¿Tiʼ t-xilen tuʼn qbautisarin ex tiquʼn nim toklen?

1. ¿Tzeʼn ojtzqiʼn quʼn qa nimxix toklen aju xnaqʼtzbʼil tiʼj bautismo?

IN KUBʼ qnaʼn nim tzalajbʼil aj tbautisarin jun xjal. Ax jlu kubʼ kynaʼn okslal ok kychmon kyibʼ toj abʼqʼi 33 te Pentecostés jatumel e bautisarin nim xjal. Toj ambʼil lu ex tqʼoʼn Pedro jun discurso ex tqʼama qa nim toklen bautismo (Hech. 2:​38, 40, 41). Yajxitl, kubʼ ttzʼibʼin apóstol Pablo qa aju «xnaqʼtzbʼil tiʼj bʼyabʼl» moqa bautismo atzun jun kyxol qe «tnejel xnaqʼtzbʼil tiʼj Crist» (Heb. 6:​1, 2). Bʼalo jaku kubʼ qximen qa nya nim toklen xnaqʼtzbʼil lu, pero in tzaj tqʼamaʼn Biblia qa nimxix toklen. Tuʼntzunju, tbʼanelxix tuʼn tel qnikʼ tiʼj.

2. ¿Tiquʼn nim toklen tuʼn tel qnikʼ tiʼj bautismo?

² Qa ma tzikʼ ambʼil qbautisarin moqa tzma in qo ximen tuʼn tbʼant quʼn, nim toklen tuʼn tel qnikʼ tiʼj tiʼ t-xilen. Tuʼn tel qnikʼ tiʼj, qo ximen tiʼj jun ejemplo. Qa at jun xjal taj tuʼn tjaw tbʼinchaʼn jun tja, il tiʼj tuʼn tkux tqʼoʼn qe tbʼanel tsimyientl. Chʼixme ax jlu in bʼaj qa qaj tuʼn tchʼiy qʼuqbʼil qkʼuʼj, nim toklen tuʼn tel qnikʼ kyiʼj tnejel xnaqʼtzbʼil, ik tzeʼn aju tiʼj bautismo. Tuʼntzunju toj xnaqʼtzbʼil lu kxel qqʼoʼn tzaqʼwebʼil kyiʼj xjel lu: ¿tiʼ t-xilen bautismo?, ¿tzeʼn in xi bʼinchet?, ex ¿tiquʼn in qo bautisarin toj tbʼi Mambʼaj, toj tbʼi Kʼwalbʼaj ex toj tbʼi espíritu santo?

¿TIʼ T-XILEN BAUTISMO EX TIQUʼN NIM TOKLEN?

3. ¿Tiʼ in kubʼ qyekʼin aj qbautisarin?

³ Aj qbautisarin in kubʼ qyekʼin jlu kywitz txqantl: tnejel, qa o txi qnimen aju o tzaj xnaqʼtzaʼn qe tiʼj Jehová ex tiʼj Jesús. Tkabʼin, qa o tzʼajtz tiʼj qanmi. Toxin, qa o che bʼant chʼixpubʼil quʼn tuʼn qajbʼen te Jehová. Tkyajin, qa o tzʼel qnikʼ tiʼj qa in najbʼen Jesús tuʼn Jehová tuʼn qklet tiʼj il ex tiʼj kamik. Tjweʼyin, qa o bʼant jun naʼj Dios quʼn tuʼn t-xi qqʼamaʼn te Jehová qa qo ajbʼel te junx tukʼil ttnam. Aj qbautisarin, in xi tzyet tuʼn tkubʼ qqʼoʼn Jehová tnejel toj qanqʼibʼil.

