Ũrekeri Nĩmbi?
Ĩcookio rĩa Bibiria
Bibiriene kiugo kĩa Kĩgiriki “ũrekeri” kĩonanagia “kũrekeeria,” ta rĩrĩa muntũ atiga gwĩtia muntũ ũngĩ ĩrandũ. Jesũ noonanĩrie ũntũ bũu rĩrĩa aritanĩre aritwa baawe barombage ũjũ: “Uturekere meeyia jetu; nikwithirwa kinya twi iturekagira o muntu uria uri na irandu rietu.” (Luka 11:4) Rĩrĩa Jesũ aritĩre ngerekano ya nthũmba ĩrĩa ĩtaarĩ na kĩao, noonanĩrie ngwatanĩro ĩrĩa ĩrĩ o, gatĩgatĩ ka kũrekanĩra na kweberia ĩrandũ.—Mathayo 18:23-35.
Twonanagia tũkũrekera bangĩ na njĩra ya kweberia mũthũũro nkorone, na kũrega kũrĩwa tontũ bwa jarĩa tũthithĩrĩtue. Bibiria nĩtũritanaga bwegie kũrega gũcienda ntwingwa, na jũu nĩju mũsingi jwa ũrekeri bwa mma, tontũ wendo “butitaraga mathuukua.”—1 Akorintho 13:4, 5.
Nĩ mantũ jarĩkũ ũrekeri bwa mma bũtĩonanagia
Kũũgia meeyia. Bibiria kamma nĩmenagĩĩria antũ barĩa baugaga mathithio jamathũũku nĩ jameega, na nĩ ja gwĩtĩkĩrĩka methone ja antũ.—Isaya 5:20.
Gũciethia nĩ teka wĩyia bũtakarĩka. Mũrungu naathuurĩre kũrekera Mũnene Daudi, tontũ bwa wĩyia bwawe bũũrito, ĩndĩ atamũrigĩrĩrie atĩkagwatwe nĩ maumĩĩra ja mathithio jaawe. Kinya naatongererie Daudi aandĩka bwegie meeyia jaawe jarĩa tũkũriikana kinya nandĩ.—2 Samweli 12:9-13.
Gwĩtĩkĩĩria antũ bangĩ bagũtumĩra bũũthũũku. Ngerekano, thũgaanĩrĩa ũkeja kwaa muntũ mbeca na ageeta na agaciĩnyangia, na akaremwa gũcookia ta ũrĩa bweranĩte, na nyumene agacooka kĩrĩgwe ainyiĩtie buru na akaromba ũrekeri. No ũmũrekere kũũma nkorone, na ũgatiga kũmũriikania bwegie ũntũ bũu kaĩrĩ, na kinya no ũmũrekere ĩrandu rĩu buru. Amwe nou, no ũũge ũtĩmũkobithia mbeca kaĩrĩ.—Zaburi 37:21; Njuno 14:15; 22:3; Agalatia 6:7.
Kũrekera ũtĩ na itũmi bia kũngʼana. Mũrungu atĩrekagĩra antũ barĩa beeyagia bakĩendaga, bakathithia meeyia ja ntabarako, na barĩa baregaga gwĩtĩkĩĩria meeyia jaao, bakarega kũgarũra mĩtĩĩre yaao, na bakarega kũromba ũrekeri kũũma kĩrĩ barĩa baatĩrĩtie. (Njuno 28:13; Mathithio 26:20; Ahibirania 10:26) Antũ baau batiiriraga baejaga anthũ ba Mũrungu, nawe atĩrĩgagĩĩra tũrekera antũ barĩa atĩrekerete.—Zaburi 139:21, 22.
A gũkeeja kwĩthĩrwa nũthithĩrĩtue bũũthũũku nĩ muntũ ũrĩa ũregete kũromba ũrekeri kana kinya gwĩtĩkĩĩria ĩatia rĩawe? Bibiria nĩgũkwaa ũtaaro bũbũ: “Ebagia maruru, na utiganage na muthuuro.” (Zaburi 37:8) Kinya kethĩra ũtĩũthia wĩyia, no ũrege gwĩka mũthũũro nkorone yaaku. Wĩthĩrwe na mma Mũrungu akagambithia muntũ ũu. (Ahibirania 10:30, 31) Womba gwĩkĩrwa inya kũmenya atĩ ĩgiita rĩĩjĩte, tũtigua ũrũrũ kaĩrĩ tontũ bwa mantũ jamathũũku jarĩa tũthithĩrĩtue nĩ antũ bangĩ, kana mantũ jarĩa jomba gũtũritũĩra.—Isaya 65:17; Kugwurirwa 21:4.
Kũrekera meeyia ja kũthũgaanĩria. Magiita jamwe, antũ a kũrekera ũrĩa tũkũthũgaania nĩwe mwĩyia, nĩtũkũbatara gwĩtĩkĩĩria tũtĩgũkari na gĩtũmi gĩkĩnene gĩa kũthũũra. Bibiria yugaga ũjũ: “Ugatanukanga kwimbatara nkorone ni muthuuro, tontu mithuuro ituuraga nkorone cia biaa.”—Mutumiiria 7:9.
Ũrĩa tũũmba kũrekera
Riikana mantũ jarĩa jendekanaga kĩrĩ ũrekeri. Tĩ kũgeria kũũthia meeyia kana kũgeria kwethia teka jatakarĩka, ĩndĩ nĩ kũrekeeria ũntũ bũu buru.
Menya baita cia kũrekera. Kũrega gwĩka mũthũũro nĩgũtethagĩa ũgakirĩĩria, ũkethĩrwa na ũgima bũbwega bwa mwĩrĩ na kinya ũkethĩrwa na kũgwĩrua kwa mma. (Njuno 14:30; Mathayo 5:9) Na ũntũ bwa gĩtũmi nkũrũki, nĩ atĩ kũrekera bangĩ nĩju mũsingi jwa kũrekerwa nĩ Mũrungu.—Mathayo 6:14, 15.
Igĩrua bangĩ kĩao. Twinthe tũtĩ baboũjũru. (Jakubu 3:2) O ta ũrĩa tũgwĩragua rĩrĩa antũ bangĩ batũrekera, nou tũbuĩrĩte kũrekera antũ bangĩ meeyia jaao.—Mathayo 7:12.
Ĩthĩrwa na ũngʼanĩru. Rĩrĩa tũrĩ na tũmantũ tũnini tũrĩa twatĩrĩtue, no tũtumĩre ũtaaro bũbũ bwa Bibiria bũrĩa bugaga ũjũ: “Buumanagiririe, bukirekanagira o muntu na ungi.”—Akolosai 3:13.
Jũkia ĩtagaaria na mpwĩ. Ciũmie kũrekera na mpwĩ, antũ a kũrekeeria mũthũũro jwĩta na mbere gũkara nkorone yaaku.—Aefeso 4:26, 27.