KĨTHOMO GĨA KWIRITANA KĨA 42
RWĨMBO NA. 44 Sala ya Mtu wa Hali ya Chini
Ũrĩa Ũũmba Kwagĩrithia Maromba Jaaku
‘ Nĩngũgũkaĩra na nkoro yakwa yonthe; Mwathani, ũmbamũkũre!’—ZB. 119:145.
JARĨA TŨKAIRITANA
Tũkoona ũrĩa maromba jarĩa jarĩ Bibiriene jomba gũtũtethia kwagĩrithia maromba jeetũ.
1-2. (a) Nĩmbi biũmba gũtũrigĩĩria kũromba Jehova kuuma nkorone? (b) Nĩmbi bigũtũtethia kũmenya atĩ Jehova nathikagĩĩra maromba jeetũ?
GWE RĨ, magiita jamwe nwigagua teka ũgũcokera mantũ o jarĩa maromberene jaaku, kana teka ũtĩkũromba kuuma nkorone? Kethĩra nĩu, tĩ wenka wigagua ũu. Tontũ bwa ũrĩa twingĩĩri nĩ mantũ ũtũũrone, twomba kwaga kaanya ga kũngʼana ga kũromba. Kana kinya magiita jamwe twomba kũremwa kwĩra Jehova jarĩa jarĩ nkorone tũkĩonaga teka tũtĩkwagĩra kwaranĩria nawe.
2 Bibiria nĩtũrikithagĩria atĩ, ũntũ bũrĩa Jehova onaga bũrĩ bwa gĩtũmi tĩ ũraaja bwa maromba jeetũ, ĩndĩ nĩjethĩrwe jaumĩte nkorone. ‘Naigagua mobatu’ ja barĩa bainyiiagia. (Zb. 10:17) Nathikagĩĩra mantũ jonthe jarĩa tũmũrombaga tontũ natwendete.—Zb. 139:1-3.
3. Nĩ biũria birĩkũ tũkaarĩĩria kĩthomone gĩkĩ?
3 Twomba gũciũria: Nĩkĩ tũbuĩrĩte kũromba Jehova tũtĩgũkĩra? Nĩatĩa tũũmba kwagĩrithia maromba jeetũ nkũrũki? Nĩatĩa kũthũgaanĩria maromba jarĩa jarĩ Bibiriene kũũmba gũtũtethia kwagĩrithia maromba jeetũ? Na nĩatĩa tũũmba kũthithia rĩrĩa tũtĩkũmenya mantũ jarĩa tũkagweta marombene? Gatũcũnkũũne macokio ja biũria biu.
ROMBA JEHOVA ŨTĨGŨKĨRA
4. Nĩmbi biũmba gũtũtethia kwaranĩria na Jehova marombene tũtĩgũkĩra? (Zaburi 119:145)
4 Rĩrĩa twaciũkĩrwa atĩ Jehova nĩ mũcoore weetũ wa mma na nendaga gũtũtethia, tũkamũromba tũtĩgũkĩra. Mwandĩki wa Zaburi 119 naairitanĩrĩtie kwĩthĩrwa na ngwatanĩro ta ĩu amwe na Jehova. Naarĩ na mathĩĩna jamaingĩ ũtũũrone bwawe. Antũ bamwe nĩbaaragia mantũ ja ũrongo jamwegie. (Zb. 119:23, 69, 78) Kinya naarũjaga na gũtaũkĩrwa kwawe. (Zb. 119:5) Amwe nou, ataakĩrĩre kwĩra Jehova jarĩa jaarĩ nkorone.—Thoma Zaburi 119:145.
