Rĩ, no Mwanka Wĩthĩrwe ũrĩ Gĩkundine Kĩnna kĩa Ndini?

Ĩcokio rĩa Bibiria

Ĩĩ, tontũ Mũrungu endaga antũ bothũrana amwe nĩkenda bamũthathayia. Bibiria yugaga ũjũ: ‘Na tũciũrageni mantũ jeetũ, tũkĩũmanagĩĩria, tũkĩendaga antũ, tũkĩthithagia mantũ jarĩa jaagĩrĩte; na tũgatigeni gũtirimanaga amwe.’—Ahibirania 10:24, 25.

Jesũ neerĩre athingati baawe barĩngĩũthũrana amwe ta gĩkundi rĩrĩa aaberĩre ũjũ: ‘Nĩ ũntũ bũu antũ bonthe bakamenya bũrĩ aritwa baakwa, bwatũũra bwendene.’ (Johana 13:35) Athingati ba Kristũ barĩngĩonania wendo na njĩra ĩnene rĩrĩa bakũgwatanĩra amwe na Akristũ bangĩ. Barĩngĩgũcemania biũthũranone rĩonthe tontũ bwa ũthathayia. (1 Akorintho 16:19) Na njĩra ĩu, barĩngĩthithia ũrũmwe bwa ataana na aarĩ ba baaba nthĩgũrũne yonthe.—1 Petero 2:17.

Bũtĩngʼani akĩ kwĩthĩrwa ũrĩ ndinine nna, jamaingĩ nĩjakũbatarĩka

Kinya kethĩra Bibiria nĩyonanagia atĩ antũ babuĩrĩte gũcemania amwe na kũthathayia Mũrungu, ĩtĩugaga nĩkenda ũgwĩria Mũrungu, no mwanka wĩthĩrwe ũrĩ ndinine nna. Nĩkenda wĩtĩkĩrĩka kĩrĩ Mũrungu, no mwanka ndini yaaku ĩgũtethie kwĩthĩrwa na ũtũũro bũbwega. Ngerekano, Bibiria yugaga ũjũ: ‘Ndini yo yongwa ĩrĩa ĩtĩ ĩgi methone ja Mũrungu weetũ na Baaba weetũ nĩ ta ĩjĩ: nĩ kũriũngagĩra barĩa bakuĩri nĩ beethe, na ntigwa rĩrĩa barĩ na mathĩĩna, na ningĩ muntũ aimenyagĩĩre akarage atĩgwikinyanga na mantũ ja nthĩgũrũ ĩjĩ.’—Jakubu 1:27.