4. Aj tkuʼx bʼaj qximlal tjaqʼ aʼ, ¿tiʼ in kubʼ qyekʼin? (Ax ikx qʼonka twitza tiʼj tilbʼilal).

⁴ Aj qbautisarin, in qo kuʼx bʼaj tjaqʼ aʼ ex in qo jatz qʼiʼn juntl maj,a ik tzeʼn otoq qo kyim ex in qo jaw anqʼin juntl maj (mojbʼankuya tukʼil Colosenses 2:12). Aj tbautisarin jun xjal in kubʼ tyekʼin qa o che bʼant nimaq chʼixpubʼil tuʼn toj qanqʼibʼil. Aj qkuʼx tjaqʼ aʼ in kyaj qqʼoʼn aju ojtxe qanqʼibʼil ex aj qjatz in kubʼ qyekʼin qa qaj tuʼn tbʼant tvoluntad Dios quʼn.

5. Aj tbʼaj qbʼinchaʼn qten tuʼn qbautisarin, ¿alqukʼil jaku tzʼok qmojbʼaʼn ex tiquʼn? (1 Pedro 3:​18-21).

⁵ (Kjawil uʼjit 1 Pedro 3:​18-21). Aju in bʼant quʼn tuʼn qbautisarin chʼixme ik tten ik tzeʼn aju bʼant tuʼn Noé tej tkubʼ tbʼinchaʼn arka. Qa tzma in xnaqʼtzana tiʼj Biblia jakulo kubʼ t-ximana qa il tiʼj tuʼn tbʼant nim tiʼchaq tuʼna tuʼn tbautisarina. Kwestlo jaku tzʼela toj twitza, ik tzeʼn tej tkubʼ tbʼinchaʼn Noé arka. ¿Pero ilpe tiʼj tuʼn tbʼant tkyaqil jlu quʼn? Il tiʼj. Qo ximen tiʼj Noé. Tuʼn tkyaj anqʼin, iltoq tiʼj tuʼn t-xi tbʼinchaʼn tkyaqilju tzaj tqʼamaʼn Dios te tiʼj tzeʼn tuʼn tjaw tbʼinchaʼn arka. In tzaj tyekʼin relato qa nimen Noé ex xi tbʼinchaʼn «tkyaqil ik tzaʼnx [ . . . ] tzaj tmaʼn Dios te» (Gén. 6:22). ¿Tiquʼn? Tuʼnju ok qeʼ tkʼuʼj Noé tiʼj Jehová ex onin tiʼj. Ax ikx teya jaku txi tbʼinchaʼna aju in tzaj tqanin Dios teya tuʼn tbautisarina.

6. ¿Alkye tten in qo klet tuʼn bautismo?

⁶ Toj versículo 21 kubʼ ttzʼibʼin Pedro jlu: aju «bʼyabʼl, aju ma qo klet tuʼn jaʼlo». Pero nya a kyxilen yol lu qa in qo klet aj qbautisarin. Ax ikx nya a t-xilen qa in che najset qe qil tuʼn, tuʼnju oʼkx jaku che najset tuʼn chojbʼil bʼant tuʼn Jesús (1 Juan 1:7). Pero nim toklen tuʼn qbautisarin, tuʼnju in tzaj tqʼamaʼn Jehová tuʼn tbʼant quʼn. Ax ikx in nonin bautismo tuʼn t-xi qqanin te Jehová «tuʼn qanqʼin tuj tumelxix», toj juntl yol, tuʼn tten qximbʼetz saq. Ex in qo tzaj ttzaqʼweʼn Jehová aj tkubʼ tnajsaʼn qil noq tuʼn chojbʼil bʼant tuʼn Jesús. Aj tbʼant jlu tuʼn Jehová in qo klet, toj juntl yol, in tzaj tqʼoʼn ambʼil qe tuʼn qanqʼin te jumajx.

¿ALKYE TTEN IN BAUTISARIN JUN XJAL EX TIʼ T-XILEN?

7. ¿Alkye tten tuʼn qbautisarin?

