Abril

Il tiʼj tuʼn tkubʼ qyekʼin qʼuqbʼil qkʼuʼj tiʼj chojbʼil tuʼntzun tonin tchkʼel ex tchibʼjal Jesús qiʼj (Efes. 1:7). Aqeju xjal in nok tqʼoʼn Jesús kybʼi te txqantl ẍneʼl, mintiʼ in xi kywan pan ex mintiʼ in xi kykʼaʼn vino aj tkubʼ ikʼset Wabʼj te Qale (Juan 10:16). Pero jaku txi qqʼamaʼn qa in bʼaj pan te chwinqlal kyuʼn aj tok qeʼ kykʼuʼj tiʼj chojbʼil (Juan 6:53). Atzun qeju in xi kywan pan ex in xi kykʼaʼn vino, o kyaj bʼant tiʼj akʼaj yol kyukʼil ex o tzaj qʼoʼn kyoklen toj Tkawbʼil Dios toj kyaʼj. Tuʼntzunju, qa atoʼ kyxol qeju skʼoʼn maj moqa kyxol txqantl rit, nim toklen tuʼn tkubʼ qyekʼin qʼuqbʼil qkʼuʼj tuʼntzun qanqʼin te jumajx. w24.12 13 párr. 14, 16

Tej tkubʼ tikʼsaʼn Jesús Wabʼj te Qale, xi tqʼoʼn pan mintiʼ levadura toj kye t-apóstol ex xi tqʼamaʼn kye qa atzun pan lu in kubʼ techlaʼn t-xmilal. Yajxitl ikʼx tqʼoʼn vino kye ex xi tqʼamaʼn tiʼ kubʼ techlaʼn tchkʼel tej tqʼama jlu: «Atzun nchkʼele jlu te kyuwsabʼl teju akʼaj yol» (Mar. 14:​22-25; Luc. 22:20; 1 Cor. 11:24). O kyaj bʼant tiʼj akʼaj yol lu oʼkx kyukʼil «aj Israel», aqeju che kawil tukʼil Jesús toj «tkawbʼil Dios» (Heb. 8:​6, 10; 9:15). Bʼaʼn tuʼn ttzaj qnaʼn qa tej tkubʼ tikʼsaʼn Jesús Wabʼj te Qale oʼkx ximen tiʼj tal chʼuq rit. Aqeju apóstol e ten tzʼaqli ex ateʼtoq tukʼil toj ambʼil aju, atzun qeju e jaw skʼoʼn tnejel tuʼn kyten kyxol kʼloj rit chʼin kybʼet. Kykyaqilx qe jlu ktzajel qʼoʼn jun kylugar toj kyaʼj junx tukʼil Jesús. w24.12 11 párr. 9, 10

Xi kʼayin Jesús, xi qʼiʼn pres, xi qʼamaʼn nya bʼaʼn ex nya ax tok yol te, kubʼ qʼoʼn tsentens tuʼn tkyim ex bʼaj kʼixbʼisaʼn. Te mankbʼil, jaw qʼoʼn twitz tzeʼ kyuʼn soldad tuʼn tkubʼ bʼyoʼn. Ikʼx tkyaqil jlu tuʼn Jesús ex ten tzʼaqli, pero kux choʼn toj tanmi Jehová tej tok tqʼoʼn twitz tiʼj tkyaqilju ok bʼinchaʼn tiʼj Tkʼwal. Maske at nim tipumal Jehová ex kʼujlaʼn Jesús tuʼn, xi tqʼoʼn ambʼil tuʼn tbʼaj jlu tiʼj Tkʼwal. ¿Tiquʼn? Tuʼnju nimxix kʼujlaʼna tuʼn. Xi tqʼoʼn Tkʼwal, aju kʼujlaʼnxix tuʼn, te chojbʼil ex ikʼx nim kʼixkʼoj tuʼn tuʼn tkleta tiʼj il ex tiʼj kamik (1 Juan 4:​9, 10). Taj Jehová tuʼn tonin tiʼj teyele junjun qe tuʼn tkubʼ tiʼj il quʼn. w24.08 6 párr. 13, 14

Jaku tzʼel qnikʼ tiʼj qa kʼujlaʼnxix qoʼ tuʼn Jehová aj qximen tiʼj nimxix kʼixkʼoj ikʼx tuʼn tej tkubʼ bʼyoʼn Tkʼwal kyuʼn xjal. In tzaj tqʼamaʼn Satanás qa ni jun tmajen Dios jaku ten tzʼaqli twitz aj tok weʼ twitz nya bʼaʼn. Tuʼntzunju, xi tqʼoʼn Jehová ambʼil tuʼn tikʼx nim kʼixkʼoj tuʼn Jesús tej naʼmxtoq tkyim tuʼntzun tel nikʼbʼaj tiʼj qa nya ax tok tyol Satanás (Job 2:​1-5). Ok tkeʼyin Jehová tzmax toj kyaʼj tkyaqilju nya bʼaʼn ok bʼinchaʼn tiʼj Jesús ik tzeʼn tej kyxmayin xjal tiʼj, tej tok jubʼin kyuʼn soldad te Roma ex tej tjaw qʼoʼn twitz tzeʼ. Ax ikx ok tqʼoʼn twitz tiʼj kʼixkʼoj ikʼx tuʼn Tkʼwal tej tkyim (Mat. 27:​28-31, 39). Toj alkyexku ambʼil jakutoq tzʼel tiʼn Jehová tkyaqil nya bʼaʼn in noktoq bʼinchaʼn tiʼj Jesús (Mat. 27:​42, 43). Pero noqwit bʼant jlu tuʼn Jehová, mintiʼwtlo chjet chojbʼil ex mintiʼwtlo jun qʼuqbʼil kykʼuʼj xjal jaʼlo. Tuʼntzunju, xi tqʼoʼn Jehová ambʼil tuʼn tikʼ Jesús toj kʼixkʼoj ex tuʼn tkyim. w25.01 22 párr. 7

