KĨTHOMO GĨA KWIRITANA KĨA 43
RWĨMBO NA. 41 Tafadhali Sikiliza Sala Yangu
Riikana Kũrombera Bangĩ
‘ Bũrombanagĩre . . . Kũromba kwa muntũ ũrĩa ũrĩ ũmwagĩru kwomba gũtũma mantũ jamanene jathithua.’—JAK. 5:16.
JARĨA TŨKAIRITANA
Tũkoona nĩkĩ bũrĩ ũntũ bwa gĩtũmi kũrombera bangĩ na ũrĩa tũũmba kũthithia ũu.
1. Nĩatĩa tũkũmenya atĩ Jehova nonaga maromba jeetũ jarĩ ja gĩtũmi?
MAROMBA nĩ kĩewa kĩa bata mono. Thũgaanĩria ũntũ bũbũ: Jehova naete araĩka ngũgĩ imwe. (Zb. 91:11) Kinya naete mũtaana waawe ngũgĩ cia gĩtũmi mono. (Mat. 28:18) Amwe nou rĩ, kũrĩwe aete ngũgĩ ya kũthikĩĩra maromba jeetũ? Arĩ, Jehova wenka nĩwe ũthithagia ũu. Jehova, ‘Mwigua wa maromba,’ nĩwe wengwa ũtũthikagĩĩra.—Zb. 65:2.
2. Nĩ ngerekano ĩrĩkũ mũtumwa Paũlũ aatwĩkĩĩre yegie kũrombera antũ bangĩ?
2 Kinya kethĩra Jehova natweete ũciathi bwa kũmwĩra bwegie mobatu jeetũ, nĩtũbuĩrĩte kũrombera antũ bangĩ. Mũtũmwa Paũlũ naathithagia ũu. Ngerekano, naandĩkĩĩre kĩũthũrano kĩa Efeso ũjũ: ‘Nĩmbũgwetaga magiita jonthe marombene jakwa.’ (Aef. 1:16) Paũlũ kinya naarombaga tontũ bwa muntũ ũmwe ũmwe. Ngerekano, neerĩre Timotheo ũjũ: ‘Nĩnkaathaga Mũrungu, . . . nĩ ũntũ bwa ũrĩa nkũriikanaga nkĩromba Mũrungu ntĩgũtirikama.’ (2 Tim. 1:3) Paũlũ naarombaga tontũ bwa mantũ jarĩa jaamũthangĩkagia. (2 Ako. 11:23; 12:7, 8) Amwe nou, neethagĩrwa na kaanya ga kũrombera bangĩ.
3. Nĩkĩ tũũmba kũũrĩrua kũrombera antũ bangĩ?
3 Magiita jamwe twomba kũũrĩrua kũrombera antũ bangĩ. Nĩkĩ? Mwarĩ wa baaba ũgwĩtwa Sabrinaa nakũgweta gĩtũmi kĩmwe. Ariuga: “Ĩgiitene rĩrĩ, kũrĩ na mantũ jamaingĩ jagũtwinyĩĩria ũtũũrone. Twomba kũthũgaanĩria mathĩĩna jeetũ mono na tũkaaga kaanya ga kũromba tontũ bwa bangĩ.” Rĩ, ũrakarĩkĩrwa nĩ ũntũ bũu? Kethĩra nĩu, kĩthomo gĩkĩ gĩgagũtethia. Kĩgataarĩĩria (1) nĩkĩ bũrĩ ũntũ bwa gĩtũmi kũrombera bangĩ na 2) mendekithia ja ũrĩa ũũmba kũthithia ũu.
NĨKĨ TŨBUĨRĨTE KŨROMBERA BANGĨ?
