Thu Puan—I Nakin Hun Atâna A Awmzia

1. Mi zawng zawngin eng thu tlûkna pawimawh tak nge an siam a ngaih?

TUN laiah, mite chuan thu tlûkna pawimawh tak siam tûr an nei a. Pathian Jehova chu lei leh vâna Rorêltu dik niin an pawm dâwn nge ni a, a hmêlma nunrâwng tak Diabol-Setana lamah an ṭang zâwk dâwn? Tuilairapa awm theih a ni lo. An thu tlûkna siam chuan an chatuan nakin hun tûr chu a nghawng ang. (Mt. 25:31-33, 46) “Hrehawm nasa tak” chhûngin, dam khawchhuak tûr zînga an tel dâwn leh dâwn loh chhinchhiah an ni ang.—Thup. 7:14; 14:9-11; Ezek. 9:4, 6.

2. (a) Hebrai 10:35-39-nain eng ti tûrin nge min fuih? (b) Engtin nge Thu Puan buin min ṭanpui theih?

² Hebrai 10:35-39 chhiar rawh. Jehova rorêlna i thlâwp a nih chuan thu tlûkna fing i siam tihna a ni. Mi dangte pawh duh thlanna dik siam tûra ṭanpui chu i châk hle a. Chutianga i ṭanpuinaah chuan, Thu Puan bu-a thute chu i hmang thei a ni. Thu Puan bu hian Jehova dodâltute chunga thilthleng tûrte a sawi mai bâkah, a rorêlna rinawm taka thlâwptute dawn tûr malsâwmnate pawh a târ lang bawk a ni. Chûng thutak pawimawh takte chu kan zir chian a ngai a. Chutianga tihna chuan Jehova rawngbâwl zawm zêl kan tumna chu a tinghet lehzual ang. Chu bâkah, kan thu zirte chu thu tlûkna dik siam tûr leh vuan tlat tûra mi dangte ṭanpui nân kan hmang thei a ni.

3. He thuziakah hian eng nge kan sawiho vang?

³ He thuziakah hian hêng zawhnate hi kan sawiho vang: Pathian rorêlna thlâwptute chungah eng thil nge thleng ang? tih leh, Thu Puan bu-a târ lan sakawlh sen tak thlâwptute chungah eng thil nge thleng ang? tihte hi.

MI RINAWMTE CHUNGA THILTHLENG TUR

4. Tirhkoh Johana’n vânah Isua nên eng pâwl nge a hmuh?

⁴ Tirhkoh Johana chuan inlârnaah Jehova rorêlna thlâwpa chatuan nun malsâwmna dawngtu pâwl pahnih a hmu a. Pâwl pakhatnaa tel zât chu mi 1,44,000 an ni a. (Thup. 7:4) Anni chu vânah Isua nêna sawrkâr, a nih loh leh Lalram din tûra lei aṭanga thlante an ni. Isua nên lei chungah ro an rêl a. (Thup. 5:9, 10; 14:3, 4) Johana chuan anni chu inlârnaah Isua nêna vân Zion Tlânga dingin a hmu a ni.—Thup. 14:1.

5. Mi 1,44,000 zînga a la bângte chungah eng thil nge thleng thuai ang?

⁵ Kum zabi tam tak chhûngin mi 1,44,000 zînga tel tûrin mi sâng tam tak thlan an ni tawh a. (Lk. 12:32; Rom 8:17) Mahse, Johana chu chûng zînga a la bâng, a nih loh leh mi tlêm tê chauh chu ni hnuhnûng chhûngin leiah an la dam ang tih hriattîr a ni. Chûng a la bâng, a nih loh leh ‘la awmte’ chuan hrehawm nasa tak a thlen hmain Jehova pawm an nihzia “chhinchhiahna” hnuhnûng ber an dawng ang. (Thup. 7:2, 3; 12:17) Hrehawm nasa tak chhûnga hun eng emawah, chûng a la bângte chu mi 1,44,000-te zînga rinawm taka lo thi tawhte nêna awm tûrin vâna lâk chhoh an ni ang a. Pathian Lalramah Isua nên ro an rêl ang.—Mt. 24:31; Thup. 5:9, 10.

6-7. (a) Johana’n eng pâwl dang nge a hmuh leh a, an chungchâng eng nge kan hriat? (b) Engvângin nge hriak thih la bângte leh “mipui tam tak” chuan Thu Puan bung 7-na chu an ngaihven ang?

