Marzo

In yolin Biblia kyiʼj xjal e ten tzʼaqli twitz Jehová, pero yajxitl e ok te nya tzʼaqli ik tzeʼn rey Salomón. Otoq tzʼel tnikʼ Salomón tiʼj Jehová ex ojtzqiʼntoq tuʼn tzeʼn tuʼn tkʼulin te ex tzaj kʼiwlaʼn tuʼn. Pero tej tikʼ ambʼil, ok ten kʼulul kywitz nya ax tok dios. Tzaj tqʼoj Jehová tuʼnju bʼant jlu tuʼn Salomón ex tzaj nya bʼaʼn kyiʼj xjal te Israel toj nimku ambʼil. Ax tok, in tzaj tqʼamaʼn Biblia qa tej tkyim «kuʼx maquʼn tuj tnam tok tbʼi Ttanmi David aju qtzan tman» (1 Rey. 11:​5-9, 43; 2 Rey. 23:13). Pero, ¿kjawelpe anqʼin tuʼnju alkye tten kuʼx maquʼn? Mintiʼ in tzaj tqʼamaʼn Biblia. Aj tjaw anqʼin jun xjal, in nok te jun oyaj tuʼn Jehová te xjal noq tuʼnju kʼujlaʼn tuʼn. Ex in xi tqʼoʼn oyaj lu te xjal taj tuʼn tajbʼen te te jumajx (Job 14:​13, 14; Juan 6:44). ¿Ktelpe Salomón kyxol xjal lu? Oʼkx Jehová ojtzqilte. Pero qʼuqli qkʼuʼj tiʼj qa kxel tbʼinchaʼn Jehová aju tzʼaqli. w24.05 4 párr. 9

Ax ikx qe, aj qbautisarin in qo okx toj tja Jehová. Aj qokx toj tja Jehová, in tzaj qʼoʼn nim qwa moqa nim xnaqʼtzbʼil in tzaj qʼoʼn qe junx kyukʼil junjuntl o txi qʼoʼn txokbʼil kye tuʼn kyten toj. Pero ¿jatumel taʼ tja Jehová? Nya oʼkx taʼ toj jun lugar. Sino atz taʼ jatumel ateʼqe tmajen Jehová in che nimen te (Apoc. 21:3). Yajtzun qe tmajen Jehová o che kyim, ¿kukxpe ateʼ toj tja Jehová? Ikju, kukx. ¿Tiquʼn in xi qqʼamaʼn jlu? Tuʼnju in tzaj tqʼamaʼn Biblia qa kukx itzʼ qe toj t-ximbʼetz Jehová. Tzaj tchikʼbʼaʼn Jesús jlu: «Tiʼj tuʼn kyjatz anqʼin qe kyimni, ax Moisés kyaj qʼonte jun xnaqʼtzbʼil tzʼibʼan tuj Tuʼjil jatum in tmaʼn tiʼj chʼiʼx in kʼant tuʼn qʼaqʼ tej tyolin tiʼj Dios kyjaʼ: Ate Qman, Tdios Abraham, Tdios Isaac ex Tdios Jacob. Ex ate Dios mya Kydios kyimni; noq oʼkx Kydios itzʼ, ex kykyaqil itzʼ qe twitz Dios» (Luc. 20:​37, 38). w24.06 3 párr. 6, 7

Qʼiʼntoq qe tiʼchaq tuʼn Sadoc toj fiesta atz Hebrón tuʼn tqʼojin (1 Crón. 12:38). Bʼantnitoq tten tuʼn t-xiʼ tukʼil David toj qʼoj ex tuʼn tkolin kyiʼj aj Israel kyiʼj aj qʼoj. Maske mintiʼxixlo tojtzqibʼil tiʼj qʼoj, pero ten tipumal. ¿Tiʼ onin tiʼj Sadoc tuʼn tten tipumal? Onin aju techel kubʼ kyqʼoʼn junjuntl xjal ten kyipumal ex mintiʼ e tzaj xobʼ, ik tzeʼn David. Kykyaqil aj Israel kyajtoq tuʼn tok David te rey tuʼnju mintiʼ tzaj xobʼ tuʼn tkubʼ nej kywitz «aj Israel tuj qʼoj» (1 Crón. 11:​1, 2). Ok qe tkʼuʼj David tiʼj Jehová ex xi tqanin onbʼil te tej kyok lepeʼ aj qʼoj tiʼj (Sal. 138:3). Ax ikx el tkanoʼn Sadoc techel kyiʼj junjun xjal e anqʼin toj ambʼil aju. Ik tzeʼn Jehoiadá ex Benaya, aju tkʼwal, at tnabʼl tuʼn tqʼojin. Nya oʼkxju, ax ikx ok lepeʼ Sadoc tiʼj techel kubʼ kyqʼoʼn 22 nejenel kye tribu e onin tiʼj David (1 Crón. 11:​22-25; 12:​26-28). w24.07 3 párr. 5, 6

O bʼant nim nya bʼaʼn tuʼn Saulo te Tarso. Ok tbʼinchaʼn nimxix nya bʼaʼn kyiʼj tdiscípulo Jesús. Tuʼntzunju, kubʼ kyximen chʼixmi kykyaqil okslal qa mlaytoq chʼexpaj tanqʼibʼil. Pero ojtzqiʼntoq tuʼn Jesús qa jakutoq chʼexpaj tmod ex qa jakutoq tzʼajtz tiʼj tanmi. El tnikʼ Jesús ex Jehová tiʼj tbʼanel tmod Saulo, tuʼntzunju tqʼama Jesús jlu tiʼj: «Porke nmajene jlu skʼoʼmaj wuʼne» (Hech. 9:15). Axpe ikx ajbʼen jun milagro tuʼn tuʼn tonin tiʼj tuʼn tajtz tiʼj tanmi (Hech. 7:58–8:3; 9:​1-9, 17-20). Tej tikʼ ambʼil, ok Saulo te okslal ex ok ojtzqiʼn twitz te apóstol Pablo. Tuʼn jlu nim maj xi tqʼoʼn chjonte tuʼnju kubʼ tyekʼin Jehová ex Jesús nim qʼaqʼbʼil tkʼuʼj tiʼj (1 Tim. 1:​12-15). Jun maj, ok tbʼiʼn Pablo qa attoq jun nya bʼaʼn in tzaj toj congregación te Corinto tuʼnju in xitoq kyqʼoʼn ambʼil te jun xjal in yaẍin tuʼn kukx tten kyxol. Pero, ¿tzeʼn xi tbʼinchaʼn Pablo tiʼj jlu? Jaku tzʼel qiʼn nim xnaqʼtzbʼil tiʼjju xi tqʼamaʼn Pablo kye. In tzaj tyekʼin jniʼ tkʼujlabʼil Jehová at, jniʼ qʼaqʼbʼil tkʼuʼj at ex tzeʼn kawbʼil in xi qʼoʼn te jun xjal in najtz tiʼj tanmi. w24.08 13 párr. 15, 16

