Bʼaʼn tuʼn kybʼant chʼixpubʼil tuʼna tuʼn tbautisarina

1. a) ¿Alkyeqe kʼiwlabʼil in tzaj qkʼamoʼn aj qbautisarin? b) ¿Tiʼ kʼelel qnikʼ tiʼj toj xnaqʼtzbʼil lu?

¿OPE txi tqʼamaʼna te Jehová tuʼn tajbʼena te ex ope bautisarina? Qa oje, in qo tzalaje tiʼja. Tej tbʼant jlu tuʼna xi tqʼamaʼna te Jehová tuʼn tkubʼ tnajsaʼn tila ex tuʼn toka te tmajen (1 Ped. 3:21). Ex kubʼ tqʼoʼna jun tbʼanel ejemplo kywitz qeju naʼmx kybautisarin. Pero, ¿yajtzun qa naʼmx tbautisarina? Ojtzqiʼn quʼne qa kʼujlaʼn Jehová tuʼna ex qa taja tuʼn tbʼant tvoluntad tuʼna. Ex ojtzqiʼn tuʼna qa tuʼn tkubʼ tnajsaʼn Jehová tila ex tuʼn ttzalaj tiʼja, il tiʼj tuʼn tbautisarina (Hech. 2:​38-40). Pero bʼalo at jun tiʼ mintiʼ in nonin tiʼja tuʼn t-xi tbʼinchaʼna jlu. Qa ikju, nimxix kʼonil xnaqʼtzbʼil lu tiʼja. Tnejel, kʼelel qnikʼ tiʼj tiquʼn mintiʼ in kubʼ kyximen junjun tuʼn kybautisarin. Tkabʼin, tiquʼn bʼaʼn tuʼn ttzaj tnaʼna qa chʼix tul xitbʼil. Ex toxin, kʼelel qnikʼ tiʼj tiquʼn nim toklen tuʼn kybʼant naj chʼixpubʼil tuʼna ex tuʼn tbautisarina.

¿TIQUʼN MINTIʼ IN KUBʼ KYXIMEN JUNJUN TUʼN KYBAUTISARIN?

2. ¿Tiquʼn mintiʼ che bautisarin junjun?

² Ateʼ junjun kyaj tuʼn kyajbʼen te Jehová, pero mintiʼ in che bautisarin tuʼnju in che tzaj xobʼ. Por ejemplo, in kubʼ kyximen qa mlayx tzalaj Dios kyuʼn. Qa in kubʼ tnaʼna jlu, bʼaʼn tuʼn tjaw tuʼjina junjun texto in tzaj kyyekʼin qa ojtzqiʼn tuʼn Jehová qa mlay tzʼoka te tzʼaqli. Pero qa ma kubʼ tbʼinchaʼna aju jaku bʼant tuʼna, ktzalajel tiʼja (Sal. 103:​13, 14; Col. 3:23). Qa in tzaj xobʼa tuʼn tel ikʼuna, qaninxa te Jehová tuʼn tkubʼ tnaʼna aju tqʼama salmista: «Ate Qman at wukʼile, mlay chin xobʼe. Mintiʼ jun mya bʼaʼn jaku kybʼincha xjal wiʼje» (Sal. 118:6).

3. ¿Tiquʼn in nikʼ ambʼil ex mintiʼ in che bautisarin junjun? (Ax ikx qʼonka twitz tiʼj tilbʼilal).

