KĨTHOMO GĨA KWIRITANA KĨA 41
RWĨMBO NA. 108 Upendo Mshikamanifu wa Mungu
Wendo bwa Mũrungu nĩ bwa Gũtũũra
‘ Kaatheni Mwathani, tontũ nĩ ũmwega; tontũ kĩao kĩawe [wendo] nĩ gĩa kenya na kenya.’—ZB. 136:1.
JARĨA TŨKAIRITANA
Tũkoona ũrĩa kwĩthĩrwa na mwonere jwa Kĩmaandĩko jwegie wendo bwa Jehova kũgatwĩkĩra inya twakũrũkĩĩra mantũ jamoomũ.
1-2. Nĩ mantũ jarĩkũ jamoomũ Akristũ babaingĩ bakũrũkagĩĩra?
ŨTHŨGAANIA gĩtarũ kĩrĩ ĩriene na kũrĩna kiurutani gĩkĩnene. Rĩu mĩgombe ĩkambia gũkĩringa ĩgĩtindĩkĩte. Kethĩra gũtĩona muntũ wa kwĩnĩka nanga, gĩtarũ kĩu kĩgeta o arĩa mĩgombe ĩgakĩerekeria. Nanga ĩgatetheeria gĩtarũ gũkara kĩriki rĩrĩa kũrĩna kiurutani gĩkĩnene.
2 Rĩrĩa ũgũkũrũkĩĩra mantũ jamoomũ no wigue ta gĩtarũ kĩu. Mantũ jomba gũkara jakĩgarũkaga na rĩmwe jagakwinyĩĩria nkũrũki. Magiita jamwe womba kwigua Jehova nakwendete na nagũgũtethia; rĩngĩ ũkaigua teka atĩonaga jarĩa ũgũkũrũkĩĩra. (Zb. 10:1; 13:1) Mbuga mũcoore waaku no akwĩre biugo bia gũgwĩkĩra inya, na ũkaigua bwega ĩgiita rĩĩkai. (Nju. 17:17; 25:11) Ĩndĩ nyuma ya kagiita, ũkambia kwĩthĩrwa na nkanja kaĩrĩ. Kinya womba kwona teka Jehova agũtiganĩrĩtie. Nĩatĩa ũũmba kwĩnĩka nanga yaaku na njĩra ya ngerekano rĩrĩa ũgũkũrũkĩĩra mantũ jamoomũ? Kana, nĩatĩa ũũmba kwirikithĩria na gũkara wĩtĩkĩtie buru atĩ Jehova nakwendete na agagũtethia?
3. (a) Nĩatĩa Zaburi 31:7 na 136:1 ĩgũtũritana bwegie wendo na wĩtĩkĩkua bwa Jehova? (b) Nĩkĩ tũũmba kuuga Jehova nĩwe ngerekano ĩrĩa njega nkũrũki ya kwonania nkuma iu? (Tega kinya mbica.)
3 Ũntũ bũmwe bũrĩa bũũmba gũgũtethia gũkara ũriki ĩgiita rĩa magerio nĩ kũriikana wendo bwa Jehova na wĩtĩkĩkua bwawe. (Thoma Zaburi 31:7; 136:1.) Kiugo kĩrĩa aja gĩtaũri ‘kĩao’ na Mũgambo jwa Kĩhibiriania nĩ wendo bwa gũtũũra na kĩonanagia ngwatanĩro ĩndiku na ĩtĩna mũthia ĩrĩa muntũ omba kwĩthĩrwa nayo kwerekera ũngĩ. Jehova nĩwe ngerekano ĩrĩa njega nkũrũki ya kwonania wendo na wĩtĩkĩkua. Biugo bia Kĩhibrania birĩa bĩtumĩri kĩrĩ Kuuma 34:6, 7 na Zaburi 86:5 bionanagia wendo na wĩtĩkĩkua nĩ nkuma cia gĩtũmi mono cia Jehova. Mĩstaarĩ ĩu ĩrĩonania atĩ Jehova atĩtiganagĩria atumĩkĩri baawe etĩkĩkua. Kũriikana atĩ Jehova nĩ mwĩtĩkĩkua kwomba gũgũtethia gũkara ũriki rĩrĩa ũgũkũrũkĩĩra mĩgombe ya mantũ jamoomũ.—Zb. 23:4.