¿Tzeʼn jaku che ok laqʼeʼ xjal ttxlaj Jehová maske aj il qe? Chʼinaq tzaj tyekʼin Jehová tzeʼn jakutoq bʼant kyuʼn. A Abel tnejel xjal ok qeʼ tkʼuʼj tiʼj Jehová, aju tkabʼ tkʼwal Adán tukʼil Eva. Ok tkʼujlaʼn Abel Jehová, tajtoq tuʼn ttzalaj tiʼj ex tajtoq tuʼn t-xi laqʼeʼ ttxlaj. Tuʼntzunju, kubʼ t-ximen tuʼn t-xi tqʼoʼn junjun t-rit te chojbʼil te Jehová. ¿Tzeʼn ela jlu toj twitz Jehová? «Tzajtzun tkeʼyin Qman ex o tzalaj tiʼj Abel tukʼix tiʼj toyaj» (Gén. 4:4). Ax ikx tej tikʼ ambʼil, tzalaj kyiʼj junjun chojbʼil xi kyqʼoʼn xjal te, aqeju ten kykʼujlabʼil tiʼj ex ok qeʼ kykʼuʼj tiʼj, ik tzeʼn Noé (Gén. 8:​20, 21). Aju bʼaj kyiʼj xjal lu tzaj tyekʼin qa jakutoq chex laqʼeʼ xjal ttxlaj Jehová ex jakutoq tzalaj kyuʼn, maske aj il qe. w24.08 3 párr. 5, 6

Atlo maj jaku kux choʼn toj qanmi ex jaku tzaj bʼaj qkʼuʼj aj tok bʼinchaʼn jun nya bʼaʼn qiʼj (Ecl. 7:7). Ax jlu kubʼ kynaʼn junjun tmajen Jehová toj ambʼil ojtxe, ik tzeʼn Job ex Habacuc (Job 6:​2, 3; Hab. 1:​1-3). Nya jun il qa ma kux choʼn toj qanmi tuʼn nya bʼaʼn, noqtzun tuʼnj, nim toklen tuʼn tok qxqʼuqin alkye qmod kbʼel qyekʼin tuʼntzun miʼn tkubʼ qbʼinchaʼn jun tiʼ nya toj tumel ex tuʼn miʼn txiʼ toj il. Aj kyok qkeʼyin qeju xjal bʼinchal nya bʼaʼn, in che tzalaj ex mintiʼ in kubʼ qʼoʼn kykastiw, jakulo kubʼ qxjelin: «¿Bʼaʼnpe tuʼn kukx tkubʼ qbʼinchaʼn aju bʼaʼn?». Qo ximen tiʼj tiʼ kubʼ tnaʼn salmista tej tok tkeʼyin qe xjal in noktoq kybʼinchaʼn nya bʼaʼn kyiʼj txqantl, pero kukxtoq in che tzalaj. Tqʼama jlu: «Kyjaʼtzun kyten qeju bʼinchal mya bʼaʼn. Mintiʼ in kykʼulbʼaʼn jun mya bʼaʼn» (Sal. 73:12). Tzajxix tbʼis tuʼnju attoq nim nya bʼaʼn ex chʼixme ikʼ tnaʼl tuʼn qa tbʼaneltoq aj tajbʼen te Jehová. Ex tqʼamatl jlu: «Ok tilil wuʼne tuʼn tel nnikʼe tiʼj jlu, ex kyuw ela te weye» (Sal. 73:​14, 16). w24.11 3 párr. 5-7

In jaw qnimsaʼn Jehová tuʼnju in qo respetarin te. At nim tiquʼn tuʼn qrespetarin te. At nim tipumal Jehová tuʼn tbʼant tkyaqilju taj ex mintiʼ in sikt (Sal. 96:​4-7). Kyiʼj qe tbʼinchbʼen Jehová, qʼanchaʼlxix qa at nimxix tnabʼil. O tzaj tqʼoʼn qchwinqlal ex tkyaqilju at tajbʼen qe tuʼn kukx qanqʼin (Apoc. 4:11). Tzʼaqlixix te (Apoc. 15:4). Tbʼanel in nela tkyaqilju in bʼant tuʼn ex in japun tkyaqilju in tzaj ttziyen (Jos. 23:14). Tuʼntzunju tqʼama profeta Jeremías jlu: «Kyxol kykyaqil xjal at kynabʼl kyuj kykyaqil kawbʼil tuj tkyaqil twitz txʼotxʼ, mintiʼ juntl ik tzaʼn teya» (Jer. 10:​6, 7). Ojtzqiʼnxix quʼn qa at nim tiquʼn tuʼn qnimen te Qman Jehová. Aj tel qnikʼ tiʼj tkyaqil jlu, nya oʼkx qaj tuʼn qrespetarin te, sino ax ikx in chʼiy qkʼujlabʼil tiʼj. Aju mas nim toklen, in jaw qnimsaʼn Jehová tuʼnju kʼujlaʼn quʼn tuʼn tkyaqil qanmi. w25.01 3 párr. 5- 6

In nok tilil kyuʼn aj qʼoj tuʼn ttzaj kyqʼamaʼn qa nya bʼaʼn tkyaqil tbʼanel tiʼchaq in bʼant tuʼn ttnam Jehová. Jun techel, in tzaj t-xnaqʼtzaʼn Biblia qa taj Jehová tuʼn tbʼaj qsaqin qibʼ, tuʼn kyten tbʼanel qmod ex tuʼn qkʼulin te ik tzeʼn taj. Nya oʼkxju, ax ikx in tzaj tqʼamaʼn qa il tiʼj tuʼn tex expulsarin jun xjal qa kukx in kubʼ tbʼinchaʼn nya bʼaʼn (1 Cor. 5:​11, 12; 6:​9, 10). Tuʼnju in xi qbʼiʼn kawbʼil lu, in tzaj kyqʼamaʼn aj qʼoj qiʼj qa nya kʼujlaʼn qe xjal quʼn, qa nya bʼaʼn qmod ex qa in kubʼ qximen qa mas nim qoklen kywitz txqantl. Bʼaʼn tuʼn tel qnikʼ tiʼj alkye in qʼojin tiʼj ttnam Jehová. Tuʼn Satanás in tzaj qʼamaʼn nya ax tok tqanil tiʼj ttnam Jehová. In tzaj tqʼamaʼn Biblia jlu tiʼj: «Atzun in tzaj nikʼaj yol tukʼil» (Juan 8:44; Gén. 3:​1-5). Mintiʼ in qo jaw labʼin aj kyajbʼen junjun xjal tuʼn Satanás tuʼn ttzaj tqʼamaʼn nya ax tok tqanil. w24.04 10, 11 párr. 13, 14

