Zeremi
52 Sedesias ti ena 21 an kan li ti vinn lerwa, ek li’nn regne pandan 11 an dan Zerizalem. So mama ti apel Amoutal ek li ti tifi Zeremi ki sorti Libna. 2 Li ti kontign fer seki move devan lizie Zeova, parey kouma Zoakim ti fer. 3 Se akoz koler Zeova ki sa bann kitsoz-la inn arive dan Zerizalem ek dan Zida, ziska ki li tir zot devan li. Ek Sedesias ti rebel kont lerwa Babilonn. 4 Dan neviem lane regn Sedesias, dan diziem mwa, diziem zour sa mwa-la, lerwa Babilonn, Naboukodonozor* ek tou so larme ti vinn lager kont Zerizalem. Zot ti kanp otour li ek zot ti ranz enn miray toutotour pou anserkle li. 5 Ek lavil ti anserkle ziska 11em lane Lerwa Sedesias.
6 Dan katriem mwa, lor neviem zour sa mwa-la, ti ena enn gran lafaminn dan lavil, ek pa ti ena manze pou bann dimounn dan pei. 7 Finalman, ti defons enn parti miray lavil ek tou bann solda ti sove ti kit lavil aswar. Zot ti pas par laport ki trouv ant de miray, pre ar zardin lerwa, pandan ki bann Kaldeen ti pe anserkle lavil; ek zot ti kontign zot semin pou al dan direksion Araba. 8 Me larme bann Kaldeen ti galoup deryer lerwa, ek zot ti trap Sedesias dan bann laplenn Zeriko, ki ti kouma bann dezer, ek tou so bann solda ti kit li ek ti disperse partou. 9 Lerla, zot ti trap lerwa ek zot ti amenn li kot lerwa Babilonn dan Ribla, dan rezion Amat, ek lerwa ti ziz li. 10 Ek lerwa Babilonn ti touy bann garson Sedesias devan so lizie, ek li ti osi touy tou bann prins Zida laba dan Ribla. 11 Lerla, lerwa Babilonn ti fer Sedesias vinn aveg, ti atas li avek bann lasenn an kwiv, ti amenn li Babilonn, ek ti anprizonn li ziska zour so lamor.
12 Dan sinkiem mwa, diziem zour sa mwa-la, setadir dan 19em lane Lerwa Naboukodonozor* lerwa Babilonn, Nebouzaradann sef bann gard rwayal, ki ti enn serviter lerwa Babilonn, ti vinn Zerizalem. 13 Li ti bril lakaz Zeova, lakaz* lerwa, ek tou bann lakaz dan Zerizalem; li ti osi bril tou bann gran lakaz. 14 Ek larme bann Kaldeen an-antie ki ti avek sef bann gard rwayal ti kraz bann miray toutotour Zerizalem.
15 Nebouzaradann sef bann gard rwayal ti amenn an exil sertin ti-dimounn ek bann dimounn ki ti’nn reste dan lavil. Li ti osi amenn bann dimounn ki ti’nn rann zotmem pou vinn dan kote lerwa Babilonn ek osi bann bon artizan ki ti’nn reste. 16 Me Nebouzaradann sef bann gard rwayal ti kit sertin dimounn ki ti bien pov dan pei pou ki zot travay kouma bann planter rezin ek ti obliz zot pou travay kouma bann fermie.
17 Ek bann Kaldeen ti kas bout-bout bann kolonn an kwiv ki ti dan lakaz Zeova, bann kales, ek Lamer kwiv ki ti dan lakaz Zeova, ek zot ti sarye tou sa bann kwiv-la pou amenn dan Babilonn. 18 Zot ti osi pran bann resipian kot met lasann, bann lapel, bann zouti ki servi pou tengn lames, bann bol, bann koup, ek tou bann istansil an kwiv ki ti servi pou servis dan tanp. 19 Sef bann gard rwayal ti pran bann kivet, bann resipian dife, bann bol, bann resipian kot met lasann, bann stenn lalanp, bann koup, ek bann bol ki ti an lor pir ek vre larzan. 20 Me li ti inposib pou kalkile komie kwiv ti’nn servi pou fer sa de kolonn-la, Lamer, sa 12 toro an kwiv ki anba Lamer-la, ek bann kales ki Lerwa Salomon ti fer pou lakaz Zeova.
21 Ek pou bann kolonn, sak kolonn ti mezir 18 koude* oter, ti bizin enn lakord ki mezir 12 koude pou fer letour enn kolonn; so lepeser ti kat dwa,* ek li ti vid. 22 Ek dekorasion ki ti lao lor kolonn-la ti an kwiv; ek oter sa parti kot ti ena dekorasion la ti sink koude; ek bann lasenn ek bann grenad ki ti otour sa dekorasion-la, zot tou ti an kwiv. Deziem kolonn-la osi ti parey, li osi li ti ena bann dekorasion dan form bann grenad. 23 Otour bann lasenn-la ti ena 96 grenad ki ti kapav trouve; me antou, ti ena 100 grenad.
24 Sef bann gard rwayal ti osi pran Seraya ki ti sef pret, Sofoni, setadir pret ki ti ed sef pret, ek sa trwa gardien ki ti vey laport la. 25 Ek li ti pran dan lavil enn ofisie lakour ki ti ansarz bann solda, set konseye lerwa, ek osi sekreter sef larme, sa kikenn ki rasanble bann solda dan pei-la, ek 60 zom parmi bann dimounn sa pei-la ki ti ankor dan lavil. 26 Nebouzaradann sef bann gard rwayal ti pran zot ek ti amenn zot kot lerwa Babilonn dan Ribla. 27 Lerwa Babilonn ti touy zot dan Ribla dan rezion Amat. Se koumsa ki ti fer Zida kit so pei pou al an exil.
28 Ala kantite bann dimounn ki Naboukodonozor* ti amenn an exil: dan setiem lane, 3,023 Zwif.
29 Dan 18em lane Naboukodonozor,* ti pran 832 dimounn depi Zerizalem.
30 Dan 23em lane Naboukodonozor,* Nebouzaradann sef bann gard rwayal ti amenn 745 Zwif an exil.
Antou, ti amenn 4,600 dimounn an exil.
31 Lerla, dan 37em lane ki lerwa Zida Zoakinn ti an exil, dan 12em mwa, 25em zour sa mwa-la, lerwa Babilonn, Evil-Merodak lane kot li ti vinn lerwa, ti larg* lerwa Zida Zoakinn ek ti tir li dan prizon. 32 Li ti koz ar li dan enn fason zanti ek li ti met so tronn pli lao ki tronn bann lezot lerwa ki ti avek li dan Babilonn. 33 Alor, Zoakinn ti tir so bann linz prizon lor li, ek regilierman li ti manz lor latab lerwa ziska ki li mor. 34 Lerwa Babilonn ti kontign fer li gagn manze toulezour ziska so lamor, toutlong so lavi.