Nũkũriikana?

Rĩ, nũrathomeete bwega ngacĩti cia Kĩrĩngo kĩa Mũkaria cia mwaka jũjũ? Ona kethĩra no ũcokie biũria bibi:

Nĩkĩ twejaga Jehova ũkumio?

Tũthithagia ũu tontũ nĩtũmũtĩaga na nĩtũmwendete mono. Kinya nĩtũmũkumagia tontũ nĩtwendaga bangĩ bamũmenya.—w25.01, kar. 3.

Nĩatĩa tũũmba gwĩta na mbere kũrekera bangĩ rĩrĩa batwaatĩria?

Tĩkuuga twaatĩrua tũtĩthũũra; amwe nou, kũrega gwĩĩka mũthũũro gũgatũtethia jũtĩgatũthũũkie.—w25.02, kar. 15-16.

Nĩkĩ Mariko, mũritwa wa Jesũ arĩ ngerekano ĩnjega ya kũthingatwa nĩ ataana ba baaba babeethĩ?

Mariko neetĩkĩĩrĩrie akwewa kaanya ka gũtumĩka. Kinya kethĩra ũntũ nĩbwaumĩĩre bwamwigithia bũbũũĩ na bwamuuna nkoro, aatatigĩre gũtumĩka. Neethĩrwe na ngwatanĩro ĩnjega na Paũlũ na Akristũ bangĩ bagimaru.—w25.04, kar. 27.

Nĩatĩa Jesũ oonanagia rĩrĩa aarombere ũjũ: ‘Ndĩkũbamenyithia riĩtwa rĩaku’? (Johana 17:26)

Aritwa baawe nĩbaaijĩ riĩtwa rĩa Mũrungu. Ĩndĩ Jesũ naabatetherie bamũmenya bwega nkũrũki, bamenya mworoto jwawe, ngũgĩ, na nkuma ciawe.—w25.05, kar. 20-21.

Nĩ ũntũ bũrĩkũ tũgaciũkĩrwa nĩbu twethĩrwa tũrĩ ainyiia?

Tũgaciũkĩrwa atĩ tũtijĩ mantũ jamwe. Ngerekano, tũtijĩ rĩrĩa mũthiro jũkeeja kana ũrĩa Jehova akathithia ĩgiita rĩu. Kinya tũtijĩ ũrĩa gũgakarĩka rũũne kana ũrĩa Jehova atwijĩ bũngˈana.—w25.06, kar. 15-18.

Nĩmbi biũmba gũtũtethia kũgunĩka kuumania na rwaria rwa antũ bonthe kana gĩcuncĩ kĩnna kĩrĩa twathoma?

No tũciũrie: ‘Nĩ ũrikithia bũrĩkũ bwejani bwa gũtũma athikĩĩria betĩkia mantũ jau? Rĩ, kũrĩ na ngerekano ĩnjega ĩrĩa mpũmba gũtumĩra rĩrĩa nkũritana? Nĩ baaũ bomba gũkucĩĩrua nĩ kĩongo gĩkĩ?’—w25.07, kar. 19.

Nĩmbi tũkwiritana bwegie ũrekeri bwa Mũrungu kuumania na ũrĩa aathithĩĩrie Daudi?

Kinya kethĩra Daudi naathithĩrie wĩyia bũrito, rĩrĩa aairirĩre kamma, Jehova naamũrekeere. (1 An. 9:4, 5) Rĩrĩa Mũrungu arekera muntũ, atĩmũgambithagĩria meyia jau kaĩrĩ kana ajariikana ĩgiita rĩĩjĩte.—w25.08, kar. 17.

Nĩatĩa ũũmba kũthithia rĩrĩa mũritwa wa Bibiria atĩgũciũkĩrwa nĩ ũritani bũnna?

Kethĩra atĩgũciũkĩrwa kinya nyuma ya kũbũtaarĩĩria bwega ũgĩtumagĩra Bibiria, bũtigĩĩre na bũbanganie kũbwarĩĩria ĩgiita rĩngĩ.—w25.09, kar. 24.

Bibiria yugaga wĩyia bũrĩ ‘wayia.’ (Ahi. 3:13) Nĩ na njĩra ĩrĩkũ bũrĩ wayia?

Wĩyia bwomba gũtũma tũthithia mantũ jamathũũku. Kinya bwomba gũtwaĩĩria tũgakara na nkanja tũkĩonaga teka Mũrungu atĩtwendete.—w25.10, kar. 16.

Nĩ mantũ jarĩkũ jathatũ jomba gũtũtethia kwagĩrithia maromba jeetũ?

(1) No tũthũgaanĩrie nkuma cia Jehova. (2) No tũthũgaanĩrie jarĩa tũgũkũrũkĩĩra na tũjagwete marombene, ngerekano ta rĩrĩa tũkũbatara kũrekera ũrĩa ũtwatĩrĩtie. (3) No tũtumĩre ĩgiita rĩraaja kũromba. Bũu bũgatwaa kaanya ga kũngʼana ga kwĩra Mũrungu jarĩa jarĩ nkorone.—w25.10, kar. 19-20.

Nĩatĩa tũũmba gũtethia antũ baakũrũ?

Twomba kũbarĩũngĩra kana kũbaringĩra thimũ. Kinya no tũbaikie rĩrĩa betĩte kwona ndagitarĩ. Kana kinya no tũtũmĩĩrie amwe nabo tũgĩtumagĩra njĩra mwanya mwanya cia ũtungatĩri.—w25.11, kar. 6-7.

Nĩ mantũ jarĩkũ ja gĩtũmi Mũkristũ abuĩrĩte kũthingatĩĩra nĩkenda ethĩrwa na mũranũ jũrĩ na gĩtĩĩo?

Thingatĩĩra mĩtaratara ya kĩwatho ĩrĩa ĩkwagĩra. Tigĩĩra atĩ mũranũ na mambura jarĩa jakathithua nĩjakwonania ĩtunda rĩa kĩrundu kĩa Mũrungu. Ĩthĩrwa na ũngʼanĩĩru kĩrĩ mwĩkĩĩre na kwigemia, na ũciebanie na mawĩthĩre jarĩa jatĩgwĩtĩkĩrĩka Kĩmandĩko. Tigĩĩra atĩ mĩbango yeenu ya mũranũ nĩkũmenyeka bwega rĩrĩa bũkũbanga mantũ.—w25.12, kar. 21-24.