Aj t-xi tzyet nimxix yajbʼil ex aj tok kykeʼyin xjal aj tkubʼ xiten «Nintz tnam Babilonia», bʼalo ateʼ junjun ktzajel kynaʼn qa ok tilil kyuʼn testigos de Jehová tuʼn ttzaj kyqʼamaʼn aju kbʼajel. Ex atlo junjun kye kbʼel kyximen tuʼn kyajbʼen te Jehová (Apoc. 17:5). Qo ximen tiʼjju bʼaj toj tqʼijlalil Moisés. Tej kyetz xjal te Israel toj tnam Egipto, ax ikx «e jeʼtz nimku txkaj xjal kyukʼil» (Éx. 12:38). Bʼalo ateʼ junjun ok qeʼ kykʼuʼj tiʼj Jehová tej tok kykeʼyin qe lajaj kʼixbʼisabʼil otoq tqʼama Moisés. Qa ax jlu ma bʼaj aj tkubʼ xiten «Nintz tnam Babilonia», ¿kbʼelpe qximen qa nya toj tumel tuʼn t-xi tzyet tuʼn kykʼulin junjun xjal te Jehová chʼixtoq t-xi tzyet Armagedón? Nya qaj tuʼn tbʼaj jlu, sino qaj tuʼn tel qkanoʼn tiʼj Jehová, aju tqʼama qe yol lu: «Aqine Dios at nim tqʼaqʼbʼil nkʼuʼje, aqine nim in tzʼeʼy nkʼuʼje, yaj in tzaj ntxʼuʼjile, nim nkʼujlalile, ex axix tok chin yoline» (Éx. 34:6). w24.05 11 párr. 12, 13

¿Tiʼ jaku tzaj qa mintiʼ sok qeʼ qkʼuʼj tiʼj «ju yol mintiʼ tpaltil»? Qqʼonk qwitz tiʼjju bʼaj toj tnejel syent abʼqʼi. At junjun okslal e ok ten qʼamalte qa otoq tzul tqʼij Jehová. Kyqʼama jlu tuʼnju ok kybʼiʼn qa at jun tcarta apóstol Pablo in yolin tiʼj jlu. Xi kynimen junjun okslal te Tesalónica qe yol lu, axpe ikx xi kyqʼamaʼn kye txqantl, maske mintiʼ xi kyjyoʼn tqanil qa ax tok jlu. Noqwit tzaj kynaʼn qe yol xi tqʼamaʼn Pablo kye tej tten kyukʼil, mintiʼwtlo e kubʼ sbʼuʼn (2 Tes. 2:​1-5). Xi tqʼamaʼn apóstol Pablo kye tuʼn miʼn t-xi kynimen tkyaqil aju in nok kybʼiʼn. Tuʼn miʼn tbʼaj juntl maj jlu kyiʼj, xi tqʼamaʼn apóstol Pablo jlu kye toj tkabʼ tcarta: «Aju qʼolbʼebʼl lu tuʼnx nqʼabʼe ma txi ntzʼibʼane, aqine Pablo; atzun techal jlu tiʼj tkyaqil uʼj in xi ntzʼibʼane; kyjaʼtzun tten chin tzʼibʼane» (2 Tes. 3:17). w24.07 12 párr. 13, 14

Iltoq tiʼj tuʼn kukx tikʼx kyuʼn okslal te Judea toj kyajbʼebʼil te Jehová tuʼnju chʼixtoq kytzaj mas nya bʼaʼn. Ateʼ junjun okslal otoq che ok weʼ twitz ikʼbʼil, pero ax ikx ateʼ junjuntl naʼmxtoq kyok weʼ twitz. Tuʼntzunju, xi tqʼamaʼn apóstol Pablo kye qa mastoq nim ikʼbʼil che okel weʼ twitz ex qa iltoq tiʼj tuʼn kyten tzʼaqli ajxi kykyim ik tzeʼn te Jesús (Heb. 12:4). Tzaj nim kyqʼoj judiy tuʼnju nim xjal e okslan tiʼj Jesús. Toj jun ambʼil tej naʼmxtoq tbʼaj jlu, kyqʼama mas te 40 judiy jlu: «Ma bʼaj qjuramentin qibʼe qxolxe tuʼn miʼn t-xi qnikʼbʼeʼne jun tiʼxti qa naʼnxtoq tkubʼ Pablo quʼne, ex mlay tzikʼx tiʼj» (Hech. 22:22; 23:​12-14). Maske o che el ikʼun qe okslal kyuʼn nim xjal, kukx o tzʼok kychmon kyibʼ, kukx o che pakbʼan ex kukx ten qʼuqbʼil kykʼuʼj kyuw. w24.09 12 párr. 15

Ok Juan te t-apóstol Jesús ex ok kʼujlaʼnxix tuʼn (Mat. 10:2). Bʼet tukʼil Jesús tej tpakbʼan, ok tqʼoʼn twitz kyiʼj milagro e bʼant tuʼn ex kukx ten tukʼil kyoj ambʼil mas kwest. Ax ikx, ten tukʼil tej tkubʼ bʼyoʼn ex ok tqʼoʼn twitz tiʼj tej otoqxi jaw anqʼin. Nya oʼkxju, ax ikx ok tqʼoʼn twitz tiʼj tej tchʼiy kybʼet okslal toj tnejel syent abʼqʼi. Ex kukx in nanqʼin Juan tej t-xi pakbʼet tbʼanel tqanil «kye kykyaqil xjal tuj tkyaqil twitz txʼotxʼ» (Col. 1:23). Tej otoq tijen Juan, xi qʼoʼn toklen tuʼn tkubʼ ttzʼibʼin uʼj te Apocalipsis (Apoc. 1:1). Ax ikx kubʼ ttzʼibʼin jun kyxol uʼj in che yolin tiʼj tanqʼibʼil Jesús aju tok tbʼi tiʼj ex e kubʼ ttzʼibʼin oxe carta. Xi ttzʼibʼin toxin carta te jun okslal Gayo tbʼi, aju ok tkʼujlaʼn ik tzeʼn jun tkʼwal (3 Juan 1). Aju kubʼ ttzʼibʼin apóstol Juan tej otoq tijen, kukx in nonin kyiʼj qe t-xnaqʼtzbʼen Jesús toj ambʼil jaʼlo. w24.11 12 párr. 15, 16