O ta ũrĩa nanga ĩgwatagĩĩra gĩtarũ gĩtĩgeete na mĩgombe, kwĩthĩrwa na ũrikithia atĩ Jehova natwendete kũgatũtethia gũkara tũriki twakũrũkĩĩra mantũ jamoomũ. (Tega gĩcuncĩ kĩa 3)
WENDO BWA JEHOVA NĨ ŨRITANI BWA MŨSINGI
4. Ejana ngerekano ya moritani ja mũsingi ja Bibiria na ũtaarĩĩrie nĩkĩ tũjetĩkĩtie buru.
4 Njĩra ĩngĩ ũũmba gũkara wirikĩtie ĩgiita rĩa magerio nĩ kũthũgaanĩria wendo bwa Jehova bũrĩ ũritani bwa mũsingi. Nĩmbi ũthũgaanagĩria waigua biugo “ũritani bwa mũsingi”? Kwombĩka nĩ mantũ jarĩa wĩtĩkĩtie jaumanĩtie na Rũteto rwa Mũrungu. Ngerekano, nĩ wiritanĩte atĩ riĩtwa rĩa Mũrungu nĩ Jehova, Jesũ nĩ mũtaana wa mũmwe wa Mũrungu, barĩa bakuĩte gũtĩu baijĩ, na nthĩgũrũ ĩkaethua Paradiso tũtũũre ku kenya na kenya. (Zb. 83:18; Mut. 9:5; Joh. 3:16; Kug. 21:3, 4) Rĩrĩa wetĩkĩrie moritani jau nĩ ja mma, gũtĩwe ũrĩngĩtũma ũtiga kũjetĩkia. Nĩkĩ? Tontũ nĩwaciũkĩĩrwe atĩ mũsingi jwajo nĩ jwa mma. Gatwarĩĩrie ũrĩa kwona wendo bwa Jehova bũrĩ ũritani bwa mũsingi bwa Bibiria kũũmba gũgũtethia ũtiga kũthũgaania Jehova atĩkũmakagĩra kana atĩkwona jarĩa ũgũkũrũkĩĩra.
5. Taarĩĩria ũrĩa muntũ omba gũtigana na moritani ja ũrongo.
5 Rĩrĩa waambĩrie kwiritana Bibiria, nĩmbi biagũtetherie gũtigana na moritani ja ũrongo? Kwombĩka neka wangʼuanithanĩrie mantũ jarĩa waritanagwa ndinine ĩrĩa wetaga na jarĩa Bibiria ĩritanaga. Thũgaanĩria ngerekano ĩmwe: Gatuuge mberene wetĩkĩtie Jesũ nĩ Mũrungu Mweneinya Yonthe. O ũrĩa wetĩre na mbere kwiritana Bibiria ũraciũria, ‘Rĩ, ũritani bũbũ nĩ bwa mma?’ Nyuma ya gũcũnkũũna ũrikithia bwa Kĩmaandĩko, nĩwaciũkĩĩrwe atĩ nĩ bwa ũrongo. Mũthiene, nĩ watiganĩre na ũritani bũu na wambia gwĩtĩkia ũmma bũbũ bwa Bibiria: Jesũ ‘nĩwe waciarĩrwe arĩ kĩranga’ gĩa into bionthe, ‘Mũtaana wa mũmwe’ wa Mũrungu. (Akol. 1:15; Joh. 3:18) O ta ũrĩa bũrĩ bũbũũmũ kwĩnyangia gĩntũ kĩrĩ na inya kĩrĩa kĩthũngũkĩĩte, tĩ bũbũũthũ gũtigana na moritani ja ũrongo. (2 Ako. 10:4, 5) Ĩndĩ rĩrĩa wombĩre kũthithia ũu, ũtaacokere kũjeetĩkia kaĩrĩ.—Afl. 3:13.