Ma pon 16 te nisán te abʼqʼi 33. In che bʼisen t-xnaqʼtzbʼen Jesús ex in che xobʼ. Ma cheʼx kabʼe t-xnaqʼtzbʼen Jesús toj tnam Emaús. Akux in bʼet kyxiʼ, pon laqʼeʼ jun xjal kytxlaj ex ok ten bʼetil junx kyukʼil. Pero mintiʼ ojtzqiʼn twitz xjal lu kyuʼn, xi kyqʼamaʼn te xjal lu qa in che bʼisun tuʼn tkyaqilju otoq tzʼok bʼinchaʼn tiʼj Jesús, pero chʼexpaj kyanqʼibʼil tuʼnju xi tqʼamaʼn xjal lu kye. Xi tchikʼbʼaʼn kye tiquʼn otoq tzikʼx nim kʼixkʼoj tuʼn Jesús ex tiquʼn otoq kubʼ bʼyoʼn. «Tzajnix qeʼ kyuj qe uʼj kyaj ttzʼibʼan Moisés ex tuj kyuʼjil kykyaqil t-sanjel Dios». Tej kypon kyoxil toj tnam Emaús el kynikʼ tiʼj qa atoq Jesús otoq jaw anqʼin (Luc. 24:​13-35). Tej atxtoq 40 qʼij tuʼn t-xiʼ Jesús toj kyaʼj, kubʼ tyekʼin tibʼ nimku maj kywitz qe t-xnaqʼtzbʼen. Xi tqʼuqbʼaʼn kykʼuʼj, tuʼntzunju, ya mintiʼ e bʼisun ex ya mintiʼ e xobʼ. Kubʼ kynaʼn tzalajbʼil juntl maj ex ten kyipumal tuʼn kypakbʼan tiʼj tbʼanel tqanil tiʼj Tkawbʼil Dios. w24.10 12 párr. 1-3

Chebʼe in nok jun kʼwal te matij xjal. Atzunte qokslabʼil nya tjunalx in chʼiy. Jun techel, xi kykʼamoʼn okslal te Corinto tbʼanel tqanil, e bautisarin, tzaj kykʼamoʼn xewbʼaj xjan ex el kyiʼn tbʼanel xnaqʼtzbʼil tiʼj apóstol Pablo (Hech. 18:​8-11). Maske otoq tzikʼ junjun abʼqʼi kybautisarin, nim kye naʼmxtoq kychʼiy toj kyokslabʼil (1 Cor. 3:2). Il tiʼj tuʼn ttzaj anqʼin toj qanmi tuʼn kukx tkubʼ qximen tuʼn qchʼiy toj qokslabʼil. Qa mintiʼ ma bʼant jlu quʼn, mlayx tzʼok qnabʼil (Prov. 1:22). Nya qaj tuʼn qok ik tzeʼn qe xjal nya kyaj tuʼn tten kyresponsabilidad ex in che ayon tuʼn t-xi tqʼamaʼn kyman kye tiʼ tuʼn t-xi kybʼinchaʼn. Sino qaj tuʼn qok te responsable tiʼj qamiwbʼil tukʼil Jehová. Qa in kubʼ tnaʼna qa naʼmx tchʼiya toj tokslabʼila, qaninxa te Jehová tuʼn tten tajbʼila ex tipumala tuʼn tok tilil tuʼna (Filip. 2:13). w24.04 4 párr. 9, 10

In tzaj tqʼamaʼn Jehová qe tiʼ in kubʼ tnaʼn aj tkubʼ tnajsaʼn jun xjal (Ezeq. 33:11). Mlay kubʼ tnajsaʼn Jehová jun xjal te jumajx qa mintiʼ jun tiquʼn tuʼn tbʼant jlu tuʼn. At nim qʼaqʼbʼil tkʼuʼj Jehová ex in kubʼ tyekʼin qa jaku bʼant. ¿Alkyeqe xjal ojtzqiʼn quʼn qa mlay che jaw anqʼin juntl maj? Oʼkx in yolin Biblia kyiʼj junjun. Jun techel, tqʼama Jesús qa mlay jaw anqʼin Judas Iscariote (Mar. 14:21; ax ikx qʼonka twitza tiʼj Juan 17:12 ex tiʼj nota de estudio). Ojtzqiʼntoq tuʼn Judas qa tiʼj Jehová ex tiʼj Tkʼwal ok tbʼinchaʼn nya bʼaʼn (qʼonka twitza tiʼj Marcos 3:29 ex kyiʼj nota de estudio). Ax ikx tqʼama Jesús qa mlay che jaw anqʼin junjun nejenel kye okslabʼil tuʼnju ok kybʼinchaʼn nya bʼaʼn tiʼj (Mat. 23:​33, TNM; ax ikx qʼonka twitza tiʼj Juan 19:11 ex tiʼj nota de estudio jatumel in tqʼamaʼn «del hombre»). Ex tqʼama apóstol Pablo qa mlay che jaw anqʼin apóstata qa mintiʼ ma tzʼajtz tiʼj kyanmi (Heb. 6:​4-8; 10:29). w24.05 4 párr. 10, 11

Ax tok, jaku tzʼok tbʼinchaʼn Satanás jun nya bʼaʼn qiʼj, pero qa mintiʼ sel qpaʼn qibʼ tiʼj Jehová kukx kʼonil qiʼj tuʼn qex twitz (1 Juan 3:8). Ax ikx toj akʼaj twitz Txʼotxʼ kukx kʼokel t-xqʼuqin Jehová tamiwbʼil at kyukʼil tmajen. Nya oʼkxju, ax ikx, ok che okel t-xqʼuqin tiʼj kyimen (Apoc. 21:4). Tbʼanelxix qoklen in tzaj tqʼoʼn Jehová aj ttzaj tqʼoʼn ambʼil qe tuʼn qten toj tja ex aj qok te tamiw te jumajx (Ezeq. 37:27). Pero tuʼn kukx qten toj tja Jehová, il tiʼj tuʼn tbʼant junjun tiʼ quʼn. Ik tten ik tzeʼn qa ma qox ttxkoʼn jun xjal toj tja. Il-lo tiʼj tuʼn t-xi qbʼinchaʼn junjun tiʼchaq aju bʼaʼn in nel toj twitz. Ax ikx tuʼn qten toj tja Jehová, il tiʼj tuʼn tok qojtzqiʼn tiʼ tajbʼil tuʼn tbʼant quʼn. Ex tuʼnju kʼujlaʼnxix Jehová quʼn, in nok tilil quʼn tuʼn tkubʼ qbʼinchaʼn tkyaqilju bʼaʼn in nela toj twitz (Col. 1:10). Qa in qo respetarin te, ok kʼonil qiʼj tuʼn miʼn tkubʼ qbʼinchaʼn jun nya bʼaʼn ex tuʼn tkubʼ qmansin qibʼ aj qajbʼen te (Miq. 6:8). w24.06 4 párr. 8, 9

