Neemi

28 Leres lepep, bann pret, bann Levit, bann gardien laport, bann santer, bann Netinim, ek tou seki’nn separ zot ar bann pep bann pei pou swiv Lalwa vre Bondie, ansam avek zot bann fam, zot bann garson, ek zot bann tifi, tou seki ti kapav konpran serman la, 29 zot ti zwenn ar zot bann frer, ar zot bann zom inportan, ek zot inn fer enn serman pou zot gagn malediksion si zot pa mars dan Lalwa vre Bondie, ki ti done par Moiz, serviter vre Bondie, ek si zot pa gard ek pratik tou bann komannman Zeova nou Segner, ek tou so bann zizman, ek so bann lalwa. 30 Nou pa pou donn nou bann tifi ar bann pep sa pei-la, ek nou pa pou pran zot bann tifi pou nou bann garson. 31 Si bann pep sa pei-la amenn bann marsandiz ek tou sort kalite sereal zour Saba pou vande, nou pa pou aste nanye ar zot zour Saba ouswa dan enn zour sakre. Ek osi, nou pa pou profit rekolt setiem lane ek tou bann det ki pa’nn paye. 32 Anplis, nou’nn inpoz lor noumem pou donn, sakenn parmi nou, enn tier sik sak lane pou servis lakaz nou Bondie, 33 pou bann dipin ki an pil, lofrand bann sereal ki abitie fer, sakrifis ki brile net ki ofer kan ena Saba, bann nouvel-linn, ek pou bann fet sak sezon, pou bann kitsoz sakre, pou bann sakrifis pese pou kouver pese Izrael, ek pou tou bann travay dan lakaz nou Bondie. 39 ... Nou pa pou negliz lakaz nou Bondie.