Zeremi
1 Sa se bann parol Zeremi,* garson Ilkia ki ti enn parmi bann pret dan Anatot, dan pei Binzamin. 2 Zeova ti koz ar li dan 13em lane regn Zozias, garson Ahmonn, lerwa Zida. 3 Li ti koz ar li ankor dan lepok Zoakim, garson Zozias, lerwa Zida, ziska lafin 11em lane regn Sedesias, garson Zozias, lerwa Zida, ziska ki bann abitan Zerizalem ti al an exil lor 5em mwa.
4 Zeova ti koz ar mwa. Li ti dir:
5 “Avan ki mo ti form twa dan vant to mama, mo ti konn* twa,
Mo ti fer twa vinn enn profet pou bann pep.”
6 Me mo’nn dir: “Maler lor mwa, A Segner Siprem* Zeova!
Mo pa mem kone kouma pou koze, parski mo zis enn garson.”*
7 Lerla Zeova ti dir mwa:
“Pa dir, ‘Mo zis enn garson.’
Parski to pou bizin al kot tou bann dimounn ki mo pou avoy twa,
Ek to pou bizin dir tou seki mo pe donn twa lord pou dir.
8 Pa per akoz zot laparans,
Parski Zeova dir, ‘Mo avek twa pou sap twa.’”
9 Lerla Zeova ti avoy so lame ek ti tous mo labous. Ek Zeova ti dir mwa: “Mo’nn met mo bann parol dan to labous. 10 Gete, zordi mo’nn donn twa lotorite lor bann pep ek lor bann rwayom, lotorite pou derasine ek pou zet anba, lotorite pou detrir ek pou kraze, lotorite pou ranze ek pou plante.”
11 Zeova ti rekoz avek mwa ek ti dir mwa: “Ki to pe trouve Zeremi?” Lerla mo ti dir: “Mo pe trouv brans pie zamann.”*
12 Zeova ti dir mwa: “To’nn bien trouve, parski konsernan mo parol, mo pe kontign veye pou ki mo realiz li.”
13 Zeova ti koz ar mwa enn deziem fwa ek ti dir: “Ki to pe trouve?”Alor mo ti dir: “Mo pe trouv enn marmit* ki pe bwi.* So fon tourn dan direksion Lenor, ek so louvertir pe vers dan direksion Lesid.” 14 Lerla Zeova ti dir mwa:
“Maler-la pou sorti depi direksion Lenor
Ek li pou anvayir tou bann abitan sa pei-la.
15 Parski ala seki Zeova dir, ‘Mo pe apel tou bann fami ki sorti dan bann rwayom Lenor,
Ek zot pou vini; sakenn pou met so tronn
Devan lantre bann laport Zerizalem,
Kont so bann miray toutotour
Ek kont tou bann lavil Zida.
16 Ek mo pou anons mo bann zizman kont zot akoz tou bann move kitsoz ki zot pe fer,
Parski zot inn abandonn mwa,
Ek zot pe fer bann lafime sakrifis monte pou bann lezot bondie
Ek zot pe kourbe devan bann kitsoz ki zot lame inn fer.’
17 Me to bizin prepar twa pou azir,*
Ek to bizin deboute ek dir zot tou seki mo’nn donn twa lord pou dir.
Pa per zot,
Pou ki mo pa fer twa gagn plis per devan zot.
18 Parski zordi mo’nn fer twa vinn enn lavil ki bien proteze,
Enn kolonn feray ek bann miray an kwiv, pou ki to kapav reziste kont sa pei-la an-antie,
Kont bann lerwa Zida ek so bann prins,
Kont so bann pret ek bann dimounn sa pei-la.
19 Ek vremem zot pou lager ar twa,
Me zot pa pou pli for ki twa,*
Parski ala seki Zeova dir, ‘Mo avek twa pou sap twa.’”