6. Nĩmbi ĩgũkũrikithĩria wendo bwa Jehova nĩ bwa ‘kenya na kenya’?
6 Nĩkenda wirikithĩria jarĩa Bibiria ĩritanaga bwegie wendo bwa Jehova, no ũthithie ũcũnkũũni ta bũu. Rĩrĩa ũgũkũrũkĩĩra magerio, ũkeeja kwĩthĩrwa na nkanja kwerekera wendo bwa Jehova ciũrie ũjũ, ‘Rĩ nĩnkũthũgaania bwega?’ Ringithania nkanja irĩa ũũmba kwĩthĩrwa nacio kwerekera wendo bwa Jehova na biugo bia ĩandĩko rĩa mũsingi bia kĩthomo gĩkĩ—Zaburi 136:1. Kiugo kĩrĩa aja gĩtaũri ‘kĩaoʼ na Mũgambo jwa Kĩhibiriania no kĩonanie kwĩrĩgĩĩrĩka. Nĩkĩ Jehova aatongererie mũtungi wa Zaburi gũtaarĩĩria wendo bwawe na njĩra ĩu, na nĩkĩ biugo ‘kĩao kĩawe gĩa kenya na kenya’ bicokeri maita 26 kĩrĩ Zaburi ĩu? O ta ũrĩa twairitana, wendo bwa Jehova bwa kwĩrĩgĩĩrĩka kĩrĩ antũ baawe nĩ ũritani bwa mũsingi bwa Bibiria, o ta moritani jangĩ jarĩa ũrĩkĩtie kwiritana na gwĩtĩkĩĩria kuuma Rũtetone rwa Mũrungu. Tĩ ũntũ bũbwega kũthũgaania atĩ Jehova atĩkwendete na atĩkwonaga ũrĩ wa gĩtũmi. Regana na ũrongo bũu, o ta ũrĩa ũũmba kũregana buru na moritani jangĩ ja ũrongo!
7. Nĩ Maandĩko ta jarĩkũ jakũrikithia atĩ Jehova nakwendete?
7 Bibiria ĩrĩna mantũ jamaingĩ jagũtũrikithĩria atĩ Jehova natwendete. Ngerekano, Jesũ neerĩre athingati baawe ũjũ: ‘Buĩ bũrĩ ba bata nkũrũki ya tũnyoni tũtwingĩ.’ (Mat. 10:31) Jehova we wengwa neerĩre antũ baawe ũjũ: ‘Ngagwĩkagĩra inya, na ngagũtethagia gwe; na ngakũgwataga na njara yakwa ya ũrĩo ĩrĩa ĩrĩ ya ũũmbani.’ (Isa. 41:10) Ona ũrikithia bũrĩa biugo biu bikwonania. Jesũ atĩkuuga ‘no bwĩthĩrwe bũrĩ ba gĩtũmi nkũrũki,’ na Jehova atĩkuuga ‘mbuga no mbũtethie.’ Mwanya nou, bariuga: “Ũrĩ wa gĩtũmi nkũrũki” na “Ngagũtethia.” Ũkeeja kwĩthĩrwa na nkanja atĩ Jehova nakwendete rĩrĩa ũgũkũrũkĩĩra magerio, maandĩko ta jau jomba gũgwĩkĩra inya na jagakũrikithĩria atĩ nakwendete. Gĩtũmi nĩ tontũ mũsingi jwajo nĩ jwa mma. Kũthũgaanĩria ũntũ bũu na njĩra ya maromba gũgagũtethia kũriikana biugo bia 1 Johana 4:16: ‘Tontũ bũũ nĩtwijĩ na twetĩkia wendo bũrĩa Mũrungu arĩ nabu kĩrĩtuĩ.’a
8. Nĩatĩa ũbuĩrĩte kũthithia ũkeeja kwĩthĩrwa na nkanja atĩ Jehova nakwendete?
8 Nĩatĩa ũbuĩrĩte kuthithia ũkeeja kwĩthĩrwa magiita jamwe no ũkwigua ũrĩna nkanja atĩ Jehova nakwendete? Ringithania ũrĩa ũkwigua na mantũ jarĩa wiritanĩte bũmwegie. Maandĩko nĩ jatũrikithirĩtie buru atĩ Jehova natwendete, kwou tũtĩbuĩrĩte kwĩrĩgĩĩra ũrĩa tũkwigua. Kũthũgaania Jehova atĩtwendete, nĩ kwonania biugo birĩa biugaga Bibiriene ‘Mũrungu nĩ wendo,’ nĩ bia ũrongo.—1 Joh. 4:8
THŨGAANĨRIA ŨRĨA JEHOVA “AKWENDETE”
9-10. Nĩmbi Jesũ aarĩĩragia rĩrĩa aaugĩre biugo bibi bia Johana 16:26, 27 atĩ ‘Baaba wengwa nabwendete’? (Tega kinya mbica.)
9 Twomba kwiritana jamaingĩ jegie wendo bwa Jehova twathũgaanĩria biugo bibi bia Jesũ kĩrĩ athingati baawe: ‘Baaba wengwa nabwendete.’ (Thoma Johana 16:26, 27.) Jesũ aateraga athingati baawe biugo biu nĩkenda abagwĩria. Mĩstaarĩ ĩngĩ ĩrĩonania monomono birĩa aarĩĩragia tĩ ũrĩa baaigagua ĩgiita rĩu. Ĩndĩ, aarĩĩragia ũntũ bũngĩ mwanya tabu—maromba.
