Antũ Baakũrũ—Bũrĩ ba Gĩtũmi Mono Kĩũthũranone

Mbuga kinya gwe ũkũrũ nĩbũtũmĩĩte ũremeerwa nĩ mantũ jamaingĩ. Kinya kethĩra nũtumĩkĩrĩte Jehova mĩaka ĩmiingĩ, womba kwambia kwimena tontũ bwa ũrĩa ũtĩkũũmba kwiingia mantũ jamaingĩ nandĩ. Ngerekano, womba kwambia kũngʼuanithania jarĩa ũkũthithia nandĩ na jarĩa waathithagia mberene. Kethĩra nĩu, nĩatĩa ũũmba kũthithia nĩkenda bũu bũtĩgakuune nkoro?

JARĨA JEHOVA AKWĨRĨGĨĨRA KUUMANIA NAGWE

Ciũrie, ‘Nĩmbi Jehova akwĩrĩgĩĩra kuumania naani?’ Ũkoona biugo bia gũkũbooreria kĩrĩ Kuriikanithia Maathana 6:5, ĩrĩa yugaga: ‘Nagwe endaga Mwathani Mũrungu waaku na nkoro yaaku yonthe, na kĩrundu gĩaku kĩonthe, na inya yaaku yonthe.’

Kũringana na mũstaarĩ jũu, Jehova erĩgagĩĩra ũmũtumĩkĩra na nkoro yaaku, mathũgaanio, na inya yaaku yonthe. Bũu bwomba gũgũtethia ũtiga kwingʼuanithania na bangĩ, kana kũngʼuanithania jarĩa ũkũũmba kũthithia nandĩ na ja au mberene.

Thũgaanĩria bũbũ: Rĩrĩa waarĩ ũmwĩthĩ rĩ, nĩ mantũ ta jarĩkũ waathithagia tontũ bwa Jehova? Atumĩkĩri babaingĩ ba Jehova bomba kuuga nĩbaamũtumĩkagĩra na inya yonthe. Na ũu nĩu wombaga na bwaku ĩgiita rĩu. Kwou rĩ, nĩ mantũ jarĩkũ ũkũũmba kũthithia nandĩ ũtungatĩrine bwa Jehova? Jarĩa ũkũthithia nĩjakwonania nũkũmũtumĩkĩra na njĩra ĩrĩa njega nkũrũki kũringana na ũũmbi bwaku bwa nandĩ. Kethĩra ũkoona mantũ na njĩra ĩu, ũkethĩrwa na kũngʼanĩrwa tontũ nũgũtumĩkĩra Jehova o ta ũrĩa waathithagia mberene. Waamwejaga kĩrĩa kĩega ĩgiita rĩu, na kinya nandĩ nokĩo ũkũmwaa.

WOMBA GŨTETHIA BANGĨ NA NJĨRA ĨNENE

Antũ a kũthingatĩĩra jarĩa ũtĩkũũmba nandĩ, thũgaanĩria ũrĩa ũũmba gũtumĩra ũkũrũ bwaku gũtethia bangĩ. Ũmma nĩ atĩ, tontũ bwa kwĩthĩrwa ũrĩ Mũkristũ ũrĩ na ũkũrũ bũbwingĩ, kũrĩ na mantũ ũkũũmba nandĩ jarĩa ũtĩngĩũmba ũrĩ ũmwĩthĩ. Ngerekano, womba kũthithia mantũ jaja:

Ĩĩra bangĩ jarĩa ũkũrũkĩĩrĩte ũtũũrone. Thũgaanĩria biugo bibi biandĩki Bibiriene:

Mũnene Daudi augĩre ũjũ: ‘Ndaarĩ mwana-mũnyi, na nandĩ ndĩ mũkũrũ, ĩndĩ ntoona muntũ ũrĩa wagĩrĩte eerũkĩri, kana rũciara rwawe rũgĩcoka kũromba biakũrĩa.’—Zb. 37:25.

Joshua augĩre ũjũ: ‘Atĩrĩ, naarua ni kambĩtĩte na njĩra o ĩria ĩĩtagwa nĩ kĩrĩndĩ kĩonthe kĩa nthĩ ĩjĩ, nabuĩ bwinthe nĩbwijĩ na nkoro cienu na irundu bienu atĩ gũtĩ gantũ kinya kamwe bwaaga kĩrĩ mantũ jonthe jarĩa Mwathani Mũrungu weenu aarĩĩrie ũntũ bwajo ũntũne bwenu. Mantũ jau jonthe nĩjoojũrĩrue o bwega. Na gũtĩ kinya bũmwe kĩrĩjo bũtoojũrĩrue.’—Jos. 23:14.

Mbuga kinya gwe ũrauga o ta bo. Daudi na Joshua baaragia mantũ jarĩa baacionerete. Tontũ atumĩkĩri baba ba Jehova etĩkua baaugaga jarĩa boonete na kwigua mĩaka ĩmiingĩ, biugo biao birĩngĩtethia bangĩ na njĩra ĩnene.

Kethĩra nũtumĩkĩrĩte Jehova mĩaka ĩmiingĩ, kinya gwe womba kwĩra bangĩ itharimo birĩa ũcionerete. Rĩ, kũrĩ mantũ ũkũriikana jegie ũrĩa wonete Jehova akĩtharima antũ baawe? Menyithia bangĩ jo rĩrĩa ũkwaranĩria nabo! Mantũ jau jomba kũringithia bangĩ, o ta ũrĩa jaakũringithĩrie. Bangĩ baigua mantũ jarĩa ũkũrũkĩĩrĩte ũgĩtumĩkagĩra Jehova, bagekĩrwa inya mono.—Aro. 1:11, 12.

