ĨPURŨ 13-19, 2026
RWĨMBO NA. 52 Wakfu wa Kikristo
Ũrĩa Ũbatithio Bwonanagia
‘Bũkaethie antũ. . . , baee aritwa bakwa bũkĩbabatithagia.’—Mat. 28:19.
JARĨA TŨKAIRITANA
Tũkaarĩĩria ũbatithio nĩmbi, baita ciabu, na ũrĩa bũthithagua.
1. Nĩmbi bionagagia atĩ ũbatithio nĩ ũritani bwa gĩtũmi mono bwa Bibiria?
Nĩtũgwĩragua mono rĩrĩa mũritwa wa Bibiria abatithua! Ũu nĩu Akristũ ba karine ya mbere baaigĩrue mwaka jwa 33 M.J. ĩgiita rĩa Pentekosti rĩrĩa boonere antũ babaingĩ bakĩbatithua. Ĩgiita rĩu, mũtũmwa Petero naaritĩre rwaria, na arataarĩĩria ũritani bwa gĩtũmi bwegie ũbatithio. (Atum. 2:38, 40, 41) Mũtũmwa Paũlũ naandĩkĩre atĩ ‘ũritani bwa ũbatithio’ nĩ bũmwe bwa mooritani ja mũsingi bũrĩa muntũ ambagĩĩria nabu rĩrĩa akwiritana ‘nteto cia Kristũ.’ (Ahi. 6:1, 2) Kinya kethĩra ũritani bũu nĩ bũmwe bwa mũsingi, nĩtũkũbatara gũciũkĩrwa nĩbu bwega. Nĩkĩ?
2. Nĩkĩ tũkũbatara gũciũkĩrwa bwega nĩ ũrĩa Bibiria ĩritanaga bwegie ũbatithio?
2 O ta ũrĩa nyomba ĩrĩ na mũsingi jũmwega ĩthagĩrwa ĩriki, gũciũkĩrwa bwega nĩ ũritani bwegie ũbatithio, gũgatũtethia kwĩthĩrwa na wĩtĩkio bũũriku. Twinthe nĩtũkũbatara gũciũkĩrwa nĩ ũntũ bũu, kwĩthĩrwe ga tũkwenda kũbatithua kana nĩtwabatithĩrue mĩaka ĩmiingĩ ĩkũrũkĩte. Kĩthomone gĩkĩ, tũgacokia biũria bibi; ũbatithio nĩmbi, nĩatĩa bũthithagua, na nĩkĩ tũbatithagua riĩtwene rĩa Ĩthe, rĩa Mũtaana, na rĩa kĩrundu gĩkĩtheru?
ŨRĨA ŨBATITHIO BWONANAGIA
3. Nĩatĩa ũbatithio bwonanagia?
3 Rĩrĩa wabatithua, nwonanagia mbere ya mwingĩ atĩ nwĩtĩkĩĩrĩtie ũmma bwegie Jehova Mũrungu na Jesũ Kristũ, nwirirĩte meeyia jaaku, nũthithĩtie ũgarũrũku mũtũũrĩrene jwaku nĩkenda ũtumĩkĩra Jehova, nwĩtĩkĩĩrĩtie atĩ Jesũ nĩwe njĩra ĩrĩa Mũrungu atumagĩra akĩ gũtwonokia, na nwonanĩtie gũkũrũkĩĩra maromba wendi bwa gũtumĩkĩra Mũrungu na kũgwatanĩra na ũthuranĩri bwawe. Rĩrĩa weeka mũciĩtio jũu kana wairita kĩrĩ Mũrungu na wabatithua, nwambagĩĩria gwĩtĩĩra njĩrene ĩrĩa ĩtongagĩĩria mwoyone.
4. Gũtombekwa rũũjĩne buru kwonanagia atĩa? (Tega kinya mbica.)
4 Rĩrĩa ũkũbatithua, ũtombekagwa rũũjĩne buru, rĩu ũgokĩĩrua,a teka ũrakuĩte rĩu wariũkua. (Teganĩĩria Akolosai 2:12.) Ũbatithio nĩbwonanagia atĩ nũthithĩtie ũgarũrũku bũbũnene mono ũtũũrone bwaku. Nĩ na njĩra ĩrĩkũ? Rĩrĩa watombekwa rũũjĩne, wonanagia ũgũtiga mũtũũrĩre jwaku jwa au mberene. Na rĩrĩa wokĩĩra kuuma rũũjĩne, wonanagia ũkwambia ũtũũro bũbwerũ, ũrĩ na mworoto jwa kũthithia wendi bwa Mũrungu.