Xi tqʼamaʼn Jehová te Abrahán tuʼn t-xi tqʼoʼn Isaac, aju tkʼwal, te chojbʼil. Tzajlo nimxix tbʼis Abrahán tuʼn jlu, pero nimen te Jehová. Tej chʼixtoq tkubʼ tbʼyoʼn Abrahán tkʼwal, xi tqʼamaʼn Jehová te tuʼn miʼn tbʼant tuʼn. Ojtzqiʼn tuʼn Jehová jniʼ bʼis jakutoq kubʼ tnaʼn Abrahán qa ma kubʼ tbʼyoʼn tkʼwal. Aju bʼant tuʼn tzaj tyekʼin tiʼtoq kbʼantel tuʼn Jehová toj ambʼil tzul: Kxeltoq tqʼoʼn tkʼwal te chojbʼil tuʼnju at nimxix tkʼujlabʼil kyiʼj xjal (Gén. 22:​1-18). Tej tikʼ nim syent abʼqʼi, xi tqʼoʼn Jehová Ley kye aj Israel ex xi tqʼamaʼn kye tuʼn t-xi kyqʼoʼn txkup te chojbʼil tuʼntzun tkubʼ tnajsaʼn kyil (Lev. 4:​27-29; 17:11). Tzaj tyekʼin jlu qa kxeltoq tqʼoʼn Jehová jun chojbʼil mas tbʼanel kywitz chojbʼil lu tuʼnju che kletel xjal tuʼn te jumajx tiʼj il. E ajbʼen qe profeta tuʼn Jehová tuʼn ttzaj tchikʼbʼaʼn qa aju Tyajil xuʼj, moqa aju oʼkxku jun Tkʼwal Dios, kʼokeltoq bʼinchaʼn nim nya bʼaʼn tiʼj ex kkyimel tuʼn kyklet kykyaqil xjal tiʼj il ex tiʼj kamik (Is. 53:​1-12). w24.08 4 párr. 7, 8

Aj tuʼjina tiʼj Biblia, ximana tiʼj tzeʼn jaku japun tuʼna. Akux in bʼant jlu tuʼna, bʼaʼn tuʼn tkubʼ t-xjelina jlu: «¿Tzeʼn jaku txi nbʼinchaʼne jaʼlo moqa kyoj qʼij che ul aju ma tzʼel nnikʼe tiʼj?». Jun techel, in jaw tuʼjina 1 Tesalonicenses 5:17 ex 18, yajxitl, jaku ximana tiʼj qa in naʼna Dios tuʼn tkyaqil tkʼuʼja ex qa in bʼant tuʼna toj tkyaqil ambʼil. Ax ikx jaku ximana tiʼj qa in xi tqʼoʼna chjonte tiʼj tkyaqilju in tzaj tkʼamoʼna. Ex jakulo ximana tiʼj oxe tiʼ aju taja tuʼn t-xi tqʼoʼna chjonte tiʼj te Jehová. Qa ma tzʼel tpaʼna junjun minut tuʼn t-ximana tiʼjju in jaw tuʼjina, nya oʼkx in jaw tuʼjina Tyol Dios sino in xi tzyet tuʼn tkubʼ tbʼinchaʼna aju in nel tnikʼa tiʼj. Ex qa ma bʼant jlu tuʼna tkyaqil qʼij, mas kʼokela te jun tbʼanel tmajen Jehová. w24.09 4, 5 párr. 9, 10

O qo kubʼ tbʼinchaʼn Jehová tuʼn qtzalaj aj t-xi qqʼoʼn chʼin kye txqantl ex nya aj ttzaj qkʼamoʼn. In kubʼ qnaʼn bʼaʼn aj qonin kyiʼj qerman ex qgan aj ttzaj kyqʼoʼn chjonte qe. Pero ax ikx qa mintiʼ saj kyqʼoʼn chjonte qe, in qo tzalaj tuʼnju otoq kubʼ qbʼinchaʼn aju bʼaʼn. Noq tiʼxku o txi qqʼoʼn, bʼaʼn tuʼn kukx ttzaj qnaʼn aju in tzaj tqʼamaʼn 2 Crónicas 25:9: «Jaku tzaj tqʼoʼn Qman mas nim teya twitz jlu». Mi aʼl juntl jaku tzʼaj qʼonte mas nim oyaj ik tzeʼn te Jehová. Ex mi aʼl juntl jaku tzʼaj tqʼoʼn tzalajbʼil qe aj qtzaj tkʼiwlaʼn. Tuʼntzunju, bʼaʼn tuʼn kukx tok tilil quʼn tuʼn t-xi qqʼoʼn oyaj kye txqantl ik tzeʼn in bʼant tuʼn Qman Jehová. w24.09 31 párr. 20, 21

A Jehová in tzaj qʼaqʼan tkʼuʼj ex in tzaj tzʼeʼy tkʼuʼj qiʼj (Sal. 103:13; Is. 49:15). Aj ttzaj qbʼis kyuʼn nya bʼaʼn, in nel tnikʼ Jehová tiʼjju kʼixkʼoj in kubʼ qnaʼn (Zac. 2:8). In nonin qiʼj tuʼn qok laqʼeʼ ttxlaj ex tuʼn qok te tamiw (Sal. 25:14; Hech. 17:27). Ax ikx in kubʼ tin tibʼ ex «in tzaj mokʼeʼ tuʼn tkuʼtz tkeʼyin kyaʼj ex txʼotxʼ» tuʼntzun tjaw «twabʼan [ . . . ] aju mebʼa tkubʼ twitz txʼotxʼ» (Sal. 113:​6, 7). Tuʼn tkyaqil jlu qaj tuʼn tjaw qnimsaʼn Jehová, aju Qdios nimxix toklen. In jaw qnimsaʼn Jehová tuʼnju qaj tuʼn tok ojtzqiʼn kyuʼn xjal. Nimku xjal in ten nya bʼaʼn kyximbʼetz tiʼj Jehová. ¿Tiquʼn? Tuʼnju in tzaj tqʼamaʼn Satanás nya ax tok yol tiʼj ex in xi kynimen xjal (2 Cor. 4:4). In nok tilil tuʼn tuʼn tkubʼ kyximen xjal qa at nim tqʼoj Jehová, qa mintiʼ in ximen qiʼj ex qa a at tpaj tiʼj tkyaqil nya bʼaʼn in tzaj twitz Txʼotxʼ. Pero atzun qe, ojtzqiʼn quʼn aju axix tok ex o tzaj qʼoʼn qoklen tuʼn qonin kyiʼj xjal tuʼn tel kynikʼ tiʼj tzeʼnxix te Jehová tuʼntzun tjaw kynimsaʼn (Is. 43:10). w25.01 3 párr. 6-7

