KĨTHOMO GĨA KWIRITANA KĨA 51
RWĨMBO NA. 132 Sasa Tumekua Mwili Mmoja
Ũrĩa Ũũmba Kũbanga Mũranũ Jũrĩa Jũkaretera Jehova Gĩtĩĩo
‘Nĩ bwega mantũ jonthe jathithague ũrĩa kwagĩrĩte gũtĩ kũrigicana.’—1 AKO. 14:40.
JARĨA TŨKAIRITANA
Tũkoona ũrĩa barĩa bakwenda kũgũrana bomba kwaa Jehova gĩtĩĩo ntukũ ya mũranũ jwao.
1-2. Nĩ ũntũ bũrĩkũ Jehova agũkwendera ntukũ ya mũranũ jwaku?
Rĩ, kũrĩwe bwĩtĩkanĩĩrĩtie bũkagũrana nawe ĩgiita rĩtĩ kũraaja? Kethĩra kũrĩwe, no mwanka wĩthĩrwe nũgwĩrĩtue mono! Kwombĩka kũrĩ na mantũ jamaingĩ ũkũbangania jegie mũranũ jwaku. Jehova nakwenda ũũmbana. Nakwenda ũgwĩrĩrua ntukũ ya mũranũa jwaku na bũgwĩrĩrua ĩgiita rĩĩjĩte bũrĩ amwe na mwendwa waaku.—Nju. 5:18; Rwi. 3:11.
2 Nĩkĩ bũrĩ ũntũ bwa gĩtũmi gũtĩĩa Jehova ntukũ ya mũranũ jwaku? Nĩatĩa ũũmba kũthithia ũu? Kinya kethĩra kĩthomo gĩkĩ kĩrĩarĩĩria barĩa bakwithuranĩra kũthithia mũranũ, mooritani jarĩa tũgacũnkũũna jagatũtethia gũtĩĩa Jehova, kwĩthĩrwe gatũgwati ũgeni kana gatũgũtetheeria kũbangania mũranũ.
NĨKĨ TŨTĨĨE JEHOVA?
3. Rĩrĩa Akristũ bakũbangania mũranũ, nĩ mantũ jarĩkũ babuĩrĩte kũthũgaanĩria, na nĩkĩ?
3 Rĩrĩa Akristũ barĩa bakũgũrana bakũbangania mũranũ nĩbabuĩrĩte kũthingatĩĩra mooritani ja Jehova jarĩa aejanĩte Rũtetone rwawe. Nĩkĩ? Tontũ Jehova nĩwe mwambĩrĩria wa ngũrano. Aambĩrĩĩrie mũranũ jwa mbere rĩrĩa agwatithanĩrie ngũrano ya Adamu na Hawa. (Kia. 1:28; 2:24) Kwou, rĩrĩa barĩa bakũgũrana bakũbanga mantũ nĩ babuĩrĩte kũthũgaanĩria ũrĩa bagatĩĩa Jehova mũranũne jwao.
4. Barĩa bakũbangania mũranũ barĩna itũmi bĩrĩkũ bia gũtĩĩa Jehova ntukũ ya mũranũ jwao?
4 Gĩtũmi ũbuĩrĩte kũthingata ithimi bia Jehova ntukũ ya mũranũ jwaku nĩ tontũ nĩwe Baaba waaku, na mũcoore ũrĩa ũmwega nkũrũki. (Ahi. 12:9) Gũtĩ nkanja nũkwenda gũtũũria ũcoore bũu. Ũtĩenda kũthithia ũntũ bũrĩa bũũmba kũthũũkia ũcoore bũu bwenu ntukũ ĩu ya mũranũ kana ntukũ kinya ĩrĩkũ ĩngĩ. (Zb. 25:14) Rĩonthe rĩrĩa wathũgaanĩria mantũ jarĩa Jehova akũthithĩrĩtie na jarĩa agakũthithĩria, rĩ, to ũciũmie buru kenda ũmũtĩĩa ntukũ ĩu ya mũranũ jwaku?—Zb. 116:12.