Rĩrĩa wabatithua, nũtigaga mũtũũrĩre jwaku jwa karaaja, ũkambia ũtũũro bũbwerũ ũkĩthithagia jarĩa jagwĩragia Mũrungu (Tega gĩcuncĩ kĩa 4)
5. Nĩatĩa kwithuranĩra tontũ bwa ũbatithio gũkũngʼuanana na ngũgĩ ĩrĩa Nuhu aathithĩrie ya gwaka Sabina? (1 Petero 3:18-21)
5 Thoma 1 Petero 3:18-21. Twomba kũngʼuanithania mantũ jarĩa ũthithagia ũkiithuranĩra kũbatithua na ngũgĩ ĩrĩa Nuhu aaritĩre ya gwaka Sabina. Ũkeeja kwĩthĩrwa nendĩ wambĩtie kwiritana bwegie Jehova, womba kwona ngũgĩ ĩu ĩrĩ ĩndito mono, mbuga ta ĩrĩa Nuhu aathithĩrie ya gwaka Sabina. Ĩndĩ no ũciũmie kũthithia mantũ jau jonthe. Tontũ kinya Nuhu nou aathithĩrie. Mũrungu naamwerekererie ũrĩa arĩngĩaka Sabina, na naabataraga kũthingata ũu ungwa Jehova aamwĩrĩte, nĩkenda oonokia ũtũũro ĩgiita rĩa ĩkondoria. Tontũ naarĩ na wĩtĩkio na naatongagĩĩrua nĩ Mũrungu, naathĩkĩre na araaka Sabina. O ta Nuhu, kinya gwe ũkoomba kũthithia ‘mantũ jonthe jarĩa Mũrungu athanĩte.’—Kia. 6:22.
6. Nĩ na njĩra ĩrĩkũ ũbatithio bũkwonokagia?
6 Mũstaarĩne jwa 21, Mũtũmwa Petero naandĩkĩre atĩ ũbatithio nĩbu ‘bũtwonokagia’. Kamma, ĩthithia rĩa gũtombeka muntũ rũũjĩne akĩ rĩtĩũmba kũmũretera wonokio kana kinya rĩthambia meeyia jaawe. Nĩ tharike ya Jesũ akĩ yũũmba kũthithia ũu. (1 Joh. 1:7) Amwe nou, ũbatithio nĩ bwa gĩtũmi mono tontũ nĩbũtũtethagia kwingiia mantũ jonthe jarĩa Mũrungu athanĩte, na kinya kwĩthĩrwa na thamiri ĩnjega. Gũkũrũkĩĩra kĩgongwana kĩa ĩkũũri rĩa Jesũ, Jehova akagwĩrua gũtũrekera meeyia jeetũ. Na njĩra o ta iu, ũbatithio ‘nĩbũkwonokagia,’ kana bũgagũtongeeria mwoyone.
ŨRĨA ŨBATITHIO BŨTHITHAGUA
7. Nĩatĩa ũbatithio bũbuĩrĩte kũthithua?
7 Kinya kethĩra Bibiria ĩtĩarĩrĩtie mono mantũ jamaingĩ jegie ũbatithio, nĩyonanĩtie no mwanka muntũ atombekwe rũũjĩne buru. Kinya Maandĩko nĩjatũtethagia kũmenya mantũ jarĩa jabuĩrĩte kũthithua ĩgiita rĩa ũbatithio. Ngerekano, mooritani ja Bibiria nĩjatethagia barĩa bakũbatithua kũthuura nguũ irĩ na nthoni injega, na barĩa bagũkũjĩĩra gũciĩtithia na njĩra ya gĩtĩĩo. (1 Ako. 14:40; 1 Tim. 2:9) Ntukũne cietũ, mũkũrũ wa kĩũthũrano nĩwe ũbatithanagia, na tũtĩkumagia barĩa baejagwa wendeeri bũu. (1 Ako. 1:14, 15) To mwanka ũbatithio bũkũjĩĩrwe nĩ antũ babaingĩ.—Atum. 8:36.