Aju chmilbʼaj kʼujlaʼn t-xuʼjil tuʼn in nok tqʼoʼn toklen ex in nok t-xqʼuqin. Toj twitz ik tten ik tzeʼn jun oyaj nim toklen o tzaj tqʼoʼn Jehová te (Prov. 18:22; 31:10). Tuʼntzunju, in kubʼ tyekʼin tbʼanel tmod tukʼil ex in respetarin te, axpe ikx aj kykubʼ ten junx. Mintiʼ in nok ten obligaril te t-xuʼjil tuʼn tkubʼ tbʼinchaʼn junjun tiʼ aju jaku kubʼ tnaʼn nya bʼaʼn tuʼn aj kykubʼ ten junx. Ax ikx te chmilbʼaj in nok tilil tuʼn tuʼn tkubʼ tnaʼn bʼaʼn twitz Jehová (Hech. 24:16). Aya chmilbʼaj, jaku tzʼok qe tkʼuʼja tiʼj qa nim toklen toj twitz Jehová tkyaqilju in bʼant tuʼna tuʼn tok tkʼujlaʼna t-xuʼjila ex tuʼn t-respetarina te. Kukx qʼonka tilil tuʼn miʼn tkubʼ tbʼinchaʼna jun tiʼ aju in nel tiʼn toklen t-xuʼjila, sino kukx yekʼinkuya tbʼanel tmoda tukʼil, tuʼn kukx t-respetarina te ex tuʼn kukx tok tkʼujlaʼna. Iktzun tten kbʼel tyekʼina qa in nok tkʼujlaʼna ex qa nim toklen toj twitza. Qa ma txi tqʼoʼna nimbʼil te t-xuʼjila kʼokel t-xqʼuqina tamiwbʼila tukʼil Jehová, aju mas nim toklen (Sal. 25:14). w25.01 13 párr. 17, 18

In kubʼ kynaʼn tmajen Jehová nimxix tzalajbʼil aj kypakbʼan ex kukx in nok tilil kyuʼn. Tuʼntzunju, junxitl qe kywitz nya ax tok okslal. ¿Tiʼ kʼonil qiʼj tuʼn kukx tkubʼ qnaʼn tzalajbʼil aj qpakbʼan? Qa ma qo xnaqʼtzaʼn tiʼj techel kyaj tqʼoʼn Jesús, kʼonil qiʼj tuʼn kukx qtzalaj toj pakbʼabʼil. Tej tten Jesús tzalu twitz Txʼotxʼ, kukx chʼiy tgan tuʼn tpakbʼan kye xjal tukʼil tzalajbʼil. Toj jun techel, ok tmojbʼan tibʼ Jesús tukʼil jun xjal kuʼx tawan jun wiʼ higo ex xqʼuqin tiʼj toj oxe abʼqʼi pero mintiʼ el twitz. Chʼixme ax jlu bʼaj tiʼj Jesús, kukx pakbʼan kye judiy toj oxe abʼqʼi, pero noq junjun e ok te t-xnaqʼtzbʼen. Maske ikju, mintiʼ kyaj tkolin Jesús tuʼn tpakbʼan. Ik tzeʼn aju xjal kuʼx tawan higo, kukx ok qeʼ tkʼuʼj tiʼj qa kpol jun qʼij kʼelel twitz (Luc. 13:​6-9). Tuʼn kukx tok tilil quʼn toj ambʼil jaʼlo, tbʼanel tuʼn qxnaqʼtzan tiʼjju bʼant tuʼn Jesús ex tuʼn tel qkanoʼn tiʼj. w25.03 14, 15 párr. 1-4

¿Yajtzun qa o kanet jun erman tuʼna ex in kubʼ t-ximana qa jaku tzʼok te jun tbʼanel chmilbʼaj moqa xuʼjilbʼaj? ¿Jun ratpe kxel tqʼamaʼna te tiʼ t-ximana tiʼj? In tzaj tqʼamaʼn Biblia qa tnejel in jyon jun xjal at tnabʼil tiʼj tqanil naʼmxtoq t-xi tbʼinchaʼn jun tiʼ. Tuʼntzunju, bʼaʼn tuʼn tel tpaʼna ambʼil tuʼn tok tkeʼyina tzeʼn tmod erman naʼmxtoq t-xi tqʼamaʼna te tiʼ in kubʼ tnaʼna. Jakulo kubʼ t-xjelina: «¿Tzeʼn jaku tzʼok nkeʼyine tzeʼn tmod erman?». Jun techel, jakulo tzʼel tnikʼa tiʼj tzeʼn taʼ tamiwbʼil tukʼil Jehová moqa tzeʼn tmod aj tok tkeʼyina toj Ja te Chmabʼil moqa aj tel kypaʼn erman ambʼil tuʼn kytzalaj jun rat. Qʼonka twitza tiʼj alkyeqe tamiw ex tiʼ in yolin tiʼj (Luc. 6:45). Tuʼn tel tnikʼa tiʼj alkyeqe tmeta, jaku yolina kyukʼil ansyan toj congregación jatumel taʼ moqa kyukʼil junjuntl erman ojtzqiʼn twitz kyuʼn (Prov. 20:18). Jaku txi tqanina tiʼ kyximbʼetz txqantl tiʼj ex alkyeqe tbʼanel tmod at (Rut 2:11). Ex aj tok tkeʼyina tzeʼn tmod erman, tbʼanel tuʼn tok tilil tuʼna tuʼn miʼn tkubʼ tnaʼn nya bʼaʼn. Qʼonka toklen aju in kubʼ tnaʼn, miʼn jyona kukx tiʼj ex nya il tiʼj tuʼn tok tbʼiʼna tkyaqil tqanil tiʼj tanqʼibʼil. w24.05 22 párr. 7, 8