⁶ Johana chuan vân lam pâwl a hmuh hnuah, “mipui tam tak” a hmu leh a. Mi 1,44,000-te ang lo takin, chu pâwla mite chu an zât chhiar theih a ni lo. (Thup. 7:9, 10) An chungchâng eng nge kan hriat? Johana chu: “Hêng hi hrehawm nasa tak ata chhuakhote kha an ni a, an puante Berâmno thisena suin an tivâr ta a,” tia hrilh a ni a. (Thup. 7:14) Hrehawm nasa tak ata an dam khawchhuah hnu chuan chu “mipui tam tak” chu he leiah hian an awm ang a, malsâwmna ropui tak an dawng ang.—Sâm 37:9-11, 27-29; Thuf. 2:21, 22; Thup. 7:16, 17.

⁷ Vâna kal tûra thlan kan ni emaw, leia awm tûra thlan kan ni emaw pawh ni se, Thu Puan bung 7-naa târ lan thu-ahte hian tel ve niin kan inhria em? Kan inhre tûr a ni. Chu chu Pathian chhiahhlawh pâwl hnihte tâna hun phûrawm tak a va ni dâwn êm! Jehova rorêlna kan thlâwp avângin kan lâwm hle ang. Thu Puan buin hrehawm nasa tak chungchângah eng thil dang nge min hrilh?—Mt. 24:21.

PATHIAN DODALTUTE CHUNGA THILTHLENG TUR

8. Engtin nge hrehawm nasa tak chu a inṭan ang a, engtin nge mi a tam zâwkte’n an chhân lêt ang?

⁸ Thuziak hmasaa târ lan tawh angin, he khawvêl politics thuneitute chuan Babulon Khaw Ropui, khawvêl sakhaw dik lo lalram chu a bei thuai ang a. (Thup. 17:16, 17) Chu beihna chu hrehawm nasa tak inṭanna a ni ang. Chu chuan mi tam tak chu Jehova be tûrin a chêttîr ang em? Chêttîr lo vang. Chutih ahnêkin, Thu Puan bung 6-na chuan chu hun khirh tak chhûngin Jehova rawngbâwl lotute chuan tlângte nêna tehkhin politics leh sumdâwnna khawvêlah inhumhimna an zawng zâwk ang tih a târ lang a ni. Pathian Lalram an thlâwp loh avângin, Jehova chuan anni chu dodâltute angin a thlîr ang.—Lk. 11:23; Thup. 6:15-17.

9. Engtin nge Jehova mite chu hrehawm nasa tak chhûnga an lansarh bîk ang a, chu chuan eng nge a thlen ang?

⁹ Ni e, Jehova chhiahhlawh rinawmte chu hrehawm nasa tak chhûngin an langsâr hle ang a. Anni chu “sakawlh” thlâwp duh lo, he leia Pathian Jehova rawngbâwltu pâwl awm chhun an ni ang. (Thup. 13:14-17) Nghet taka an dinna chuan Jehova dodâltute chu a tithinrim hle ang a. Chuvângin, hnam insuih khâwm chuan khawvêl puma Pathian mite chu a bei ang. Bible chuan chu beihna nasa tak chu Magog rama Goga beihna tiin a sawi a ni.—Ezek. 38:14-16.

10. Thu Puan 19:19-21-naa târ lan angin, engtin nge Jehova’n a mite chunga beihna chu a chhân lêt ang?

¹⁰ Engtin nge Jehova’n chu beihna râpthlâk tak chu a chhân lêt ang? Heti hian min hrilh a ni: “Ka thinrimna chu ka hnâr khu chhuah hluah hluah ang,” tiin. (Ezek. 38:18, 21-23) Thu Puan bung 19-na chuan a dawta thilthleng chu a sawi a. Jehova chuan a Fapa chu a mite vênghim tûr leh hmêlmate hneh tûrin a tîr chhuak a ni. Vântirhkoh rinawmte hmanga din “vâna sipaihote” leh mi 1,44,000-te chuan Isua rualin Magog rama Goga chu an bei ang. (Thup. 17:14; 19:11-15) Chu indona chuan eng nge a rah chhuah ang? Jehova dodâltu mihring leh pâwl zawng zawng chu tihchimih vek an ni ang!—Thu Puan 19:19-21 chhiar rawh.

