ĨPURŨ 6-12, 2026
RWĨMBO NA. 82 “Acheni Nuru Yenu Iangaze”
Ũrĩa Tũũmba Gũtethia Antũ ba Nja Barĩa Batĩĩtĩkĩtie
‘Tũkanogeni nĩ kũthithia mantũ jarĩa meega.’—GAL. 6:9.
JARĨA TŨKAIRITANA
Tũkoona ũrĩa tũũmba gũkũria ngwatanĩro ĩnjega na antũ ba nja barĩa batĩĩtĩkĩtie na ũrĩa tũũmba kũbatethia gĩkĩrundu kwombĩka.
1-2. Kwombĩka nĩmbi biathũũkĩrie ngwatanĩro yeetũ amwe na antũ ba nja tũkwambia kwiritana ũmma?
JESŨ eerĩre muntũ mũrũme ũrĩa wendaga kwaa mũthingati waawe ũjũ: ‘Aana njenu kĩrĩ antũ beenu ũkabeere mantũ jamanene jarĩa ũthithĩrĩtue nĩ Mwathani, na ũrĩa akwigĩĩrĩtue kĩao.’ (Mar. 5:19) Jesũ aaugĩre ũu tontũ naamenyaga antũ babaingi nĩbendete kwĩra antũ ba nja yaao bwegie nkuma ĩnjega.
2 Rĩ, nũkũriikana ũrĩa waigĩrue rĩa mbere ũrĩkwigua bwegie nkuma ĩnjega? Mbuga nĩwagwĩrĩrue mono na ũraciĩra ũtĩkira nayo. Kwombĩka bamwe ba nja yeenu bataagwĩrĩrue kwigua nũkwiritana na Akũũjĩ ba Jehova. Kana mbuga bũtaagwatanĩĩre nabo tontũ njĩra ĩrĩa watumĩĩre kũbeera jarĩa waritanagwa ĩtaarĩ ĩnjega. Kethĩra nĩu gwakarĩkĩre, nĩatĩa ũũmba gũcokia ngwatanĩro ĩnjega amwe na antũ ba nja ũtĩgũtiganĩria wĩtĩkio bwaku?
3. Nĩmbi tũkairitana kĩthomone gĩkĩ?
3 Kĩthomone gĩkĩ tũkoona: (1) Ũrĩa tũũmba gũtethia na njĩra ya kĩao antũ ba nja barĩa batĩĩtĩkĩtie,a kinya kethĩra batĩgwĩtĩkĩĩria ũmma; (2) ũrĩa tũũmba kũthĩthia rĩrĩa batwarĩria kana batũthithĩria mantũ ja gũtuuna nkoro; (3) ũrĩa tũũmba kũbatethia tũrĩ na weteeri twĩrĩgĩĩrĩte no bairitane ũmma ĩgiita rĩĩjĩte; (4) ũrĩa tũũmba kũbonia nĩ tũbendete.
TONGEERUA NĨ KĨAO KŨBATETHIA
4. Nĩatĩa Jesũ aathithagĩria barĩa bateetĩkagĩĩria ntũmĩĩri yaawe?
4 Jesũ aatatigĩre gũtetheeria barĩa bateetĩkagĩĩria ntũmĩĩri yaawe. Aingʼuanithanĩrie na mũriti ngũgĩ mundene jwa mĩzabibũ ũrĩa ũgeragia njĩra mwanya mwanya nĩkenda atethia mutĩ jũkũra na jũriiba. (Luk. 13:6-9) Akĩrita ngerekano ĩu, naatumĩrĩte nkũrũki ya mĩaka ĩthatũ akĩgeragia gũtethia Ayahudi bamwĩtĩkia. Nĩkĩ ataatigĩre kũbatethia? Tontũ naabaigagĩĩrua kĩao, bũu nĩbwatũmĩre abonia weteeri.
