Zeremi
23 “Maler pou bann berze ki pe detrir bann mouton ki dan mo patiraz ek pe fer zot fane partou-partou!” ala seki Zeova dir.
2 Alor ala seki Zeova Bondie Izrael dir kont bann berze ki pe gid mo pep: “Zot inn fer mo bann mouton fane partou-partou, zot pe kontign fer bann-la disperse, ek zot pa’nn pran bann-la kont.”
“Alor mo pa pou pran zot kont akoz bann move kitsoz ki zot pe fer,” ala seki Zeova dir.
3 “Apre sa, parmi bann mouton ki mo’nn fane partou-partou dan tou bann pei, mo pou rasanble ansam bann ki reste ek mo pou retourn zot dan zot patiraz, ek zot pou miltipliye ek vinn boukou. 4 Ek mo pou etabli bann berze lor zot, ki pou vremem pran zot swin. Zot pou nepli gagn per ouswa panike, ek pa pou ena okenn parmi zot ki pou manke,” ala seki Zeova dir.
5 “Gete! Bann zour pe vini,” ala seki Zeova dir, “kot mo pou fer enn bourzon* ki drwat leve parmi bann desandan David. Ek enn lerwa pou regne, li pou montre bon zizman ek li pou fer ki respekte lazistis ek ladrwatir dan pei-la. 6 Dan so lepok pou sap Zida, ek Izrael pou viv an sekirite. Ek ala kouma pou apel li: Zeova Li Nou Ladrwatir.”
7 “Selman, bann zour pe vini,” ala seki Zeova dir, “kot zot nepli pou dir, ‘Parey kouma Zeova li vivan, limem ki’nn tir pep Izrael depi pei Lezip!’ 8 me okontrer zot pou dir, ‘Parey kouma Zeova li vivan, limem ki’nn tir ek ki’nn retourn bann desandan pep Izrael depi Lenor ek depi tou bann pei kot mo ti dispers zot,’ ek zot pou res dan zot prop pei.”
9 Konsernan bann profet:
Mo leker inn kase andan.
Tou mo bann lezo pe tranble.
Mo kouma enn zom ki sou
Ek kouma enn zom ki’nn soule ar divin,
Akoz Zeova ek akoz so bann parol ki sin.
10 Parski pei-la ranpli avek bann ki fer ladilter;
Akoz malediksion, pei-la an-dey
Ek bann patiraz dan dezer inn sek.
Zot inn pran enn move semin, ek zot pe abiz zot pouvwar.
11 “Bann profet ek bann pret toule-de inn kontamine.*
Mem dan mo lakaz mo finn trouv bann move kitsoz ki zot inn fer,” ala seki Zeova dir.
12 “Ala kifer zot semin pou glise ek pou vinn nwar;
Pou pous zot ek zot pou tonbe.
Parski mo pou amenn enn maler lor zot
Lane kot zot pou bizin rann bann kont,” ala seki Zeova dir.
13 “Ek mo’nn trouv enn kitsoz degoutan ar bann profet ki dan Samari.
Zot pe profetize lor nom Baal,
Ek zot pe elwagn mo pep Izrael ar mwa.
14 Ek mo’nn trouv bann kitsoz sokan ar bann profet dan Zerizalem.
Zot pe fer ladilter ek zot pe mars dan foste;
Zot pe ankouraz* bann move dimounn,
Ek zot pa pe aret fer bann move kitsoz.
Pou mwa, zot tou parey kouma Sodom,
Ek bann abitan sa lavil-la parey kouma Gomor.”
15 Alor ala seki Zeova Sef bann larme dir kont bann profet:
“Gete! Mo pe donn zot labsint* pou manze
Ek mo pe donn zot delo anpwazone pou bwar.
Parski akoz bann profet dan Zerizalem, lapostazi* inn fane partou dan pei-la.”
16 Ala seki Zeova Sef bann larme dir:
“Pa ekout seki bann profet pe anons zot.
Bann-la pe anbet zot.*
Zot koz lor enn vizion ki sorti dan zot prop leker,
Sa pa sorti dan labous Zeova.
17 Zot pe kontign dir ar bann ki pena respe pou mwa,
‘Zeova inn dir: “Zot pou dan lape.”’
Ek ar tou bann ki swiv zot leker ki teti, zot dir,
‘Okenn maler pa pou vinn lor zot.’
18 Parski kisann-la inn debout parmi Zeova so bann kamarad pros
Pou trouv ek tann so parol?