Mintiʼ in kubʼ kyximen ansyan qa nya taj erman tuʼn tajtz tiʼj tanmi. Ateʼ junjun in najtz tiʼj kyanmi aj tok kychmon kyibʼ tnejel maj tukʼil comité, atzun junjuntl in xi tiʼn chʼintl ambʼil tuʼn tajtz tiʼj kyanmi. Tuʼntzunju, jaku tzʼok kychmon kyibʼ ansyan tukʼil erman mas te jun maj. Jakulo kubʼ ten ximel tiʼjju otoq txi kyqʼamaʼn ansyan te ex jakulo txi tqanin najsam te Jehová toj naʼj Dios (Sal. 38:18). Ex aj tok kychmon kyibʼ ansyan tukʼil juntl maj, bʼalo otoq chʼexpaj t-ximbʼetz ex tmod. Tuʼn kyonin ansyan tiʼj erman tuʼn tajtz tiʼj tanmi, il tiʼj tuʼn tkubʼ kyyekʼin tbʼanel kymod ex qʼaqʼbʼil kykʼuʼj. In xi kyqanin onbʼil te Jehová tuʼntzun kyonin tiʼj erman tuʼn tspikʼeʼ toj twitz ex tuʼn tjatz tiʼj tanmi (2 Tim. 2:​25, 26). w24.08 22, 23 párr. 12, 13

Nya taj Jehová tuʼn tnaj jun xjal. Taj tuʼn tajtz tiʼj kyanmi ex tuʼn kyok te tamiw (2 Cor. 5:20). Tuʼntzunju, kukx in xi tqʼamaʼn Jehová kye tmajen in nel kypaʼn kyibʼ tiʼj tuʼn tajtz tiʼj kyanmi ex tuʼn kymeltzʼaj juntl maj. Ex o txi qʼoʼn tbʼanel kyoklen ansyan tuʼn kyonin tiʼj Jehová tuʼn tajtz tiʼj kyanmi xjal o kubʼ kybʼinchaʼn jun matij il (Rom. 2:4; 1 Cor. 3:9). ¡At nimxix tzalajbʼil toj kyaʼj aj tajtz tiʼj tanmi jun xjal! In kubʼ tnaʼn Jehová, aju Qtat, nimxix tzalajbʼil aj tmeltzʼaj jun erman toj congregación. Kukx qo ximen tiʼj qʼaqʼbʼil tkʼuʼj Jehová ex tiʼj tkʼujlabʼil tuʼnju kʼonil qiʼj tuʼn tchʼiy qkʼujlabʼil tiʼj (Luc. 1:78). w24.08 31 párr. 16, 17

Noqwit xi tqʼoʼn Jesús ambʼil kye xjal tuʼn tok te rey kyuʼn, okxwitlo tqʼon tibʼ toj política kyxol xjal judiy, aqeju ateʼtoq tjaqʼ kykawbʼil xjal te Roma. Pero in tzaj tqʼamaʼn txʼolbʼabʼil qa «el tpaʼn juntl maj tibʼ kyiʼj xjal, xiʼ twi witz». Maske ok tilil kyuʼn xjal tuʼn tokx tqʼon tibʼ Jesús toj política, pero mintiʼ bʼant tuʼn. ¡Jun tbʼanelxix techel qwitz! Ax tok, mi aʼlx jun tzul tqʼamaʼn qe tuʼn tbʼant jun milagro quʼn tuʼn t-xi qqʼoʼn kywa nim xjal, tuʼn tkubʼ qqʼaʼnin jun yabʼ moqa tuʼn ttzaj kyqʼamaʼn qe tuʼn qok te jun rey moqa te jun aj kawil. Pero jaku tzʼok tilil kyuʼn xjal tuʼn tokx qqʼon qibʼ toj política ik tzeʼn tuʼn qvotarin moqa tuʼn qonin toj junjuntl tten tiʼj jun xjal aju in kubʼ kyximen qa kxel tbʼinchaʼn tiʼj nya bʼaʼn. Pero kyaj tqʼoʼn Jesús jun tbʼanel techel qwitz tuʼn tel qnikʼ tiʼj tiʼ bʼaʼn tuʼn tbʼant quʼn. Mintiʼ xi tqʼoʼn ambʼil tuʼn tokx tqʼon tibʼ toj política. Ex yajxitl tqʼama jlu: «Aju nkawbʼile mya te twitz txʼotxʼ» (Juan 17:14; 18:36). Tbʼanel in bʼant quʼn qa in nel qkanoʼn tiʼjju bʼant tuʼn Jesús ex alkye tten ximen. In nel qkanoʼn tiʼj aj qyolin tiʼj Tkawbʼil Dios ex aj qnaʼn Dios tuʼn ttzaj kawbʼil lu (Mat. 6:10). w24.12 4 párr. 5, 6

Akux in xnaqʼtzana, ximana tiʼj tzeʼn jaku txi tbʼinchaʼna aju in nel tnikʼa tiʼj. Jun techel, tzʼaqli te Jehová ex jaku tzʼel tkanoʼna tiʼj aj tten tbʼanel tmoda kyukʼil kykyaqil. Jaku tzʼel tkanoʼna tiʼj kʼujlabʼil in kubʼ tnaʼn Jesús tiʼj Tman ex kyiʼj xjal. ¿Tzeʼn? Aj tikʼx nya bʼaʼn tuʼna tuʼn tpaj tbʼi Dios, aj tonina kyiʼj erman maske at maj kwest ex aj tpakbʼana kye xjal tuʼntzun tonin chojbʼil kyiʼj. Qa mas ma tzʼel qnikʼ tiʼj chojbʼil ex qa mas ma tzʼok qqʼoʼn toklen, mas kʼokel qkʼujlaʼn Jehová ex Tkʼwal. Ax ikx mas qo okel kʼujlaʼn kyuʼn (Sant. 4:8). Tuʼntzunju, kukx qqʼonk tilil tuʼn tajbʼen tkyaqilju in tzaj tqʼoʼn Jehová qe tuʼn kukx qxnaqʼtzan tiʼj chojbʼil. w25.01 25 párr. 16, 17

Toj juntl yol, in tzaj tqʼamaʼn texto te qʼij jalo lu: «O che kyaj tqʼoʼna kykyaqil qe wile ttzel tiʼja». Toj juntl yol, aj tajtz tiʼj qanmi, in nok ik tzeʼn in jaw tiʼn Jehová qe qil ex in xi t-xoʼn jatumel mlay tzʼok tqʼoʼntl twitz kyiʼj. Ax ikx jaku kubʼ traducirit versículo lu ik tzeʼn: «Ma tzʼok tqʼoʼna ik tzeʼn mintiʼ jun il o bʼant wuʼne». Tuʼn tel mas qnikʼ tiʼj jlu, in kanet jun techel quʼn toj Miqueas 7:18 ex 19. Kyoj qe versículo lu in tzaj qʼamaʼn qa in xi t-xoʼn Jehová qe qil tzmax t-xeʼ mar. Toj ambʼil ojtxe, qa in kux tzʼaq jun tiʼ t-xeʼ mar, mlayxtoq kanet juntl maj kyuʼn xjal. Kyukʼil techel lu ma tzʼel qnikʼ tiʼj qa in kubʼ tnajsaʼn Jehová qe qil te jumajx. Tuʼntzunju, ya mintiʼ tuʼn tkubʼ qnaʼn nya bʼaʼn. Tqʼama David jlu: «At tzalajbʼil kye xjal in kubʼ najsaʼn kyil, ex in kubʼ maqsiʼn kyil» (Rom. 4:7). Kyukʼil techel lu in nel qnikʼ tiʼj qa axix tok in kubʼ tnajsaʼn Jehová qil. w25.02 9 párr. 7, 8