10 Kĩrĩ Johana 16:23, 24, Jesũ naarĩ akwĩra aritwa baawe barombage gũkũrũkĩĩra riĩtwa rĩawe ĩndĩ tĩ bamũrombe. Kũmenya ũntũ bũu nĩ kwaarĩ kwa gĩtũmi kĩrĩ bo. Nĩbaarĩ barĩgũtuma ũcoore bũbũnene nawe. Kwou, kwombĩka nyuma ya kũriũkua kwawe, barĩngĩambia kũmũromba bakĩthũgaanagia tontũ naabendete arĩngĩthikĩĩra merencana jaao na akeera ĩthe abatethie. Amwe nou, Jesũ naabakanĩrie batĩkathithie ũu. Nĩkĩ? Aaberĩre ũjũ: ‘Baaba wengwa nabwendete.’ Bũu nĩ bũmwe bwa ũritani bwa mũsingi bwegie maromba. Thũgaania ũrĩa ũntũ bũu bũkwegie: Gũkũrũkĩĩra wiritani bwaku bwa Bibiria, nũrĩĩkĩtie kũmenya Jesũ na wamwenda. (Joh. 14:21) Ĩndĩ o ta aritwa ba karine ya mbere, womba kũromba Mũrungu ũrĩna mma atĩ we “wengwa nakwendete.” Rĩonthe rĩrĩa ũkũromba Jehova nwonanagia nũgwĩtĩkia biugo biu.—1 Joh. 5:14.
Romba Jehova ũtĩna nkanja, wĩtĩkĩtie atĩ we ‘wengwa nakwendete’ (Tega gĩcuncĩ kĩa 9-10)b
MENYA BIRĨA BIGŨTŨMA WĨTHĨRWA NA NKANJA
11. Nĩkĩ Shaitani omba kũgwĩrua tũkeeja kwĩthĩrwa na nkanja atĩ Jehova natwendete?
11 Nĩmbi biũmba gũtũma twĩthĩrwa na nkanja atĩ Jehova natwendete? Kwombĩka ũgacokia nĩ Shaitani, na bũu nĩ mma. Nkoma ‘nagũcwa’ gũtwĩnyangia, kwou agwĩrua mono tũkeeja kwĩthĩrwa na nkanja Jehova natwendete. (1 Pet. 5:8) Kinya endaga twona teka tũthithĩĩtie meyia jamanene mono na tũtĩũmba kũgunĩka kuumania na ĩkũũri rĩrĩa Jehova aaritĩre tontũ bwa wendo bwawe. (Ahi. 2:9) Ĩndĩ nũũ ũkagunĩka twethĩrwa na nkanja iu? Nĩ Shaitani. Na nũu ũgwĩragua rĩrĩa twaunĩka nkoro na twatiga gũtumĩkĩra Jehova? No Shaitani. Nĩwe wendaga tũthũgaania Jehova atĩtwendete, ĩndĩ bũu tĩ mma. Ũmma nĩ atĩ Shaitani nĩwe ũtĩendi nĩ Jehova. Amwe nou, ‘wayia’ bũmwe bũrĩa atumagĩra nĩ kũgeria gũtũma twigua atĩ nĩtuĩ Jehova atĩendete. (Aef. 6:11) Rĩrĩa twaciũkĩrwa nĩ mworoto jwa mũnthũ weetũ, tũgaciũmia buru ‘kũregana na Nkoma.’—Jak. 4:7.
12-13. Nĩatĩa wĩyia bwetũ bwa kaumo bũũmba gũtũma twĩthĩrwa na nkanja atĩ Jehova natwendete?
12 Kũrĩna ũntũ bũngĩ bũmba gũtũma twĩthĩrwa na nkanja kwerekera wendo bwa Jehova. Nĩ ũntũ bũrĩkũ? Nĩ wĩyia bwetũ bwa kaumo. (Zb. 51:5; Aro. 5:12) Wĩyia nĩbũthũthũkĩtie ngwatanĩro yeetũ na Mũrungu. Kinya nĩbũtũreterete mathĩĩna ja kĩmathũgaanio, ja nkoro, na ja kĩmwĩrĩ.