Maske tzʼaqlitoq Jesús ex e bʼant milagro tuʼn, e ajbʼen junjun xjal tuʼn Satanás tuʼn ttzaj kyqʼamaʼn nya ax tok yol tiʼj. Jun techel, xi kyqʼamaʼn nejenel kye okslabʼil kye txqantl qa ten tipumal Jesús tuʼn kyetz demonio toj kyxmilal xjal noq tuʼn «nejenel kye juʼẍ» moqa demonio (Mar. 3:22). Ex tej tok Jesús toj juicio, xi kyqʼamaʼn nejenel kye okslabʼil qa yolin nya bʼaʼn tiʼj Dios ex kubʼ kykʼuʼj xjal kyuʼn tuʼn tkubʼ bʼyoʼn (Mat. 27:20). Ex tej t-xi tzyet tuʼn kypakbʼan t-xnaqʼtzbʼen Jesús, «bʼaj kytzpet-saʼn [aj qʼoj] kynabʼl txqantl xjal mya judiy qe tuʼn kyqʼojin kyiʼj» (Hech. 14:​2, 19). In tzaj tqʼamaʼn uʼj Aju Xqʼuqil te 1 te diciembre te 1998 qe yol lu tiʼj Hechos 14:2: «Nya oʼkx el kyikʼun aj qʼoj judiy tbʼanel tqanil, sino ax ikx ok tilil kyuʼn tuʼn tkubʼ kykʼuʼj xjal te junjuntl tnam tuʼntzun kyyolin nya bʼaʼn kyiʼj okslal». Kukx in nikʼan Satanás yol ex «in sbʼun kyiʼj kykyaqil xjal twitz txʼotxʼ». w24.04 11 párr. 15, 16

Mlay txi qʼoʼn ambʼil te jun xjal tuʼn tanqʼin te jumajx noq tuʼnju toj alkye ambʼil ma kyim. In nok Jehová te jun Jwes tzʼaqli ex toj tumel tkyaqilju in bʼant tuʼn (Sal. 33:​4, 5). Qʼuqli qkʼuʼj tiʼj qa kxel tbʼinchaʼn «jwes kyibʼaj kykyaqil xjal» aju tzʼaqli. Ax ikx mlay txi qʼoʼn tchwinqlal jun xjal te jumajx noq tuʼnju toj alkye lugar in nanqʼin. Ex mlay kubʼ t-ximen Jehová qa in che ok nim millón xjal ik tzeʼn qe chip noq tuʼnju mintiʼ xi pakbʼet tbʼanel tqanil toj lugar jatumel in che anqʼin (Mat. 25:46). Qa nim kyoklen xjal lu toj qwitz, ¿nyapetzulo mas nim kyoklen toj twitz «jwes kyibʼaj kykyaqil xjal»? Mintiʼ ojtzqiʼn quʼn tzeʼn ok che bʼantel junjun tiʼchaq tuʼn Jehová toj nimxix yajbʼil. Aj tok kykeʼyin junjun xjal aju kbʼajel toj nimxix yajbʼil, jakulo tzʼok qeʼ kykʼuʼj tiʼj Jehová aj tok kykeʼyin tzeʼn kbʼajel t-xjansaʼn tbʼi (Ezeq. 38:16). w24.05 12 párr. 14, 15

Kygan qe tmajen Jehová tuʼn tbʼaj kyonin kyibʼ kyxolx (2 Cor. 8:4). Pero at maj tuʼn tbʼant jlu kyuʼn il tiʼj tuʼn tten kyipumal. Jun techel, qa ma tzʼok jun qʼoj, in nel kynikʼ ansyan tiʼj qa il tiʼj tuʼn kyxiʼ onil kye erman, tuʼn t-xi kyqʼuqbʼaʼn kykʼuʼj tukʼil Tyol Dios moqa tuʼn t-xi kyiʼn kywa. In nok tilil kyuʼn tuʼn t-xi kyqʼon aju at tajbʼen kye erman tuʼnju at kykʼujlabʼil kyiʼj, maske ojtzqiʼn kyuʼn qa jaku tzaj jun nya bʼaʼn kyiʼj. Nim toklen tuʼn qnimen tuʼn tten mujbʼabʼil qxol. Tuʼntzunju, aj ttzaj tqʼoʼn sucursal jun tqanil qe, bʼaʼn tuʼn t-xi qbʼiʼn (Heb. 13:17). Ex nim toklen tuʼn kukx kyxnaqʼtzaʼn ansyan tiʼj tqanil in yolin tiʼj tiʼ jaku bʼant aj ttzaj jun xitbʼil ex tiʼ jaku bʼant otoqxi tzikʼ jun xitbʼil (1 Cor. 14:​33, 40). Bʼaʼn tuʼn tten qipumal ex tuʼn tten qnabʼil (Prov. 22:3). Tenx qnabʼil aj tbʼant jun tiʼ quʼn ex miʼn txi qbʼinchaʼn jun tiʼ jaku tzaj tiʼn jun nya bʼaʼn qiʼj. Qeʼk qkʼuʼj tiʼj Jehová. Jaku tzʼonin tuʼn miʼn ttzaj jun nya bʼaʼn qiʼj aj qonin kyiʼj erman. w24.07 4 párr. 8; 5 párr. 11