5. Nĩmbi biatũmaga Jesũ aigĩrua Ayahudi bangĩ kĩao?
5 Jesũ naaigagĩĩrua Ayahudi bangĩ kĩao tontũ atongeeria ba ndini batabatethagia kwĩthĩrwa na wĩtĩkio bwa mma kĩrĩ Mũrungu. Jesũ noonere atĩ antũ bau baakari ta ‘ngʼondu irĩa ciagĩte mũrĩĩthi.’ (Mar. 6:34) Kagiita gakai mbere Jesũ akua, naarĩrĩre agũtega Jerusalemu tontũ naamenyaga atĩ yathirua, akari baayo babaingĩ barĩngĩkua tontũ bwa kwaga wĩtĩkio. (Luk. 19:41-44) Rĩrĩa twethĩrwa na kĩao o ta kĩu kwerekera antũ ba nja cietũ, tũkabatethia na wĩru.
6. Nĩkĩ tũbuĩrĩte kwonia weteeri antũ ba nja yeetũ barĩa batĩĩtĩkĩtie? (Agalatia 6:9)
6 Thoma Agalatia 6:9. Kinya kethĩra antũ ba nja yeetũ batĩgũkucĩĩrua nĩ jarĩa twĩtĩkĩtie nandĩ, nĩtũbuĩrĩte kwĩthĩrwa na weteeri na tũtĩbuĩrĩte gũtiga kũbathithĩria ‘mantũ jameega.’ Nĩtwijĩ nĩkũjũkagia ĩgiita muntũ kũgarũra jarĩa etĩkĩtie na ambia gwĩtĩkia Jehova. Mbuga au mberene, kinya gwe wakari tabo na ũtaarĩ na ‘wĩrĩgĩĩro na gũtĩ Mũrungu warĩ nawe nthĩgũrũne.’ (Aef. 2:12) Kethĩra nĩu, gũtĩ nkaanja kũrĩ muntũ wairitĩĩre aragũtethia. Kwou, kinya gwe wonia antũ ba nja yeenu weteeri, womba kũbatethia bairitana bwegie Jehova.
MENYA ŨTHINGATĨĨRA MAATIA JAAO
7. Kwombĩka nĩmbi biatũmaga ataanongʼina ba Jesũ barega kũmwĩtĩkia?
7 Kwombĩka ataanongʼina ba Jesũ nĩbaaigĩrue bwegie biama birĩa aaringaga Galili. (Luk. 4:14, 22-24) Amwe nou, mwambĩrĩrione bataamwĩtĩkagia. (Joh. 7:5) Nĩkĩ? Bibiria ĩtĩgwetete. Ĩndĩ nĩtaarĩĩragia nĩkĩ Ayahudi bamwe baaregere kwaa aritwa baawe. Bamwe baao nĩbaakĩraga kwathũrwa nĩ bangĩ. (Joh. 9:18-22) Tontũ bwa kwĩthĩrwa bangĩ nĩbaamwijĩ kuuma arĩ ũmũniini nĩ bwarĩ bũbũũmũ gwĩtĩkia nĩ mũtaana wa Mũrungu. (Mar. 6:1-4) Kinya ataanongʼina ba Jesũ kwombĩka nĩ baarĩ na mwonere o ta jũu. Rĩ, no kwĩthĩrwe nĩ mantũ ta jau jagũtũma antũ ba nja cietũ bakĩra na barega kwiritana bwegie Jehova?
8. Nĩkĩ antũ ba nja cietũ barĩa batĩĩtĩkĩtie bomba gũtwarĩria kana gũtũthithĩria mantũ ja gũtuuna nkoro?
8 Thũgaanĩria nĩkĩ bakuuga kana bakũthithia na njĩra nna. Mbuga ataanongʼina ba Jesũ nĩ bamwe ba antũ ba nja yaao barĩa baaugaga ‘gakuuma nthũũ.’ (Mar. 3:21) Nĩkĩ baugaga ũu? Bibiria yonanagia naagĩĩte kinya kaanya ga kũrĩa tontũ bwa kwingĩĩrwa nĩ ngũgĩ ya gũtũmĩĩria na kworia antũ. (Mar. 3:20) Rĩ, no kwĩthĩrwe antũ bau ba nja yaao ka boonaga teka athũũki mũtwe? Ĩĩ kwombĩka. Kinya antũ ba nja cietũ bomba kwona teka tũkwiritanĩria nkũrũki ya kĩthimi mantũne ja ndini yeetũ. Kethĩra nĩu bakwigua, nĩbwega tũbarikithĩrie gũkũũrũkĩĩra biugo na mathithio jeetũ atĩ nĩtwĩthagĩrwa na ũngʼanĩĩru.
