Zeremi
39 Dan neviem lane lerwa Zida Sedesias, dan diziem mwa, lerwa Babilonn Naboukodonozor* ek tou so larme ti vinn Zerizalem ek ti anserkle li.
2 Dan 11em lane Sedesias, dan 4em mwa, lor 9em zour sa mwa-la, zot ti defons miray lavil ek zot ti rantre. 3 Lerla tou bann prins lerwa Babilonn ti rantre ek ti asiz kot Laport Omilie. Ti ena Nergal-Sharezer ki ti Samgar,* Nebo-Sarsekim ki ti Rabsaris,** Nergal-Sharezer ki ti Rabmag* ek tou bann lezot prins lerwa Babilonn.
4 Kan lerwa Zida Sedesias ek tou so bann solda ti trouv bann-la, zot ti sove, zot ti kit lavil aswar, zot ti pas par zardin lerwa, zot ti pas par laport ki trouv ant de miray ek zot ti kontign zot semin pou al dan direksion Araba. 5 Me larme bann Kaldeen ti galoup deryer bann-la, ek zot ti trap Sedesias dan bann laplenn Zeriko ki ti kouma bann dezer. Zot ti may li ek zot ti amenn li kot lerwa Babilonn Naboukodonozor* dan Ribla dan rezion Amat, ek laba lerwa ti ziz li. 6 Lerwa Babilonn ti fer touy bann garson Sedesias devan so lizie dan Ribla ek lerwa Babilonn ti fer touy tou bann abitan Zida ki sorti dan bann gran fami. 7 Lerla li ti fer Lerwa Sedesias vinn aveg. Ek apre sa, li ti atas li ar bann lasenn an kwiv pou amenn li Babilonn.
8 Apre sa, bann Kaldeen ti bril lakaz* lerwa ek bann lakaz bann dimounn, ek zot ti kraz bann miray Zerizalem. 9 Nebouzaradann sef bann gard rwayal ti amenn an exil dan Babilonn bann dimounn ki ti’nn reste dan lavil, bann dimounn ki ti’nn rann zotmem pou vinn dan so kote ek bann lezot dimounn ki ti’nn reste.
10 Me Nebouzaradann sef bann gard rwayal ti kit dan pei Zida sertin dimounn ki ti bien pov, bann ki pa ti ena nanye ditou. Ek sa zour-la li ti osi donn zot bann karo rezin ek bann lezot karo pou ki zot travay ladan.*
11 Lerla lerwa Babilonn Naboukodonozor* ti donn Nebouzaradann sef bann gard rwayal sa bann lord-la konsernan Zeremi: 12 “Pran li ek vey lor li; pa fer li okenn ditor, ek donn li tou seki li demann twa.”
13 Alor Nebouzaradann sef bann gard rwayal, Neboushazbann ki ti Rabsaris,* Nergal-Sharezer ki ti Rabmag,* ek tou bann zom inportan ki ti servi lerwa Babilonn ti avoy bann zom 14 pou tir Zeremi dan Lakour Gard. Zot ti kit li ar Gedalia garson Aikam, ki ti garson Shafann, pou ki li amenn li dan so lakaz. Alor Zeremi ti res parmi lepep.
15 Kan Zeremi ti anferme dan Lakour Gard, Zeova ti koz ar li ek ti dir: 16 “Ale ek dir Ebed-Melek ki enn Etiopien, ‘Ala seki Zeova Sef bann larme, Bondie Izrael dir: “Gete mo pe realiz mo bann parol lor sa lavil-la pou amenn maler, pa pou fer dibien, ek sa zour-la to pou trouv sa arive.”’
17 “‘Me sa zour-la mo pou sap twa,’ ala seki Zeova dir, ‘ek personn pa pou livre twa dan lame bann zom ki to per.’
18 “‘Parski vremem mo pou fer twa sape, to pa pou mor par lepe. To pou gagn to lavi kouma enn rekonpans* parski to’nn fer mwa konfians,’ ala seki Zeova dir.”