Ok ojtzqiʼnxix Jehová tuʼn rey David ex ok qeʼ tkʼuʼj tiʼj. Tuʼntzunju, xi tqanin onbʼil te tej tajtoq rey Saúl ex junjuntl aj qʼoj tuʼn tkubʼ bʼyoʼn kyuʼn. Tej tkolin Jehová tiʼj David, el tnikʼ tiʼj qa tzaj ttzaqʼweʼn Jehová tnaʼj Dios. Tuʼntzunju tqʼama qe yol lu: «Itzʼ te Qman» (Sal. 18:46). ¿Tiʼ tajtoq David tuʼn ttzaj tqʼamaʼn kyukʼil yol lu? In tzaj tqʼamaʼn jun uʼj qa ok qeʼxix tkʼuʼj David tiʼj qa «itzʼ te Dios aju in nonin jun ex juntl maj tiʼj ttnam». El tnikʼ David tiʼj qa axix tok itzʼ te Jehová tuʼnju onin tiʼj tej tok weʼ kywitz nya bʼaʼn. Ax ikx, onin tiʼj tuʼn kukx tjaw tnimsaʼn ex tuʼn kukx tajbʼen te (Sal. 18:​28, 29, 49). Aj tok qeʼ qkʼuʼj tiʼj qa itzʼ te Jehová, kʼonil qiʼj tuʼn qajbʼen te tukʼil tzalajbʼil. Ax ikx, kʼonil qiʼj tuʼn tikʼx alkyexku nya bʼaʼn quʼn ex tuʼn kukx qonin tiʼj. Nya oʼkxju, ax ikx kʼonil qiʼj tuʼn kukx qten ttxlaj. w24.06 20, 21 párr. 3, 4

¿Tiʼ in tzaj t-xnaqʼtzaʼn qe aju xi ttzʼibʼin apóstol Pablo kye okslal te Tesalónica? Qa ma tzʼok qbʼiʼn jun tqanil aju junxitl twitzju ojtzqiʼn quʼn, tenx qnabʼil. Jun techel, toj ojtxe tnam te Unión Soviética, kubʼ kytzʼibʼin aj qʼoj tiʼj ttnam Jehová jun carta toj kybʼi qeju qʼil twitz aqʼuntl aju in tzaj tqʼamaʼn qa jaku bʼant juntl organización kyuʼn aparte tiʼj ttnam Jehová. Mintiʼ e kubʼ tzʼaq qe erman waʼl toj kyokslabʼil toj tramp lu, maske mer axix tok aju ok kybʼiʼn. El kynikʼ tiʼj qa nya ax tok aju tzaj qʼamaʼn toj carta. Ax ikx toj ambʼil jaʼlo, at maj in najbʼen internet ex qe redes sociales kyuʼn aj qʼoj tuʼn qel tzpet ex tuʼn miʼn tten mujbʼabʼil qxol. Tuʼntzunju, tbʼanel tuʼn t-xi qjyoʼn tqanil tiʼjju in nok qbʼiʼn ex tiʼjju in jaw quʼjin qa ik tten ik tzeʼn o tzʼel qnikʼ tiʼj toj Biblia tuʼntzun «miʼn tchʼexpet naj» qnabʼil (2 Tes. 2:2; 1 Juan 4:1). w24.07 12 párr. 14, 15

Aju mas nim toklen tuʼn tkubʼ t-ximen jun xjal aju tuʼn t-xi tqʼamaʼn te Jehová qa kʼajbʼel te ex qa kʼokel te tfamilia. Tajbʼil Jehová tuʼn tkubʼ kyximen tkyaqil xjal tuʼn kyajbʼen te ex tuʼn kyok te tfamilia. ¿Tiquʼn? Tajbʼil tuʼn tuʼn tten jun tbʼanel kyamiwbʼil tukʼil ex tuʼn kyanqʼin te jumajx (Deut. 30:​19, 20; Gál. 6:​7, 8). Mintiʼ in che ok t-obligarin Jehová qe xjal tuʼn kyajbʼen te, sino in xi tqʼoʼn ambʼil kye tiʼ kyajbʼil tuʼn t-xi kybʼinchaʼn. Pero ¿tiʼtzun in bʼaj qa ma kubʼ tbʼinchaʼn jun okslal otoq bautisarin jun matij il? Qa mintiʼ in najtz tiʼj tanmi in nex qʼiʼn toj congregación (1 Cor. 5:13). Maske ikju, taj Jehová tuʼn tmeltzʼaj juntl maj tukʼil. Tuʼntzunju tzaj tqʼoʼn chojbʼil tuʼn tkubʼ tnajsaʼn kyil xjal in najtz tiʼj kyanmi. Nimxix tkʼujlabʼil Jehová at kyiʼj xjal aj il qeʼ ex taj tuʼn tajtz tiʼj kyanmi (Zac. 1:3; Rom. 2:4; Sant. 4:8). w24.08 14 párr. 1, 2

Tej tkubʼ ttzʼibʼin apóstol Juan toxin tcarta, ateʼtoq junjun xjal in xi kyxnaqʼtzaʼn nya ax tok ex in tzajtoq kyiʼn nya bʼaʼn toj congregación. Pero ateʼtoq junjuntl kukx in che ok lepeʼ «tiʼj ju yol axix tok». E nimen te Jehová ex japun qe tmandamyent kyuʼn (2 Juan 4, 6). Nya oʼkx Juan tzalaj kyuʼn okslal lu, sino ax ikx te Jehová (Prov. 27:11). ¿Tiʼ xnaqʼtzbʼil jaku tzʼel qiʼn tiʼj jlu? Qa kukx in qo ten tzʼaqli twitz Jehová in qo tzalaj ex in che tzalaj txqantl quʼn (1 Juan 5:3). Jun techel, in qo tzalaj aj tel qnikʼ tiʼj qa in tzalaj Jehová quʼn. Ik tzeʼn aj tel qikʼen jun nya bʼaʼn ex aj t-xi qnimen qe tkawbʼil. Ax ikx in che tzalaj qe anjel ateʼ toj kyaʼj (Luc. 15:10). Ax ikx qe in qo tzalaj aj tok qqʼoʼn qwitz kyiʼj txqantl erman in che ten tzʼaqli twitz Jehová (2 Tes. 1:4). Ex aj tkubʼ najsaʼn tkyaqilju tokx tjaqʼ tkawbʼil Satanás qo tzalajel aj ttzaj qnaʼn qa otoq qo ten tzʼaqli twitz Jehová. w24.11 12 párr. 17, 18