INDO ZAWHAH, INNEIHNA

11. Thu Puan bu-a thilthleng pawimawh ber chu eng nge ni?

¹¹ Pathian hmêlmate tihboral vek an nih laia an dam khawchhuah theih avânga leia mi rinawmte awm dân tûr chu han mitthla teh! A va hlimawm dâwn tak êm! Babulon Khaw Ropui tihboral a nih huna vâna lâwmna nasa tak a awm rualin, chu aia lâwmna nasa zâwk thlentu thil dang pawh a awm ang. (Thup. 19:1-3) Dik tak chuan, chu chu Thu Puan bu-a thilthleng pawimawh ber a ni—‘Berâmno nupui neihna chu.’—Thup. 19:6-9.

12. Thu Puan 21:1, 2-in a târ lan angin, eng hunah nge Berâmno nupui neihna chu a thlen ang?

¹² Eng hunah nge inneihna chu a thlen ang? Armageddon indona ṭan hma lawkah mi 1,44,000-te chu vânah an awm kim vek tawh ang. Amaherawhchu, Berâmno nupui neih hun erawh a la ni lo vang. (Thu Puan 21:1, 2 chhiar rawh.) Berâmno nupui neih hun chu Armageddon indonaa Pathian hmêlma zawng zawng tihboral an nih hnuah a thleng ang.—Sâm 45:3, 4, 13-17.

13. Berâmno nupui neihna chuan chumia telte tân eng awmzia nge a neih?

¹³ Berâmno nupui neihna chuan chumia telte tân eng awmzia nge a neih? Ni e, inneihna chuan mipa leh hmeichhia a inpumkhattîr angin, he entîr nei inneihna pawh hian Lal Isua Krista leh a “mo,” mi 1,44,000-te chu a inpumkhattîr a. Anni chuan lei chungah kum 1,000 ro an rêl ang.—Thup. 20:6.

KHAWPUI ROPUI TAK LEH I NAKIN HUN

14-15. Thu Puan bung 21-nain mi 1,44,000-te chu eng nên nge a tehkhin? (A kâwma milem en rawh.)

¹⁴ A dawtah, Thu Puan bung 21-na chuan mi 1,44,000-te chu “Jerusalem Thar” tia koh khawpui mawi tak nên a tehkhin a. (Thup. 21:2, 9) Chu khawpui chuan lungphûm 12 a nei a, chûngahte chuan “Berâmno tirhkoh sâwm leh pahnihte hming a chuang a.” Engvângin nge chu chu Johana’n a ngaihven êm êm? Chûng lung zînga pakhatah chuan a hming inziak a hmuh vâng a ni. Chanvo hlu a va ni tak êm!—Thup. 21:10-14; Eph. 2:20.

¹⁵ Chu entîr nei khawpui chu khawpui dangte lakah a danglam hle a. A khaw kawtlaite chu rangkachak thianghlima siam a ni a, kawngkhâr 12-te chu tuikeplunga siam a ni a, kulhte leh lungphûmte chu lung man tam chia cheimawi a nih bâkah, a dung leh vâng leh a sân zâwngte chu a inang vek a ni. (Thup. 21:15-21) Mahse, thil eng emaw kim lo awm niin a lang tlat mai! Johana sawi zawm hi lo chhinchhiah ang che: “A chhûngah chuan biak in rêng ka hmu lo va; Lalpa Pathian Engkimtitheia leh Berâmno chu an biak in a ni si a. Tin, chu khua chuan a ên tûrin nî a ngai lo va, thla pawh a ngai hek lo; Pathian ropuina chuan a ên a, an khâwnvâr chu Berâmno a ni si a,” tih hi. (Thup. 21:22, 23) Jerusalem Thara telte chu Jehova bulah an awm ang. (Heb. 7:27; Thup. 22:3, 4) Chuvângin, Jehova leh Isua chu, chu khawpui biak in an ni.

