitsoz. 37 So bann frwi an-abondans, zot pou bann lerwa ki to’nn etabli lor nou akoz nou bann pese. ... ek nou dan enn gran detres.