³ Ax ikx ateʼ junjun mintiʼ in che bautisarin tuʼnju in kubʼ kyximen qa nya nim kyojtzqibʼil tiʼj Biblia. Pero, ¿ilpe tiʼj tuʼn tel tnikʼa tiʼj tkyaqilju tkuʼx toj Biblia tuʼntzun tbautisarina? Nya il tiʼj. Qo xnaqʼtzan tiʼj jun relato. Tej attoq Pablo ex Silas toj cárcel, tzaj jun kyajnabʼ tuʼn kytzaqpaj ex ajbʼen ambʼil lu kyuʼn tuʼn kypredicarin te jun xqʼuqil pres ex kye tfamilia. Bʼalo el kynikʼ xjal lu tiʼj qa otoq bʼant jun milagro tuʼn Dios tuʼn kytzaqpaj tmajen. Tuʼntzunju, toj qonikʼen aju el kynikʼ kyiʼj junjun xnaqʼtzbʼil tiʼj Jehová ex tiʼj Jesús. ¿Tiʼ tzaj tuʼn jlu? «Jurat o bʼyan kyukʼix kykyaqil qeju ateʼ tuj tja» (Hech. 16:​25-33). Qa ya o tzʼel tnikʼa tiʼj Jehová, kyiʼj junjun xnaqʼtzbʼil, o tzʼajtz tiʼj tanmiya, kʼujlaʼn tuʼna ex taja tuʼn tnimana te, ya jaku bautisarina (Mar. 12:​30, nwt).

4. ¿Alkye juntl tiquʼn mintiʼ in che bautisarin junjun? (Ax ikx qʼonka twitza tiʼj tilbʼilal).

⁴ Ateʼ junjun kyaj tuʼn kyajbʼen te Jehová, pero in kubʼ kyximen qa kwest tuʼn tbʼant chʼixpubʼil kyuʼn. Ax tok, il tiʼj tuʼn qximen tiʼj tzeʼn kchʼexpajel qanqʼibʼil tuʼnju in kubʼ qximen (Luc. 14:​27-30, nwt). Pero ateʼ junjun in kubʼ kyximen qa il tiʼj tuʼn tkyaj kyqʼoʼn nim tiʼchaq tuʼn kyajbʼen te Jehová. Atzun jlu bʼaj tiʼj Candace. Testigo qe tfamilia, pero mintiʼ ajbʼen te Jehová tej tjaw chʼiy. Tej otoq chʼiy, xi tzyet t-xnaqʼtzan tiʼj Biblia juntl maj. In tzaj tqʼamaʼn jlu: «Ngantoqe tzeʼn wanqʼibʼile, pero ojtzqiʼn wuʼne qa nya tgan Jehová. Ex el nnikʼe tiʼj qa kwesttoq tuʼn kybʼant chʼixpubʼil wuʼne». Atzun junjuntl in kubʼ kyximen qa kwest tuʼn kyanqʼin ik tzeʼn tajbʼil Jehová. In kubʼ kyximen qa jaku kubʼ kybʼinchaʼn jun matij il ex qa jaku che ex qʼiʼn toj congregación. ¿Tiʼ jaku bʼant teya tuʼn qa in tzaj bʼaj tkʼuʼja kyiʼj tiʼchaq lu?

5. ¿Tiʼ bʼaʼn tuʼn t-ximana tiʼj qa in dudarina tuʼn tbautisarina? (Mateo 13:​44-46).

⁵ Qo ximen tiʼj jun ejemplo. Aj ttzaj qlaqʼoʼn jun tiʼ, in qo ximen tiʼj tprecio ex in qo ximen tiʼj jniʼ kʼajbʼel quʼn. Qa kʼajbʼel quʼn, in tzaj qlaqʼoʼn maske kar twiʼ. Ax ikx aj tkubʼ qximen tuʼn qbautisarin, nya oʼkx tuʼn qximen kyiʼj chʼixpubʼil il tiʼj tuʼn kybʼant quʼn, sino ax ikx bʼaʼn tuʼn qximen kyiʼj kʼiwlabʼil, ik tzeʼn tuʼn tten jun tbʼanel qamiwbʼil tukʼil Jehová. Ajbʼen kabʼe ejemplo tuʼn Jesús tuʼn tel qnikʼ tiʼj jlu (kjawil uʼjit Mateo 13:​44-46, nwt). Tqʼama Jesús qa teyele junjun xjal xi tkʼayin tkyaqilju at te tuʼn ttzaj tlaqʼoʼn qʼinumabʼil otoq kanet tuʼn. Ax ikx teya o kanet jun tbʼanel qʼinumabʼil tuʼna: aju axix tok tiʼj Tgobierno Dios. Qa in kubʼ t-xjelina jlu: «¿Tbʼanelpe qa ma che bʼant chʼixpubʼil wuʼne tuʼn nbautisarine?», bʼaʼn tuʼn t-ximana kyiʼj ejemplo yolin Jesús tiʼj. Jaku kubʼ t-xjelina jlu: «¿In nokpe nqʼoʼne axix tok tiʼj Tgobierno Dios ik tzeʼn jun qʼinumabʼil? ¿In nokpe nqʼoʼne toklen wamiwbʼile tukʼil Jehová, kyukʼil erman ex aju qʼuqbʼil nkʼuʼje tuʼn wanqʼine te jumajx?». Aju tzaqʼwebʼil tzul tqʼoʼna kyiʼj xjel lu, kʼonil tuʼn tel tnikʼa tiʼj alkyeqe chʼixpubʼil il tiʼj tuʼn kybʼant tuʼna tuʼntzun tbautisarina.

