Zeremi
37 Ek Lerwa Sedesias garson Zozias ti koumans regne dan plas Konia* garson Zoakim, parski lerwa Babilonn Naboukodonozor* ti fer li vinn lerwa dan pei Zida. 2 Me li, so bann serviter, ek bann dimounn ki ti res dan pei-la pa ti ekout bann parol ki Zeova ti dir par mwayin profet Zeremi.
3 Ek Lerwa Sedesias ti avoy Zeoukal garson Selemia ek Sofoni garson Maaseya ki ti enn pret pou al dir profet Zeremi: “Silteple, priye Zeova nou Bondie pou nou.” 4 Zeremi ti lib ek li ti pe marse parmi bann dimounn, parski zot pa ti ankor met li dan prizon. 5 Selman kan bann Kaldeen ki ti anserkle Zerizalem ti tann dir ki larme Faraon ti sorti Lezip, zot ti kit Zerizalem zot ti ale. 6 Lerla Zeova ti koz ar profet Zeremi. Li ti dir: 7 “Ala seki Zeova Bondie Izrael dir, ‘Ala seki zot bizin dir lerwa Zida, ki’nn avoy zot kot mwa pou poz mwa kestion: “Gete! Larme Faraon ki pe vinn ed zot pou bizin retourn dan so pei, Lezip. 8 Ek bann Kaldeen pou retourne ek pou lager kont sa lavil-la, zot pou pran li ek zot pou bril li ar dife.” 9 Ala seki Zeova dir, “Pa anbet zotmem ek dir, ‘Pena dout ki bann Kaldeen pou al lwin ar nou,’ parski bann-la pa pou ale. 10 Mem si zot gagn laviktwar kont larme bann Kaldeen an-antie ki pe lager kont zot ek ki res zis bann zom ki’nn blese, kanmem sa, sa bann zom-la pou leve depi zot latant ek pou bril sa lavil-la ar dife.”’”
11 Kan larme bann Kaldeen ti’nn kit Zerizalem akoz larme Faraon, 12 Zeremi ti kit Zerizalem pou al dan pei Binzamin pou gagn so leritaz laba parmi so pep. 13 Me kan li ti ariv devan Laport Binzamin, ofisie ki ti ansarz bann gard ki ti apel Iriya garson Selemia, ki ti garson Anania, ti trap profet Zeremi. Ofisie-la ti dir: “To pe al rann tomem ar bann Kaldeen!” 14 Me Zeremi ti dir: “Manti sa! Mo pa pe sove pou al kot bann Kaldeen.” Me li pa ti ekout Zeremi. Alor, Iriya ti aret Zeremi ek ti amenn li devan bann prins. 15 Bann prins ti bien ankoler ar Zeremi, ek zot ti bat li ek zot ti ferm li* dan lakaz Zeonatann ki ti enn sekreter, lakaz ki zot ti fer vinn enn prizon. 16 Zot ti met Zeremi dan enn kaso* ki anba later, ek li ti res laba pandan enn kantite zour.
17 Lerla, Lerwa Sedesias ti fer al sers Zeremi, ek lerwa ti poz li bann kestion an sekre dan so lakaz.* Li ti demann li, “Eski Zeova inn dir kitsoz?” Zeremi ti dir, “Wi, li’nn dir!” ek li ti kontigne, “Pou livre twa dan lame lerwa Babilonn!”
18 Zeremi ti osi dir Lerwa Sedesias: “Ki pese mo’nn fer kont twa, kont to bann serviter, ek kont sa pep-la pou ki zot inn met mwa dan prizon? 19 Aster-la, kotsa zot bann profet ete, bann ki ti anons zot bann profesi ek ki ti dir, ‘Lerwa Babilonn pa pou vinn atak zot ek sa pei-la’? 20 Ekoute, silteple, A mo segner lerwa. Silteple, fer mwa enn faver. Pa re-avoy mwa dan lakaz Zeonatann ki enn sekreter, sinon mo pou mor laba.” 21 Alor, Lerwa Sedesias ti donn lord pou met Zeremi dan prizon dan Lakour Gard, ek toulezour ti donn li enn dipin ron ki sorti dan lari bann boulanze, ziska ki ti nepli ena dipin dan lavil. Ek Zeremi ti kontign res dan Lakour Gard.