¿Jniʼ ambʼil kʼokel tqʼoʼn twitza tiʼj tmod erman taja tuʼn tok tojtzqiʼna? Qa jun rat ma txi tqʼamaʼna te aju in kubʼ tnaʼna, jakulo kubʼ t-ximen qa mintiʼ in ximana tiʼjju in bʼant tuʼna (Prov. 29:20). Noqtzun tuʼnj, qa ma kyaj tqʼoʼna tuʼn tikʼ nim ambʼil, jakulo kubʼ t-ximen qa mintiʼ ojtzqiʼn tuʼna tiʼ taja (Ecl. 11:4). Tuʼn t-xi tqʼamaʼna te jun erman qa taja tuʼn tok tojtzqiʼna, nya il tiʼj tuʼn tkubʼ t-ximana qa bʼiʼx kbʼel mojeʼya tukʼil. Pero il tiʼj tuʼn tel tnikʼa tiʼj qa otoq bʼant ttena tuʼn tkubʼ mojeʼya ex qa atzun xjal lu jaku tzʼok te jun tbʼanel tchmila moqa t-xuʼjila. Yajtzun qa in nok tkeʼyina qa taj jun erman tuʼn tok ojtzqiʼna tuʼn, ¿tiʼ jaku bʼant tuʼna? Qa nya taja, bʼaʼn tuʼn t-xi tyekʼina te tukʼil tbʼinchbʼena. Nya toj tumel tuʼn tkubʼ tyekʼina qa taja tuʼn tok tojtzqiʼna, pero mintiʼ jun tiʼ in kubʼ tnaʼna tiʼj (Efes. 4:25). w24.05 22, 23 párr. 9, 10

Oʼkx qeju axix tok okslal skʼoʼn maj che okex tkʼamoʼn Jesús toj Tkawbʼil Dios toj kyaʼj. Qa ya mintiʼ ma tzʼok tilil tuʼn jun okslal skʼoʼn maj tuʼn t-xqʼuqin, ya mlay tentl toklen kyxol «qeju skʼoʼmaj» (Mat. 24:31). Ax ikx kykyaqil qeju che anqʼil tzalu twitz Txʼotxʼ, il tiʼj tuʼn tok kyqʼoʼn kywiʼ kyiʼj techel tqʼama Jesús, tuʼn kyten tzʼaqli ex tuʼn kukx kyxqʼuqin. Ojtzqiʼnxix Jehová quʼn ex in nok qeʼ qkʼuʼj tiʼjju in kubʼ t-ximen tuʼn tbʼant. Tuʼntzunju, mintiʼ in tzaj bʼaj qkʼuʼj qa o kubʼ t-ximen tuʼn kyjaw t-skʼoʼn junjuntl skʼoʼn maj. Bʼaʼn tuʼn ttzaj qnaʼn aju txʼolbʼabʼil tqʼama Jesús kyiʼj aqʼunal toj tqan uva tuʼnju ateʼ junjun xi qʼoʼn kyaqʼun tej chʼixtoq tex bʼaj qʼij (Mat. 20:​1-16). Aqeju e okx aqʼunal yajxitl tzaj kykʼamoʼn ax twiʼ kykʼuʼj ik tzeʼn qeju e okx nej. Chʼixmi ax jlu kbʼajel kyiʼj qeju skʼoʼn maj kukx in che ten tzʼaqli, kxel qʼoʼn ambʼil kye tuʼn kyanqʼin toj kyaʼj, axpe ikx qa tzma in che jaw skʼoʼn. w24.09 24 párr. 15-17

Kubʼ tqʼoʼn Jesús jun tbʼanel techel qwitz tuʼn miʼn taj qqʼoʼn t-xel jun nya bʼaʼn. Nim qe xjal ok kybʼinchaʼn nya bʼaʼn tiʼj, axpe ikx junjun tfamiliar. Kyqʼama qa otoq tzʼok te loc ex mintiʼ ok qeʼ kykʼuʼj tiʼj qa atoq Mesías. Kyqʼama junjun nejenel kye txqantl okslabʼil qa kyukʼil demonio tzaj tpoder tuʼn kybʼant milagro tuʼn. Atzun kye soldad te Roma, e xmayin tiʼj, bʼaj kybʼyoʼn ex kyim kyuʼn (Mar. 3:​21, 22; 14:55; 15:​16-20, 35-37). Pero ikʼx tkyaqil jlu tuʼn Jesús ex mintiʼ aj tqʼoʼn t-xel. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn? (1 Ped. 2:​21-23). Kyaj tqʼoʼn Jesús jun tbʼanel techel tiʼj alkye qmod tuʼn tten aj tok bʼinchaʼn jun nya bʼaʼn qiʼj. El tnikʼ tiʼj toj alkye ambʼil tuʼn tyolin ex toj alkye ambʼil mintiʼ tuʼn tyolin (Mat. 26:​62-64). Jun techel, tej t-xi qʼamaʼn jun nya ax tok yol tiʼj, at maj kubʼ t-ximen tuʼn miʼn t-xi ttzaqʼweʼn (Mat. 11:19). Ex tej tkubʼ t-ximen tuʼn tyolin, mintiʼ e ok tyasoʼn qe aj qʼoj tiʼj ex mintiʼ xi tqʼamaʼn yol te xobʼtzabʼil kye. w24.11 4, 5 párr. 9, 10