⁷ ¿Alkye tten tuʼn qbautisarin? In tzaj tqʼamaʼn Biblia qa il tiʼj tuʼn tkuʼx bʼaj qximlal tjaqʼ aʼ, pero mintiʼ in tzaj tqʼamaʼn mas tqanil. Noqtzun tuʼnj, in tzaj tqʼoʼn junjun nabʼil tiʼjju tuʼn tbʼant quʼn toj ambʼil lu. Por ejemplo, tzeʼn tuʼn tbʼaj qxbʼalumin qibʼ ex tzeʼn kymod txqantl tuʼn tkubʼ kyyekʼin (1 Cor. 14:40; 1 Tim. 2:9). Chʼixme tkyaqil maj in qo bautisarin tuʼn jun ansyan, pero mintiʼ in jaw qnimsaʼn (1 Cor. 1:​14, 15). Ex jaku che ten nim moqa nya nim xjal aj qbautisarin (Hech. 8:36).

8. ¿Alkyeqe xjel in xi qanin kye qeju in che bautisarin ex tiquʼn? (Hechos 2:​38-42; ax ikx qʼonka twitza tiʼj tilbʼilal).

⁸ In tzaj tqʼamaʼn Biblia qa «tuʼn qtziʼ in qchikʼbʼaʼn», kywitz xjal qa qaj tuʼn qajbʼen te Dios (Rom. 10:​9, 10). Nya oʼkx in bʼant jlu quʼn aj qpredicarin kye xjal, sino ax ikx toj qʼij aj qbautisarin. Tuʼntzunju in tzaj qanin kabʼe xjel qe. Tnejel: «¿Ope tzʼajtz tiʼj tanmiya, ope txi tqʼamaʼna te Jehová qa taja tuʼn tbʼant tajbʼil tuʼna ex ope tzʼok qeʼ tkʼuʼja tiʼj qa a Jesucristo o tzaj tqʼoʼn Dios tuʼn qklet?». In tzaj tyekʼin xjel lu aju o bʼant quʼn tuʼn tbʼaj qbʼinchaʼn qten tuʼn qbautisarin. Chʼixme ax jlu xi tqanin Pedro kye xjal te Pentecostés. Tkabʼin: «¿In nelpe tnikʼa tiʼj qa tuʼnju kbautisarila kbʼel tyekʼina kywitz kykyaqil qa ya testigo de Jehová teya ex qa in noktza toj ttnam Dios?». Tuʼn tjapun twiʼ qyol o txi qtziyen te Jehová, in nonin xjel lu qiʼj tuʼn t-xi qbʼiʼn aju in tzaj tqʼamaʼn ttnam qe ex tuʼn qajbʼen te junx kyukʼil erman, ik tzeʼn bʼant kyuʼn okslal toj tnejel syent abʼqʼi (kjawil uʼjit Hechos 2:​38-42). Aj t-xi qtzaqʼweʼn qe xjel lu, in japun qe requisito quʼn tuʼn qbautisarin.

9. ¿Tiʼ il tiʼj tuʼn tbʼant quʼn tuʼntzun ttzalaj Dios qiʼj?

⁹ Tej naʼmxtoq tel tnikʼa tiʼj axix tok, bʼalo mintiʼ kubʼ tbʼinchaʼna jun matij il. Moqa testigo de Jehová qe tmana ex o che onin tiʼja tuʼn tok tkʼujlaʼna Jehová. Pero, ¿ilpe tiʼj tuʼn tajtz tiʼj tanmiya ex tuʼn tbautisarina tuʼntzun ttzalaj Dios tiʼja? Il tiʼj, tuʼnju qkyaqilx aj il xjal qo aj qul itzʼj ex mintiʼ in nonin jlu tuʼn qok te tamiw Dios (Sal. 51:5). Pero aj tel qnikʼ tiʼj Jehová, in kubʼ qximen tuʼn tbʼant tajbʼil quʼn ex nya aju qe qajbʼil. Aj tbʼant jlu quʼn, ya jaku tzʼajtz tiʼj qanmi ex jaku kyaj qqʼoʼn aju ojtxe qanqʼibʼil tuʼntzun qanqʼin ik tzeʼn tajbʼil Jehová ex jaku qo bautisarin (Hech. 3:19).