9. Nĩmbi biũmba gũtethia antũ ba nja cietũ kũgarũra mwonere jwao gũtwerekera? (1 Petero 3:1, 2) (Tega kinya mbica.)
9 Ĩthĩrwa na mĩĩtĩre ĩmĩega. Biugo na mathithio jeetũ jomba gũtũma antũ ba nja cietũ bagarũra mwonere jwao gũtwerekera. (Thoma 1 Petero 3:1, 2.) Ngerekano, mwarĩ wa baaba omba kwĩthĩrwa na mũkũrũ ũtĩĩtĩkĩtie na omba kwigua ĩoru rĩrĩa eta mĩcemanione kana ũtungatĩrĩne. Tontũ atĩkwenda kũmwigithia bũbũũĩ, no athithie mogarũrũku manna ũtungatĩrine bwawe nĩkenda atumĩra kaanya gakaĩngĩ amwe nawe. Ngerekano, no eete ũtungatĩrĩne rĩrĩa mũkũrũ waawe arĩ mantũne jangĩ kana rĩrĩa atĩ nja. Rĩrĩa athithia mogarũrũku ta jau na ethĩrwa na ũngʼanĩĩru, omba gũtũma agarũra mwonere jwawe gũtwerekera.
Biugo na mathithio jeetũ ja kĩao jomba kũgarũra mwonere jwa mwendwa weetũ ũrĩa ũtĩĩtĩkĩtie kwerekera Akũũjĩ wa Jehova (Tega gĩcuncĩ gĩa 9)g
10. Nĩatĩa tũũmba kwigerekania na Jesũ rĩrĩa twameneerua?
10 To mwanka ũbacokerie bakũmeneeria. Rĩrĩa Jesũ aatujagĩrwa nakũrĩa na kũnyua ncoobi mono, ataathũraga kana ageria gwiteteera. Mwanya nou, neekĩĩre antũ inya baicũnkũũnĩre bongwa ũmma bwa mantũ. (Mat. 11:19) Kinya noonanĩrie atĩ naarĩ na ũngʼanĩĩru ũtũũrone bwawe. (Teganĩĩria Joh. 2:2, 6-10.) O ta Jesũ, rĩrĩa antũ batũmeneeria, tĩ rĩonthe tũbuĩrĩte gwiteteera. Mwanya nou, bonie gũkũrũkĩĩra mathithio jaaku ũrĩ na ũngʼanĩĩru na kũgwĩrua ũtũũrone. Bũu bwomba kũbatethia gũciũkĩrwa atĩ mantũ jarĩa baigagua jamathũũku jatwegie tĩ ja mma.
ĨTHĨRWA NA WETEERI NA WĨRĨGĨĨRO
11. Nĩatĩa Jesũ aathithagĩria ataanongʼina kinya kethĩra bataamwĩtĩkagia?
11 Mauku ja injili jonanagia atĩ Jesũ neetĩre na mbere kwonia ataanongʼina weteeri. Ngerekano, nĩbaarĩ o rĩrĩa aaringĩre kĩama kĩawe kĩa mbere narĩa Kana ya Galili. (Joh. 2:11, 12) O ta ũrĩa twonere, ataanongʼina bataamwĩtĩkagia mwambĩrĩrione. Amwe nou, Jesũ ataatigĩre kũbamakĩra. Bibiria nĩyonanagia akĩaranĩria nabo na njĩra ya kĩao gĩntũ ta mĩaka ĩthatũ nyuma ya kũringa kĩama kĩu.—Joh. 7:5-8.