ŨRĨA ŨŨMBA GŨTĨĨA JEHOVA
5. Nĩatĩa Bibiria yũmba gũtethia barĩa bakũgũrana rĩrĩa bakũbanga mantũ ja mũranũ?
5 Bibiria ĩtĩejeene mawatho jegie ũrĩa mũranũ jũbuĩrĩte kũthithua kana biatho biaju. Muntũ no athingatĩĩre mawĩthĩre ja kwao kana mantũ jarĩa endete. Athathayia ba mma nĩbatĩaga mawatho ja ngũrano jarĩa jeki nĩ thirikarĩ. (Mat. 22:21) Amwe nou, kethĩra tũkathingata mooritani ja Bibiria ĩgiita rĩa mũranũ tũgatĩĩa Jehova na tũmũgwĩrie. Kwou rĩ, nĩ mooritani jarĩkũ ja Bibiria tũbuĩrĩte kũthingatĩĩra?
6. Kũringana na Aroma 13:1, 2, nĩkĩ barĩa bakũgũrana babuĩrĩte kũthingata mawatho ja thirikarĩ jegie ngũrano?
6 Thingatĩĩra mawatho ja thirikarĩ. (Aro. 13:1, 2) Nthĩgũrũne inyiingĩ, no mwanka barĩa bakwenda kũgũrana bathingate mawatho ja ngũrano jarĩa jeeki nĩ thirikarĩ. Nĩkenda ũmenya mantũ nkũrũki jegie ũntũ bũu, romba akũrũ ba kĩũthũrano kĩenu ũtethio.b
7. Kĩatho kĩa mũranũ kĩbuĩrĩte kwĩthĩrwa gĩkari atĩa?
7 Thithia mũranũ jũrĩ na gĩtĩĩo. (1 Ako. 10:31, 32) Rĩrĩa bũkũthithia mũranũ ciũmieni nĩkenda kwĩthĩrwa na mantũ ja kwonania ĩtunda rĩa kĩrundu kĩa Mũrungu na tĩ kĩa nthĩgũrũ. (Gal. 5:19-26) Tontũ mũtaana wa baaba ũrĩa ũkũgũrana nĩwe ũkethĩrwa arĩ kĩongo kĩa nja, nabuĩrĩte gũtigĩĩra atĩ mũranũ jwao jũrĩ na gĩtĩĩo na nĩjũkwagĩra. Nĩmbi biũmba kũmũtethia gũkinyĩra ũntũ bũu? Rwaria rwa Bibiria rũkeeja kũritwa na njĩra ya wendo na gĩtĩĩo, rũkabatethia gwĩkĩĩra mũbango jwa Mũrungu jwa ngũrano. Kinya rũgatethia bonthe barĩa barĩ mũranũne kũjũkia ngũrano na ũrito. Akristũ babaingĩ nĩbathuuraga kũthithĩria mũranũ Nyomba ya Ũnene rĩrĩa gũkũũmbĩka. Kethĩra nũkwenda gũtumĩra Nyomba ya Ũnene, andĩkĩra kĩama gĩa akũrũ barũga ũbarombe rũũtha.
8. Nĩmbi biũmba kũbũtethia gũtĩĩa Jehova mamburene ja mũranũ? (Aroma 13:13)
8 Thoma Aroma 13:13. Kethĩra bũkathithia mambura nyuma ya mũranũ, nĩatĩa ũũmba kũthithia jatĩgatongeerue nĩ kĩrundu kĩa nthĩgũrũ? Kiugo gĩa Kĩgiriki kĩrĩa gĩtaũri ‘biatho bitĩagĩrĩte’ kĩonanagia biatho birĩa birĩ na wogiti na ndwĩmbo irĩa ikwinwa ũtukũ maindũkĩra. (Tega study note, “wild parties” kĩrĩ Aroma 13:13.) Kethĩra ncoobi ĩgatumĩrwa kĩathone, menya ũrekeeria ĩnyuwa nkũrũki ya kĩthimi.c Kethĩra mũsiki jũkainwa, tigĩĩra jũtĩ na kajũ gakanene kenda ageni baiganua rĩrĩa bakwaria. Thuura bwega ndwĩmbo irĩa ikainwa nĩkenda itĩkethĩrwe na biugo biũmba kũgitaria bangĩ.