10. ¿Tiʼ il tiʼj tuʼn tbʼant tuʼna qa bautisarina toj juntl okslabʼil?

¹⁰ ¿Yajtzun qa o bautisarina toj juntl okslabʼil? ¿Ilpe tiʼj tuʼn tbautisarina juntl maj tuʼn toka te testigo de Jehová? Il tiʼj, tuʼnju toj ambʼil aju naʼmxtoq telxix tnikʼa tiʼj Jehová ex tiʼj Jesús. Axpe ikx qa otoq txi tqʼamaʼna te Dios tuʼn tajbʼena te, pero naʼmxtoq tel tnikʼa tiʼj alkyexix tvoluntad. Qo yolin tiʼj jun ejemplo te tnejel syent abʼqʼi. Tej tyolin Pablo kyukʼil junjun xjal te Éfeso, onin kyiʼj tuʼn tel kynikʼ tiʼj qa iltoq tiʼj tuʼn kybautisarin juntl maj tuʼnju naʼmxtoq tten kyojtzqibʼil tiʼj Jesús (Hech. 19:​1-5).b Ax ikx toj ambʼil jaʼlo, il tiʼj tuʼn tel tnikʼ jun xjal tiʼj alkye tvoluntad Jehová tuʼntzun tok tqʼoʼn Dios toklen tbautismo.

«TOJ TBʼI MAMBʼAJ, TOJ TBʼI KʼWALBʼAJ EX TOJ TBʼI ESPÍRITU SANTO»

11. ¿Tiʼ t-xilen tuʼn qbautisarin «toj tbʼi Mambʼaj, toj tbʼi Kʼwalbʼaj ex toj tbʼi espíritu santo»? (Mateo 28:​18-20).

¹¹ Tqʼama Jesús qa iltoq tiʼj tuʼn kybautisarin akʼaj tdiscípulo «toj tbʼi Mambʼaj, toj tbʼi Kʼwalbʼaj ex toj tbʼi espíritu santo» (kjawil uʼjit Mateo 28:​18-20, nwt). ¿Tiʼ tajtoq tuʼn ttzaj tqʼamaʼn kyukʼil yol lu? Aju yol in najbʼen tuʼn Biblia tiʼj yol «bʼibʼaj» atz in yolin tiʼj tzeʼn tmod jun xjal. Pero ax ikx jaku yolin tiʼj toklen jun xjal at. Tuʼntzunju, aj tbʼant jun tiʼ quʼn «toj tbʼi» jun xjal, in kubʼ qyekʼin qa in nok qqʼoʼn toklen. Qo xnaqʼtzan tiʼj tzeʼn jaku kubʼ qyekʼin qa in nok qqʼoʼn toklen Mambʼaj, Kʼwalbʼaj ex tzeʼn in nonin espíritu santo.

12. ¿Tiʼ t-xilen tuʼn qbautisarin toj tbʼi Mambʼaj? (Apocalipsis 4:11; ax ikx qʼonka twitza tiʼj tilbʼilal).

¹² Toj tbʼi Mambʼaj. Ojtzqiʼn quʼn qa a Jehová in tzaj qʼonte qchwinqlal ex qa a Qtat. Ax ikx ojtzqiʼn quʼn qa at nimxix tipumal ex qa a kubʼ bʼinchante kykyaqil tiʼchaq (kjawil uʼjit Apocalipsis 4:11). Ojtzqiʼn quʼn qa in tzaj tbʼiʼn qnaʼj Dios. In najbʼen tbʼi quʼn ex in qo respetarin te aj qnaʼn Dios ex aj qyolin tiʼj kyukʼil xjal (Sal. 65:2). Pero ax ikx il tiʼj tuʼn tel qnikʼ tiʼj juntl tiʼ. Aqeju e bʼin tiʼj Pedro toj Pentecostés ya otoq tzʼel kynikʼ tiʼj Jehová, pero iltoq tiʼj tuʼn tel kynikʼ tiʼj qa oʼkx jakutoq tzaj qʼoʼn kychwinqlal te jumajx qa ma tzʼok qeʼ kykʼuʼj tiʼj Jesús (Rom. 5:8).