6. ¿Tiʼ jaku tzʼonin qiʼj tuʼn t-xi qbʼinchaʼn aju in nel qnikʼ tiʼj?

⁶ Toj ejemplo yolin Jesús tiʼj, tqʼama qa junxitl kymod xjal kbʼel kyyekʼin tiʼj tbʼanel noticia ex qa kwest kʼelel toj kywitz. Ax ikx tqʼama qa ateʼ junjun kbʼel kyyekʼin tbʼanel kymod ex kxel kybʼiʼn (Luc. 8:​5-15, nwt). Miʼn tzaj tbʼisa qa in jawje tkʼuʼja. Jaku tzʼonin Jehová tiʼja tuʼn tnimana te. Jaku txi tqʼamaʼna te tuʼn tonin tiʼja tuʼn tok tkʼujlaʼna ex tuʼn t-xi tbʼiʼna qe tkawbʼil (Ezeq. 18:31; 36:26).

7, 8. ¿Tiquʼn mintiʼ in kubʼ kyximen junjun kuʼxun tuʼn kybautisarin? (Ax ikx qʼonka twitza tiʼj tilbʼilal).

⁷ Ateʼ junjun kuʼxun kʼujlaʼn Jehová kyuʼn, pero mintiʼ in kubʼ kyximen tuʼn kybautisarin tuʼn yol in xi kyqʼamaʼn txqantl kye. Bʼalo ateʼ junjun maestro in xi kyqʼamaʼn kye kuʼxun qa bʼaʼn junjun mod, aju in nel tikʼun Jehová. Pero jaku tzaj nya bʼaʼn kyiʼj qa ma txi kybʼiʼn jlu (Sal. 1:​1, 2; Prov. 7:​1-5). Aya kuʼxun, ¿tiʼ jaku bʼant tuʼna tuʼn miʼn ttzaj nya bʼaʼn tiʼja? Tuʼn tel tkanoʼna tiʼj salmista tqʼama jlu te Jehová: «Mas ma tzikʼ nnabʼle kywitz qe xnaqʼtzal weye tuʼnju kukx in chin ximane tiʼj ju in tmaʼna weye tuʼn nbʼinchanteye» (Sal. 119:99).

⁸ In tzaj kyyekʼin junjun tqanil qa ateʼ junjun Testigo mintiʼ in che onin kyiʼj kykʼwal tuʼn kybautisarin. Bʼalo oʼkx in che ximen jniʼ kyxnaqʼtzbʼil kykʼwal kʼeletz moqa tiʼ kyaqʼun ktel. Moqa in nikʼ tnaʼl kyuʼn tuʼn kyonin kyiʼj kykʼwal tuʼn tchʼiy kyamiwbʼil tukʼil Jehová. Aya kuʼxun, ¿jakupe che onin tmana tiʼja? Tbʼanel qa ma yolina tiʼj jlu kyukʼil. Ex bʼaʼn tuʼn ttzaj tnaʼna qa jaku tzʼoka te tamiw Jehová noq alkyexku tabʼqʼiya (Prov. 20:11).