13 Wĩyia nĩbũtũmaga twigua nthao, tũrĩna ĩatia, tũtĩna ũkaria, na tũthangĩka. Twomba kwigua ũu monomono rĩrĩa tweyia. Kinya twomba kwigua ũu tontũ tũtĩbaboojũru, thĩĩna ĩrĩa Mũrungu ataatũũmbĩte tũrĩ nayo kĩambĩrĩriene. (Aro. 8:20, 21) O ta ũrĩa ngarĩ ĩtĩũmba gwĩta bwega tairi ĩtĩna mĩrukĩ, kinya tuĩ tontũ tũtĩbaboojũru, tũtĩũmba kũthithia mantũ bwega buru, o ta ũrĩa twombi tũthithagia. Nĩkĩo magiita jamwe twĩthagĩrwa na nkanja kethĩra Jehova natwendete. Bũu bũkeeja gũkarĩka, nĩtũbuĩrĩte kũriikana atĩ Jehova nĩ ‘Mũrungu Ũmũnene wa kũmakania ũrĩa . . . ũũjũragia kĩrĩĩkanĩro na kĩao kĩrĩ barĩa bamwendaga na barĩa bamenyagĩĩra maathana jawe.’—Neh. 1:5.
14. Nĩatĩa kũthũgaanĩria ĩkũũri kũũmba gũtũtethia tũtiga kwona teka Jehova atĩtwendete? (Aroma 5:8) (Tega kinya kathandũkũ “Imenyeere Kuumania na ‘Wayia bwa Wĩyia’”)
14 Magiita jamwe twomba kwigua tũtĩkwagĩra kwendwa nĩ Jehova, na bũu no bũtũme tũkaigua bũbũũĩ. Amwe nou natwonagia wendo bũu, na nĩkĩo gĩtũmi wendo bwawe bũrĩ bwa mwanya mono. Jehova nĩwe wengwa ũtwendaga. Kinya naaritĩre ĩkũũri nĩkenda atũrekera meyia jeetũ tontũ natwendete. (1 Joh. 4:10) Riikana atĩ kinya Jesũ eejĩre kwonokia eeyia, ĩndĩ tĩ antũ baboojũru. (Thoma Aroma 5:8.) Gũtĩ muntũ ũũmba kũthithia mantũ na njĩra ĩmbũjũru, na kinya Jehova atĩĩrĩgagĩĩra tũthithia ũu. Rĩrĩa twaciũkĩrwa atĩ mwerekera jwetũ jwa meeyia no jũtũme twona teka Jehova atĩtwendete, tũkomba kweberia ũntũ bũu mathũgaanione jeetũ.—Aro. 7:24, 25.
THUURA GŨKARA ŨRĨ MWĨTĨKĨKUA
15-16. Nĩ wĩrane bũrĩkũ Jehova agũtwaa twakara tũrĩ etĩkĩkua, na nĩkĩ? (2 Samweli 22:26)
15 Jehova arĩenda ‘tũciigĩkania nawe’ nĩkenda tũtua matua jameega. (Kur. 30:19, 20) Twathithia ũu, tũkethĩrwa na mma atĩ agakara arĩ mwĩtĩkĩkua kĩrĩ tuĩ. (Thoma 2 Samweli 22:26.) Rĩonthe twakara tũrĩ etĩkĩkua kĩrĩ Jehova, agatũtethia kinya twakũrũkĩĩra ũntũ bũrĩkũ ũtũũrone.
16 O ta ũrĩa twairitana, tũrĩna itũmi bibiingĩ bia gũkara tũriki kinya twakũrũkĩĩra mantũ jamoomũ. Nĩtwijĩ atĩ Jehova natwendete na agatũtethia. Ũu nĩu Bibiria ĩritanaga. Tũkeeja kwĩthĩrwa na nkanja bwegie wendo bwawe, no tũthũgaanĩrie mantũ jarĩa twijĩ nĩ ja mma antũ a jarĩa tũciĩraga nĩ ja mma. Rekeni twĩte na mbere kwirikithĩria ũmma bũbũ bwa Bibiria atĩ wendo bwa Jehova bũtũũraga kenya na kenya.
RWĨMBO NA. 159 Aa Jehova Ũkumio
a Maandĩko jangĩ nĩ ta Kuriikanithia Maathana 31:8, Zaburi 94:14, na Isaya 49:15.
b Gũtaarĩĩria Mbica: Mũtaana wa baaba akĩrombaga Mũrungu amũtethia kũmenyeera mwekũrũ waawe ũrĩa wajĩtue, gũtua matua ja ũũme jegie mbeca, na kũritana mwarĩ waawe kwenda Jehova.