9. Nĩmbi barĩa bakũgũrana babuĩrĩte gũtigĩĩra nĩbikũthingatĩĩrwa mamburene jaao?
9 Rĩ, antũ bakaewa kaanya ga kwaria, ga kũringwa mbica, kũjũkua vidio, kana mantũ jangĩ ja kwigĩria? Mantũ jau nĩjathongomagia ntukũ ĩu mono. Amwe nou, tigĩĩra atĩ jarĩa jakathithua nĩ jagwaka. (Afl. 4:8) Ciũrie: ‘Ũntũ bũũ rĩ, nĩbũkwonania nĩtũgũtĩĩa bangĩ? Rĩ, bũkonania nĩtũgũtĩĩa ngũrano?’ Na ũntũ bwa gĩtũmi nkũrũki, ciũrie: ‘Rĩ, bũkonania nĩngũtĩĩa Jehova?’ Kinya kethĩra tĩ bũthũũku kwĩthĩrwa na mantũ ja kũthekania, nĩbwega gũciebania na ndwaria cia gũkucĩĩria antũ mantũne ja kũmenyana kĩmwĩrĩ. (Aef. 5:3) Tigĩĩra atĩ antũ ba nja na acoore barĩa bakaewa kaanya ga kwaria nĩbagũtĩĩa wendi bwaku.
10. Nĩkĩ barĩa bakũbanga kũthithia mũranũ bakũbatara kwĩthĩrwa na ũngʼanĩĩru? (1 Johana 2:15-17)
10 Ĩthĩrwa na ũngʼanĩĩru. (Thoma 1 Johana 2:15-17.) Jehova nendete antũ barĩa baciũmagia kũmwaa gĩtĩĩo antũ a gwicwĩra ũkumio bongwa. Kwou Akristũ barĩa barĩ na ũngʼanĩĩru bagaciebania na ũtumĩri bwa mbeca inyiingĩ na mantũ ja “gwikaatha.” Nĩatĩa ũkagunĩka wathithia mũranũ jũtĩ na mantũ jamaingĩ? Mũtaana wa baaba Mike kuuma Norway naagunĩkĩre arĩkũthithia ũu. Ariuga: “Nĩtwaciebanĩrie na marandũ na tũtatigĩre ũpainia. Mũranũ jwetũ jũtaarĩ na mantũ jamaingĩ ĩndĩ nĩjwathongi na nĩtwajũgwĩrĩĩrue.” Mwarĩ wa baaba ũgwĩtwa Tabitha kuuma India ariuga: “Nĩtwaciebanĩrie na mantũ jamaingĩ ja gũtũcumbũra mũranũne jwetũ. Tontũ bũu, mĩbango nĩ yaarĩ ĩmĩkai na kwou nĩ bwarĩ bũbũũthũ kũgwatanĩra mantũne.”
Ĩtĩkũmakania narĩa tũkaraga, mũranũ jwa Gĩkristũ nĩjũbuĩrĩte kwĩthĩrwa jũrĩ na ũngˈanĩĩru, jũthongi, na jũrĩ jwa kũgwĩrĩrua (Tega gĩcuncĩ gĩa 10-11)
11. Nĩatĩa mwiki na mũjũkania bomba kwonania ũngʼanĩĩru mantũne jegie gwĩkĩra na kwigemia? (Tega kinya mbica.)
11 Rĩ, nũthuurĩte birĩa ũgekĩra? Gũtĩ nkanja ũkenda kwonekana ũthongi mono. Kinya magiita ja karaaja, Bibiria nĩyonanagia atĩ mwiki na mũjũkania nĩbaaigemagia mono. (Isa. 61:10) Kinya kethĩra nguũ irĩa ũgekĩra ntukũ ya mũranũ jwaku ciomba kwĩthĩrwa irĩ mwanya na irĩa wĩkagĩra ntukũ ingĩ, niibuĩrĩte kwonania ũngˈanĩĩru. (1 Tim. 2:9) Menya ũreka nguũ irĩa ũgekĩra kana ũrĩa ũkwoneka bwĩthĩrwa nĩbu ũntũ bũgũkucĩĩria antũ nkũrũki mũranũne jwaku.—1 Pet. 3:3, 4.