4-5. Nĩatĩa kũrombera bangĩ kũũmba gũtũma ‘mantũ jamanene jakarĩka’? (Jakubu 5:16)
4 Kũrombera bangĩ nĩgũtũmaga ‘mantũ jamanene jagakarĩka.’ (Thoma Jakubu 5:16.) Rĩ, kũrombera bangĩ no gũtũme gũkethĩrwa na ũgarũrũku kĩrĩ mantũ jarĩa bagũkũrũkĩĩra? Ĩĩ. Tontũ Jesũ naamenyaga atĩ nyuma ya ĩgiita rĩĩkai Petero arĩngĩmũkana, naaugĩre ũjũ: ‘Ĩndĩ nĩnkũromberete wĩtĩkio bwaku bũtĩkeeje kũũra.’ (Luk. 22:32) Kinya Paũlũ naamenyaga atĩ kũrombera bangĩ kũrĩngĩreta ũgarũrũku ũtũũrone bwao. Rĩrĩa aaingĩri nceera, naandĩkĩĩre Filemoni ũjũ: ‘Nĩmbĩrĩgĩrĩĩte atĩ ngeetĩkĩĩrua mbĩje kĩrĩbuĩ nĩ ũntũ bwa maromba jenu.’ (Flm. 22; tega study note “for I am hoping that through your prayers.”) Ta maumĩĩra, Paũlũ naarekererue na aracokera ngũgĩ yaawe ya gũtũmĩĩria.
5 Kũu tĩ kuuga twomba gũkinyĩĩria Jehova atũthithĩria jarĩa tũkwenda. Nĩ mma nonaga mobatu ja nthũmba ciawe, na magiita jamwe nathuraga kwiingia jarĩa bakũmũromba. Kũmenya ũu kũgatũtethia kũromba Jehova kuuma nkorone bwegie jarĩa tũgũkũrũkĩĩra na tũtige mantũ njarene ciawe twĩrĩgĩĩrĩte akajojũria.—Zb. 37:5; tega 2 Akorintho 1:11 na study notes.
6. Kũrombera bangĩ kwomba gũtũma twĩthĩrwa na mwonere jũrĩkũ kũberekera? (1 Petero 3:8)
6 Kũrombera bangĩ nĩgũtũmaga tũbaigĩĩrua kĩao. (Thoma 1 Petero 3:8.) Muntũ ũrĩna kĩao nonaga jarĩa jakũthangĩkia bangĩ na akabatethia. (Mar. 1:40, 41) Mũkũrũ ũmwe wa kĩũthũrano ũgwĩtwa Michael ariuga: “Rĩrĩa ndaromba tontũ bwa mobatu ja bangĩ, nĩnciũkagĩrwa nĩ mantũ jamoomũ jarĩa bagũkũrũkĩĩra na bũu bũgatũma mbonia wendo nkũrũki. Nĩmbigagua ndĩ akuĩ nabo, kinya kethĩra batĩkũmenya nĩnkũbarombera.” Mũkũrũ ũngĩ ũgwĩtwa Richard nagũtaarĩĩria iguni bingĩ bia kũthithia ũu. Ariuga: “Rĩrĩa twarombera muntũ ũngĩ, nou twigagua tũkĩenda kũmũtethia.” Arĩongera ũjũ: “Rĩrĩa twatethia muntũ ũrĩa tũkũrombera, nĩ teka twĩthagĩrwa tũgĩtethagia Jehova gũcokia ĩromba rĩawe.”
7. Nĩatĩa kũrombera bangĩ kũũmba gũtũtethia kwĩthĩrwa na mwonere jũmwega jwegie mathĩĩna jeetũ? (Afilipi 2:3, 4) (Tega kinya mbica.)
7 Kũrombera bangĩ nĩgũtũtethagia kwĩthĩrwa na mwonere jũmwega kwerekera mathĩĩna jeetũ. (Thoma Afilipi 2:3, 4.) Twinthe nĩtũrũjaga na mantũ manna jamoomũ jarĩa jaumanagia na nthĩgũrũ ĩjĩ ĩkwathwa nĩ Shaitani. (1 Joh. 5:19; Kug. 12:12) Kũmenyeria kũrombera bangĩ, nĩgũtũtethagia kũriikana atĩ, ‘aana bangĩ ba Abagu wenu barĩa barĩ nthĩgũrũ yonthe, kinya bo ibeethagĩrwa bakĩthangĩkagua na mĩthangĩko o ĩu.’ (1 Pet. 5:9) Painia ũgwĩtwa Katherine ariuga: “Kũrombera bangĩ nĩgũntethagia kũriikana atĩ, kinya bo nĩbagũkũrũkĩĩra mantũ jamoomũ. Bũu nĩbũntethagia ntĩgakare nkĩthũgaanagĩria mathĩĩna jakwa nkũrũki ya kĩthimi.”