Toj ambʼil jaʼlo, at jun paraíso twitz Txʼotxʼ, jatumel at tzalajbʼil ex in bʼant nim tiʼchaq toj. Toj paraíso lu, in che anqʼin nim millón xjal toj mujbʼabʼil moqa nakʼbʼil ex nya kyaj tuʼn tkyaj kykolin. Ax ikx, kyaj tuʼn kyten mas xjal kyukʼil. ¿Alqiʼj in qo yolin? Atz in qo yolin tiʼj paraíso espiritual. In qo jaw labʼin tiʼj tzeʼn in nonin Jehová tuʼn tten mujbʼabʼil kyxol tmajen maske at nim nya bʼaʼn, ikʼbʼil ex junjuntl tiʼchaq twitz Txʼotxʼ (1 Juan 5:19; Apoc. 12:12). Ojtzqiʼn tuʼn Jehová tkyaqil nya bʼaʼn jaku tzaj qiʼj tuʼn tkawbʼil Satanás ex in nonin kyiʼj tmajen tuʼn kyten segur tuʼntzun kukx kyajbʼen te tukʼil tzalajbʼil. In tzaj qʼamaʼn toj Tyol Dios qa in nok paraíso espiritual ik tzeʼn jun lugar te kolbʼil qibʼ ex ik tzeʼn jun jardín «aʼlin wen» (Is. 4:6; 58:11). Noq tuʼn t-xtalbʼil Jehová in che tzalaj ex xqʼuqin ateʼ qe tmajen toj paraíso lu toj mankbʼil tqʼijlalil (Is. 54:14; 2 Tim. 3:1). w24.04 20 párr. 1, 2

Olo naʼna Dios te Jehová tuʼn t-xi tqʼamaʼna te qa taja tuʼn tkubʼ mojeʼya. Mintiʼ in xi ttziyen Jehová teya qa kxel tjyoʼn jun tchmila moqa t-xuʼjila. Pero ojtzqiʼn tuʼn tiʼ taja ex tiʼ in kubʼ tnaʼna ex jaku tzʼonin tiʼja aj t-xi tjyoʼna jun erman tuʼn tkubʼ mojeʼya tukʼil. Tuʼntzunju, kukx qʼamanxa te Jehová tiʼ taja ex tiʼ in kubʼ tnaʼna (Sal. 62:8). Ax ikx qaninxa te tuʼn ttzaj tqʼoʼn tnabʼila ex tuʼn tonin tiʼja tuʼn tten tpasensa (Sant. 1:5). ¿Yajtzun qa naʼmx tkanet jun tukʼila ex ya ma tzikʼ ambʼil? Miʼn tzaj bʼaj tkʼuʼja. Kukx kbʼel tyekʼin Jehová tkʼujlabʼil tiʼja ex kxel tqʼoʼn tkyaqilju at tajbʼen teya (Sal. 55:22). Bʼaʼn tuʼn tok t-xqʼuqin tibʼa tuʼntzun miʼn t-ximana oʼkx tiʼjju tuʼn tkanet jun tchmila moqa t-xuʼjila (Filip. 1:10). Jaku kubʼ qnaʼn axix tok tzalajbʼil tuʼnju o tzaj tqʼoʼn Jehová ambʼil qe tuʼn qok te tamiw ex nya tuʼnju qa otoq qo kubʼ mojeʼ moqa miʼn (Mat. 5:3). Ex jaku bʼant mas tuʼna toj tajbʼebʼila te Jehová qa naʼmx tkubʼ mojeʼya (1 Cor. 7:​32, 33). Tuʼntzunju, tbʼanel qa ma tzʼajbʼen ambʼil tuʼna toj tumel. w24.05 21 párr. 4; 22 párr. 6

¿Jniʼ ambʼil bʼaʼn tuʼn tel kypaʼne tuʼn tok kyojtzqiʼn kyibʼe? Qa mintiʼ sel qpaʼn ambʼil tuʼn tkubʼ qximen alkye tuʼn tbʼant quʼn, at maj nya bʼaʼn in nela te qe (Prov. 21:5). Tuʼntzunju, bʼaʼn tuʼn t-xi kyqʼoʼne ambʼil tuʼn tok kyojtzqiʼnxix kyibʼe. Pero ax ikx bʼaʼn tuʼn ttzaj kynaʼne qa nya bʼaʼn tuʼn t-xi kyqʼoʼne nimxix ambʼil toj, tuʼnju in tzaj tqʼamaʼn Biblia jlu: «Qa at jun tiʼxti in qo ayon tiʼj ex qa mintiʼ ma tzul, tzul bʼis tuj qanmi tuʼn» (Prov. 13:12). Akux in nok kyojtzqin kyibʼ qʼa ex txin, ¿tiʼ jaku bʼant quʼn kyiʼj? Jaku txi qqʼoʼn txokbʼil kyiʼj tuʼn qex bʼetel kyukʼil, tuʼn kyul wal qukʼil ex tuʼn kyten qukʼil aj t-xi qqʼoʼn ambʼil te Jehová kyukʼil toj qja (Rom. 12:13). Qa kyaj qeju in nok kyojtzqin kyibʼ tuʼn qxiʼ kyukʼil, moqa il tiʼj tuʼn kyxi qiʼn toj jun lugar, moqa kyaj tuʼn kyul qja tuʼn kyyolin, ¿tiʼ jaku bʼant quʼn? Jaku tzʼok tilil quʼn tuʼn qonin kyiʼj (Gál. 6:10). Qa ma tzaj kyqʼamaʼn qeju in nok kyojtzqiʼn kyibʼ tuʼn qten kyukʼil, bʼaʼn tuʼn qonin kyiʼj. Ax ikx bʼaʼn tuʼn tok qqʼoʼn qwitz tiʼj alkye tten jaku qo onin kyiʼj qa kyaj tuʼn kyyolin tiʼj jun tiʼ oʼkx kye, pero ax ikx tuʼn miʼn kykyaj qqʼoʼnxix kyjunalx. w24.05 30 párr. 13, 14

