Zeremi
36 Dan katriem lane Zoakim garson Zozias, lerwa Zida, Zeova ti koz ar Zeremi. Li ti dir: 2 “Pran enn roulo* ek ekrir lor la tou bann parol ki mo ti dir twa kont Izrael ek Zida ek tou bann pep, depi premie zour ki mo ti koz ar twa dan lepok Zozias ziska zordi. 3 Kan bann ki parmi pep Zida pou tann tou bann maler ki mo pe pans pou amenn lor zot, kitfwa zot pou aret fer bann move kitsoz ki zot pe fer ek lerla, kitfwa mo pou pardonn zot erer ek zot pese.”
4 Lerla, Zeremi ti apel Barouk garson Neria, ek Zeremi ti dir Barouk tou bann parol ki Zeova ti’nn dir li, ek Barouk ti ekrir sa dan roulo-la.* 5 Apre sa, Zeremi ti donn Barouk sa lord-la: “Mo pa gagn drwa rant dan lakaz Zeova. 6 Alor se twa ki bizin ale ek lir for bann parol Zeova ki mo’nn fer twa ekrir dan sa roulo-la. Lir sa devan lepep dan lakaz Zeova, zour ki ena enn karem; koumsa to pou lir sa ar tou bann dimounn dan Zida ki’nn sorti dan zot lavil ek ki’nn vini. 7 Kitfwa Zeova pou tande kan zot pou priye pou gagn so faver, ek sakenn pou aret fer bann move kitsoz ki li pe fer, parski Zeova inn fini dir ki li bien ankoler kont sa pep-la.”
8 Alor Barouk garson Neria ti fer tou seki profet Zeremi ti donn li lord pou fer; li ti al dan lakaz Zeova ek li ti lir for bann parol Zeova ki ti ena dan sa roulo-la.*
9 Pandan sinkiem lane Zoakim garson Zozias, lerwa Zida, dan neviem mwa, tou bann dimounn ki dan Zerizalem ek tou bann dimounn ki ti sorti dan bann lavil Zida ek ki ti vinn dan Zerizalem ti koumans gard karem devan Zeova. 10 Lerla Barouk ti rant dan lakaz Zeova, dan sal-a-manze* ki pou Gemaria, garson Shafann, enn kopis,* dan lakour ki lao, kot lantre nouvo laport lakaz Zeova, ek li ti lir bien for devan lepep an-antie bann parol ki Zeremi ti fer li ekrir dan sa roulo-la.*
11 Kan Mikaya garson Gemaria, garson Shafann, ti tann tou bann parol ki Zeova ti dir dan sa roulo-la,* 12 li ti desann kot lakaz* lerwa ek li ti rant dan pies ki pou sekreter. Tou bann prins* ti pe asize laba: Elishama ki ti sekreter, Delaya garson Semaya, Elnatann garson Akbor, Gemaria garson Shafann, Sedesias garson Anania, ek tou bann lezot prins. 13 Mikaya ti dir bann-la tou bann parol ki li’nn tande kan Barouk ti lir sa roulo-la* devan lepep.
14 Lerla, tou bann prins ti avoy Zeoudi ki ti garson Netania, ki ti garson Selemia, ki ti garson Kousi, pou dir Barouk sa bann parol-la: “Vini ek amenn avek twa sa roulo ki to’nn lir devan lepep la.” Barouk garson Neria ti pran roulo-la dan so lame ek li ti rant devan zot. 15 Zot ti dir li: “Silteple, asiz twa ek lir for sa roulo-la ar nou.” Alor Barouk ti lir sa roulo-la ar zot.
16 Deswit kouma zot ti tann tou sa bann parol-la, sakenn ti get zot kamarad dan enn gran laper, ek zot ti dir Barouk: “Nou bien bizin dir lerwa tou sa bann parol-la.” 17 Ek zot ti demann Barouk: “Silteple, dir nou, kouma to’nn ekrir tou sa bann parol-la. Eski se Zeremi ki’nn dir twa ekrir tou sa bann kitsoz-la?” 18 Barouk ti reponn zot: “Li’nn dir mwa tou sa bann parol-la, ek mo’nn ekrir zot avek lank dan sa roulo-la.”* 19 Bann prins ti dir Barouk: “Ale, rod enn plas pou zot kasiet, twa ek Zeremi, ek pa fer personn kone kotsa zot ete.”
20 Lerla zot ti rant kot lerwa, dan lakour, ek zot ti met roulo-la dan pies ki ti pou Elishama ki ti sekreter, ek zot ti dir lerwa tou seki zot inn tande.
21 Alor, lerwa ti avoy Zeoudi al sers roulo-la, ek Zeoudi ti pran li dan pies ki ti pou Elishama ki ti sekreter. Zeoudi ti koumans lir li devan lerwa ek devan tou bann prins ki ti pe debout kot lerwa. 22 Lerwa ti pe asize dan so lakaz liver, dan neviem mwa,* ek ti ena enn dife ki ti pe brile dan enn reso devan li. 23 Apre ki Zeoudi ti fini lir trwa ouswa kat kolonn, lerwa ti koup sa parti roulo-la avek kouto sekreter ek ti zet sa dan dife ki ti pe brile dan reso. Li ti fer sa ziska ki roulo-la an-antie ti brile dan dife ki ti dan sa reso-la. 24 Ek zot pa ti resanti okenn laper; ni lerwa ni tou so bann serviter ki ti’nn tann tou sa bann parol-la pa ti desir zot linz. 25 Mem si Elnatann, Delaya, ek Gemaria ti sipliy lerwa pou pa bril sa roulo-la, li pa ti ekout zot. 26 Anplis, lerwa ti donn lord Zerameel garson lerwa, Seraya garson Azriel, ek Selemia garson Abdeel pou atrap Barouk ki ti sekreter ek profet Zeremi, me Zeova ti kontign kasiet zot.
27 Apre ki lerwa ti’nn bril sa roulo kot ti ena bann parol ki Zeremi ti’nn dir Barouk ekrir la, Zeova ti rekoz avek Zeremi. Li ti dir li: 28 “Pran enn lot roulo ek ekrir lor la bann mem parol ki ti ena dan premie roulo-la, sa roulo ki Zoakim lerwa Zida inn brile la. 29 Ek to bizin dir konsernan Zoakim lerwa Zida, ‘Ala seki Zeova dir: “To’nn bril sa roulo-la ek to’nn dir, ‘Kifer to’nn ekrir sa lor la: “Lerwa Babilonn vremem pou vini ek pou detrir sa pei-la, ek pou nepli ena okenn dimounn ek okenn zanimo ladan”?’ 30 Alor, ala seki Zeova dir konsernan Zoakim lerwa Zida, ‘Pa pou ena personn parmi so bann desandan ki pou asiz lor tronn David, ek pou les so kadav dan saler lizour ek dan freser lanwit. 31 Mo pou fer li, so bann desandan, ek so bann serviter rann bann kont pou zot bann erer, ek mo pou amenn lor zot ek lor bann abitan Zerizalem ek bann zom Zida tou bann maler ki mo’nn dir mo pou amenn lor zot, parski zot pa’nn ekoute.’”’”
32 Lerla, Zeremi ti pran enn lot roulo ek ti donn sa Barouk garson Neria, ki ti sekreter. Apre sa, Zeremi ti dir Barouk ekrir tou bann parol ki ti ena dan roulo* ki Zoakim lerwa Zida ti’nn brile dan dife. Ek ti azout boukou lezot parol koumsa dan sa roulo-la.