Zeremi
43 Kan Zeremi ti fini dir ar lepep an-antie tou bann parol ki Zeova zot Bondie inn dir, tou bann parol ki Zeova zot Bondie inn avoy li pou dir zot, 2 Azaria garson Oshaya, Zohanann garson Karea, ek tou bann zom arogan ti dir Zeremi: “Seki to pe dir fos! Zeova nou Bondie pa’nn avoy twa pou dir, ‘Pa al res dan Lezip.’ 3 Me se Barouk, garson Neria ki pe fer twa vir kont nou pou ki livre nou ar bann Kaldeen, pou touy nou ouswa pou amenn nou an exil dan Babilonn.”
4 Alor Zohanann garson Karea, tou bann sef larme ek lepep an-antie ti dezobeir Zeova ki ti demann zot pou res dan pei Zida. 5 Okontrer Zohanann garson Karea ek tou bann sef larme ti pran avek zot tou bann ki ti’nn reste dan Zida, se sa bann dimounn lamem ki ti’nn disperse parmi tou bann pep ek ki ti’nn retourne pou res dan pei Zida. 6 Zot ti pran bann zom, bann fam, bann zanfan, bann tifi lerwa, ek tou dimounn ki Nebouzaradann sef bann gard rwayal ti’nn kit avek Gedalia, garson Aikam ki ti garson Shafann, ek osi profet Zeremi ek Barouk garson Neria. 7 Ek zot ti rant dan pei Lezip parski zot pa ti obeir Zeova, ek zot ti al ziska Tapanes.
8 Apre sa kan Zeremi ti dan Tapanes, Zeova ti koz ar li ek ti dir: 9 “Pran bann gro ros dan to lame ek kasiet zot dan mortie* dan teras ki’nn fer avek bann brik* ki trouv devan lantre lakaz Faraon dan Tapanes. Fer sa devan bann zom Zwif. 10 Lerla dir zot, ‘Ala seki Zeova Sef bann larme, Bondie Izrael dir: “Gete, mo pe fer apel Naboukodonozor* lerwa Babilonn, mo serviter, ek mo pou met so tronn zis lao sa bann ros ki mo’nn kasiet la, ek li pou tal so latant rwayal lor sa bann ros-la. 11 Ek li pou vini ek li pou atak pei Lezip. Seki bizin mor ar enn maladi pou mor ar enn maladi, seki bizin al dan prizon pou al dan prizon, ek seki bizin mor ar lepe pou mor ar lepe. 12 Ek mo pou met dife dan bann lakaz* bann bondie Lezip, ek li pou bril zot ek li pou amenn zot kouma prizonie. Li pou anvlop pei Lezip otour li parey kouma enn berze anvlop li avek so linz ek li pou kit laba anpe.* 13 Ek li pou kas bout-bout bann kolonn* Bet-Semes* ki trouv dan pei Lezip ek li pou met dife dan bann lakaz* bann bondie Lezip.”’”