Biũria Kuuma Kĩrĩ Athomi Beetũ

Nĩ ĩthũgaanio rĩrĩkũ Jehova agekĩra nkorone cia thirikarĩ ĩgiita rĩtĩ kũraaja?

Kugwurirwa 17:16, 17 yugaga ũjũ bwegie mwambĩrĩrio jwa thĩĩna ĩrĩa nene: ‘Na ngoji irĩa ũkwona ĩkũmi, o na kinya nyomoo njene, bau bakamena mũmalaya ũu, bamwĩnge atĩ nguũ, bacoke bamũrĩe nyama cia mwĩrĩ, ĩndĩ bamũcine mwanki athire buru. Nĩkwĩthĩrwa Mũrungu nĩwe ũbaathĩte nkorone ciao atĩ bathithie ũrĩa we akwenda, na bakare na kĩrĩĩko kĩmwe, na barekereerie nyomoo ĩu wathani bwao, o mwanka nteto cia rwaria rwa Mũrungu ithirĩrie kũũjũrua.’ Mberene, mauku jeetũ jataarĩĩrĩtie atĩ ĩthũgaanio rĩrĩa Jehova agekĩra nkorone cia thirikarĩ iu nĩrĩa kwĩnyangia ndini ya ũrongo.

Amwe nou, ũgarũrũku nĩbũkũbatara kũthithua. Ĩthũgaanio rĩrĩa Jehova agekĩra nkorone cia thirikarĩ iu nĩ ‘kũrekereeria nyomoo ĩu wathani bwacio.’ Nĩkenda tũciũkĩrwa ũrĩa ũntũ bũu bũkoojũrua, thũgaanĩria biũria bibi.

Nĩ baaũ bakwarĩĩrua ũroriene bũu? ‘Mũmalaya’ ũrĩa kinya etagwa ‘Babiloni Mũciĩ Jũrĩa Mũnene’ arĩrũngamĩĩra ndini cionthe cia ũrongo nthĩgũrũne. ‘Nyomoo ĩntune’ ĩrĩrũngamĩĩra gĩkundi kĩa Ngwatanĩro ya Kĩmanthĩgũrũ kĩrĩa kĩathithĩrue 1919 kĩreta thĩĩrĩ, na nandĩ gĩĩtagwa Ũrũmwe bwa Kĩmanthĩgũrũ. (Kug. 17:3-5) ‘Ngoji ĩkũmi’ irĩrũngamĩĩra thirikarĩ cionthe cia nthĩgũrũ irĩa ikũgwata mbaru nyomoo ĩu.

Kũrĩna ngwatanĩro ĩrĩkũ gatĩgatĩ ka mũmalaya ũu na nyomoo ĩu ntune? Mũmalaya ũu ‘akarĩrĩte’ nyomoo ĩrĩa ntune akĩmĩgwataga mbaru, na akĩgeragia kũmĩtongeeria.

Nĩatĩa gũgakarĩka kĩrĩ mũmalaya ũu? Nyomoo ĩu, o amwe na ngoji irĩa ĩkũmi ikũmĩgwata mbaru, ‘ikamũmena’ mono. Bũu bũgatũma imũtunya ũtonga bwawe bunthe na ĩguũre ũthũũku bwawe. Igatua ĩgamba rĩa Jehova kũmwerekera, imũthirie buru o ta ũrĩa Bibiria yugĩte. (Kug. 17:1; 18:8) Jũu jũkethĩrwa jũrĩ mũthia jwa ndini cionthe cia ũrongo. Amwe nou, mbere bũu bũkarĩka, Jehova agatongeeria thirikarĩ iu kũthithia ũntũ bũngĩ bũrĩa bũtakarĩka kaĩrĩ.

Nĩatĩa Jehova agatongeeria thirikarĩ iu kũthithia? Agekĩĩra mathũgaanio jaawe nkorone cia thirikarĩ kana ngoji irĩa ĩkũmi, nĩkenda ‘barĩĩkania kĩrĩĩko kĩmwe, nakĩo nĩ atĩ banenkere nyomoo ĩu [ntune] wathani bwao na ũnene bwao,’ tayo Ũrũmwe bwa Kĩmanthĩgũrũ. (Kug. 17:13) Bũu bũrĩonania atĩa? Rĩ, neka thirikarĩ iu ikanenkera nyomoo ĩu wathani na ũnene ikĩendaga? Arĩ! Ũroria bũu bũrĩonania atĩ Mũrungu gwe wengwa nĩwe ũkabatongeeria bathithia ũu. (Nju. 21:1; tenganĩĩria na Isaya 44:28.) Rĩ, ũntũ bũu neka bũgakarĩka o mpari mpari? Arĩ! Bũgakarĩka o rĩmwe batĩĩrĩgĩĩrĩte. Nyuma ya au, nyomoo ĩu ĩkathiria ndini cionthe cia ũrongo buru.

Nandĩ, nĩmbi tũbuĩrĩte kwĩrĩgĩĩra ĩgiita rĩĩjĩte? Tũtĩkwĩrĩgĩĩra kwigua ripoti ikwonania atĩ thirikarĩ ĩkwambia kwongeera wĩru bwa kũgwata mbaru Ũrũmwe bwa Kĩmanthĩgũrũ. Bũbũ nĩbu tũkwĩrĩgĩĩra bũkarĩka: O rĩmwe, Jehova agatũma thirikarĩ cionthe inenkera nyomoo ĩu wathani bwacio. Rĩrĩa bũu bũgakarĩka, tũkamenya atĩ thĩĩna ĩrĩa nene ĩrĩ akuĩ kwambia. O tweteerete ĩgiita rĩu, menya ‘tũmaamaʼ ĩndĩ ga ‘tũkare tũciũkĩtie toro’ tontũ mantũ jakagarũka na mpwĩ ĩgiita rĩtĩ kũraaja!—1 Athe. 5:6.