Ũtethio Kĩrĩ Antũ Aka Barĩa Bainyĩĩrĩtue
“ Ekũrũ na aarĩ babaingĩ nthĩgũrũne yonthe nĩbathithĩrĩtue na njĩra ĩtĩagĩrĩte. Rĩ, ũrĩ ũmwe waao? Cũnkũũna woone nĩkĩ Mũrungu onaga ũkaria bwaku bũrĩ bwa gĩtũmi na ũrĩa akathithia bwegie kwinyĩĩrua kwa antũ aka.”
Ũu nĩu gĩcuncĩ kĩrĩa kĩrĩ na kĩongo“Usalama wa Wanawake—Maoni ya Biblia” kĩrĩ jw.org kĩambagĩĩria. Linki ĩrĩa ĩrĩ mũthia jwa gĩcuncĩ kĩu nĩ yonanĩtie ũrĩa ũũmba kũrita PDF, ũgacabithia, na gũkũũnja maita jana, ta trakti. Stacy ũrĩa uumĩte Amerika ariuga: “Nĩndacabithĩrie imwe cia trakti iu na twaciikia na mwarĩ wa baaba ũngĩ, arĩa antũ aka barĩa bainyagĩĩrua beetaga gũcwaa ũtethio.”
Ũmwe wa ariti ngũgĩ naatũrombere tũmwongeere trakti ingĩ cia kwaa barĩa bakaraga nabo. Tontũ bũu, tũramwaa trakti ingĩ 40 na kandi cia jw.org 30. Twĩkũriũnga kaĩrĩ, mũrũngamĩĩri waao naatũrombere twonie antũ bau ũrĩa tũũmba kwiritana nabo Bibiria.
Stacy na aarĩ ba baaba bangĩ baĩrĩ nĩboonere maumĩĩra o ta jau, gũntũ kũngĩ kwa gũtethia antũ aka barĩa bainyagĩĩrua. Nĩbaeejanĩre trakti ithano na bararombwa barete ingĩ nkũrũki. Ũmwe wa ariti ngũgĩ aaugĩre ũjũ: “Nĩtũkũbatara trakti iji, igatethia ekũrũ baba mono.” Baĩkũriũnga kaĩrĩ, ekũrũ bamwe nĩboothũranĩre nĩkenda boona ũrĩa twiritanaga Bibiria na antũ, na baĩrĩ kĩrĩ bo barauga bakeeja mũcemanione mũthia jwa kiumia Nyomba ya Ũnene.
Stacy ariuga: “Nĩtwaringithĩrue mono kwona ũrĩa antũ baagwĩrĩĩrue jarĩ baathomere traktine ĩu. Tũrĩ na wirĩrĩĩria bũbũnene mono bwa kwenda kwona ũrĩa Jehova agatũtethia o twĩtĩte na mbere gũtũmĩrĩria ekũrũ baba nkuma ĩnjega.”