MĨI 25-31, 2026
RWĨMBO NA. 135 Jehova Arĩkwĩra: “Mũtaana Waakwa Ĩthĩrwa Ũrĩ Muntũ Ũmũũme”
Kũria Ũũmbi bwa Gũciũra Mantũ na ‘Ũkoona Weega’
‘Ũrĩa ũgĩtaga ũũme neendete nkoro yaawe wengwa; ũrĩa ũmenyagĩĩra ũmenyo akoona maweega.’—Nju. 19:8.
JARĨA TŨKAIRITANA
Tũkoona ũrĩa kwĩthĩrwa na ũũmbi bwa gũciũra mantũ kũũmba gũtũtethia kũrwa na mantũ jamoomũ.
1-2. Ũũmbi bwa gũciũra mantũ nĩmbi, na nĩatĩa bũũmba gũtũtethia?
Rĩ, muntũ arakũthithĩria ũntũ bũratũma wigua atĩrakwaa gĩtĩĩo? Ũratuĩrwa bũbũũĩ kana muntũ agwatĩria? Rĩ, ũrakũrũkĩĩra ũntũ, bwakũmakia mono? Kethĩra nĩu, mbuga nũcionerete tĩ bũbũũthũ kũthithĩria muntũ ũu na njĩra ĩnjega. Ĩndĩ ũntũ bwa kũgwĩria nĩ atĩ, Maandĩko nĩjatũtethagia kũmenya nkuma ĩrĩa yũũmba gũtũtetheria ũntũne ta bũu, nayo nĩ ũũmbi bwa gũciũra mantũ.
2 Gũciũra mantũ nĩ ũũmbi bwa kwona ũntũ kĩndeene na kũbũmenya bwega. Nĩbũtũtethagia kũmenya nĩkĩ ũntũ bũũmba kwĩthĩrwa bũkarĩkĩte kana nĩkĩ muntũ athithĩtie na njĩra nna. Ta maumĩĩra, nkuma ĩu yomba gũtũtethia kũthithia mantũ na njĩra ya ũũme. Ngerekano, ĩgatũtethia ‘kũgwata mĩromo yeetũ’ na kũmenya rĩrĩa tũbuĩrĩte “gũkira.” (Nju. 10:19; Zb. 4:4) No ĩtũtetheerie kinya kũrigĩĩria mũthũũro na kinya kũrekera bangĩ rĩrĩa batwatĩria. Kinya no ĩtũtethie gwĩtĩkĩĩria ũtaaro kana maatia jeetũ. (Nju. 19:20) Rĩrĩa twonania nkuma ĩu, nĩtũgwĩragia Jehova na kinya tũkagĩrithia ngwatanĩro yeetũ na barĩa twatanĩrĩtie nabo. Na rĩrĩa ũntũ bwakarĩka bũrĩa bũũmba gũtũma twaria bũbũũĩ kana tũthũura, nkuma ĩu ĩgatũtethia kwirigĩĩria. Gatwarĩĩrie ngerekano ithatũ kuuma Bibiriene irĩa ikwonania ũũmbi bwa gũciũra mantũ bwomba gũtũtethia kwinyiia, kũborera, na kinya kwĩrĩgĩĩra Jehova.
ĨTHĨRWA NA WINYIIA NA TĨ WIKUMIA
3. Naamani aarĩ ũũ?
3 Nĩkenda mantũ jeeta bwega, nĩtũkũbatara gũciebania na wiikumia. (1 Pet. 5:5) Ũũmbi bwa gũciũra mantũ bũgatũtethia kũthithia ũu. Na njĩra ĩrĩkũ? Thũgaanĩria ngerekano ya Naamani. Aatũũraga Sĩria, nthĩgũrũ ĩrĩa ĩrĩ bwa rũgũrũ ya Isiraeli. Arĩ mũrũngamĩĩri wa jeshi ya Sĩria arĩ na ĩgweta. Amwe nou, naagwatĩrwe nĩ mũrimo jũmũthũũku mono jwa mũtigiri.—2 An. 5:1.