5. Nĩkĩ tũtĩbuĩrĩte kũrekeeria mathũgaanio jamathũũku jatũrigĩĩria kũromba? Taarĩĩria.
5 Jehova nendaga kinya barĩa bathithĩtie wĩyia bũũrito bamũromba. (Isa. 55:6, 7) Kwou tũtĩbuĩrĩte kũrekeeria mathũgaanio jamathũũku jatũrigĩĩria kũromba. Ngerekano, mwĩtithia wa ndege naijĩ atĩ no aranĩrie na barĩa barĩ gĩtuone kĩa ndege akeja kũbatara ũtethio. Rĩ, nabuĩrĩte kwigua nthao kũbaromba ũtethio rĩrĩa ata njĩra kana athithia ĩatia rĩngĩ? Arĩ. O ta ũu, magiita jamwe rĩrĩa twaũra kana twathithia meyia, nĩtũbuĩrĩte kwaranĩria na Jehova tũtĩgũkĩra.—Zb. 119:25, 176.
ŨRĨA TŨŨMBA KWAGĨRITHIA MAROMBA JEETŨ NKŨRŨKI
6-7. Nĩatĩa kũthũgaanĩria nkuma cia Jehova kũũmba gũtũtethia kwagĩrithia maromba jeetũ? Ejana ngerekano. (Tega kinya nteto irĩa irĩ gaiti)
6 Rĩrĩa twaranĩria na Jehova tũtĩkwitha, na njĩra ya kũmũmenyithia jarĩa jarĩ nkorone cietũ, bũu nĩbũtũtethagia kũmũthengeera. Kwou, nĩatĩa tũbuĩrĩte kũthithia nĩkenda twagĩrithia maromba jeetũ nkũrũki?
7 Thũgaanĩria nkuma cia Jehova.a O ũrĩa tũkathũgaanĩria nkuma ciawe nkũrũki, nou bũkethĩrwa bũrĩ bũbũũthũ kũmwĩra jarĩa jarĩ nkorone. (Zb. 145:8, 9, 18) Thũgaanĩria ngerekano ya mwarĩ wa baaba ũgwĩtwa Christine, ũrĩa ĩthe aarĩ muntũ wa mũthũũro na thanga. Arĩtaarĩĩria ũjũ: “Bũu nĩbwatũmaga mbona bũrĩ bũbũũmũ kwaranĩria na Jehova na kũmwona arĩ Baaba ũrĩna wendo. Ndoonaga teka atĩngĩũmba gũmpenda tontũ bwa gũtaũkĩrwa gwakwa.” Nĩ nkuma ĩrĩkũ ya Jehova yaamũtetherie. Ariuga ũjũ: “Wendo bwa Jehova bwa kwĩrĩgĩĩrĩka nĩbwatũmĩre ntiga gũkĩra. Ndĩna mma atĩkorontiganĩria. Kinya nkeeja kũgwa, akambũkĩĩria. Bũu nĩbũtũmaga mwĩra mantũ jonthe jarĩa jangwĩragia, na jarĩa jatũmaga nkĩra.”
8-9. Kũrĩna baita irĩkũ cia kũthũgaanĩria mantũ jarĩa ũkwenda kuuga mbere ũromba? Taarĩĩria.
8 Thũgaanĩria jarĩa ũkauga. Nĩbwega gũciũria biũria binna mbere ya kũromba. Ngerekano: ‘Nĩ thĩĩna ĩrĩkũ ngũkũrũkĩĩra nandĩ? Rĩ, kũrĩwe nkũbatara kũrekera? Rĩ, kũrĩ na ũntũ bũbũũmũ ngũkũrũkĩĩra bũrĩa nkũbatara Jehova antethia kũbũciinda?’ (2 An. 19:15-19) Kinya no tũthingate ngerekano ĩrĩa Jesũ eekĩre na njĩra ya kũthũgaanĩria mantũ jarĩa tũũmba kũromba Jehova jegie riĩtwa Rĩawe, Ũnene Bwawe, na wendi Bwawe.—Mat. 6:9, 10.
9 Rĩrĩa mwarĩ wa baaba ũgwĩtwa Aliska aamenyere mũkũrũ waawe naajĩtue nĩ kansa, nĩbwarĩ bũbũũmũ kĩrĩwe kũromba Jehova. Ariuga: “Nĩndainyĩrĩkĩte mono na bũu nĩbwatũmaga bwĩthĩrwa bũrĩ bũbũũmũ kĩrĩni kũromba.” Nĩmbi biamũtetherie? Ariuga: “Nĩnjũkagia kagiita kanna kũthũgaanĩria mantũ jarĩa nkauga, na bũu nĩbũntethetie kũrombera bangĩ antũ a kwithũgaanĩria akĩ. Kũthithia ũu nĩgũntethetie kwĩthĩrwa maarĩĩrĩte, na kũmenya mantũ mwanya mwanya jarĩa mpũmba kũromba Jehova.”