8. Nĩ biũria birĩkũ barĩa bakwenda kũbatithua boragua na nĩkĩ? (Mathithio 2:38-42) (Tega kinya mbica.)
8 Bibiria yonanagia nĩtũbuĩrĩte ‘kũmenyithania wonokio bwetũ mbere ya antũ,’ na kũu nĩ kuuga kwonania wĩtĩkio bwetũ. (Aro. 10:9, 10; tega “publicly declare” kĩrĩ study note.) Na ũu nĩu tũthithagia rĩrĩa twabatithua, ĩthithia rĩrĩa rĩrĩ rĩa gĩtũmi mono nĩkenda twonokua! Tontũ bwa gĩtũmi kĩu, barĩa bakwenda kũbatithua nĩboragua biũria biĩrĩ. Kĩa mbere, “Rĩ, nwirirĩte meeyia jaaku, wairita kĩrĩ Jehova, na wetĩkĩĩria njĩra yaawe ya kwonokania gũkũrũkĩĩra Jesũ Kristũ?” Kĩũria kĩu kĩonanagia matagaaria jarĩa muntũ arĩkĩĩtie kũjũkia nĩkenda abatithua, na nĩ jangʼuananaga na jarĩa Petero eerĩre antũ bajũkie ntukũ ya Pentekosti. Kĩũria kĩa biĩrĩ nĩ, “Rĩ, nũgũciũkĩrwa atĩ ũbatithio bwaku nĩbũgũkũmenyithania ta ũmwe wa Akũũjĩ ba Jehova ũrĩa ũkũgwatanĩra na ũthuranĩri bwawe?” Kĩũria gĩkĩ nĩgĩtũriikanagia nĩtũbuĩrĩte gũtũũra kũringana na kwiritĩra gwetũ kĩrĩ Jehova tũkĩgwatanagĩra na ũtongeeria bũrĩa aejanĩte gũkũrũkĩĩra ũthuranĩri bwawe na kũmũtumĩkĩra amwe na Akristũ bangĩ, o ta ũrĩa aritwa ba karine ya mbere baathithagia. (Thoma Mathithio 2:38-42.) Barĩa bacokagia kũuma nkorone ĩĩ kĩrĩ biũria biu, nĩbabatithagua.
Rĩrĩa ũkũbatithua ‘nũmenyithanagia wonokio bwaku mbere ya antũ’ (Tega gĩcuncĩ kĩa 8)d
9. No mwanka twinthe tũjũkie matagaaria jarĩkũ nĩkenda twĩtĩkĩrwa nĩ Mũrungu?
9 Mbuga mbere wambia kwiritana Bibiria, nĩ waarĩ na mĩĩtĩre ĩmĩega na ũtathithagia meeyia jamarito. Kana mbuga nũreri nĩ aciari Akristũ na nĩbagũtethetie kwenda Jehova. Kethĩra nĩu, rĩ, nũkũbatara kwirira na kũbatithua nĩkenda Mũrungu agwĩtĩkĩra? Ĩĩ. Ĩtĩkũmakania narĩa tũrereri, twinthe nĩtũciari na wĩyia bwa kaumo, bũrĩa bũtwathũranĩte na Mũrungu. (Zb. 51:5) Rĩrĩa twairitana ũmma bwegie Jehova, nĩtũthuuraga gwĩĩka wendi bwawe mbere ya bwetũ. Twathithia ũu, nĩtwiriraga, tũkagarũka, na tũkambia kũthingata njĩra ĩrĩa ĩgwĩragia Baaba weetũ wa ĩgũrũ. Mũthiene nĩtũbatithagua.—Atum. 3:19.
10. Nĩatĩa ũbuĩrĩte kũthithia kethĩra nĩwabatithĩrĩtue ndinine ĩngĩ?
10 Nĩkenda waa Mũkũũjĩ wa Jehova, no mwanka ũbatithue kaĩrĩ kinya kethĩra nĩ wabatithĩrĩtue ndinine ĩngĩ. Nĩkĩ? Tontũ au mberene ũtaciũkĩrĩtwe bwega nĩ ũmma bwegie Jehova Mũrungu na Jesũ. Na kinya kethĩra nĩwairitĩte kĩrĩ Mũrungu gũkũrũkĩĩra maromba, mũciĩtio jũrĩa wekĩĩte jũtaumanĩtie na gũciũkĩrwa bwega nĩ wendi bwawe. Rĩrĩa Mũtũmwa Paũlũ aacemanĩrie na antũ ba Efeso barĩa baabatithĩtue batĩmenyete ũmma bwegie Jesũ, naathithĩrie mũbango nĩkenda babatithua kaĩrĩ.b (Atum. 19:1-5) O ta ũu, ntukũne cietũ, ũbatithio bwĩtĩkĩrĩkaga akĩ kethĩra muntũ nethĩrĩtwe na ũmenyo bwa mma bwegie wendi bwa Mũrungu.
