Abakouk
1 Enn mesaz ki profet Abakouk* ti gagne dan enn vizion:
2 Ziska kan, A Zeova, mo bizin kriye pou gagn led, me to pa tande?
Ziska kan mo bizin demande pou gagn led akoz laviolans, me to pa azir?*
3 Kifer to fer mwa trouv bann move kitsoz?
Ek kifer to permet ki lezot fer dominer?
Kifer ena destriksion ek violans devan mwa?
Ek kifer ena sa kantite diskision ek lager la?
4 Lalwa li initil,
Ek zame pa aplik lazistis.
Parski bann move dimounn antour bann ki drwat;
Se akoz sa ki lazistis inn deforme.
5 “Get parmi bann pep ek pran kont!
Fixe bann-la avek labous ouver ek gagn sezisman;
Parski dan zot lepok pou ariv enn kitsoz
Ki zot pa pou krwar, mem si dir zot sa.
6 Parski mo pe les bann Kaldeen vini,
Sa pep ki pena pitie ek ki azir san reflesi la.
Zot anvayir bann gran landrwa lor later
Pou pran bann lakaz ki pa pou zot.
7 Zot fer per, extra per.
Zot etabli zot prop lazistis ek lotorite.*
8 Zot bann seval pli rapid ki bann leopar,
Ek zot pli danzere ki bann loulou aswar.
Zot bann seval lager pe galoupe pe vini;
Zot bann seval sorti bien lwin.
Zot fonse parey kouma enn leg ki plonze pou atrap so manze.
9 Zot tou vini ansam pou fer bann kitsoz violan.
Kan zot avanse ansam zot koumadir divan Les,
Ek zot ramas bann prizonie parey kouma disab.
10 Zot boufonn bann lerwa
Ek zot riy bann ofisie ki ena enn gran pozision.
Zot riy tou bann plas ki bien proteze;
Zot anpil later pou rant dan sa bann plas-la ek pou pran zot.
11 Lerla zot pas dan pei-la parey kouma enn gro divan,
Me zot pou koupab,
Parski zot dir ki se zot bondie ki’nn donn zot lafors.”*
12 A Zeova, eski to pa existe depi touzour?
A mo Bondie, mo Bondie Ki Sin, twa to pa mor.*
A Zeova, to’nn swazir zot pou amenn zizman;
Mo Gran Ros, to’nn etabli zot pou amenn pinision.*
13 To lizie tro sin pou get lemal,
Ek to pa kapav siport bann move kitsoz.
Alor, kifer to siport bann dimounn ki fer tret
Ek to res trankil kan enn move dimounn kraz enn dimounn ki pli drwat ki li?
14 Kifer to fer bann zom parey kouma bann pwason ki dan lamer,
Parey kouma bann zanimo dan lamer ki pena sef?
15 Li* ris zot tou avek enn lamson.
Li may zot dan so file,*
Ek li rasanble zot dan so file lapes.
Se akoz sa ki li dan enn gran lazwa.
16 Se akoz sa ki li ofer bann sakrifis pou so file*
Ek li fer bann sakrifis* pou so file lapes;
Parski gras-a zot li ena enn zoli porsion,*
Ek li ena bon kalite manze.
17 Alor, eski li pou kontign devid so file?**
Eski li pou kontign masakre bann pep san okenn pitie?