16. Mihringte chuan Pathian Ram Kum Sâng Rorêl chhûngin engte nge an tawn ang?

¹⁶ Hriak thihte tân chu khawpui chungchâng ngaihtuah chu a phûrawm hle a. Lei lam beiseina neite pawhin chu khawpui ngaihvenna tûr chhan an nei a ni. Pathian Ram Kum Sâng Rorêl chhûngin Jerusalem Thar chuan malsâwmna chhiar sên loh a thlen ang. Johana chuan chûng malsâwmnate chu “nunna tui lui” anga luang chhuak angin a hmu a. Lui kam tuakahte chuan “hnam tin tihdamna tûr” thing hnahte tichhuaktu “nunna thing” a awm a ni. (Thup. 22:1, 2) Chutih huna awm mi zawng zawngte chuan chûng malsâwmte chu an hlâwkpui tawh ang. Thuawih mihringte chu zawi zawiin an ṭha famkim chho vang a. Natna te, hrehawm tawrhna te, leh lungngaih avânga mittui tlâknate pawh a awm tawh lo vang.—Thup. 21:3-5.

17. Thu Puan 20:11-13-nain a târ lan angin, tute’n nge Kum Sâng Rorêlna chu hlâwkpui ang?

¹⁷ Tute’n nge chûng malsâwmnate chu hlâwkpui ang? A hmasa berah chuan, Armgeddon-a dam khawchhuak mipui tam takte leh khawvêl thara lo la piang tûrte an ni a. Chu bâkah, Thu Puan bung 20-na chuan mitthite pawh kaihthawh an nih tûr thu a tiam a ni. (Thu Puan 20:11-13 chhiar rawh.) Tûn hmaa lo thi tawh “mi felte” leh Jehova chanchin zirna hun remchâng nei hman lova thi ta ‘mi fel lote’ chu he leiah hian kaihthawh leh vek an ni ang. (Tirh. 24:15; Joh. 5:28, 29) Chu chu Kum Sâng Rorêl chhûngin mitthi zawng zawng an tholeh vek dâwn tihna a ni em? Ni lo. An thih hmaa Jehova rawngbâwl theihna hun remchâng hnâwl tlattute chu kaihthawh an ni tawh lo vang. Hun remchâng pêk an ni tawh a, lei Paradis-a nung tlâk an ni lo tih an lantîr tawh a ni.—Mt. 25:46; 2 Thes. 1:9, 10; Thup. 17:8; 20:15.

FIAHNA HNUHNUNG BER

18. Kum 1,000 tâwpa lei dinhmun chu eng ang nge a nih ang?

¹⁸ Kum 1,000 a tâwp hunah chuan, leia chêng zawng zawngte chu an ṭha famkim tawh ang a. Adama hnên aṭanga kan rochun sualin tu chungah mah nghawng a nei tawh lo vang. (Rom 5:12) Adama sual avânga ânchhia chu tihboral hlen a ni tawh ang a. Chutiang chuan, leia chêngte chu kum 1,000 tâwpah chuan mihring ṭha famkimte niin ‘an nung tawh ang.’—Thup. 20:5.

19. Engvângin nge fiahna hnuhnûng ber a awm a ngaih?

¹⁹ Isua chuan a rinawmna vawng lo tûra Setana beihna chu a do tlat tih kan hria a. Fiahna hnuaiah pawh a rinawm reng a ni. A nih chuan, mihring ṭha famkim zawng zawngte chuan anmahni fiah tûra Setana hun remchâng pêk a nih hunah rinawm tlat chu an duh ang em? Kum 1,000 tâwpa leilâwt aṭanga Setana chhuah a nih hunah chuan mi tinin chu zawhna chu an chhâng thei ang. (Thup. 20:7) Chu fiahna hnuhnûngber chhûnga rinawm tlattute chuan chatuan nunna an changin, zalênna dik tak an nei ang a. (Rom 8:21) Rinawm lote erawh chu Dibola leh a ramhuaite ruala chatuana tihboral an ni ang.—Thup. 20:8-10.

20. Thu Puan bu-a kan hmuh hrilh lâwkna phûrawm takte avângin engtin nge i awm?

²⁰ Thu Puan bu ennawna tawi tê kan neih hnu hian engtin nge i awm? Chûng hrilh lâwkna mak taka i tel ve tih hriat chu a phûrawm hle a ni lâwm ni? Kan Pathian biakna thianghlima kan ruala lo tel ve tûra mi dangte sâwm tûrin a chêttîr che a ni lâwm ni? (Thup. 22:17) Nakina chûng thilthleng tûr phûrawm takte avâng chuan tirhkoh Johana’n “Amen. Lo kal ta che, Lalpa Isu,” tia a sawi anga sawi ve tûrin kan thinlung leh rilru chu chêttîrin a awm a ni.—Thup. 22:20.