Qo ximen tiʼj ju xjal kʼujlaʼnxix quʼn ex in xi qqʼoʼn jun tbʼanel oyaj te aju jaku tzʼajbʼen tuʼn. Jakulo tzaj qbʼis qa noq xi tkʼuʼn oyaj in xi qqʼoʼn te ex qa in nel naj tiʼj tkʼuʼj tuʼn tajbʼen tuʼn. Pero nimxixlo jaku qo jaw tzalaj aj tok qkeʼyin qa in najbʼen oyaj tuʼn ex in tzalaj tiʼj. ¿Tiʼ xnaqʼtzbʼil in nel qiʼn tiʼj techel lu? Tzaj tsamaʼn Jehová Tkʼwal tuʼn qpaj. Nimlo in tzalaj Jehová aj tkubʼ qyekʼin qa in qo tzalaj tiʼj chojbʼil ex tiʼj tkʼujlabʼil kubʼ tyekʼin qiʼj (Juan 3:16; Rom. 5:​7, 8). Noqtzun tuʼnj, aj tikʼ ambʼil jakulo tzikʼ tnaʼl chojbʼil quʼn. In qo tzalaj tiʼj, pero qa ma tzʼok qqʼoʼn ik tzeʼn oyaj in xi qkʼuʼn, jakulo tzikʼ tnaʼl quʼn. Tuʼn miʼn tbʼaj jlu qiʼj moqa tuʼn kukx t-xi qqʼoʼn chjonte tiʼj, nim toklen tuʼn qximen tiʼjju o bʼant tuʼn Jehová ex tuʼn Jesús qiʼj. w25.01 26 párr. 1, 2

Mlay tzʼok te ansyan «jun akʼaj okslal». Maske naʼmxtoq tikʼ nim ambʼil tej tbautisarin, il tiʼj tuʼn tchʼiy tamiwbʼil tukʼil Jehová ex tuʼn tajbʼen Biblia tuʼn tuʼn tjaw tjyoʼn aju mas bʼaʼn aj tbʼant jun tiʼ tuʼn. Ex naʼmxtoq tok te ansyan, kbʼel tin tibʼ ik tzeʼn te Jesús. Tuʼntzunju, kbʼel tyekʼin tbʼanel tmod ex kʼayol tuʼn ttzaj tqʼoʼn Jehová toklen (Mat. 20:23; Filip. 2:​5-8). Ax ikx, il tiʼj tuʼn tkubʼ tyekʼin qa «bʼaʼnxix tten tchwinqlal». A t-xilen jlu qa in nok qeʼ tkʼuʼj tiʼj Jehová ex kyiʼj tkawbʼil. Ex in xi tbʼiʼn qe tqanil in tzaj tqʼoʼn ttnam. Ax ikx in tzaj tqʼamaʼn Biblia qa bʼantni tten ansyan «tuʼn tqʼonte xnaqʼtzbʼil». ¿Ape t-xilen jlu qa tbʼanelxix qʼon chikʼbʼabʼil? Miʼn. Tuʼnju ateʼ tbʼanel ansyan bʼalo nyaxix tbʼanel che qʼon chikʼbʼabʼil, pero tbʼanel che pakbʼan ex tbʼanel che onin kyiʼj erman tuʼn t-xi kyqʼuqbʼaʼn kykʼuʼj. w24.11 23, 24 párr. 14, 15

Qa mintiʼ sel tnikʼa tiʼj jun akʼaj xnaqʼtzbʼil aj tuʼjina moqa aj t-xnaqʼtzana tiʼj Biblia, miʼn tzaj bʼaj tkʼuʼja. Jaku txi qqʼamaʼn qa aj qxnaqʼtzan tiʼj Biblia ik tten ik tzeʼn aj qjyoʼn oro (Sal. 119:97). At maj, in xi tiʼn nim or moqa in xi tiʼn nim qʼij tuʼn tkanet oro kyuʼn xjal. Pero kukx in ten kypasens ex kukx in che jyon tiʼj, tuʼnju maske tal chʼin oro in kanet kyuʼn, nim toklen toj kywitz. Ex aqeju xnaqʼtzbʼil ateʼ toj Tyol Dios, mas nim kyoklen twitz oro (Prov. 8:10). Tuʼntzunju, bʼaʼn tuʼn tten tpasensa ex tuʼn kukx tuʼjina ex tuʼn kukx t-xnaqʼtzana tiʼj Biblia (Sal. 1:2). w25.01 25 párr. 14, 15

Taj Jehová tuʼn tkubʼ qnajsaʼn kyil xjal o tzʼok kybʼinchaʼn jun nya bʼaʼn qiʼj (Sal. 86:5; Luc. 17:4; Efes. 4:32). Jaku kux choʼn toj qanmi tuʼn tyol jun xjal moqa tuʼn tbʼinchbʼen. Pero mas jaku kubʼ qnaʼn jlu qa jun tbʼanel qamiw moqa jun toj qja sok bʼinchante nya bʼaʼn qiʼj (Sal. 55:​12-14). At maj jaku kubʼ qnaʼn nim bʼis moqa jaku tzaj qqʼoj. Jaku kubʼ qnaʼn ik tzeʼn otoq qo kʼixbʼi tuʼn kuchiy (Prov. 12:18). Qa in xi qqʼamaʼn qa mintiʼ in kubʼ qnaʼn bʼis aj tok tbʼinchaʼn jun xjal nya bʼaʼn qiʼj, jaku tzaj tiʼn mas nya bʼaʼn qiʼj ex mlay tzʼonin tuʼn kubʼ qnaʼn bʼaʼn. Jaku tzʼok jlu ik tzeʼn aj qkʼixbʼi tuʼn jun kuchiy ex ax in kyaj ten toj qxmilal. Ax ikx, nya toj tumel qa ma kubʼ qximen qa mintiʼ in kux choʼn toj qanmi aj tok bʼinchaʼn jun nya bʼaʼn qiʼj. Aj tok bʼinchaʼn jun nya bʼaʼn qiʼj bʼalo tnejel in tzaj qqʼoj. In tzaj tqʼamaʼn Biblia qa jaku bʼaj jlu qiʼj, pero ax ikx in tzaj tqʼamaʼn qa mintiʼ tuʼn t-xi qqʼoʼn ambʼil tuʼn tkubʼ qiʼj tuʼn qʼoj (Sal. 4:4; Efes. 4:26). ¿Tiquʼn? Tuʼnju jaku tzaj mas nya bʼaʼn (Sant. 1:20). At maj kwest tuʼn miʼn ttzaj qqʼoj aj tok bʼinchaʼn jun nya bʼaʼn qiʼj, pero jaku tzʼok qxqʼuqin qibʼ tuʼn miʼn t-xi qkʼuʼn qʼoj tiʼj xjal. w25.02 15 párr. 4-6