12. Nĩkĩ barĩa bakũgũrana babuĩrĩte gũciebania na mawĩthĩre jatĩ ja Kĩmaandĩko jarĩa jathithagua gĩcigone kĩao?
12 Ciebanie na mawĩthĩre jarĩa jatĩ ja Kĩmaandĩko. (Kug. 18:4) Ntukũne cietũ, mĩranũ ĩmiingĩ nĩĩthagĩrwa na mawĩthĩre ja gĩpagani, ja morogi, na jaumanĩtie na irundu bibithũũku. Jehova natwathĩte tũciebanie buru na mantũ jau jatĩagĩri. (2 Ako. 6:14-17) Kethĩra kũrĩ na mawĩthĩre ta jau gĩcigone kĩenu, nĩ bwega gũcũnkũũna kaumo kaajo na mooritani ja Bibiria jagũgũtethia kũthuura jarĩa ũgetĩkĩĩria mũranũne jwaku.
13. Nĩatĩa barĩa bakũgũrana bomba kwĩthĩrwa na mwonere ta jwa Jehova jwegie biewa?
13 Rĩ, nĩ wĩthĩre antũ gĩcigone kĩenu kwaa barĩa bakũgũrana biewa? Muntũ no aejane kĩewa kũringana na ũũmbi bwawe bwa kĩmbeca. Nĩ mma, Akristũ nĩbekagĩrwa inya kwĩthĩrwa barĩ atugani, na bũu nĩbũbaretagĩra kũgwĩrua. (Nju. 11:25; Atum. 20:35) Amwe nou, tũtĩngĩenda ageni beetũ baigua teka no mwanka batwe biewa; kana tũtũma baigua bũbũũĩ tontũ batĩroomba gũtwa biewa bia goro. Nĩtwigerekanagia na Jehova, rĩrĩa twethĩrwa na nkaatho bangĩ batwaa biewa kuuma nkorone kũringana na ũũmbi bwao.—2 Ako. 9:7.
ŨRĨA ŨŨMBA GŨCIEBANIA NA MANTŨ JAMOOMŨ NA KŨJACIINDA
14. Nĩ mantũ jarĩkũ jamoomũ barĩa bakwenda kũgũrana bakũrũkagĩĩra?
14 Rĩrĩa ũkũbanga mũranũ nĩkenda ũretera Jehova gĩtĩĩo, womba gũkũrũkĩĩra mantũ jamoomũ. Ngerekano, no bwĩthĩrwe bũrĩ bũbũũmũ kũbangania mũranũ jũtĩ na mantũ jamaingĩ. Charlie, kuuma icĩgĩrione bia Solomon ariuga: “Nĩbwarĩ bũbũũmũ gũtaara barĩa tũrĩngĩgwata ũgeni mamburene ya mũranũ. Nĩtwĩthagĩrwa na acoore babaingĩ, na kũringana na wĩthĩre bwa gwetũ, antũ bonthe nĩberĩgagĩĩra kũgwatwa ũgeni!” Tabitha, ũrĩa ũkũgweti au mbere ariuga: “Narĩa nkaraga, nĩ wĩthĩre antũ kũthithia mambura jamanene. Twendaga kũgwata ũgeni antũ baakai akĩ, ĩndĩ nĩkwajũkĩrie ĩgiita aciari beetũ gwĩtĩkĩĩria ũntũ bũu.” Sara, kuuma India ariuga: “Antũ babaingĩ nĩbendete kwĩthĩrwa na ĩgweta mono. Antũ bamwe ba nja yeetũ nĩbaathithĩtie mĩranũ ĩmĩnene, kwou nĩndaigagua mbatĩki nthithia jũmũnene nkũrũki.” Nĩmbi biũmba gũgũtethia gũciinda mantũ ta jau na jangĩ jamoomũ?