9. ¿Tiquʼn in kubʼ kyximen junjun tuʼn kybautisarin yajxitl?

⁹ Ateʼ junjun in japun requisito kyuʼn tuʼn kybautisarin, pero mintiʼ in bʼant kyuʼn tuʼnju in xi tqʼamaʼn jun kyamiw moqa jun kyfamiliar tuʼn kybautisarin junx. Nya jun il tuʼn qbautisarin junx tukʼil jun qamiw moqa qfamiliar, pero ¿ape t-xilen jlu qa il tiʼj tuʼn qayon kyiʼj tuʼntzun qbautisarin? Bʼaʼn tuʼn ttzaj qnaʼn qa teyele junjun kbʼel ximente qa kʼajbʼel te Jehová. Tuʼntzunju, mintiʼ tuʼn qayon kyiʼj txqantl tuʼn qbautisarin (Rom. 14:12).

¿TIQUʼN BʼAʼN TUʼN TTZAJ TNAʼNA QA CHʼIX TUL XITBʼIL?

10. ¿Tiquʼn ateʼ junjun mintiʼ in bʼant chʼixpubʼil kyuʼn tuʼn kybautisarin?

¹⁰ Ma tzʼel qnikʼ tiʼj tiquʼn mintiʼ in che bautisarin junjun. Pero ax ikx ateʼ junjuntl mintiʼ in che bautisarin tuʼnju in kubʼ kyximen qa atx nim ambʼil tuʼn tul xitbʼil. ¿Bʼaʼnpe tuʼn tten qximbʼetz ik tzeʼn jlu? Tqʼama Jesús jlu kye tdiscípulo: «Kukx che xqʼuqine porke tzul Tkʼwal Xinaq toj jun or mintiʼ ximen kyuʼne» (Luc. 12:​40, nwt).

11. Ik tzeʼn in tzaj tqʼamaʼn Salmo 119:​60, ¿tiʼ in kubʼ qnaʼn kyiʼj tkawbʼil Jehová aj tok qojtzqiʼn mas?

¹¹ Tuʼnju kʼujlaʼn Jehová quʼn ex qe tkawbʼil, in kubʼ qximen tuʼn qajbʼen te ex tuʼn qbautisarin. Aj tel mas qnikʼ tiʼj Jehová, in nel qnikʼ tiʼj qa in tzaj tqʼoʼn qe kawbʼil qe tuʼnju kʼujlaʼnxix qo tuʼn. Tuʼntzunju, qajbʼil tuʼn t-xi qnimen (kjawil uʼjit Salmo 119:60). Ax ikx mintiʼ ojtzqiʼn quʼn tiʼ jaku bʼaj qiʼj nchiʼj, tuʼntzunju tqʼama Santiago tuʼn t-xi qbʼiʼn naj qe tkawbʼil Jehová. Bʼaʼn tuʼn t-xi qbʼinchaʼn «ju bʼaʼn» junjun qʼij, toj juntl yol, tuʼn t-xi qbʼinchaʼn aju tajbʼil Jehová (Sant. 4:​13-17).

12. ¿Tiʼ xnaqʼtzbʼil jaku tzʼel qiʼn tiʼj relato kyiʼj xjal e aqʼunan toj tqan uva?

¹² Qo ximen tiʼjju tqʼama Jesús toj relato kyiʼj xjal e aqʼunan toj tqan uva. Tqʼama qa oʼkx jun or che aqʼunal junjun ex ikx twi kykʼuʼj kxel chjoʼn ik tzeʼn kye qeju e aqʼunan tkyaqil qʼij. Pero, ¿tiquʼn mintiʼ xi tzyet naj kyaqʼunan qeju oʼkx e aqʼunan jun or? Kyqʼama jlu: «Porke mintiʼ ma tzaj qʼoʼn qaqʼune tuʼn ni jun xjal». Nya tuʼnju kyʼaj qe. Jakutoq che aqʼunan tkyaqil qiʼj, pero ni jun tzaj qʼonte kyaqʼun. Tej t-xi qʼamaʼn kye tuʼn kyaqʼunan jurat naj i ex (Mat. 20:​1-16, nwt). Ax ikx toj ambʼil jaʼlo o tzaj qʼoʼn txokbʼil qe tuʼn Jesús tuʼn qok te tdiscípulo ex tuʼn qonin tiʼj predicación. ¡Tbʼanel tuʼn t-xi qbʼinchaʼn naj!

