Nĩatĩa Aciari Bomba Kũritana Aana Baao Bwegie Kũmenyana Kĩmwĩrĩ?
Ũrĩa Bibiria yugaga
Nũũ ũbuĩrĩte kũritana aana bwegie kũmenyana kĩmwĩrĩ? Bibiria nĩejaga aciari ngũgĩ ĩjĩ, na aciari babaingĩ nĩbonete mantũ jaja jakĩbatethia:
Menya wigua nthoni. Bibiria nĩtaragĩĩria ĩtĩkwitha bwegie kũmenyana kĩmwĩrĩ na irũngo bia ũciarĩ, na kinya Mũrungu neerĩre mũgongo jwa Isiraeli baritane ‘aanaʼ bwegie mantũ jau. (Kuriikanithia Maathana 31:12; Mantu ja Alawi 15:2, 16-19) Womba gũtumĩra biugo birĩa bikwonania gĩtĩĩo kwerekera irũngo bia ũciari na kũmenyana kĩmwĩrĩ.
Ritana mwana o ũrĩa etĩte na mbere gũkũra. Antũ a kũritana mwana mantũ jamaingĩ o rĩmwe jegie kũmenyana kĩmwĩrĩ, rĩrĩa mwĩrĩ jwawe jwambia kũgarũka, mũritane o kaora na ũrĩa eetĩte na mbere agĩkũraga nou agaciũkĩrwa nĩjo nkũrũki.—1 Akorintho 13:11.
Baritane bwegie mĩtugo ya wagĩru. Aana no baritanwe mantũ jamwe jegie kũmenyana kĩmwĩrĩ barĩ cukuru. Amwe nou, Bibiria nĩĩkagĩra aciari inya baritane aana baao, tĩ mantũ jegie ũrĩa mwĩrĩ jwao jũgũkũra akĩ, ĩndĩ kinya mantũ ja mĩtugo ya wagĩru ya kũmenyana kĩmwĩri.—Njuno 5:1-23.
Thikĩĩra mwana waaku bwega. Menya ũthũũra kana wĩthĩrwa na mpwĩ cia kũmũgitĩra ĩgamba na mpwĩ, rĩrĩa ooria biũria biegie kũmenyana kĩmwĩrĩ. Ĩthĩrwa na ‘mpwĩ cia kũthikĩĩra na tĩ mpwĩ cia kwaria.’—Jakubu 1:19.
Ũrĩa ũũmba gũkaria aana baaku kuumania na antũ barĩa bomba kũbathũũkia kĩmwĩrĩ
Ritana mwana waaku kũregana na mantũ ja antũ barĩa bomba kũbathũũkia kĩmwĩrĩ
Iritane. Ciũmie kũmenya ũrĩa antũ barĩa bathithanagĩria kĩmwĩrĩ bũthũũku bathithagia.—Njuno 18:15; tega kĩthoomo kĩa 32 iuku Maswali Ambayo Vijana Huuliza—Majibu Yafanyayo Kazi, Buku la 1.
Menya mantũ jarĩa jagwĩta na mbere mũtũrĩrene jwa mwana waaku. Menya ũmũtiga kĩrĩ muntũ ũtĩkũmwĩtĩkia bwega, kana ‘ũmũrekeeria’ wenka.—Njuno 29:15.
Mũritane kwĩthĩrwa na mwonere jũngʼanĩĩrĩte jwegie kwathĩka. Aana nĩbabuĩrĩte kwathĩkĩra aciari baao. (Akolosai 3:20) Amwe nou, kethĩra ũkaritana mwana waaku atĩ no mwanka rĩonthe athĩkĩre muntũ ũmũnene, bũu bũgatũma bwĩthĩrwe bũrĩ bũbũũthũ kũthithĩrua ũntũ bũthũũku. Aciari Akristũ no beere aana baao ũjũ, “Muntũ akeeja gũkwĩra ũthithie ũntũ bũrĩa bũtĩgwĩragia Mũrungu, regana nabu.”—Mathithio 5:29.
Mũritane mantũ jamoothũ ja gwikaria. Tetheeria mwana waaku ũrĩa omba kũthithia muntũ akeeja kũgeria kũmũthithĩria bũbũĩ rĩrĩa gũtĩ muntũ ũrĩ akuĩ. Kwithuranĩra kĩmbere, bũgĩtumagĩra kĩonanĩria gĩkuĩ kũgatetheeria mwana waaku kwĩthĩrwa na ũcamba bwa kuuga “Tiga kũthithia ũu! Nkera aciari bakwa!” na amatũke na mpwĩ. Kwombĩka ũkabatara kũriikania “mwana waaku kaĩrĩ na kaĩrĩ,” tontũ aana nĩboragĩrua na mpwĩ.—Kuriikanithia Maathana 6:7.