Njĩra ĩngĩ ũũmba gwĩkĩra bangĩ inya nayo nĩ gwĩta mĩcemanione, kethĩra gũkombĩka. Wathithia ũu, ũkagunĩka na ũgune bangĩ. Connie, ũrĩa ũkũgweti au mberene, ariuga: “Gwĩta mĩcemanione nĩgũntethagia ntĩkaunĩke nkoro. Rĩrĩa mbĩthagĩrwa mĩcemanione amwe na bangĩ nĩbambonagia wendo na bũu nĩbũmbĩkagĩra inya. Nĩnciũmagia kwonia bangĩ wendo na njĩra ya kũbaa biewa. Na nĩndiritanagĩria kũgwatanĩra na ataana na aarĩ ba baaba mantũne ja gĩkĩrundu ntĩgũtiga.”

JEHOVA NONAGA ŨTUNGATĨRI BWAKU BŨRĨ BWA GĨTŨMI

Kũrĩ na antũ babaingĩ bagweti Bibiriene barĩa beendi mono nĩ Mũrungu kinya kethĩra gũtoombĩkaga bamũtumĩkĩra ũrĩa beendaga. Thũgaanĩria ngerekano ya Simioni, mũkũrũ Mwisiraeli, ũrĩa waatũraga rĩrĩa Jesũ aaciarĩrwe. Rĩrĩa eetaga kĩũrũne, kwombĩka noonaga antũ arũme babaanake bakiingia mantũ ja gĩtũmi. Nĩatĩa we aacionaga? Kwombĩka tontũ bwa ũkũrũ bwawe, naaigagua bũbũũĩ akĩonaga teka Mũrungu akũmwona atĩ wa gĩtũmi mono. Ĩndĩ ũu tĩu aamwonaga. Aamwonaga arĩ ‘ũmwagĩru’ na mwĩtĩkĩkua na kwou aramwaa wendeeri bwa kwona Jesũ arĩ gakenke. Jehova kinya naamũtumĩĩre kũroria atĩ mwana ũu arĩngĩaa Mesiya! (Luk. 2:25-35) Kinya kethĩra naarĩ ũmũkũrũ, Jehova naamwonaga arĩ muntũ ũrĩ na wĩtĩkio bũũriku, ‘na kĩrundu gĩkĩtheru nĩ kĩarĩ ĩgũrũ rĩawe.’

Jehova nonaga ũtungatĩri bwaku kinya gwe bũrĩ bwa gĩtũmi ona kethĩra nũgũkũrũkĩĩra irigĩĩria. Nagwĩragua kwona muntũ akiiritanĩria ‘agĩciendagĩra’ na tĩ kũthithia jarĩa atĩkũũmba.—2 Ako. 8:12.

Kwou, iritanĩrie kũthithia jarĩa ũkũũmba. Ngerekano, thũgaanĩria ũrĩa ũũmba kũgwata mbaru ũtungatĩri, kinya kethĩra ũgatũmĩĩria ĩgiita rĩĩkai. Rĩ, no waranĩrie na antũ na njĩra ĩnkuĩ gũkũrũkĩĩra thimũ kana kũbaandĩkĩra barũga? Mathithio jamaniini ja wendo, monomono jarĩa jaumanĩtie na atumĩkĩri ba Jehova ba ĩgiita rĩraaja tagwe, jomba kũringithia athathaayia bangĩ na njĩra ĩnene.

Bamwe nĩbakũrigĩĩrua nĩ mathĩĩna ja kĩmwĩrĩ. Tega ũntũ bũrĩa bwonetwe kuuma Afrika, kathandũkũne karĩa karĩ na kĩongo, “Noonokerie Ũtũũro Bwawe.”

Riikana atĩ ngerekano yaaku ya gũtumĩkĩra Jehova ũrĩ mwĩtĩkĩkua mĩaka ĩmiingĩ yomba gwĩkĩra bangĩ inya mono. Nĩ wĩkĩrĩte bangĩ ngerekano ĩnjega tontũ bwa kũũmĩĩria gwaku na gũtĩ nkanja Mũrungu ‘atĩkororĩrua nĩ ngũgĩ yaaku, o na ũrĩa wendete riĩtwa rĩawe, ũgĩtethagia antũ barĩa atheru, ta ũrĩa ũbatethagia kinya nandĩ.’—Ahi. 6:10.

ĨTHĨRWA NA WĨRU BWA GŨTETHIA BANGĨ

Ũcũnkũũni bwonanĩtie atĩ antũ baakũrũ barĩa batethagia antũ bangĩ nĩbethagĩrwa na ũgima bũbwega bwa mwĩrĩ na bwa mathũgaanio, na nĩbakaraga mĩaka ĩmiingĩ.

Nĩ mma, kũthithĩria antũ mantũ jameega gũtĩebia mathĩĩna jonthe ja ũkũrũ. Nĩ Ũnene bwa Mũrungu akĩ bũkoojũria ũntũ bũu na bũthirie kaumo ga ũkũrũ na gĩkuũ, tako wĩyia bũrĩa bwaumanĩrie na Adamu.—Aro. 5:12.

Kinya nandĩ, rĩrĩa ũgũtungatĩra Jehova, ũgĩtethagia bangĩ bamũmenya wĩrĩgĩĩro bwaku nĩbũgĩjaga inya na ũgima bwaku bwa mwĩrĩ bũkaagĩra. Antũ baakũrũ, riikaneni atĩ Jehova nagwĩragĩrua ũtungatĩri bwenu, na kinya bangĩ kĩũthũranone nĩbagwĩragĩrua ngerekano yeenu ya wĩtĩkio.