13. ¿Tiʼ xnaqʼtzbʼil jaku tzʼel qiʼn tiʼj t-xuʼjil Lot?

¹³ Ateʼ junjun in kubʼ kyximen tuʼn miʼn tbʼant chʼixpubʼil kyuʼn jaʼlo, sino ajxi ttzaj xitbʼil. Pero mas kwest kʼelel te kye tuʼn kyajbʼen te Jehová qa ma che ayon mas ambʼil. Ojtzqiʼntoq jlu tuʼn Jesús tuʼntzunju tqʼama kye tdiscípulo: «Bʼaʼn tuʼn ttzaj kynaʼne aju bʼaj tiʼj t-xuʼjil Lot» (Luc. 17:​31-35, nwt). Ojtzqiʼntoq tuʼn t-xuʼjil Lot qa chʼixtoq tkubʼ najsaʼn Sodoma ex Gomorra, pero nyatoq taj tuʼn tkyaj tqʼoʼn qe tiʼchaq attoq te (Gén. 19:​23-26). In tzaj tyekʼin relato lu qa o kubʼ t-ximen Jehová jniʼ ambʼil tuʼn t-xi tqʼoʼn kye xjal tuʼn tbʼant chʼixpubʼil kyuʼn. Aj tkubʼaj ambʼil lu, ya mlay ten ambʼil kyiʼj xjal tuʼn tbʼant chʼixpubʼil kyuʼn (Luc. 13:​24, 25, nwt).

14. Aj tok tqʼoʼna twitza tiʼj tzeʼn in japun kywi profecía tiʼj mankbʼil tqʼijlalil, ¿tzeʼn jaku tzʼonin tiʼja?

¹⁴ Tkyaqilju in bʼaj toj ambʼil jaʼlo in tzaj tyekʼin qa in japun kywiʼ profecía tiʼj makbʼil tqʼijlalil. Bʼalo toj lugar jatumel in nanqʼina mintiʼ in japun junjun profecía in tzaj tqʼamaʼn Biblia. Pero qa in nok tqʼoʼna twitza tiʼj qa in japun kywiʼ kyoj junjuntl lugar, tbʼanel tuʼn kybʼant naj chʼixpubʼil tuʼna tuʼn tbautisarina. Qo ximen tiʼjju tqʼama apóstol Pedro kye okslal te tnejel syent abʼqʼi: «Che xqʼuqine». ¿Tiquʼn tqʼama jlu kye? Tuʼnju «in laqʼex ttzaj tqʼijlalil tuʼn tbʼaj tkyaqil» (1 Ped. 4:7). Tej tqʼama Pedro «tuʼn tbʼaj tkyaqil», bʼalo atz yolin tiʼj ambʼil tuʼn tkubʼ najsaʼn Jerusalén ex templo. Najchaq in che anqʼin okslal lu, tuʼntzunju mlaytoq tzaj nya bʼaʼn kyiʼj aj tkubʼ xiten tnam (1 Ped. 1:1). Tej tok kyqʼoʼn kywitz tiʼj qa japun twi profecía, ok qeʼ kykʼuʼj tiʼj qa kjapunel kywi mas profecía. Chʼixme ax jlu in bʼaj jaʼlo, in nok tkeʼyina alkye tten in japun kywi profecía tiʼj mankbʼil tqʼijlalil. Jaku tzʼonin jlu tiʼja tuʼn kybʼant chʼixpubʼil tuʼna tuʼn tbautisarina.