‘RIĨTWENE RĨA ĨTHE, RĨA MŨTAANA, NA RĨA KĨRUNDU GĨKĨTHERU’
11. Kũbatithua ndeene ya riĩtwa rĩa ‘Ĩthe, na rĩa Mũtaana, na rĩa kĩrundu gĩkĩtheru’ kwonanagia atĩa? (Mathayo 28:18-20)
11 Jesũ naathanĩre atĩ barĩa barĩngĩĩtĩkĩĩria kwaa aritwa baawe, babuĩrĩte kũbatithua riĩtwene rĩa ‘Ĩthe, na rĩa Mũtaana na rĩa kĩrundu gĩkĩtheru.’ (Thoma Mathayo 28:18-20.) Nĩatĩa bũu bwonanagia? Bibiriene, kiugo “riĩtwene” kaingĩ kĩonanagia nkuma irĩa muntũ ethagĩrwa nacio. Kinya kĩomba kwonania kaanya kana wathani bũrĩa bũrũngamĩĩri nĩ riĩtwa rĩu. Kwou, rĩrĩa twathithia ũntũ bũnna “riĩtwene rĩa” muntũ kana gĩntũ kĩnna, twĩthagĩrwa tũgĩtĩĩaga wathani bũrĩa mwene riĩtwa rĩu arĩ nabu. (Teganĩĩria Mathayo 10:41; tega “because he is a prophet” kĩrĩ study note.) Ga tũcũnkũũne ũrĩa ũũmba kwonania nũgũciũkĩrwa nĩ kaanya, na wathani bũrĩa Ĩthe na Mũtaana barĩ nabu, na kinya ngũgĩ ya kĩrundu gĩkĩtheru.
12. Nĩatĩa tũbatithagua riĩtwene rĩa Ĩthe? (Kugwurirwa 4:11) (Tega kinya mbica.)
12 Riĩtwene rĩa Ĩthe. Nĩkwonania nĩtũciũkagĩrwa atĩ Jehova nĩwe Baaba weetũ wa ĩgũrũ na Mwejani wa Mwoyo. Nĩwe Mũrungu mwene inya yonthe na Mũũmbi wa into bionthe. (Thoma Kugwurirwa 4:11.) Nĩtũmwonaga arĩ Mwigua wa maromba, na nĩtũtumagĩra riĩtwa rĩawe rĩrĩa tũkũmũromba na tũkwaria na bangĩ bũmwegie. (Zb. 65:2) Amwe nou, kũrĩ mantũ jangĩ jendekaga nĩkenda muntũ abatithua riĩtwene rĩa Ĩthe. Antũ barĩa Petero aaranagĩria nabo ntukũ ya Pentekosti, nĩbamenyaga riĩtwa rĩa Jehova, ĩndĩ nandĩ nĩbaabataraga gũciũkĩrwa atĩ aejanaga mwoyo jwa kenya na kenya, gũkũrũkĩĩra Jesũ Kristũ akĩ.—Aro. 5:8.
Nyuma ya kũbatithua, ĩta na mbere gũtĩĩa kaanya na wathani bũrĩa Ĩthe (Tega gĩcuncĩ gĩa 12)
13. Nĩ na njĩra ĩrĩkũ tũbatithagua rĩitwene rĩa Mũtaana? (Tega kinya mbica.)
13 Riĩtwene rĩa Mũtaana. Nĩtũciũkagĩrwa atĩ Jesũ nĩwe Mũtaana wa mũmwe wa Mũrungu. Nĩwe ‘njĩra’ yonka ĩrĩa Jehova atumagĩra nĩkenda twĩthĩrwa na ngwatanĩro ĩnjega amwe nawe. (Joh. 14:6) Kinya nĩwe Mũtũkũũri ũrĩa wakuĩre tontũ bwetũ nĩkenda twĩja kwona mwoyo. Kũmenya ũntũ bũu nĩgũtũmaga tũthingata ngerekano yaawe ntukũ cionthe ũtũũrone bwetũ, na tĩ ntukũ ya kũbatithua akĩ. (1 Joh. 2:6) Tontũ bũu, o ta Jesũ, tũtĩĩtĩkagĩĩria ũntũ kinya bũrĩkũ bũtũrigĩĩria gũtũmĩĩria na wĩru. (Luk. 4:43) Kinya nĩtwĩthagĩrwa na wendi bwa kũũmĩĩria mĩthangĩko tũgĩtumĩkagĩra Jehova tũrĩ etĩkĩkua. (2 Tim. 3:12) Nĩtũtĩĩaga Jesũ arĩ ‘kĩongo gĩa kĩũthũrano,’ na kwou nĩtwathĩkagĩra barĩa ekĩte nĩkenda batongeeria na bamenyeera athingati baawe.—Aef. 4:8, 11, 12; 5:23.
