Zeremi
40 Zeova ti koz ar Zeremi apre ki Nebouzaradann sef bann gard rwayal ti liber li ek ti les li ale depi Rama. Kan Nebouzaradann ti amenn li laba ti ena menot dan so lame, ek li ti parmi bann dimounn ki ti deporte depi Zerizalem ek Zida pou al an exil dan Babilonn. 2 Lerla sef bann gard rwayal ti pran Zeremi ek ti dir li: “Zeova to Bondie ti predir ki sa maler-la pou arive lor sa plas-la, 3 ek Zeova inn fer sa arive parey kouma li ti dir, parski zot finn fer pese kont Zeova ek zot pa’nn obeir so lavwa. Se akoz sa ki sa inn ariv zot. 4 Azordi mo pe tir bann menot ki ena dan to lame. Si sa paret bon pou twa pou vinn avek mwa Babilonn, vini, ek mo pou pran to sarz. Me si to pa anvi vinn avek mwa Babilonn, pa vini. Gete! Pei-la an-antie devan twa. Swazir kot to anvi ale.”
5 Alor ki Zeremi pa ti ankor deside ki li ti pou fer, Nebouzaradann ti dir li: “Retourn kot Gedalia, garson Aikam ki garson Shafann, ki lerwa Babilonn inn etabli lor bann lavil Zida, ek res avek li parmi lepep; ouswa gete kotsa to anvi ale.”
Lerla sef bann gard rwayal ti donn li inpe manze ek enn kado, ek ti les li ale. 6 Alor Zeremi ti al Mizpa kot Gedalia garson Aikam ek li ti res avek li parmi lepep ki ti ankor dan pei Zida.
7 Plitar, tou bann sef larme ek zot bann zom ki ti dan lakanpagn ti’nn tann dir ki lerwa Babilonn ti’nn etabli Gedalia garson Aikam lor pei-la ek ki ti’nn etabli li lor bann dimounn pov sa pei-la, bann zom, bann fam, ek bann zanfan ki pa ti’nn al an exil dan Babilonn. 8 Alor zot ti vinn Mizpa pou get Gedalia. Ti ena Ishmael ki ti garson Netania, Zohanann ek Zonatan ki ti bann garson Karea, Seraya ki ti garson Tanoumet, bann garson Efay ki ti enn Netofatien, ek Zezania ki ti garson Maakat, ansam avek zot bann zom. 9 Gedalia, garson Aikam ki ti garson Shafann, ti fer enn serman ar zot ek ar zot bann zom. Li ti dir: “Pa gagn per pou servi bann Kaldeen. Res dan pei-la ek servi lerwa Babilonn, ek tou pou pas bien pou zot. 10 Me mwa, mo pou res Mizpa pou reprezant zot devan* bann Kaldeen ki pou vinn kot nou. Me zot bizin ramas divin, bann frwi lete, ek delwil, ek gard zot dan bann resipian. Zot bizin res dan bann lavil ki zot inn pran pou zot.”
11 Ek tou bann Zwif ki ti dan Moab, Amonn, ek Edom, ek osi bann ki ti dan tou bann lezot pei, ti osi tann dir ki lerwa Babilonn ti les enn tigit dimounn res dan Zida ek ki li ti’nn etabli lor zot Gedalia, garson Aikam ki ti garson Shafann. 12 Alor tou bann Zwif ti koumans retourn depi tou bann landrwa kot zot ti’nn disperse, ek zot ti vinn dan pei Zida kot Gedalia dan Mizpa. Ek zot ti ramas enn gran kantite divin ek frwi lete.
13 Zohanann garson Karea ek tou bann sef larme ki ti dan lakanpagn ti vinn get Gedalia dan Mizpa. 14 Zot ti dir li: “Eski to pa kone ki Baalis, lerwa bann Amonit, inn avoy Ishmael garson Netania pou touy twa?” Me Gedalia garson Aikam pa ti krwar zot.
15 Lerla Zohanann garson Karea ti dir Gedalia an sekre dan Mizpa: “Mo anvi ale ek touy Ishmael garson Netania, ek personn pa pou kone. Kifer li bizin touy twa, ek kifer pep Zida an-antie ki’nn rasanble ansam avek twa bizin disperse ek sa tigit ki reste dan Zida la bizin mor?” 16 Gedalia garson Aikam ti dir Zohanann garson Karea: “Pa fer sa parski seki to pe dir konsernan Ishmael fos.”