Abakouk
3 Lapriyer profet Abakouk, ki kouma bann sante dey:
2 A Zeova, mo’nn tann seki pe dir lor twa.
A Zeova, to bann aksion fer mwa ranpli ar laper.
Dan ler ki to’nn deside* fer to bann aksion reviv!
Dan ler ki to’nn deside* fer konn to bann aksion.
Ki to rapel pou montre mizerikord* kan ena detres.
3 Bondie ti sorti depi Temann,
Sa Kikenn Ki Sin la ti sorti depi Montagn Parann. (Sela)*
So grander ti kouver lesiel;
Ek later ti ranpli avek so louanz.
4 Li ti pe briye parey kouma lalimier.
De reyon lalimier ti sorti depi so lame,
Kot ti’nn kasiet so lafors.
5 Lepidemi ti al devan li,
Ek gro lafiev ti pe swiv li.
6 Li ti debout anplas ek ti sakouy later.
Avek enn regar, li ti fer bann pep sote.
Ti kraz bann montagn ki la depi touletan,
Ek bann vie kolinn ti kourbe.
Li mars lor bann semin ki la depi lontan.
7 Mo ti trouve ki ena problem dan bann latant Kous.
Bann latwal latant dan pei Madian ti tranble.
8 Eski se kont bann larivier, A Zeova,
Eski se kont bann larivier ki to koler pe brile?
Ouswa eski to gran koler li kont lamer?
Parski to’nn mont lor to bann seval;
To bann kales lager ti gagn laviktwar.*
9 To’nn tir to lark ek to pare pou servi li.
Bann baton* inn pare akoz enn serman.* (Sela)
To’nn fann later avek bann larivier.
10 Bann montagn ti korde ar douler deswit kouma zot ti trouv twa.
Enn gro lapli ti tonbe ek ti inond pei-la.
Bann delo ki dan profonder ti fer enn gran tapaz.
Li ti lev so lame lao.
11 Soley ek lalinn pa’nn bouze depi dan plas extraordiner kot zot reste.
To bann fles inn al vit parey kouma lalimier.
To lans ti briye parey kouma zekler.
12 Avek koler, to ti mars partou lor later.
Dan to koler, to’nn kraz bann pep avek to lipie.*
13 To’nn sorti pou sap to pep, pou sap sa kikenn ki to’nn swazir la.
To’nn kraz sa kikenn ki sef* dan lakaz bann move dimounn la.
Pran depi so lao* ziska so fondasion, lakaz-la ti detrir. (Sela)
14 To’nn pers latet so bann gerye avek so bann prop zarm*
Kan zot ti sorti dan enn koutvan pou dispers mwa.
Dan zot plas kasiet, zot ti pe atann dan enn gran lazwa
Moman kot zot pou devor sa kikenn ki pe soufer la.
15 Avek to bann seval to’nn mars dan lamer,
Dan bann gro delo kot ena bann gro vag.
Pouritir inn rant dan mo lezo;
Mo lazam inn koumans tranble.
Me mo res kalm pandan ki mo pe atann zour maler,
Parski li pe vinn lor bann ki pe atak nou.
17 Mem si pie fig pa fleri,
Ek ki bann pie rezin pa gagn frwi;
Mem si pena zoliv lor pie zoliv,
Ek ki bann karo pa raport nanye;
Mem si troupo-la disparet dan lanklo,
Ek ki pena bef dan lekeri;
18 Me mwa, mo pou dan enn gran lazwa akoz Zeova;
Mo pou extra kontan akoz sa Bondie ki sap mwa la.
19 Segner Siprem* Zeova limem mo lafors;
Li pou fer mo lipie vinn parey kouma lapat enn serf
Ek fer mwa mars lor bann plas ki dan oter.
Pou direkter lamizik;* avek mo bann instriman ki ena lakord.