12. Nĩmbi biũmba gũtũtethia kwĩthĩrwa na wĩrĩgĩĩro atĩ antũ bamwe ba nja cietũ boomba kwiritana ũmma?
12 Twaciũkĩrwa bwega nĩ kĩao kĩa Jehova tũkethĩrwa na wĩrĩgĩĩro atĩ antũ ba nja cietũ no bagarũke. Rĩrĩa ndini cia ũrongo ikathirua, mbuga boomba kũriikana nĩtwabeeraga ũntũ bũu bũgakarĩka.b (Kug. 17:16) Kinya bomba kũthuura gũtumĩkĩra Jehova amwe natuĩ nyuma ya thĩĩna ĩrĩa nene kwambia. Kinya nandĩ, nĩtũbuĩrĩte gũciũmia ũrĩa tũkũũmba nĩkenda tũbatethia rĩrĩa bagũkũrũkĩĩra mantũ jamoomũ. Rĩrĩa boona kamma nĩtũbendete na nĩtũkũbaigĩĩrua kĩao, kwombĩka bakenda kwiritana ũmma.
BONIE NŨBENDETE
13. Kinya kethĩra tũrĩ na mantũ jamaingĩ ja kũthithia ũtungatĩrĩne bwa Jehova, nĩ ũntũ bũrĩkũ tũbuĩrĩte gũciebania nabu?
13 Kinya kethĩra tũrĩ na mantũ jamaingĩ jakũthithia ũtungatĩrine bwa Jehova, nĩtũbuĩrĩte kwimenyeera tũtĩkoonie antũ ba nja teka tũtĩ na kaanya nabo kana teka tũtĩbendete. (Mat. 7:12) Nĩatĩa tũũmba kũboonia nĩtũkũbamakĩra? Gatwarĩĩrie njĩra mwanya mwanya.
14-15. Nĩatĩa tũũmba kwonania nĩtwendete antũ ba nja cietũ barĩa batĩĩtĩkĩtie? Ejana ngerekano.
14 Menyeria kwaranĩria nabo, na ũbonie nũbendete. Nĩtwonagia antũ ba nja cietũ nĩtũbendete rĩrĩa twaranĩria nabo na wĩthĩre. Ngerekano, no tũbatũmĩre ntũmwa cia thimũ kana mbica cietũ irĩa bomba kũgwĩrĩrua. Ũntũ bũngĩ bũũmba kwagĩrithia nkũrũki ngwatanĩro yeetũ amwe nabo nĩ kũbaa kĩewa gĩkĩniini kana kũbandĩkĩra barũga. Twabathithĩria mantũ ta jau, bakoona nĩtũbendete mono.
15 Thũgaanĩria ngerekano ya mwarĩ wa baaba ũgwĩtwa Anna, wa kuuma Armenia. Antũ ba nja yaao nĩbendete gũtumĩra kaanya barĩ amwe, mono mono magiita ja thigũnkũ kana rĩrĩa bagũkũngũĩra ntukũ cia gũciarwa. Arĩkwaa Mũkũũjĩ wa Jehova, nĩbaamakĩre mono tontũ boonaga teka atĩgwatanĩra nabo kaĩrĩ. Kinya nĩbaamakaga bakĩonaga teka nyumene akathangĩka na ũtũũro bũthũũke. Nĩatĩa Anna aathithĩrie nĩkenda batiga kũmaka? Ariuga: “Rĩrĩa ndabariũngĩra, nĩmberaga ũrĩa mbĩtĩte na mbere na jarĩa mbĩthĩrĩtwe nkĩthithagia. Kinya nĩmbagwataga ũgeni gwakwa na nkabamenyithania na acoore bakwa. Bũu nĩbũtũmĩte bakamenyana na acoore bakwa babaingĩ, na nandĩ nĩbaigagua bangʼanĩri.” Nkũrũki, ariuga: “Nandĩ babaingĩ baao nĩbaugaga atĩ nĩbonaga ndĩna kũgwĩrua, na nĩbatigĩte kũmaka tontũ bwakwa.”