In nok tilil kyuʼn ansyan tuʼn tel kynikʼ tiʼj tiquʼn kubʼ tbʼinchaʼn erman il. Jun techel, ¿o chewix toj tokslabʼil tuʼnju ya mintiʼ in xnaqʼtzaʼn tiʼj Tyol Dios moqa ya mintiʼ in pakbʼan? ¿Ya mintiʼ in naʼn Dios te Jehová? ¿In xipe tqʼoʼn ambʼil tuʼn tchʼiy nya bʼaʼn toj tanmi? ¿Alkyeqe tamiw ateʼ? ¿Alkyeqe saqchbʼil in nok tqʼoʼn mas ambʼil tiʼj? ¿Tzeʼn chʼexpaj t-ximbʼetz ex tmod kyuʼn tiʼchaq lu? ¿In nelpe tnikʼ tiʼj tiʼ in kubʼ tnaʼn Jehová tiʼjju o bʼant tuʼn? Kxel kyqanin ansyan junjun xjel toj tumel te erman, pero mlay txi kyqanin junjun tiʼ nya il tiʼj tuʼn tok kybʼiʼn. Kbʼel kyyekʼin ansyan tbʼanel kymod, tuʼntzun miʼn t-xobʼ erman tuʼn tyolin ex tuʼn tel tnikʼ tiʼj tiquʼn kubʼ tbʼinchaʼn il (Prov. 20:5). Jaku tzʼajbʼen junjun techel kyuʼn ansyan tuʼntzun tel tnikʼ erman tiʼj qa nya bʼaʼn aju otoq bʼant tuʼn. Bʼalo aj tok kychmon kyibʼ tnejel maj, jakulo kubʼ tyekʼin erman qa in tzaj tbʼis tiʼjju otoq bʼant tuʼn, axpe ikx jaku tzʼajtz tiʼj tanmi. w24.08 22 párr. 9-11

Pakbʼan Jesús tukʼil tzalajbʼil kyiʼj «tbʼanel tqanil tiʼj Tkawbʼil Dios» tuʼnju ojtzqiʼntoq tuʼn qa atzun tvoluntad Dios. Kubʼ tqʼoʼn pakbʼabʼil tnejel toj tanqʼibʼil. Axpe ikx kyoj mankbʼil qʼij tej tten tzalu twitz Txʼotxʼ, pakbʼan «Jesús kyuj qe tnam ex qe aldey, in tqʼoʼn xnaqʼtzbʼil kye xjal» (Luc. 13:22). Ax ikx, xi tqʼoʼn Jesús xnaqʼtzbʼil kye tdiscípulo tuʼn tbʼant kypakbʼan ik tzeʼn te (Luc. 10:1). Ax ikx toj ambʼil jaʼlo, nim toklen toj twitz Jehová ex Jesús tuʼn kukx qpakbʼan tiʼj tbʼanel tqanil (Mat. 24:14; 28:​19, 20). Qa ma ten tbʼanel qximbʼetz kyiʼj xjal ik tzeʼn te Jehová, kʼonil jlu qiʼj tuʼn qpakbʼan tukʼil tzalajbʼil. Taj Jehová tuʼn tok kybʼiʼn ex tuʼn tel kynikʼ chʼixme kykyaqil xjal tiʼj tbʼanel tqanil (1 Tim. 2:​3, 4). Tuʼntzunju, in qo tzaj t-xnaqʼtzaʼn tuʼn qok te jun tbʼanel pakbʼal tuʼntzun kyklet xjal. Qa nya kyaj xjal tuʼn tok kybʼiʼn tbʼanel tqanil toj ambʼil jaʼlo, bʼalo jaku txi kybʼiʼn naʼmxtoq tbʼaj ambʼil te nimxix kʼixbʼisabʼil. w25.03 15, 16 párr. 5-7

Bʼalo ateʼ junjun jaku kubʼ kyximen tuʼn t-xi kyqʼolbʼeʼn moqa tuʼn t-xi kyqʼoʼn bʼaʼn kyulen toj Ja te Chmabʼil. Pero mintiʼ tuʼn qyolin nim ambʼil tukʼil moqa tuʼn kybʼant junjuntl tiʼchaq quʼn junx tukʼil. Pero jakulo kubʼ qxjelin jlu: ¿Mintiʼpe in tzaj tqʼamaʼn Biblia qa ma txi qqʼolbʼen xjal lu at qoklen «tiʼj ju tbʼinchbʼen [ . . . ] mya bʼaʼn»? (2 Juan 9-11). In tzaj kyyekʼin junjuntl versículo qa atz in yolin jlu kyiʼj apóstata ex kyiʼj qeju in xi kyqʼamaʼn kye txqantl tuʼn tkubʼ kybʼinchaʼn nya bʼaʼn (Apoc. 2:20). Qa at jun xjal in xi tyekʼin xnaqʼtzbʼil nya ax tok moqa taj tuʼn tkubʼ kybʼinchaʼn txqantl nya bʼaʼn, mintiʼ tuʼn tkubʼ kyximen ansyan tuʼn kyxiʼ visitaril te. Bʼalo jaku chʼexpaj tmod, pero qa naʼmx tbʼant jlu tuʼn, mintiʼ tuʼn tok qqʼolbʼen nix tuʼn t-xi qqʼoʼn txokbʼil te tuʼn tpon toj chmabʼil. w24.08 30, 31 párr. 14, 15

Tej otoq che bʼaj waʼn xjal tuʼn Jesús, xi tqʼamaʼn kye t-apóstol tuʼn kymeltzʼaj toj bark atz Capernaúm, atzunte xiʼ twiʼ witz tuʼntzun miʼn t-xi qʼiʼn kyuʼn xjal tuʼn tok te rey (Juan 6:​16-20). Tej in che bʼettoq apóstol toj bark, tzaj kyqʼiqʼ tukʼil jbʼal ex jaw xtuliqʼin mar. Xi bʼet Jesús tibʼaj mar ex xi tqʼamaʼn te Pedro tuʼn tbʼant axju tuʼn (Mat. 14:​22-31). Tej tjax Jesús toj bark, weʼ kyqʼiqʼ toj mar. E jaw labʼin t-xnaqʼtzbʼen Jesús ex kyqʼama: «Ax tok aya Tkʼwaʼl Dios» (Mat. 14:33). Pero mintiʼ el kynikʼ tiʼj tiʼ toklen milagro lu tukʼilju otoq bʼant tuʼn kyukʼil pan. Tqʼama Marcos qa nimxix e jaw labʼin apóstol «tuʼnju naʼnxtoq tel kynikʼ tiʼj ti t-xilen aju o tbʼincha Jesús tiʼj wabʼj» (Mar. 6:​50-52). Ikju, naʼmxtoq tel kynikʼ tiʼj tkyaqil ipumalj otoq txi tqʼoʼn Jehová te Jesús tuʼn kybʼant milagro tuʼn. w24.12 5 párr. 7