4. Nĩatĩa Naamani oonanĩrie ũũmbi bwa gũciũra mantũ?
4 Mwekũrũ wa Naamani neerĩrwe nĩ mwarĩ Mwisiraeli ũrĩa waamũritagĩra ngũgĩ eere mũkũrũ waawe eete kĩrĩ kĩroria kĩa Mũrungu narĩa Isiraeli nĩkenda oorua. (2 An. 5:2, 3) Naamani arĩngĩciĩra ũjũ, ‘Rĩ, no kũmbĩkĩke nkombo ĩjĩ ya mwarĩ wa nthĩgũrũ ĩrĩa tũrĩ ũthũ nayo ĩmbĩĩra ũntũ bũmba gũntethia?’ Naamani aatathũgaanĩrie ũu. Antũ a gũtongeerua nĩ rwikumio, naajũkĩrie biugo bia mwarĩ ũu na ũrito. Naarombere Mũnene wa Sĩria rũũtha na areeta Isiraeli gũcwaa kĩroria kĩu nĩkenda kĩmworia.—2 An. 5:4, 5.
5. Nĩatĩa gwakarĩre kĩrĩ Naamani arĩgũkinya Isiraeli?
5 Naamani arĩgũkinya Isiraeli, neetĩre kĩrĩ Mũnene Jehoramu erĩgĩĩrĩte kworua. Jehoramu arĩkwigua nĩkĩ eejĩte, naathũgaanĩrie Mũnene wa Sĩria nĩ thanga aamũreterete. Ĩndĩ rĩrĩa kĩroria Elisha aaigĩrue ũntũ bũu, neerĩre Jehoramu amũtũme kĩrĩwe. (2 An. 5:6-9) Amwe nou, mantũ jateetĩre ũrĩa Naamani eerĩgĩĩrĩte. Ũntũ bwa kũrigaria nĩ atĩ Elisha ataaumagarĩre nyomba aaranĩria nawe kana kinya eja kũmũgwata ũgeni. Ĩndĩ nĩ nthũmba yaawe aatũmĩre ĩmũmenyithia ũrĩa aabuĩrĩte kũthithia nĩkenda orua.—2 An. 5:10.
6. (a) Kwombĩka nĩkĩ Naamani aatathithĩrie ũrĩa eerĩrwe nĩ nthũmba ya Elisha? (b) Nĩatĩa nthũmba cia Naamani cioonanĩrie ũũmbi bwa gũciũra mantũ, na kwarĩ na maumĩĩra jarĩkũ? (2 Anene 5:13, 14)
6 Mwambĩrĩrione, Naamani aatetĩkĩrĩĩrie mendekithia jarĩa aaerwe nĩ nthũmba ya Elisha. ‘Naathũũrĩre’ na areeta ‘angʼenti’ mono. (2 An. 5:11, 12) Nĩkĩ? Kwombĩka aaigagua ataaerwe gĩtĩĩo kĩrĩa aabataraga arĩ mũrũngamĩri wa jeshi ya Sĩria. Nkũrũki, mbuga oonaga teka Elisha aatatĩĩaga Sĩria tontũ bwa mendekithia jarĩa aamwete. Bũu nĩbwatũmĩre Naamani enda gũcoka kwao kinya atĩorĩtue. Ĩndĩ nthũmba ciawe nĩcionanĩrie ũũmbi bwa gũciũra mantũ rĩrĩa ciamwerencere atĩkathithie ũu. Mũthiene, Naamani naatigĩre rwikumio na arathingata mendekithia ja Elisha ainyiĩtie. Ta maumĩĩra, noorerue!—Thoma 2 Anene 5:13, 14.