Kũrombera antũ bangĩ nĩgũtũmaga tũtĩkathũgaanĩrie mathĩĩna jeetũ mono (Tega gĩcuncĩ kĩa 7)d
NĨ BAKŨBATARA MAROMBA JEETŨ
8. Gweta ngerekano ya antũ barĩa tũũmba kũgweta marombene jeetũ.
8 Nĩ baaũ tũũmba kũgweta marombene jeetũ? No tũrombere barĩa barĩna mathĩĩna ja ũgima bwa mwĩrĩ, antũ babeethĩ barĩa bakũmeneerua cukuru, kana barĩa bakũrwa na mathĩĩna ja ũkũrũ. Babaingĩ ba barĩa tũthathayia nabo nĩbagũkũrũkĩĩra ũregani kuuma kĩrĩ thirikarĩ kana antũ ba nja. (Mat. 10:18, 36; Atum. 12:5) Ataana ba baaba bamwe nĩbatiganĩrĩtie nja ciao tontũ bwa wagagu bwa gĩciaca. Bangĩ nĩbaringithĩtue nĩ mogwati ja wĩthĩre. No twĩthĩrwe tũtĩkũmenya ataana na aarĩ ba baaba bau. Ĩndĩ rĩrĩa twabarombera, nĩtwonanagia nĩtũkũthingata watho bwa Jesũ bwa ‘kwendana.’—Joh. 13:34
9. Nĩkĩ tũbuĩrĩte kũrombera barĩa batongagĩĩria ũthuranĩrine bwa Jehova amwe na ekũrũ baao?
9 Kinya no tũrombere barĩa batongagĩĩria ũthuranĩrine bwa Jehova. Bamwe baao nĩ ataana ba baaba ba Kĩama Kĩrĩa Gĩtongagĩĩria na atetheeria baao, akamĩtĩ na ategeeri ba obici cia rwangʼi, ategeeri ba mũthiũrũko, akũrũ ba kĩũthũrano, na nthũmba cia ũtungatĩri. Kinya kethĩra nĩbairitanagĩria tontũ bwetũ, babaingĩ baao nĩbethagĩrwa na mantũ jamoomũ ũtũũrone bwao. (2 Ako. 12:15) Ngerekano, mũtegeeri wa mũthiũrũko ũgwĩtwa Mark ariuga: “Ũntũ bũmwe bũbũũmũ mono ndũjaga nabu nĩ kwĩthĩrwa kũraaja na aciari bakwa barĩa bainyĩrĩtue nĩ ũkũrũ. Bobaĩrĩ barĩ na mathĩĩna ja ũgima bwa mwĩrĩ. Kinya kethĩra mwarocia na mũkũrũ waawe nĩbakũbamenyeera, nĩmbigagua bũbũũĩ tontũ ntĩkũbatethia ĩmwe kwa ĩmwe.” Kwĩthĩrwe nĩtũkũmenya mantũ jamoomũ jarĩa ataana ba baaba bau bagũkũrũkĩĩra kana tũtĩkũjamenya, nĩbwega kũbarombera. (1 Athe. 5:12, 13) Kinya nĩtũbuĩrĩte kũrombera ekũrũ baao tontũ bwa kũbagwata mbaru na njĩra ya wĩtĩkĩkua nĩkenda beeta na mbere kwiingia twanya twao.
10-11. Rĩ, Jehova nagwĩragua rĩrĩa twarombera ataana na aarĩ na baaba kinya kethĩra tũtĩkũbagweta na mariĩtwa? Taarĩĩria.
10 O ta ũrĩa twairitana, kaingĩ nĩtũrombagĩra ataana na aarĩ ba baaba bonthe. Ngerekano, nĩtũrombaga Jehova atethie bonthe barĩa baingĩri nceera kana aborerie barĩa bakuĩri nĩ endwa baao, kinya kwethĩrwa gũtĩwe tũkũgweta na riĩtwa. Mũkũrũ wa kĩũthũrano ũgwĩtwa Donald ariuga, “Tontũ ataana na aarĩ ba baaba barĩa bagũkũrũkĩĩra mantũ jamoomũ nĩbabaingĩ, magiita jamwe twomba kũbagweta barĩ amwe marombene jeetũ.”
11 Rĩ, Jehova nagwĩragua nĩ maromba ta jau? Ĩĩ! Gĩtũmi nĩ tontũ tũtĩkũmenya mobatu jongwa jarĩa ataana na aarĩ ba baaba bonthe bagũkũrũkĩĩra. Kwou nĩ ũntũ bũkwagĩra kũromba tontũ bwa mantũ jarĩa bonthe bagũkũrũkĩĩra. (Joh. 17:20; Aef. 6:18) Maromba jau nĩjarikithagia atĩ ‘nĩtwendete ataana bonthe’ ba nthĩgũrũne yonthe.—1 Pet. 2:17.