Juntl tten tuʼn t-xi qyekʼin te Jehová qa in xi qqʼoʼn chjonte tiʼj chojbʼil ex tiʼj tkʼujlabʼil, aju tuʼn tkubʼ qbʼinchaʼn tkyaqilju jaku bʼant quʼn toj ambʼil te Nabʼitz Tkyimlen Jesucristo. Bʼaʼn tuʼn tok tilil quʼn tuʼn qten toj qʼij aju ex tuʼn t-xi qqʼoʼn txokbʼil kye xjal. Aj tbʼant jlu quʼn, jaku txi qchikʼbʼaʼn tiʼ in bʼaj toj chmabʼil lu. Ex jaku chex qyekʼin video toj jw.org aju tok tbʼi: ¿Tiquʼn kyim Jesús? ex aju Nabʼitz Tkyimlen Jesucristo. Kʼokel tilil kyuʼn ansyan tuʼn t-xi kyqʼoʼn txokbʼil kye qeju o che chewix toj kyokslabʼil. Nimxixlo tzalajbʼil kbʼel kynaʼn qe tmajen ateʼ toj kyaʼj ex qe ateʼ twitz Txʼotxʼ qa ma che meltzʼaj junjun t-rit Jehová otoq che el tzpet (Luc. 15:​4-7). Toj Nabʼitz Tkyimlen Jesucristo qqʼonk tilil tuʼn qqʼolbʼen kye kykyaqil pero mas kye qeju che pol tnejel maj ex kye qeju otoq kyaj kytzaqpiʼn tuʼn kypon. ¡Qqʼonk tilil tuʼn tkubʼ kynaʼn tzalajbʼil kykyaqilx! (Rom. 12:13). w25.01 29 párr. 15

In tzaj tyekʼin chojbʼil qa tzʼaqli te Jehová, pero mas in tzaj tyekʼin qa kʼujlaʼnxix qoʼ tuʼn (Juan 3:16; 1 Juan 4:​9, 10). Tzaj t-samaʼn Jehová Tkʼwal tuʼn tkyim tuʼn qpaj tuʼnju taj tuʼn qanqʼin te jumajx ex tuʼnju taj tuʼn qten kyxol tfamilia. Ximana tiʼj jlu: Tej tkubʼ tbʼinchaʼn Adán il, ya mintiʼtl ok te jun kyxol tfamilia Jehová. Tuʼntzunju, ax ikx qe aj qul itzʼj, nya tfamilia Jehová qoʼ. Pero noq tuʼnju chojbʼil o tzaj tqʼoʼn, aqeju xjal in nok qeʼ kykʼuʼj tiʼj Jehová ex in che nimen te, che okel te tfamilia toj ambʼil tzul. Axpe ikx toj ambʼil jaʼlo, jaku kubʼ tnajsaʼn Jehová qil ex jaku ten jun tbʼanel qamiwbʼil tukʼil ex kyukʼil qerman. Nimxix kʼujlaʼn qoʼ tuʼn Jehová (Rom. 5:​10, 11). w25.01 21 párr. 6

Tzaj tqʼoʼn Jehová jun tbʼanelxix oyaj qe tej ttzaj tqʼoʼn Tkʼwal tuʼn tkyim kyiʼj xjal (2 Cor. 9:15). Tuʼnju xi tqʼoʼn Jesús tchwinqlal tuʼn qpaj, jaku ten jun tbʼanel qamiwbʼil tukʼil Jehová ex jaku qo anqʼin te jumajx. Kubʼ tyekʼin Jehová qa kʼujlaʼnxix qo tuʼn tej ttzaj tqʼoʼn oyaj lu qe, tuʼntzunju, at nim tiquʼn tuʼn t-xi qqʼoʼn chjonte te (Rom. 5:8). Kyaj tqʼamaʼn Jesús tuʼn ttzaj qnaʼn tkyaqil abʼqʼi aju tkyimlen tuʼntzun miʼn tikʼ tnaʼl ambʼil lu quʼn ex tuʼn kukx t-xi qqʼoʼn chjonte tiʼj (Luc. 22:​19, 20). Toj abʼqʼi lu kʼokel Nabʼitz Tkyimlen Jesucristo toj jueves 2 te abril te 2026. Qkyaqil-lo qajbʼil tuʼn qten toj ambʼil lu. Toj ambʼil te Nabʼitz Tkyimlen Jesucristo, nim kʼonil qiʼj qa ma tzʼel qpaʼn ambʼil tuʼn qkubʼ ten ximel tiʼj tkyaqilju o bʼant tuʼn Jehová ex tuʼn Tkʼwal qiʼj. w25.01 20 párr. 1, 2

Jaku tzʼel mas tnikʼa tiʼj tkʼujlabʼil Jehová ex Jesucristo qa ma tzeʼl tpaʼna ambʼil tuʼn t-ximana tiʼjju o bʼant kyuʼn qiʼj. Jun techel, jaku jaw tuʼjina jun moqa mas te jun libro tkuʼx toj Biblia, aju in yolin tiʼj tanqʼibʼil Jesús toj ambʼil te Nabʼitz Tkyimlen Jesucristo te abʼqʼi lu. Qʼonka tilil tuʼn miʼn tjaw tuʼjina nim capítulo, sino tuʼn tel tnikʼa tiʼj tiquʼn bʼaʼn tuʼn tok tkʼujlaʼna Jehová ex Jesucristo. Qa atxix ojtxe tbautisarina, jakulo kubʼ t-ximana qa ya ojtzqiʼn tkyaqil tqanil tuʼna kyiʼj junjun xnaqʼtzbʼil ik tzeʼn tiʼj tkʼujlabʼil Dios, tiʼj chojbʼil ex tiʼj qa tzʼaqli te Dios. Pero mlayx tzʼel bʼaj qnikʼ kyiʼj xnaqʼtzbʼil lu tuʼnju jaku tzʼel qnikʼ kyiʼj akʼaj tqanil. Tuʼntzunju, bʼaʼn tuʼn tuʼjina ex tuʼn t-xnaqʼtzana kyiʼj uʼj o che etz tuʼn ttnam Jehová. w25.01 24, 25 párr. 13-15