7. Nĩmbi tũkwiritana kuumania na rũgono rwa Naamani? (Njuno 22:4) (Tega kinya mbica.)
7 Nĩmbi tũkwiritana kuumania na rũgono rũu? Twonanagia ũũmbi bwa gũciũra mantũ rĩrĩa twatega ũntũ kĩndeene na tĩ ũrĩa bũkwonekana oome akĩ. Kinya nĩtwonanagia nkuma ĩu twarega gũtongeerua nĩ ũrĩa tũkwigua rĩrĩa tũgũtua matua. Ũũmbi bwa gũciũra mantũ nĩbũtũtethagia kwĩthĩrwa tũrĩ ainyiia. Bũu nĩbũtũtethagia gwĩtĩkĩĩria atĩ tũtiĩjĩ mantũ jonthe. Magiita jamwe rĩrĩa tũtĩgũciũkĩrwa nĩ ũntũ, nĩ tũbataraga ũtethio bwa bangĩ na mono mono bwa Jehova. Kinya kethĩra Naamani aataarĩ mũthathayia wa Jehova, noonanĩrie ũũmbi bwa gũciũra mantũ na njĩra ya kũthikĩĩra: mwarĩ Mwisiraeli ũrĩa waarĩ nkombo, nthũmba ciawe, na kinya nkũrũki kĩroria kĩa Jehova takĩo Elisha. Kinya naaciindĩre nkuma ĩnthũũku ya rwikumia. Na mũthiene, naatuĩre ĩtua rĩa ũũme na aroorua. Kwou, mbere ya kũjũkia ĩtagaaria rĩrĩa twaewa ũtaaro bũrĩa tũtĩgwĩtĩkanĩria nabu bwa Kĩmaandĩko kana mwerekera tũtĩgũciũkĩrwa nĩju, nĩbwega tũciũrie kethĩra ũntũ bũrĩa tũkwenda kuuga kana kũthithia bũkonania tũrĩ na rwikumia kana nĩ winyiia?—Thoma Njuno 22:4.
O ta ũrĩa Naamani aathĩkĩĩrĩre bangĩ ainyiĩĩtie, kinya tuĩ nĩtũbuĩrĩte kũthikĩĩra rĩrĩa twaewa ũtaaro, rĩrĩa bangĩ batwĩra bwegie thĩĩna nna, kana rĩrĩa twaewa ũtongeeria bũnna kuuma kĩrĩ ũthuranĩri bwa Jehova (Tega gĩcuncĩ kĩa 7)
ONANIA ŨBORERU ANTŨ A MŨTHŨŨRO
8. Nĩ mantũne ta jarĩkũ tũũmba kwona bũrĩ bũbũũmũ kwonania ũboreru?
8 Ũũmbi bwa gũciũra mantũ bũgatũtethia kũborera na gũciebania na mũthũũro rĩrĩa tũgũkũrũkĩĩra mantũ jagũtuuna nkoro. Ũmma bwa mantũ nĩ atĩ tĩ rĩonthe bwĩthagĩrwa bũrĩ bũbũũthũ kũthithia ũu mono mono rĩrĩa muntũ atũthithĩria na njĩra ĩtĩ ya ĩota. (Aef. 4:26 na ũtege “Be wrathful” kĩrĩ study note.) Nandĩ gatũncũnkũũne ũrĩa Daudi na Abigaili boonanĩrie ũũmbi bwa gũciũra mantũ barĩgũkũrũkĩĩra ũntũ bũbũũmũ.
9. Nĩatĩa Nabali aathithĩrie Daudi?
9 Thũgaanĩria ũntũ bũrĩa bwakarĩkĩre rĩrĩa Daudi na antũ baawe baaiciithĩte rwanda rwa Parani. (1 Sam. 25:1) Rĩrĩa baarĩ naao, nĩbaakaragia arĩĩthi na ndĩthia cia muntũ weetagwa Nabali ũrĩa waarĩ mwĩtonga mono. (1 Sam. 25:15, 16) Ĩgiita rĩa kwenja ngʼondu rĩgũkinya, Daudi naatũmĩre antũ baawe kĩrĩ Nabali bamũromba biakũrĩa. (1 Sam. 25:6-8) Ĩndĩ Nabali aatonanĩrie nkaatho kinya aniini tontũ bwa maweega jarĩa Daudi na antũ baawe baamũthithĩritie. Naabarĩĩrie bũbũũĩ mono na kinya araruma Daudi na antũ baawe.—1 Sam. 25:10, 11.