10. Nĩkĩ tũciũmie gũtumĩra ĩgiita rĩa kũngʼana kũromba? (Tega kinya mbica.)
10 Tumĩra ĩgiita rĩa kũngʼana kũromba. Kinya kethĩra maromba jamakuĩ nĩ ja gĩtũmi, gũtumĩra ĩgiita rĩa kũngʼana kũromba kũgatũtethia kũmenyithia Jehova jarĩa jarĩ nkorone cietũ.b Elijah, mũkũrũ wa Aliska ariuga: “Nĩnciũmagia kũromba jamaingĩ ndeene ya ntukũ, na bũu nĩbũntethetie gũkuĩĩria Jehova rĩrĩa ndatumĩra ĩgiita rĩa kũngʼana kũromba. Jehova atĩĩthagĩrwa na mpwĩ akĩendaga ndĩĩkia maromba, kwou nĩntumagĩra ĩgiita rĩa kũngʼana kwaria nawe.” Geria kũthithia ũjũ: Cwaa ĩgiita na antũ arĩa gũkwagĩra nĩkenda ũromba, kwombĩka na kajũ, ũtĩkwangaratanua, na ũmenyerie gũtumĩra ĩgiita rĩa kũngʼana kũromba.
Cwaa kaanya na antũ arĩa ũkaaranĩria na Jehova ũtĩkwangaratanua. (Tega gĩcuncĩ kĩa 10)
THŨGAANĨRIA MAROMBA JARĨA JARĨ BIBIRIENE
11. Nĩatĩa tũgunĩkaga twathũgaanĩria maromba jarĩa jarĩ Bibiriene? (Tega kinya kathandũkũ, “Rĩ, Nwigagua Tabo?”)
11 Wathũgaanĩria maromba ja kuuma nkorone, ndwĩmbo kana Zaburi irĩa irĩ Bibiriene ũkagunĩka mono. Gũcũnkũũna ũrĩa nthũmba cia Mũrungu ciaranagĩria nawe kuuma nkorone, kũgagũtethia kwonoreria Jehova jarĩa jarĩ nkorone. Womba kinya kwiritana mantũ jameerũ ja gũkumia Jehova marombene jaaku. Nkũrũkĩ, kwombĩka ũkona maromba jagwĩtanĩria na mantũ jarĩa ũgũkũrũkĩĩra.
12. Nĩ biũria birĩkũ tũũmba gũciũria rĩrĩa tũkũthũgaanĩria maromba jarĩa jarĩ Bibiriene?
12 Rĩrĩa ũkũthũgaanĩria maromba jarĩa jarĩ Maandĩkone, ciũrie: ‘Nũũ waarĩrie biugo biu, na nĩ mantũ jarĩkũ aakũrũkagĩĩra? Rĩ, nĩngũkũrũkĩĩra mantũ jakũngʼuanana na jarĩa jagweti marombene jaja? Nĩmbi nkwiritana kuumania na ĩromba rĩrĩ?’ Womba kũbatara kũthithia ũcũnkũũni nkũrũki nĩkenda wona macokio, ĩndĩ kwiritanĩria gwaku tĩ kwa ũtheri. Thũgaanĩria ngerekano iji inkaĩ.
13. Nĩ kĩthomo kĩrĩkũ kĩmwe ũkwiritana kuumania na Hanna kĩegie maromba? (1 Samweli 1:10, 11) (Tega kinya karatacine ka mbere.)