Yolin Jesús tiʼj jun xjal xi tkʼuʼn nim tpwaq, tuʼn ttzaj t-xnaqʼtzaʼn qe qa mintiʼ tajbʼen qa ma ten nim tiʼchaq qe tuʼnju «tuj twitz Dios mebʼa te xjal lu» (Luc. 12:​16-21). Mintiʼ bʼiʼn quʼn tiʼ kbʼajel qiʼj nchiʼj (Prov. 23:​4, 5; Sant. 4:​13-15). Ax ikx tqʼama Jesús kye qeju kyajbʼiltoq tuʼn kyok te tdiscípulo, qa iltoq tij tuʼn tkyaj kyqʼoʼn tkyaqilju attoq kye (Luc. 14:33). Ax jlu bʼant kyuʼn okslal te Judea toj tnejel syent abʼqʼi, kyaj kyqoʼn tkyaqilju tiʼchaq attoq kye ex bʼant jlu kyuʼn tukʼil tzalajbʼil (Heb. 10:34). Toj ambʼil jaʼlo, nim qe erman o tzʼel qʼiʼn kyaqʼun ex qe tiʼchaq at kye tuʼnju mintiʼ in nokx kyqʼon kyibʼ toj política (Apoc. 13:​16, 17). O kubʼ kyyekʼin erman qa in nok qeʼ kykʼuʼj tiʼj ttziybʼil Jehová: «Mlay kyaj nkoline, ex mlay kyaj nqʼoʼne» (Heb. 13:5). Tuʼntzunju, in nok tilil quʼn tuʼn qaqʼunan tuʼntzun tten chʼin qpwaq aj qtijen. Ex qʼuqli qkʼuʼj tiʼj qa ok xqʼuqil Jehová qiʼj aj tbʼaj jun tiʼ qiʼj, aju mintiʼ ximen quʼn. w25.03 29 párr. 13, 14

Mintiʼ in nayon Jehová tuʼn qchʼiy qjunalx toj qokslabʼil. Tuʼntzunju, o che tzaj tqʼoʼn ansyan ex qe erman tuʼn kyonin qiʼj «tuʼn ttzʼaqet-xix qnabʼl, [ . . . ] ik tzaʼn te Crist tzʼaqlxix» (Efes. 4:​11-13). Ax ikx, in tzaj tqʼoʼn xewbʼaj xjan qe tuʼn tonin qiʼj tuʼn tten qnabʼil ik tzeʼn te Jesús (1 Cor. 2:​14-16). Ex tzaj tqʼoʼn Jehová ambʼil tuʼn kykubʼ tzʼibʼit kyaje Evangelio. In che onin qiʼj tuʼn tok qojtzqiʼn tiʼ bʼant tuʼn Jesús tej tten tzalu twitz Txʼotxʼ. Qa ma tzʼel qkanoʼn tiʼj t-ximbʼetz Jesús, tiʼj tzeʼn yolin ex tmod, jaku qo chʼiy toj qokslabʼil. Pero tuʼn qchʼiy toj qokslabʼil, il tiʼj tuʼn tel qnikʼ kyiʼj mas xnaqʼtzbʼil ex nya oʼkx aju ya ojtzqiʼn quʼn tiʼj Jesús. w24.04 4, 5 párr. 11, 12

Tkyaqil qʼij in kubʼ qximen tiʼ tuʼn tbʼant quʼn, ik tzeʼn tiʼ kxel qwaʼn ex jniʼ or qo xeʼl jtal. Nya kwest tuʼn tkubʼ qximen jlu, pero at junjuntl tiʼchaq mas kwest tuʼn tjaw qjyoʼn. Ik tzeʼn tuʼn tok qxqʼuqin qxmilal, tuʼn qtzalaj, aju at toklen tukʼil qfamilia ex tukʼil qajbʼebʼil te Jehová. Qaj tuʼn tel bʼaʼn tkyaqil aju in kubʼ qximen, tanto te qe ex kye toj qja, pero mas tuʼn ttzalaj Jehová quʼn (Rom. 12:​1, 2). Tuʼn tjaw qjyoʼn aju mas bʼaʼn, nim toklen tuʼn tok qbʼiʼn tkyaqil tqanil. ¿Tiquʼn nim toklen jlu? Qo ximen tiʼj jun techel, at jun xjal tok jun yabʼil grave tiʼj ex in xiʼ tukʼil doctor. ¿Kxelpe tqʼoʼn doctor tqʼanbʼil qa naʼmx tok t-examinarin moqa naʼmx t-xi tqanin tiʼ in choʼn te? Mlay. Ax ikx teya kjawil tjyoʼna aju mas bʼaʼn qa ma ximana tnejel tiʼjju in nok weʼya twitz. w25.01 14 párr. 1-3

At nim qʼaqʼbʼil tkʼuʼj Jehová ex nya taj «tuʼn tnaj jun xjal». ¿Tzeʼn kubʼ tyekʼin Jehová qʼaqʼbʼil tkʼuʼj kyiʼj junjun xjal kubʼ kybʼinchaʼn jun matij il? (2 Ped. 3:9) Kubʼ tbʼinchaʼn rey David junjun matij il ik tzeʼn yaẍbʼil ex bʼiybʼel. Pero tzaj qʼaqʼin tkʼuʼj Jehová tiʼj ex kubʼ tnajsaʼn til tuʼnju ajtz tiʼj tanmi (2 Sam. 12:​1-12). Ax ikx kubʼ tbʼinchaʼn rey Manasés nim nya bʼaʼn. Pero tzaj qʼaqʼin tkʼuʼj Jehová tiʼj ex kubʼ tnajsaʼn til tuʼnju ajtz tiʼj tanmi (2 Crón. 33:​9-16). In tzaj kyyekʼin techel lu qa in kubʼ tyekʼin Jehová qʼaqʼbʼil tkʼuʼj qa in nok tkeʼyin qa jaku bʼant jlu tuʼn. Kjawil anqʼin juntl maj David ex Manasés tuʼn Jehová tuʼnju el kynikʼ tiʼj qa kubʼ kybʼinchaʼn jun matij il ex ajtz tiʼj kyanmi. w24.05 4 párr. 12