16. Nĩatĩa Jesũ oonanĩrie naamakagĩra mũtaanongʼina ũrĩa wetagwa Jakubu? (Tega kinya nteto irĩa irĩ gaiti.)
16 Boonie nũkũbamakĩra. Tontũ Jesũ naamakagĩra mũtaanongʼina ũrĩa wetagwa Jakubu, arĩkũriũkua naacionanĩrie kĩrĩwe. (1 Ako. 15:7) Ũrĩthũgaania nĩatĩa aaigĩrue arĩkũmenya Jesũ no aamũmakagĩra? Kwombĩka ĩgiita rĩu nĩrĩo aaciũkĩĩrwe atĩ Jesũ nĩwe Mesiya. Mbuga nyuma ya au, nĩrĩo Jakubu aatetheerie antũ bangĩ ba nja yaao kũmenya Jesũ bwega.c—Atum. 1:14.
17. Nĩatĩa tũũmba gũtumĩra ũritani bwa Aroma 12:15? (Tega kinya mbica.)
17 Thoma Aroma 12:15. Kethĩra tũkoonania nĩtũkũmakĩra antũ ba nja cietũ ĩgĩĩta rĩa maweega na rĩa maũũĩ, bomba kũgarũra mwonere jwao gũtwerekera.d Ngerekano, rĩrĩa ũmwe waao aewa kaana, no tũmwikĩrie kĩewa nĩkenda twonania nĩtũgwĩranĩrĩtue amwe nabo. Rĩrĩa ũmwe waao akuĩrwa nĩ mwendwa waawe, twomba kũmũboreria gũkũrũkĩĩra biugo bietũ, ntũmwa ya thimũ, kana tũkamũtethia na njĩra ingĩ. Kinya nĩtũbuĩrĩte kwaranagĩria nabo na kũbariũngagĩra na wĩthĩre, monomono rĩrĩa bagũkũrũkĩĩra mantũ jamoomũ.
Wonia endwa baaku nũkũbamakĩra rĩrĩa bagũkũũrũkĩĩra mantũ jamoomũ, bomba kũgarũra mwonere jwao gũkwerekera na kinya kwerekera jarĩa wĩtĩkĩtie (Tega gĩcuncĩ gĩa 17)h
18. Nĩatĩa tũũmba kwigerekania na Anderea?
18 Bamenyithanie na ataana na aarĩ ba baaba. Anderea arĩkũmenya Jesũ nĩwe Mesiya, naamũmenyithanĩrie na Petero, mũtaanongʼina. (Joh. 1:40-42) Rĩ, kinya batuĩ to tũthithĩrie antũ ba nja cietũ o ũu? Ngerekano, rĩmwe na rĩmwe no tũbagwate ũgeni mĩcemanione kana rĩrĩa tũkũgwĩrĩrua biakũria amwe na acoore beetũ. Rĩrĩa twabamenyithania na ataana na aarĩ ba baaba, bakoona Akũũjĩ nĩ antũ ba wĩthĩre na babeega.
19. Kinya kethĩra antũ ba nja cietũ batĩgũciũkĩrwa buru nĩkĩ twĩtĩkĩtie mantũ manna, nĩatĩa tũũmba kũbathithĩria? (1 Petero 3:15)
19 Thoma 1 Petero 3:15. Mbuga antũ ba nja cietũ batĩciũkĩrwa buru nĩkĩ tũtĩthithagia mantũ jamwe, ĩndĩ batĩkoroorĩrua nĩ ũrĩa tũbathithagĩria na njĩra ya kĩao na gĩtĩĩo. Kinya kethĩra tũtĩkorotumĩra ĩgiita amwe nabo kaĩrĩ gũkũngũĩra biatho bimwe, bakagwĩrua twacwaa kaanya kangĩ ga kwĩthĩrwa nabo. Ngerekano, no tũbariũngĩre, tũkarĩjanĩra nabo, na magiita jangĩ tũkabaa biewa.