10. Nĩatĩa Daudi na Abigaili boonanĩrie ũũmbi bwa gũciũra mantũ? (1 Samweli 25:32, 33) (Tega kinya mbica.)
10 Rĩ, kethĩra nĩ gwe waathithĩĩrue ta Daudi, nĩatĩa ũrĩngĩigua? Nĩbũbũũthũ gũciũkĩrwa nĩkĩ Daudi aathũũrĩre. Ũntũ bũu nĩbwamwigithĩrie bũbũũĩ, arathũũra mono na arenda kũũraga Nabali! (1 Sam. 25:13, 21, 22) Na rĩrĩa aarĩ njĩrene etĩte kũmũũraga, nĩrĩo Abigaili, mwekũrũ ũmũũme wa Nabali eejĩre nĩkenda amũrigĩĩria. Nĩatĩa Abigaili oonanĩrie ũũmbi bwa gũciũra mantũ? Naaciũkĩĩrwe atĩ Daudi naarĩ muntũ ũmwega kinya kethĩra naathũũri, na kwou araciumia buru nĩkenda amũboreria. Naamũreteere biewa bibiingĩ na aramwaa ũtaaro bwa ũũme ainyiĩtie. (1 Sam. 25:18, 23-31) Kinya Daudi noonanĩrie nkuma ĩu, na njĩra ya kũmũthikĩĩra, agĩciũkagĩrwa atĩ biugo bia Abigaili bionanagia ũrĩa Jehova oonaga ũntũ bũu. Bũu nĩbwatũmĩre aborera na aciebania na ĩatia rĩĩrito rĩrĩa aarĩ athithie.—Thoma 1 Samweli 25:32, 33.
Ũũmbi bwa gũciũra mantũ, nĩbwatetherie Daudi na Abigaili kũrigĩĩria ũntũ bũbũthũũku bũtĩgakarĩke (Tega gĩcuncĩ kĩa 10)
11. Nĩatĩa ũũmbi bwa gũciũra mantũ bũũmba gũtũtethia rĩrĩa twathũũrua? (Njuno 19:11)
11 Nĩmbi tũkwiritana kuumania na rũgono rũu? Ũũmbi bwa gũciũra mantũ bũgatũtethia gũtuma thĩĩrĩ kinya rĩrĩa tũrĩ na gĩtũmi gĩkĩega gĩa kũthũũra. Nkuma ĩu yomba gũtũtethia kũthũgaanĩria maumĩĩra ja biugo na mathithio jeetũ. (Thoma Njuno 19:11.) Rĩrĩa Daudi ariikanĩrue ũrĩa mathithio jaawe jarĩngĩtũma Jehova aigua, noombĩre kũrigĩĩria mũthũũro jwawe. Ũkeeja kũthũũra kana ũkaunĩka nkoro, menya ũjũkia ĩtagaaria na mpwĩ ũtĩthũgaanĩtie bwega. (Jak. 1:19) Romba Jehova na ũcũnkũũne ũrĩa akwona ũntũ bũu, na kũthithia ũu gũgagũtethia kũborera.