15. ¿Tiʼ qmod kbʼel qyekʼin akux in qo ayon tiʼj tqʼijlalil Jehová? (2 Pedro 3:​10-13).

¹⁵ Toj tkabʼin carta kubʼ ttzʼibʼin Pedro, tzaj tqʼamaʼn alkye qmod tuʼn tten akux in qo ayon tiʼj «tqʼijlalil Qajaw» moqa makbʼil tqʼijlalil. Toj tnejel syent abʼqʼi, atxtoq nim ambʼil tuʼn tbʼaj jlu. Maske ikju, tqʼama Pedro kye okslal tuʼn kyayon tiʼj qʼij lu (kjawil uʼjit 2 Pedro 3:​10-13). Ax ikx qe bʼaʼn tuʼn ttzaj qnaʼn qa chʼix tkubʼ najsaʼn nya bʼaʼn ex qajxix tuʼn tpon qʼij lu. Tuʼntzunju, in nok tilil quʼn tuʼn tbʼaj qbʼinchaʼn qten ‹tuʼn qanqʼin bʼaʼn, tuʼn tel qpaʼn qibʼ tiʼj tkyaqil nya bʼaʼn ex tuʼn qnimen te Dios›. Aj tbʼant jlu quʼn, in tzalaj Jehová qiʼj. Ximana tiʼj jlu: ¿Tiʼ kbʼel tnaʼn Jehová aj t-xi ttziyena tuʼn tajbʼena te ex aj tbautisarina?

QE KʼIWLABʼIL JAKU TZAJ QKʼAMOʼN QA MA QO BAUTISARIN NAJ

16. ¿Toj alkye ambʼil mas bʼaʼn tuʼn qbautisarin? (2 Corintios 6:​1, 2; ax ikx qʼonka twitza kyiʼj tilbʼilal).

¹⁶ Tbʼanel qa ma qo bautisarin jaʼlo (kjawil uʼjit 2 Corintios 6:​1, 2). Qo ximen tiʼj eunuco etíope aju predicarin Felipe te. Tej tel tnikʼ tiʼj tbʼanel noticia jurat naj bautisarin. Mintiʼ kubʼ t-ximen jlu: «Tnejel waje tuʼn tel mas nnikʼe tiʼj tbʼanel noticia. Ex bʼalo yajxitl kkanetel juntl lugar tuʼn nbautisarine». Mintiʼ bʼant jlu tuʼn sino xi tqanin jlu te Felipe: «¿Myapelo bʼaʼn tuʼn nbʼyane?» (Hech. 8:​26, 27, 35-39). In tzalaj tej tikʼ bʼet tuʼnju otoq bautisarin.

17. ¿Tiʼ bʼaʼn tuʼn tok qeʼ qkʼuʼj tiʼj?

¹⁷ Qa at jun tiʼ in nel qʼinte ambʼil teya tuʼn tbautisarina, jaku tzʼok qeʼ tkʼuʼja tiʼj qa taj Jehová tuʼn tonin tiʼja tuʼn tchʼiy tamiwbʼila tukʼil (Rom. 2:4). Kʼonil tiʼja tuʼn miʼn ttzaj xobʼa, tuʼn miʼn ttzaj bʼaj tkʼuʼja ex tuʼn texa twitz alkyexku tiʼ in nel qʼinte ambʼil teya tuʼn tchʼiy tamiwbʼila tukʼila. Aj tbautisarina, kbʼel tnaʼna nim tzalajbʼil tuʼnju kxel tqanina te Jehová tuʼn tkubʼ tnajsaʼn tila ex tuʼn toka te tmajen. Ex bʼalo ya mlay tzʼok tqʼoʼna kyoklen qe tiʼchaq che kyjel tqʼoʼna (Filip. 3:​8, 13). Sino k-ayola tuʼn tjapun twiʼju o txi ttziyen Jehová kye qeju in che ajbʼen te ex in che bautisarin (Hech. 3:19).