13 Thoma 1 Samweli 1:10, 11. Rĩrĩa Hanna aarombaga ĩromba rĩu, naakũrũkagĩĩra mantũ jaĩrĩ jamoomũ mono. Bwa mbere, naarĩ nthata na mwĩru waawe naakaraga akĩmũcikũũraga. (1 Sam. 1:4-7) Ũkeeja kwĩthĩrwa ũgĩkũrũkagĩĩra mathĩĩna jatĩkũthira rĩ, nĩatĩa ũũmba kwiritana kuumania na ĩromba rĩa Hanna? Naaboreerue arĩgũtumĩra ĩgiita rĩa kũngʼana kũromba na gwĩtũũrĩra Mũrungu nkoro yaawe. (1 Sam. 1:12, 18) Kinya tuĩ tũkaborerua ‘twarekereria Mwathani ũrito’ bwetũ na twamũtaarĩĩria ũrĩa tũkwigua bwegie ũntũ bũrĩa bũtwinyĩĩrĩtie.—Zb. 55:22.
Hanna noonoreerie Jehova jarĩa jaarĩ nkorone tontũ naarĩ nthata, na naameneragua nĩ mwĩru waawe. (Tega gĩcuncĩ kĩa 13)
14. (a) Nĩmbi bingĩ tũkwiritana kuumania na ngerekano ya Hanna? (b) Nĩatĩa tũũmba kwagĩrithia maromba jeetũ twathũgaanĩria maromba jarĩa jarĩ Maandĩkone? (Tega nteto irĩa irĩ gaiti.)
14 Mĩaka ĩmĩkai Samweli arĩgũciarwa, Hanna naamwikĩrie kĩrĩ Eli Mũthĩnjĩri Ũrĩa Mũnene. (1 Sam. 1:24-28) Gũkũrũkĩĩra ĩromba rĩawe, noonanĩrie atĩ naarĩ na mma Jehova nakaragia na akamenyeera atumĩkĩri baawe etĩkĩkua.c (1 Sam. 2:1, 8, 9) Kinya kethĩra mathĩĩna ja nja yaawe jataathirĩre, neetĩre na mbere kũthũgaanĩria ũrĩa Jehova amũtharimĩte. Nĩmbi tũkwiritana? Tũkoomba kũmĩĩria mantũ jamoomũ tweta na mbere kũthũgaanĩria ũrĩa Jehova atũtharimĩte.
15. Nĩmbi tũkwiritana kuumania na ĩromba rĩa kĩroria Jeremia, rĩrĩa twakũrũkĩĩra wagi bwa ĩota? (Jeremia 12:1)
15 Thoma Jeremia 12:1. Ĩgiita rĩmwe kĩroria Jeremia naacumbũkaga ona antũ bathũũku bakĩũmbana ũtũũrone. Kinya naacumbũkaga tontũ bwa mantũ jamaaĩ jarĩa Aisiraeli bangĩ baamũthithagĩria. (Jer. 20:7, 8) Kinya tuĩ twomba kwigua o tawe rĩrĩa twona antũ aayia bakĩũmbana ũtũũrone kana bagĩtũmeneeria. Gũtĩrĩo Jeremia ona teka Mũrungu atĩ wa ĩota kinya kethĩra naaigagua bũbũũĩ. Naairikithĩĩrie nkũrũki atĩ Jehova nĩ wa ĩota o ũrĩa oonaga agĩkanũkia antũ Baawe barĩa ndemi. (Jer. 32:19) Kinya tuĩ twomba kwonoreria Jehova jarĩa jatwinyĩĩrĩtie gũkũrũkĩĩra maromba, twĩrĩgĩĩrĩte atĩ akathiria wagi bwa ĩota bunthe ĩgiita rĩrĩa rĩkwagĩra.
16. Rĩrĩa twaigua twinyĩĩrĩkĩte, nĩmbi tũũmba kwiritana kuumania na ĩromba rĩa Mũlawi ũrĩa waarĩ ũtaene? (Zaburi 42:1-4) (Tega kinya mbica.)
