Zeremi

45 Ala seki profet Zeremi ti dir Barouk, garson Neria kan li ti ekrir dan enn liv bann parol ki Zeremi ti dir li dan katriem lane Zoakim garson Zozias, lerwa Zida:

2 “Ala seki Zeova Bondie Izrael dir lor twa, Barouk, 3 ‘To’nn dir: “Maler lor mwa, parski Zeova inn azout tristes ar mo douler! Mo’nn fatige plengne ek mo pa’nn trouv okenn plas pou repoze.”’

4 “To bizin dir li, ‘Ala seki Zeova dir: “Gete! Seki mo’nn konstrir mo pe kraze, ek seki mo’nn plante mo pe derasine, setadir pei-la net. 5 To pe rod* bann gran-gran kitsoz pou tomem. Aret rod sa bann kitsoz-la.”’

“‘Parski mo pe amenn enn maler lor tou dimounn,’ ala seki Zeova dir, ‘me twa, partou kot to pou ale, se to lavi ki to pou gagne kouma rekonpans.’”*