Kisann-la ki’nn pran kont so parol pou ki li tann sa?
19 Gete! Tanpet ki sorti kot Zeova pou eklate dan enn gran violans;
Parey kouma tourbiyon enn siklonn, li pou vinn lor latet bann move.
20 Koler Zeova pa pou kalme
Tanki li pa fer ek realiz seki li’nn panse dan so leker.
Dan bann dernie zour* zot pou vremem konpran sa.
21 Mo pa’nn avoy bann profet, pourtan zot inn galoupe.
Mo pa’nn koz ar zot, pourtan zot inn profetize.
22 Me si zot ti’nn debout parmi mo bann kamarad pros,
Zot ti pou’nn fer mo pep tann mo bann parol
Ek zot ti pou’nn fer bann-la aret swiv move semin ki zot inn pran ek aret bann move kitsoz ki zot pe fer.”
23 “Eski mo zis enn Bondie kan mo pre ar zot?” ala seki Zeova dir, “Eski mo pa osi enn Bondie kan mo lwin ar zot?”
24 “Eski enn zom kapav kasiet dan enn plas kot mo pa kapav trouv li?” ala seki Zeova dir.
“Eski mo pa ranpli lesiel ek later?” ala seki Zeova dir.
25 “Mo finn tann bann profet ki pe servi mo nom pou profetiz bann foste. Ek zot pe dir, ‘Mo’nn fer enn rev! Mo’nn fer enn rev!’ 26 Ziska kan ankor sa lide pou profetiz bann foste la pou res dan leker bann profet? Zot pe profetiz bann manigans ki ena dan zot prop leker. 27 Zot anvi fer mo pep bliye mo nom par bann rev ki zot pe rakont ar sakenn zot kamarad, parey kouma zot bann anset ti bliye mo nom akoz Baal. 28 Si enn profet inn fer enn rev, ki li rakont sa rev-la, me ki sa kikenn ki ena mo parol la bizin dir bann parol dan enn fason exakt.”
“Eski ena enn kitsoz ki parey ant enn lapay ek enn lagrin sereal?” ala seki Zeova dir.
29 “Eski mo parol pa kouma enn dife ek parey kouma enn marto forzron ki kraz enn gro ros?” ala seki Zeova dir.
30 “Alor gete, mo pou pini bann profet, ki pe kokin mo bann parol sakenn ar zot kamarad,” ala seki Zeova dir.
31 “Gete! Mo pe pini bann profet,” ala seki Zeova dir, “bann ki servi zot lalang pou dir, ‘Li dir!’”
32 “Gete! Mo pe pini bann profet ki pe dir bann rev ki ranpli ar foste, ki rakont bann rev ek elwagn mo pep akoz zot bann foste ek zot larogans,” ala seki Zeova dir.
“Me mo pa ti avoy zot ni donn zot lord pou fer sa. Alor, zot pa pou amenn nanye debon pou sa pep-la,” ala seki Zeova dir.
33 “Ek kan sa pep-la ouswa enn profet ouswa enn pret demann twa, ‘Ki ete fardo* Zeova?’ to bizin reponn zot, ‘“Zotmem sa fardo-la! Ek mo pou zet zot,” ala seki Zeova dir.’ 34 Si enn profet ouswa enn pret ouswa lepep dir, ‘Sa se fardo* Zeova!’ Mo pou pini sa zom-la ek so fami. 35 Ala seki sakenn pe dir ar so prosin ek ar so frer, ‘Ki repons Zeova inn done? Ek ki Zeova inn dir?’ 36 Me zot bizin aret koz lor fardo* Zeova, parski fardo-la* se sakenn so prop parol, ek zot inn sanz bann parol Bondie vivan, Zeova Sef bann larme, nou Bondie.
37 “Se seki to bizin dir profet-la, ‘Ki repons Zeova inn donn twa? Ek ki Zeova inn dir? 38 Ek si zot kontign dir, “Fardo* Zeova!” ala seki Zeova dir: “Parski zot pe dir, ‘Sa parol-la se fardo* Zeova,’ apre ki mo’nn dir zot, ‘Zot bizin pa dir: “Fardo* Zeova!”’ 39 gete! mo pou lev zot ek mo pou zet zot lwin ar mwa, zot ek osi lavil ki mo’nn donn zot ek zot bann anset. 40 Ek mo pou amenn lor zot laont pou touletan ek mo pou imilie zot pou touletan, enn kitsoz ki bann dimounn zame pa pou bliye.”’”