16 Thoma Zaburi 42:1-4. Rwĩmbo rũrũ rwandĩkĩrwe nĩ Mũlawi ũmwe arĩ ũtaene ũrĩa ũtĩngĩũmba kũthathathayia amwe na bangĩ kĩũrũne. Zaburi ĩjĩ nĩkũguũra ũrĩa aaigagua. Kinya tuĩ no twigue tawe rĩrĩa twarigĩĩrua kuumagara kana twaingĩrwa ncera tontũ bwa wĩtĩkio bwetũ. Magiita jamwe no twigue bwega, rĩngĩ tũkaigua tuunĩki nkoro. Amwe nou, nĩ ũntũ bũbwega kwĩra Jehova jarĩa tũgũkũrũkĩĩra. Bũu bwomba gũtũtethia gwicũnkũũna na kwona mantũ na njĩra ĩnjega. Ngerekano, Mũlawi ũu naaciũkĩĩrwe atĩ arĩngĩĩthĩrwa na twanya tũngĩ twa gũkumia Jehova. (Zb. 42:5) Kinya naathũgaanĩĩrie ũrĩa Jehova aamũmenyagĩĩra. (Zb. 42:8) Kũromba Mũrungu kuuma nkorone kũgatũtethia gũciũkĩrwa nĩ ũrĩa tũkwigua, kwĩthĩrwa na thĩĩrĩ kaĩrĩ, na kũgĩa inya ya kũmĩĩria.
Mũlawi ũrĩa waandĩkĩre Zaburi 42 noonoreerie Mũrungu jarĩa jaarĩ nkorone. Rĩrĩa twera Jehova jarĩa jarĩ nkorone gũkũrũkĩĩra maromba, bũu bũgatũtethia kwĩthĩrwa na mwonere jũmwega kwerekera mantũ jarĩa tũgũkũrũkĩĩra. (Tega gĩcuncĩ kĩa 16)
17. (a) Nĩmbi tũkwiritana kuumania na ĩromba rĩa Jona? (Jona 2:1, 2) (b) Nĩatĩa biugo bimwe birĩa birĩ kĩrĩ Zaburi biũmba gũtũtethia rĩrĩa tũgũkũrũkĩĩra mantũ jamoomũ? (Tega nteto irĩa irĩ gaiti.)
17 Thoma Jona 2:1, 2. Jona aarombere ĩromba rĩu arĩ kĩune kĩa gĩkũyũ gĩkĩnene. Kinya kethĩra naaregete kwathĩka, naarĩ namma atĩ Jehova arĩngĩigua kajũ kaawe. Kĩrĩ ĩromba rĩawe, naatumĩĩre biugo bibiingĩ birĩa birĩ kĩrĩ Zaburi.d Kwombĩka naaijĩ Zaburi ĩu bwega. Kũthũgaanĩria biugo biu nĩgwatũmĩre ethĩrwa na ũmma atĩ Jehova arĩngĩmũtethia. Kinya tuĩ twaciũmia gwĩĩka mathũgaanione mĩstaarĩ ya Bibiria, twomba kũmĩriikana na ĩgatũboreria rĩrĩa tũkũromba Jehova magiitene jamomũ.
ĨTA NA MBERE KŨTHENGEERA JEHOVA GŨKŨRŨKĨĨRA MAROMBA
18-19. Kethĩra rĩmwe nĩtũremagwa kwĩra Jehova jarĩa tũgũkũrũkĩĩra, nĩatĩa Aroma 8:26, 27 ĩgũtũrikithĩria? Ejana ngerekano.
18 Thoma Aroma 8:26, 27. Magiita jamwe twomba kwigua twinyĩrĩkĩĩte nĩ mantũ kinya tũkaremwa nĩ kũromba. Ĩndĩ kũu tĩ kwonania tũtĩna ũtethio. Magiita ta jau, kĩrundu gĩkĩtheru kĩa Jehova ‘nĩgĩtwerencanagĩĩra.’ Nĩatĩa kĩthithagia ũu? Nĩgũkũrũkĩĩra maromba jamaingĩ jarĩa Jehova aatũmĩre jaandĩkwa Rũtetone rwawe gũkũrũkĩĩra kĩrundu kĩu. Rĩrĩa twaigua tũkĩremwa kũgweta jarĩa jarĩ nkorone, Jehova omba gwĩtĩkĩĩria biugo bimwe birĩa bitumĩri marombene jarĩa jarĩ Maandĩkone birĩ ta mantũ jarĩa tũbataraga, na agatũcokeria.
