Daniel
1 Dan trwaziem lane regn Zoakim, lerwa Zida, Naboukodonozor, lerwa Babilonn, ti vinn Zerizalem ek ti anserkle li. 2 Avek letan Zeova ti livre lerwa Zida, Zoakim, dan lame lerwa Babilonn, ansam avek sertin istansil ki sorti dan lakaz* vre Bondie. Ek lerwa Babilonn ti amenn sa bann istansil-la dan pei Sinear,* dan lakaz* so bondie. Li ti met sa bann istansil-la dan lasal trezor so bondie.
3 Lerla, lerwa ti donn lord Ashpenaz, so sef bann ofisie lakour, pou amenn sertin Izraelit.* Parmi zot, ti ena ki ti sorti dan enn fami rwayal ek dan enn gran fami. 4 Zot ti bizin bann zenn* ki ti bien zoli ek ki pena okenn defo. Zot ti bizin ena sazes, konesans, bon zizman, ek zot ti bizin kapav servi dan pale lerwa. Ashpenaz ti pou bizin ansegn bann-la lang ek konesans* bann Kaldeen. 5 Anplis, lerwa ti anvi ki sak zour donn zot enn porsion bann bon manze ki lerwa limem ti manze ek divin ki li ti bwar. Ti bizin donn zot enn formasion* pandan trwa-z-an, ek alafin sa trwa-z-an-la zot ti bizin kapav servi lerwa.
6 Parmi zot ti ena sertin ki ti sorti dan tribi* Zida: Daniel,* Anania,* Mishael,* ek Azaria.* 7 Responsab bann ofisie lakour ti donn zot lezot nom.* Li ti donn Daniel nom Belsatzar, li ti donn Anania nom Shadrak, li ti donn Mishael nom Meshak, ek li ti donn Azaria nom Abed-Nego.
8 Me Daniel ti bien deside dan so leker ki li pa pou les bann bon manze ki lerwa manze ek divin ki lerwa bwar fer li vinn inpir. Alor, li ti demann responsab bann ofisie lakour permision pou pa manz ek bwar sa bann kitsoz ki pou fer li vinn inpir la. 9 Ek vre Bondie ti fer responsab bann ofisie lakour montre faver* ek zantiyes anver Daniel. 10 Me responsab bann ofisie lakour ti dir Daniel: “Mo per mo segner lerwa ki’nn fini deside seki zot bizin manze ek bwar. Ki pou arive si li trouv zot paret pli fay ki bann lezot zenn* dan zot laz? Akoz zot mo* pou pas pou koupab devan lerwa.” 11 Responsab bann ofisie lakour ti met enn gardien pou vey Daniel, Anania, Mishael, ek Azaria. Ek Daniel ti dir ar sa gardien-la: 12 “Silteple, teste to bann serviter pandan dis zour, ek donn nou inpe legim pou manze ek delo pou bwar. 13 Apre sa, get diferans ki ena ant nou figir ek figir lezot zenn* ki pe manz bann bon manze ki lerwa manze. Lerla dapre seki to trouve, deside ki to pou fer avek to bann serviter.”
14 Alor li ti aksepte seki bann-la ti propoz li ek li ti fer enn test ar zot pandan dis zour. 15 Alafin sa dis zour-la, zot ti pli korek ek plis an-form* ki tou bann lezot zenn* ki ti pe manz bann bon manze ki lerwa manze. 16 Lerla gardien-la ti kontign donn zot legim, olie bann bon manze ek divin. 17 Ek vre Bondie ti donn sa kat zenn-la* konesans ek bon zizman pou konpran tou kalite liv* ek ti donn zot sazes; ek Daniel ti gagn kapasite pou konpran tou kalite vizion ek rev.
18 Alafin sa trwa-z-an ki lerwa ti’nn fixe pou amenn sa bann zenn-la devan li, responsab bann ofisie lakour ti amenn zot devan Naboukodonozor. 19 Kan lerwa ti koz avek zot, pa ti ena personn dan sa group-la ki ti parey kouma Daniel, Anania, Mishael, ek Azaria; ek zot ti kontign servi dan pale lerwa. 20 Letan lerwa ti poz bann kestion kot zot ti bizin montre ki zot ena sazes ek lintelizans, li ti trouve ki dan tou so rwayom bann-la ti dis fwa pli bon ki tou bann pret ki fer mazik ek bann ki invok bann lespri. 21 Ek Daniel ti kontign res laba ziska premie lane Lerwa Siris.*