13. ¿Tiʼ t-xilen tuʼn qbautisarin toj tbʼi Kʼwalbʼaj? (Ax ikx qʼonka twitza tiʼj tilbʼilal).

¹³ Toj tbʼi Kʼwalbʼaj. Ojtzqiʼn quʼn qa a Jesús tnejel Tkʼwal Dios ex qa a aju «bʼe», toj juntl yol qa a in nonin qiʼj tuʼn tten jun tbʼanel qamiwbʼil tukʼil Jehová (Juan 14:​6, nwt). Ax ikx ojtzqiʼn quʼn qa kyim Jesús tuʼn qpaj tuʼntzun qanqʼin te jumajx. Aj tel qnikʼ tiʼj jlu, in nonin qiʼj tuʼn tel qkanoʼn tiʼj tkyaqil qʼij ex nya oʼkx toj qʼij aj qbautisarin (1 Juan 2:6). Tuʼntzunju in nok tilil quʼn tuʼn kukx qpredicarin (Luc. 4:​43, nwt). Ax ikx in nikʼx ikʼbʼil quʼn tuʼntzun qten tzʼaqli twitz Jehová (2 Tim. 3:12). Ex in nok qqʼoʼn toklen Jesús, aju «nejenel kye kykyaqil okslal». Tuʼntzunju, in qo nimen kye qeju o che jaw tskʼoʼn tuʼn kykubʼ nej kywitz tdiscípulo ex tuʼn kyxqʼuqin kyiʼj (Efes. 4:​8, 11, 12; 5:23).

14. a) ¿Tiʼ t-xilen tuʼn qbautisarin toj tbʼi espíritu santo? (Ax ikx qʼonka twitza tiʼj tilbʼilal). b) ¿Alkye junjuntl bautismo in bʼant kyuʼn okslal skʼoʼn maj? (Qʼonka twitza tiʼj recuadro «Qe bautismo in bʼant kyuʼn okslal skʼoʼn maj»).

¹⁴ Toj tbʼi espíritu santo. Ojtzqiʼn quʼn qa nya jun xjal espíritu santo ex qa nya jun dios, sino tipumal Jehová. Ex ojtzqiʼn quʼn qa onin espíritu santo kyiʼj xjal e kubʼ tzʼibʼinte Biblia, tuʼntzunju in jaw quʼjin tkyaqil qʼij ex in xi qbʼinchaʼn aju in nel qnikʼ tiʼj (2 Ped. 1:​20, 21). Ax ikx in nok tilil quʼn tuʼn miʼn tkubʼ qbʼinchaʼn jun matij il, tuʼnju mlay tzʼonin espíritu santo qiʼj nix kyiʼj erman toj congregación (Efes. 4:30).

15. ¿Tiʼ bʼaʼn tuʼn tbʼant quʼn?

¹⁵ Qa ya o bautisarin teya, bʼaʼn tuʼn tel tnikʼa kyiʼj «xnaqʼtzbʼil tiʼj bʼyabʼl»c ex tuʼn tjapun tyola xi ttziyena te Jehová tuʼn tajbʼena te tej tbautisarina. ¿Yajtzun qa naʼmx tbautisarina? ¿Atpe jun tiʼ in nel qʼinte ambʼil teya? Toj juntl xnaqʼtzbʼil kʼelel qnikʼ tiʼjju jaku bʼant tuʼna tuʼn tbautisarina.