RĨRĨA ŨKŨROMBERA MUNTŨ KĨŨMBE
12. Nĩatĩa kũmenya jarĩa bangĩ bagũkũrũkĩĩra kũũmba gũtũtethia kũgweta mantũ jongwa rĩrĩa tũkũbarombera?
12 Menya jarĩa bangĩ bagũkũrũkĩĩra. O amwe na kũrombera ataana na aarĩ ba baaba bonthe, nĩbwega kũgweta muntũ na riĩtwa rĩrĩa tũkũromba. Kũrĩwe kĩũthũranone kĩenu ũkũrwa na mbajua ĩndito? Rĩ, kũrĩna muntũ ũmwĩthĩ ũkũmenya uunĩki nkoro mbuga tontũ bwa mathĩĩna jarĩa agũkũrũkĩĩra cukuru? Rĩ, kũrĩ na mũciari ũrĩ wenka ũgũciũmia kũrera mwana na ‘kũmwoneria ũrĩa athingatanĩkia na Mwathani’? (Aef. 6:4) Kũmenya jarĩa bangĩ bagũkũrũkĩĩra kũgagũtethia kũbenda, kũbaigĩrua kĩao, na gũtũme wenda kũbarombera.b—Aro. 12:15.
13. Nĩmbi bigatũtethia kũrombera kinya barĩa tũtijĩ?
13 Bagwete na mariĩtwa rĩrĩa ũkũromba. No tũthithie ũu kinya rĩrĩa tũkũrombera barĩa tũtaacemania nabo. Ngerekano, thũgaanĩria ataana na aarĩ ba baaba barĩa barĩ nceera narĩa, Crimea, Eritrea, Russia, na Singapore. Kĩrĩ jw.org, ũkoona mariĩtwa ja barĩa baingĩri nceera.c Mũtegeeri wa mũthiũko ũgwĩtwa Brian ariuga: “Nĩmbonete kwandĩka mariĩtwa ja ataana ba baaba barĩa barĩ nceera na kũjagweta na kajũ, nĩgũntethagia kũjariikana na kũbagweta rĩrĩa nkũromba.”
14-15. Nĩatĩa tũũmba kũmenya ũntũ bungwa bũrĩa tũkagweta marombene?
14 Gweta ũntũ bungwa rĩrĩa ũkũromba. Michael, ũrĩa ũkũgweti ariuga: “Rĩrĩa nkũthoma mantũ kĩrĩ jw.org jegie barĩa barĩ nceera nĩngeragia kũthũgaanĩria ũrĩa ndĩngĩigua kethĩra nĩni mpingĩri. Nĩnkũmenya ndĩngĩmakĩra mwekũrũ wakwa, na ngaciũmia kwona nakũmenyeerwa. Bũu nĩbũtũmaga menya ũntũ bungwa bwa kũgweta rĩrĩa nkũrombera ataana ba baaba barĩa barĩ nceera bagũrene.”—Ahi. 13:3.
15 Rĩrĩa twathũgaanĩria jarĩa ataana ba baaba bagũkũrũkĩĩra nceera, tũkamenya mantũ jangĩ jarĩa tũũmba kũgweta rĩrĩa tũkũbarombera. Ngerekano, no tũrombe nĩkenda akaria ba nceera babathithĩria na njĩra ya kĩao na kinya barĩa bakwathana batĩkabarigĩĩrie kũthathayia. (1 Tim. 2:1, 2) Twomba kũromba nĩkenda bangĩ kĩũthũranone bekĩrwa inya nĩ ngerekano ya wĩtĩkĩkua ya barĩa barĩ nceera, kana barĩa bainganĩrĩtue nabo bakucĩĩrua nĩ mwĩtĩre jwao jũmwega na bathikĩĩra nkuma yeetũ ĩnjega. (1 Pet. 2:12) No tũthithie o ũu rĩrĩa tũkũrombera ataana na aarĩ ba baaba barĩa bagũkũrũkĩĩra mantũ jangĩ jamoomũ. Twamenya jarĩa bangĩ bagũkũrũkĩĩra, twabagweta na mariĩtwa na ũntũ bungwa marombene jeetũ, tũkonania ‘nĩtwendene o muntũ na ũngĩ.’—1 Athe. 3:12.