12. Nĩatĩa bangĩ bomba gũtũtethia kwonania ũũmbi bwa gũciũra mantũ na kũborera?
12 O ta ũrĩa Jehova aatumĩĩre Abigaili gũtethia Daudi ona mantũ kĩndeene, oomba gũtumĩra bangĩ batũtethia gũciũkĩrwa nĩ ũntũ bwega. Kwou, mbere ũjũkia ĩtagaaria rĩrĩa wathũũrua nĩ ũntũ bũnna, no waranĩrie na Mũkristũ ũmũgimaru ũrĩa ũũmba gũgũtethia kwona mantũ na njĩra ĩnjega nkũrũki. (Nju. 12:15; 20:18) Na kinya ũkeeja kwĩthĩrwa nĩgwe ũgũtetheeria mũcoore waaku ũntũne ta bũu, to wigerekanie na Abigaili? Rĩ, womba gũtetheeria mũcoore waaku gũciũkĩrwa nĩ ũrĩa Jehova akwona ũntũ bũu? Jehova akatharima wĩru bwaku bwa gũtethia bangĩ bakũria ũũmbi bwa gũciũra mantũ na bethĩrwa na ũboreru.
ĨRĨGĨĨRA JEHOVA RĨRĨA WAIGUA ŨGUAA
13. Nĩatĩa ũũmbi bwa gũciũra mantũ bũũmba gũtũtethia rĩrĩa twaigua ũguaa?
13 Magiita jamwe tũgakũrũkĩĩra mantũ jamoomũ jarĩa jomba gũtũma tũkĩra. Ĩndĩ, ũũmbi bwa gũciũra mantũ bũgatũtethia kũriikana atĩ Jehova arĩ na inya nkũrũki ya ũntũ kinya bũrĩkũ bũrĩa bũũmba gũtũma tũkĩra. (Zb. 27:1) Jehova agatũtethia mantũne jonthe, kinya jarĩa tũkwona teka tũtĩjoomba. Kĩroria Jona naacioneere ũntũ bũu ũtũũrone bwawe. Neendete Mũrungu mono, ĩndĩ naabataraga kwona mantũ kĩndeene nĩkenda oombana rĩrĩa aeerwe ngũgĩ ĩndito.
14. Kwombĩka nĩkĩ Jona aaregaga gwĩta Nineve?
14 Jehova naeere Jona ngũgĩ ĩndito ya gwĩta Nineve kwĩra antũ atĩ ĩgiita rĩtĩ kũraaja barĩngĩthirua. (Jona 1:1, 2) Rĩ, kethĩra nĩgwe waatũmĩrwe ũrĩngĩthithia atĩa? Aarĩ eete na magũrũ kuuma Isiraeli mwanka Nineve narĩa Sĩria, rũgendo rũraaja rwa gĩntũ ta mweri jũmwe. Antũ ba Sĩria baarĩ bangʼeentu mono na ba ndwa. Nineve kinya nĩyeetagwa ‘ntũũra ya tharike.’ (Nah. 3:1, 7) Antũ agwĩtĩkĩĩria gwĩta naao, Jona naamatũkĩre.—Jona 1:3.
15. Nĩmbi biatetherie Jona kwĩrĩgĩĩra Jehova nkũrũki? (Jona 2:6-9)
15 Jona arĩkũmatũka, Jehova naamũriikanĩrie bwegie inya Yaawe rĩrĩa aamwonokerie na njĩra ya kĩama kuuma kĩune kĩa gĩkũyũ. (Jona 1:15, 17) Jona naairitanĩre ũntũ bwa gĩtũmi mono. Antũ a kũrekeeria ũguaa bwa gwĩta Nineve bũmũgwata, noonere mantũ kĩndeene na arariikana Jehova arĩngĩmũkaria kuumania na ũgwati burĩa bũrĩngĩumĩra. (Thoma Jona 2:6-9.) Rĩrĩa aatũmĩrwe Nineve kaĩrĩ, neetĩkĩrĩrie. Neetĩre arabatũmĩrĩria, baragarũka na Jehova ataabathirĩrie.—Jona 3:5.