Nyuma ya kũbatithua, ĩta na mbere gũtĩ ĩa kaanya na wathani bwa Mũtaana wa Mũrungu (Tega gĩcuncĩ gĩa 13)
14. (a) Nĩatĩa tũbatithagua riĩtwene rĩa kĩrundu gĩkĩtheru? (Tega kinya mbica.) (b) Nĩ ũbatithio bũrĩkũ bũngĩ etũrĩrua maguta babatithagua nabu? (Tega kathandũkũ “Ũbatithio Bũrĩa Etũrĩrua Maguta Babatithagua Nabu.”)
14 Riĩtwene rĩa kĩrundu gĩkĩtheru. Nĩtwĩtĩkagĩĩria ũmma bwegie kĩrundu gĩkĩtheru. Nĩtwijĩ atĩ, kĩrundu gĩkĩtheru tĩ muntũ kana gĩcuncĩ kĩa Withatũ, ĩndĩ nĩ inya ya Mũrungu. Kinya nĩtwĩtĩkagĩĩria atĩ kĩrundu gĩkĩtheru nĩgĩatongeererie iroria na barĩa bonthe baandĩkĩre Bibiria, kwou nĩtũmĩthomaga na wĩthĩre na kũthingata mooritani jayo. (2 Pet. 1:20, 21) Kinya nĩtũciebanagia na meeyia jamarito, tontũ bũu bwomba gũtũma kĩrundu gĩkĩtheru gĩtĩkarite ngũgĩ ndeene yeetũ o na kinya kĩũthũranone.—Aef. 4:30.
Nyuma ya kũbatithua, ĩta na mbere gũtĩ ĩa ngũgĩ ya kĩrundu gĩkĩtheru (Tega gĩcuncĩ kĩa 14)
15. Nĩ mworoto jũrĩkũ tũbuĩrĩte kwĩthĩrwa naju?
15 Kethĩra ũrĩ Mũkristũ ũbatithĩtue, ĩta na mbere kwiriikania nĩkĩ ũbatithio bũrĩ bwa gĩtũmic na wĩte na mbere gũtũũra kũringana na mũciĩtio jũrĩa wekĩre kĩrĩ Jehova ũrĩkwirita na wabatithua. Ĩndĩ rĩ, akethĩra ũtĩrabatithua? Rĩ, ga kũrĩ na ũntũ bũgũkũrigĩĩria? Kĩthomone kĩrĩa kĩthingatĩte tũkaarĩĩria ũrĩa ũũmba kũthithia nĩkenda ũkinyĩra ũbatithio.
RWĨMBO NA. 161 Nĩ Ngwĩragĩrua Kũthithia Wendi Bwaku
a Kiugo gĩa Kĩgiriki baˈpti-sma, kĩrĩa gĩtaũragwa “ũbatithio” kĩonanagia “gũtombekwa” kana “gũtonyithua rũũjĩne buru.” Kwou kũbatithua nĩ gũtombekwa buru rũũjĩne, na tĩ kũminyĩrua rũũjĩ ta ũrĩa ndini imwe iritanaga.
b Antũ arũme bau ba Efeso baabatithĩtue na “ũbatithio bwa Johana.” (Atum. 19:3) Johana mũbatithania neerĩre Ayahudi bairire meeyia jarĩa baathithĩtie kwerekera Watho bwa Musa, na barĩa beetĩkĩĩrĩrie naabaabatithĩrie. (Mar. 1:4, 5) Amwe nou, ũbatithio bwa Johana nĩbwakinyĩre mũthia Watho bwa Musa bũrĩgũtiga kũthingatwa. Kuuma ĩgiita rĩu, Mũrungu etĩkagĩĩria ‘ũbatithio bũmwe’ akĩ bũrĩa bũtongagĩĩria kĩrĩ wonokio.—Aef. 4:5.
c Tega gĩcuncĩ kĩrĩ na kĩongo “Ũbatithio Nĩmbi?” kĩrĩ jw.org na kĩrĩ JW Library® kĩrĩ mũthingatano jwa “Macookio ja Biũria bia Bibiria.”
d GŨTAARĨĨRIA MBICA: Kĩgomanone, barĩa bakwenda kũbatithua barũngami nĩkenda batũmĩĩria mbere ya mwingĩ bwegie wĩtĩkio bwao.