ĨTHĨRWA NA WĨRĨGĨĨRO BAKAGARŨKA
20. Nĩkĩ ngerekano ya Jakubu ĩgũtwĩkĩra inya?
20 Kinya kethĩra rĩrĩa Jesũ aarĩ nthĩgũrũne Jakubu ataarĩ mũthingati waawe, nyumene neejĩre kwaa mũritwa waawe. (Gal. 1:18, 19; 2:9) Kinya neejĩre kũthingatĩĩra jarĩa Jesũ aaritanĩte rĩrĩa aarĩ nthĩgũrũne. Ngerekano, naagwetere mantũ jegie ntũmĩĩri ya Jesũ ya kĩrĩmene kĩrĩ barũga ĩrĩa aandĩkĩre atongeeretue nĩ kĩrundu.e
21. Nĩkĩ tũtĩbuĩrĩte gũtiga gũtethia antũ ba nja cietũ barĩa batĩĩtĩkĩtie?
21 Kinya nyuma ya kwiritanĩria mono gũtethia antũ ba nja cietũ barĩa batĩĩtĩkĩtie, boomba kũrega gwĩtĩkĩĩria ũmma kana kinya bagatũthithĩria na njĩra ĩtĩ ya kĩao. Nĩkĩ tũtĩbuĩrĩte gũkua nkoro? Tontũ tũkethĩrwa tũkiigerekanagia na Jehova, Mũrungu wa kĩao, na Mũtaana waawe Jesũ, rĩonthe rĩrĩa twabonia wendo na twabamakĩra. (Luk. 6:33, 36) Nyuma ya ĩgiita, mwĩtĩre jwetũ jũmwega jwomba gũtũma bagarũra mwonere jwao gũtwerekera. Kinya boomba kũriikana mantũ jarĩa twabaritanĩte jegie wĩtĩkio bwetũ. Tweta na mbere kũbatethia tũtĩgũkua nkoro, tũkethĩrwa na kũgwĩrua twona bamwe baao bakĩgwatanĩra natuĩ kĩrĩ ũthathayia bwa mma!
RWĨMBO NA. 60 Ni Uzima Kwao
a GŨTAARĨĨRIA BIUGO: Bibiriene, tĩ rĩonthe kiugo “barĩa batĩĩtĩkĩtie” gĩtumagĩrwa kwonania muntũ ũrĩa ũtĩ wa ndini. (1 Ako. 7:12; tega “an unbelieving wife” kĩrĩ study note.) Kĩthomone gĩkĩ, kiugo kĩu kĩrĩarĩĩria muntũ ũrĩa ũtĩthathaagia Jehova Mũrungu ũrĩa Akũũjĩ ba Jehova bamũthathaagia.
b Tega gĩcuncĩ kĩrĩ na kĩongo “Nĩmbi Tũkũmenya Bwegie Ĩgamba rĩa Jehova Ĩgiita Rĩĩjĩte?” kĩrĩ ngacĩti ya Kĩrĩngo kĩa Mũkaria ya Mĩi 2024, kar. 11, gĩc. 11-13.
c Jesũ arĩgũkua, ataanongʼina bamwe nĩbaeere athingati baawe, tabo Jakubu na Juda.
e Teganĩĩria na Jakubu 1:2 na Mathayo 5:11, 12; Jakubu 1:19 na Mathayo 5:22; Jakubu 1:22; 2:24 na Mathayo 7:21; Jakubu 2:13 na Mathayo 5:7; 6:14, 15.
f Nĩkenda wona mantũ nkũrũki jegie ũrĩa ũũmba kũthithia ũntũne ta bũu, tega “Biũria Kuuma Kĩrĩ Athoomi Beetũ” ngacĩtine ya Kĩrĩngo kĩa Mũkaria ya Mĩi 15, 2002, na ya Novemba 15, 2007.
g GŨTAARĨĨRIA MBICA: Mwarĩ wa baaba mbere eeta ũtungatĩrine, akĩthuranagĩra mũkũrũ waawe biakũrĩa.
h GŨTAARĨĨRIA MBICA: Mwarĩ wa baaba o ũrĩa ariũngĩrĩte ngʼina wa mũkũrũ waawe, ũrĩa ũtĩ Mũkũũjĩ wa Jehova.