15. Nĩkĩ maromba jarĩ ja gĩtũmi rĩrĩa tũkũbangania mũranũ?
15 Ĩĩka mĩbango ya mũranũ marombene. Rĩrĩa ũkũbanga mũranũ, menyithia Jehova mantũ jamoomũ jarĩa ũgũkũrũkĩĩra kana ũrĩa ũkwigua. (Afl. 4:6, 7 na study note “in everything”) Mũrombe agũtethie ũtĩgakĩre rĩrĩa ũgũtua matua jarĩ mwanya na wendi bwa bangĩ. (1 Pet. 5:7) O ũrĩa ũkoona agĩgũtethia nou ũkamwĩrĩgĩĩra nkũrũki. Tabitha, ũrĩa ũkũgweti au mberene, ariuga: “Rĩrĩa twabangaga mũranũ jwetũ, ũũni na mũnyanya waakwa nĩtwakĩraga tũremwa gwĩtĩkanĩĩria tubaĩrĩ kana kinya na antũ ba nja cietũ. Kwou, rĩonthe nĩtwambagia na maromba. Kamma, nĩtwoonere Jehova agĩtũtethia na twethĩrwa na thĩĩrĩ gatĩgatĩne geetũ ona kinya na antũ ba nja cietũ.
16-17. Kwaranĩria bũtĩkwithana kwomba gũtethia atĩa rĩrĩa bũkũbangania mantũ ja mũranũ?
16 Aranĩrieni na njĩra ya gĩtĩĩo na bũtĩkwithana. (Nju. 15:22) Bubaĩrĩ bũkabatara gũtua matua jamaingĩ jegie mũranũ jwenu. Bũkabatara gũtua bwegie ntarĩki, mbeca irĩa igatumĩka, barĩa bũkagwata ũgeni, na mantũ jangĩ jamaingĩ. Mbere bũtua matua, arĩĩrieni mendekithia jenu na mooritani ja Bibiria jarĩa bũũmba gũtumĩra kana motaaro jarĩa bũkaewa nĩ ataana na aarĩ ba baaba bagimaru gĩkĩrundu. Rĩrĩa bũkwaranĩria onanieni gĩtĩĩo, ũngʼanĩĩru, na menya ũgwatĩĩra maoni jaaku. Kethĩra aciari beenu kana antũ ba nja bakabũromba bũthithia ũntũ bũnna bũgwĩtanĩria na mathũgaanio, bathikĩĩreni tontũ kĩatho gĩkĩ nĩ kĩa gĩtũmi kĩrĩ bo. Kethĩra bũtĩthithia jarĩa bakwendaga, bataarĩĩrieni itũmi na njĩra ya ũũme na gĩtĩĩo. (Akol. 4:6) Menyithieni antũ ba nja bũtĩkwitha atĩ, mworoto jwenu jũrĩa mũnene nĩ kwĩthĩrwa na mũranũ jũgũtĩĩa Jehova.
17 Aciari beenu bakethĩrwa batĩ ũmmene bwomba kũbataarĩĩria na njĩra ya gĩtĩĩo matua jeenu, kinya kethĩra tĩ bũbũũthũ kũthithia ũu. Mũtaana wa baaba ũgwĩtwa Santhosh kuuma India ariuga: “Antũ beetũ ba nja nĩbeendaga twĩthĩrwa na mawĩthĩre jamaingĩ ja Kĩhindi mũranũne jwetũ. Ĩndĩ, ũũni na mũnyanya wakwa nĩtwatumĩĩre ĩgiita rĩriingĩ kũbataarĩĩria matua jeetũ. Nĩtwetĩkĩrĩĩrie kũthithia mantũ jamwe jarĩa beendaga bunka akĩ tũtĩkathũũrie Jehova. Ngerekano, nĩtwarugĩre irio birĩa beendaga antũ a birĩa twendaga, na tũratigana na ndwĩmbo tontũ bataamenyeretie mantũ ta jau.”
18. Nĩmbi biũmba gũgũtethia nĩkenda ntukũ yeenu ya mũranũ ĩĩta bwega? (1 Akorintho 14:40) (Tega kinya mbica.)
18 Bangania mantũ bwega. Kethĩra ũkabangania mantũ bwega, ũtĩĩthĩrwa na mĩnoga ntukũ ya mũranũ. (Thoma 1 Akorintho 14:40.) Wayne, kuuma Taiwan, ariuga: “Ntukũ inkai mbere ya mũranũ jwetũ, nĩtwathithĩrie mũcemanio jũmũniini na antũ barĩa baatũtethagĩĩria mĩbangone. Nĩtwaarĩĩrĩrie mantũ jarĩa tũrĩngĩthithia na twairiikania ũrĩa tũrĩngĩ jathithia ntukũ ya mũranũ nĩkenda mantũ jatĩkeeje kwangaratana.” Nĩkenda bwonania nĩbũgũtĩĩa ageni beenu ntukũ ya mũranũ, thithieni mantũ bũtĩcereri.