16. Nĩatĩa ũũmbi bwa gũciũra mantũ bũũmba gũtũtethia rĩrĩa tũgũkĩra? (Njuno 29:25) (Tega kinya mbica.)
16 Nĩmbi tũkwiritana kuumania na rũgono rũu? Tũtĩkwenda ũguaa bwa gũkĩra antũ kana kinya ũntũ bũrĩkũ bũngĩ bũtũrigĩĩria kũthathayia Jehova. (Thoma Njuno 29:25.) Ũũmbi bwa gũciũra mantũ nĩ bwatetherie Jona atiga gũkĩra na arerĩgĩĩra ũtethio bwa Jehova. Kinya tuĩ tũgaciinda ũguaa twathũgaanĩria ũrĩa Jehova atũtethetie na gũtũkaria ĩgiita rĩkũrũkĩte. Kinya no tũthũgaanĩrie ngerekano cia ataana na aarĩ ba baaba barĩa bombanĩte nyuma ya gũkũrũkĩĩra mantũ jamoomũ kana barĩa bombĩte kwiingia twanya tũũrito twa ũtungatĩri bakĩĩrĩgagĩĩra Jehova.a (Ahi. 13:6) Twĩteni na mbere kwonania ũũmbi bwa gũciũra mantũ tũkĩĩrĩgagĩĩra Jehova buru na gũtethia bangĩ bathithia ũu.
Ngerekano ya Jona nĩgũtũritana atĩ ũũmbi bwa gũciũra mantũ bũgatũtethia gwĩtĩkĩĩria mwerekera jwa Jehova na kũũmbana kĩrĩ twanya twa ũtungatĩri tũtũũmũ (Tega gĩcuncĩ kĩa 16)
KŨRIA ŨŨMBI BWA GŨCIŨRA MANTŨ NA ŨBŨTŨŨRIE
17. Nĩatĩa tũũmba gũkũria ũũmbi bwa gũciũra mantũ nkũrũki?
17 O ta ũrĩa twairitana, ũũmbi bwa gũciũra mantũ bũgatũtethia tũũmbe gũciinda mantũ jamoomũ. Nĩatĩa tũũmba gũkũria nkuma ĩu nkũrũki? Jehova nĩwe Kaumo ga nkuma ĩu, na natumagĩra Rũteto rwawe na kĩrundu kĩawe gĩkĩtheru gũtũtethia kũmĩkũria. (Neh. 9:20; Zb. 32:8) Natwejaga ũtaaro bũrĩa bũtũtethagia gũtua matua ja ũũme na kwirigĩĩria tũtĩkathũũre rĩrĩa twaigithua bũbũũĩ. (Zb. 119:97-101) Twomba gũkũria nkuma ĩu twacũnkũũna kĩndeene jarĩa Bibiria yugaga na twaromba Jehova atwee kĩrundu kĩawe gĩkĩtheru. Bũu bũgatũtethia kwĩthĩrwa na mwonere ta jwa Jehova na kũthithia ũrĩa endaga.—Nju. 21:11.
18. Nĩ mworoto jũrĩkũ ũrĩ naju?
18 Twĩteni na mbere gũkũria ũũmbi bwa gũciũra mantũ bũrĩa Jehova atwejaga. (Zb. 14:2) Twathithia ũu, gũtĩrĩo tũkauma ‘njĩrene ya kĩrĩra’ na tũkoomba gũtua matua ja ũũme. (Nju. 21:16) Bũu bũgatũtethia kwĩthĩrwa na wendi bwa kwonania ũũmbi bwa gũciũra mantũ magiita jonthe na mantũne jonthe. Ta maumĩĩra, tũkombana na tũkoona ‘maweega.’
RWĨMBO NA. 42 Ĩromba rĩa Nthũmba ya Mũrungu
a Ngerekano, cũnkũũna rũgono rwa Georgiy Porchulyan kĩrĩ mũthingatano jwa “Masimulizi ya Maisha ya Mashahidi wa Yehova” kĩrĩ JW Library® kana kĩrĩ jw.org.