19 Ũntũ bũu nĩbwatetherie mwarĩ wa baaba ũgwĩtwa Yelena wa kuuma Russia. Naagwatĩrwe tontũ bwa kũromba na kũthoma Bibiria. Naaigagua ainyĩrĩkĩte mono kĩmathũgaanio na atĩngĩũmba kũromba. Ariuga ũjũ: “Nĩndaariikanĩre atĩ rĩrĩa nkwigua mpinyĩrĩkĩĩte na ntĩkũmenya mbuge atĩa marombene, Jehova agetĩkĩĩria maromba jarĩa jarĩ Maandĩkone ja nthũmba ciawe . . . jarĩ ta mantũ jarĩa ndĩrĩngĩmũromba. . . . Ũntũ bũu nĩbwamboreerie mono rĩrĩa ndakũrũkagĩĩra mantũ jamoomũ.”
20. Nĩatĩa tũũmba kũthuranĩra mathũgaanio jeetũ mbere tũromba rĩrĩa twinyĩĩrĩtue nĩ mantũ?
20 Tĩ bũbũũthũ gũkirĩĩria nĩkenda tũromba rĩrĩa twinyĩĩrĩtue nĩ mantũ. Nĩkenda tũthuranĩra mathũgaanio jeetũ, no tũthikĩĩre Zaburi irĩa irekondetwe ikĩthomwa. Kinya twomba kwandĩka jarĩa tũkwigua nkorone, o ta ũrĩa Mũnene Daudi aathithĩrie. (Zb. 18, 34, 142; utangulizi.) Nĩ mma gũtĩ watho bwĩĩki bwegie ũrĩa tũũmba kwithuranĩra rĩrĩa tũkwenda kũromba. (Zb. 141:2) Tumĩra njĩra ĩrĩa ĩgakwagĩra nkũrũki.
21. Nĩkĩ tũũmba kũromba kuuma nkorone?
21 Nĩtũboragĩrua kũmenya atĩ Jehova naciũkagĩrwa nĩ ũrĩa tũkwigua kinya mbere tũmwĩra. (Zb. 139:4) Amwe nou, nendaga tũmwĩra ũrĩa tũkwigua na tũmwonia nĩtũkũmwĩrĩgĩĩra. Kwou, menya ũkĩra kũromba Baaba waaku wa ĩgũrũ. Ĩkĩrwa inya nĩ maromba jarĩa jarĩ Rũtetone rwawe. Mũrombe kuuma nkorone. Mwĩre mantũ jarĩa jagũkũgwĩria na jarĩa jakwinyĩĩrĩtie. Tontũ Jehova nĩ mũcoore waaku wa mma, rĩonthe akethĩrwa amwe nagwe!
RWĨMBO NA. 45 Kutafakari kwa Moyo Wangu
a Thũgaanĩria “nkuma imwe cia Jehova” irĩa igweti kĩrĩ Maandiko kwa Ajili ya Maisha ya Mkristo kĩrĩ kĩongo “Yehova.”
b Maromba jarĩa muntũ akũrombithia kĩũthũranone jabuĩrĩte kwĩthĩrwa jarĩ jamakuĩ.
c Rĩrĩa Hanna aarombaga, naatumĩĩre biugo bikũngʼuanana na birĩa Musa aandĩkĩte. Bũu bũrĩonania naamenyeretie kũthũgaanĩria Maandĩko. (Kur. 4:35; 8:18; 32:4, 39; 1 Sam. 2:2, 6, 7) Mĩaka ĩmiingĩ nyumene, Maria ngʼina wa Jesũ, naatumĩĩre biugo bia gũkumia Jehova bikũngʼuana na bia Hanna.—Luka 1:46-55.
d Ngerekano, teganĩĩria Jona 2:3-9 na Zaburi 69:1; 16:10; 30:3; 142:2, 3; 143:4, 5; 18:6; na 3:8, bibanganĩtue o ũrĩa Jona aabitumĩĩre.