MWONERE JŨNGʼANĨĨRĨTE JWEGIE MAROMBA JEETŨ
16. Nĩatĩa tũũmba kwĩthĩrwa na mwonere jũngʼanĩĩrĩte rĩrĩa tũkũromba? (Mathayo 6:8)
16 O ta ũrĩa twairitana, kũrombera bangĩ kwomba gũtũma mantũ jaao jagarũka. Amwe nou, nĩtũkũbatara kwĩthĩrwa na mwonere jũngʼanĩĩrĩte. Rĩrĩa tũkũromba, tũtĩĩthagĩrwa tũkĩmenyithagia Jehova ũntũ atĩkũmenya, na tũtĩbuĩrĩte kũmwatha ũrĩa akathithia bwegie ũntũ bũrĩa tũgũkũrũkĩĩra. Jehova naijĩ mobatu ja nthũmba ciawe mbere bo bongwa kana kinya tuĩ tũjamenya. (Thoma Mathayo 6:8.) Ĩndĩ rĩ, nĩkĩ tũbuĩrĩte kũromba tontũ bwa bangĩ? O amwe na itũmi birĩa biagwetwa kĩthomone gĩkĩ, ĩu kinya nĩ njĩra ya kwonania ũrĩa tũmakagĩra bangĩ. Wendo nĩbu bũtũmaga tũbarombera na Jehova nagwĩragua rĩrĩa ona tũkĩonania wendo tawe.
17-18. Taarĩĩria nĩkĩ tũbuĩrĩte kũrombera bangĩ. Ejana ngerekano.
17 Kinya kethĩra maromba jeetũ jatĩratũma mantũ ja ataana na aarĩ ba baaba jagarũka, nĩjonanagia nĩtũbendete, na Jehova nagwĩragĩrua ũntũ bũu. Gatũtaarĩĩrie ũntu bũu na ngerekano ĩjĩ: Thũgaanĩria nja ĩrĩna kaana ga kaarĩ na ga kaĩjĩ. Kaĩjĩ nĩkamaami kaajĩtue. Rĩu kaarĩ gakambia kwerenca ĩthe gakĩmwĩraga: “Baaba, mũtanocia najĩtue mono! Itũ bu, ona ũrĩa ũũmba kũmũtethia.” Kinya kethĩra nakũmwĩra ũu, tĩ kuuga atĩene najĩtue; najũkĩtie matagaaria ja kũmũtethia tontũ namwendete na namũmakagĩra. Gũtĩ nkanja ĩthe akagwĩrua mono kwona kaarĩ gakĩmakĩra mũtanongʼina mono na kwenda atethua.
18 Ũu nĩu Jehova endaga twonania nĩtũkũmakĩra bangĩ na tũromba tontũ bwao. Rĩrĩa tũkũthithia ũu, maromba jeetũ nĩjonanagia tũrĩna wendo bũbũnene kwerekera bangĩ, na Jehova nagwĩragĩrua ũntũ bũu. (2 Athe. 1:3; Ahi. 6:10) Na o ta ũrĩa kinya twarĩkia kwarĩĩria, magiita jamwe maromba jeetũ jomba gũtũma ũtũũro bwa antũ bangĩ bũgarũka. Kwou, rekeni twinthe tũciũmie kũriikana bangĩ marombene jeetũ.
RWĨMBO NA. 101 Kufanya Kazi Pamoja kwa Umoja
a Mariĩtwa jamwe nĩjacĩncĩtue.
b Tega vidio ĩjĩ ya Takeshi Shimizu: Jehova Nĩwe ”Wigagua Maromba” kĩrĩ jw.org/mer
c Nĩkenda wona mariĩtwa ja ataana na aarĩ ba baaba barĩa baingĩri nceera tontũ bwa wĩtĩkio bwao, ĩta kĩrĩ jw.org na ũcwee “Mashahidi wa Yehova Walio Gerezani kwa Sababu ya Imani Yao—Kulingana na Eneo.”
d GŨTAARĨĨRIA MBICA:Ataana na aarĩ ba baaba barĩa bagũkũrũkĩĩra mantũ jamoomũ bakĩrombaga tontũ bwa bangĩ.