Kũbangania mantũ bwega mbere ya mũranũ gũgatethia jeeta bwega (Tega gĩcuncĩ gĩa 18)
19. Nĩmbi bigagũtethia nĩkenda mantũ jeeta bwega mamburene ja mũranũ jwenu?
19 Ũgaciebania na mathĩĩna jamaingĩ kethĩra ũkathũgaanĩria mantũ jarĩa jomba gũkarĩka kũrĩo. (Nju. 22:3) Ngerekano, kethĩra narĩa ũkaraga antũ nĩbejaga mamburene ja mũranũ batĩgwati ũgeni, thũgaanĩria ũrĩa ũkathithia. Menyithia antũ ba nja yeenu barĩa batĩ Akũũjĩ ba Jehova mĩtaratara ĩrĩa ĩkathingatĩĩrwa na mawĩthĩre jarĩa bũtĩĩtĩkĩĩria mũranũne jwenu. Kinya no ũbonie kĩrĩ jw.org gĩcuncĩ kĩrĩa kĩrĩ na kĩongo “Ni Nini Hutendeka Katika Harusi za Mashahidi wa Yehova?” Romba mũtaana wa baaba ũmũgimaru agũtethie arĩ mũrũngamĩĩri wa kĩatho nĩkenda atongeeria mantũ jarĩa jakathithĩka mamburene. (Joh. 2:8) Kethĩra ũkamũtaarĩĩria bwega mĩbango ya mũranũ jwenu, akabũtethia nĩkenda mantũ jeeta bwega na kwĩthĩrwa na gĩtĩĩo.
20. Nĩ mantũ jarĩkũ barĩa bakwenda kũgũrana babuĩrĩte kũriikana bwegie mũranũ jwao?
20 Womba kwigua winyĩĩrĩkĩte rĩrĩa bũkũbangania mantũ jonthe ja mũranũ jwenu. Amwe nou, riikana atĩ mũranũ nĩ jwa ntukũ ĩmwe. Nĩ mwambĩrĩrĩo jwa ũtũũro bũbũthongi bũgĩtumĩkagĩra Jehova bũrĩ amwe. Ciũmie nĩkenda bwĩthĩrwa na mũranũ jũrĩ na gĩtĩĩo na jũtĩ na mantũ jamaingĩ. Ĩrĩgĩĩra Jehova. Akĩbũtongagĩĩria, bũkoomba kũbangania mũranũ jũrĩa bũkagwĩrĩrua na bũgatũũra kũjũriikana bũtĩkwirira.—Zb. 37:3, 4.
RWĨMBO NA. 107 Mungu—Kielelezo cha Upendo
a GŨTAARĨĨRIA BIUGO: Kĩrĩ mawĩthĩre ja gũntũ gũkwingĩ, ĩgiita rĩa mũranũ barĩa bakũgũrana nĩbaciĩtagia mbere ya Mũrungu atĩ bagatũũrania rĩonthe rĩrĩa barĩ mwoyo. Rĩmwe nĩkwĩthagĩrwa na mambura nyumene. Gũntũ kũrĩa antũ batĩthithagia mĩranũ kana mambura mono, barĩa bakũgũrũna bakagunĩka bathingatĩĩra mooritani ja Bibiria.
b Nĩkenda wona mantũ nkũrũki jegie mwonere jũrĩa Akristũ bethagĩrwa naju jwegie mawatho jarĩa jeki nĩ thirikarĩ jegie ngũrano, tega gĩcuncĩ kĩrĩ na kĩongo “Arusi Zenye Kuheshimika Machoni pa Mungu na Wanadamu” kĩrĩ ngacĩti ya Mnara wa Mlinzi, Oktoba 15, 2006.
c Tega vidio ĩrĩ na kĩongo Mbĩthĩrwe na Ncobi Kĩathone? kĩrĩ jw.org/mer.