I LO HRE TAWH EM?
Bible-a hman “tilreh” tih thu mal hian eng awmzia nge a neih?
Assuria mi tilreh pakhat lemker
A châng chuan, he thu mal hi mipa pâ thei lo tûra tilreh tak tak sawi nâna hman a ni a. Bible hun lai chuan, mipa ṭhenkhat chu hrem nân an til an rehsak ṭhîn a; an râl man emaw, an salte emaw til pawh an rehsak ṭhîn bawk. Mi tilreh rinawm takte chuan lal in ropui taka hmeichhia hlîr awmna hmun, a nih loh leh lal nupuite awm khâwmna hmun chu an enkawl a. Entîr nân, mi tilreh Hegaia leh Saasgaza chu Zerzia I-na nia ngaih, Persia Lal Ahasuera hmeite leh nupuite enkawltu an ni.—Estheri 2:3, 14.
Mahse, Bible-in mi tilreh tia a sawi zawng zawng hi tilreh tak tak an ni vek lo. Mi thiam ṭhenkhat chuan he thu mal hi lal in chhûnga rawngbâwl tûra ruat, mi liante sawi nân pawha hman a nih thu an sawi a. Hetiang awmze nei hian Jeremia ṭhian, Ebedmeleka leh chanchin ṭha hriltu Philipa’n thu a hrilh, a hming hriat loh Ethiopia mi sawi nâna hman niin a lang. Ebedmeleka chuan Lal Zedekia a biak pawh theih avângin, lal ina mi lian a ni tih a lang a ni. (Jeremia 38:7, 8) Chu bâkah, ‘Jerusalem khuaa Pathian be tûra kal’ Ethiopia mi chu lal sum enkawltu anga târ lan a ni bawk.—Tirhkohte 8:27. ▪ (wp15-E 01/01)
Engvângin nge Bible hun laia berâm vêngtute chuan kêl zîng ata berâmte chu an hlîr?
Isua chuan nakina lo thleng tûr rorêlna chungchângah: “Mihring Fapa hi chu, . . . a ropuinaa inthuama a lo kal hunah chuan, . . . berâm vêngtuin kêl zîng ata a berâmte a hlîr angin anniho chu a hlîr ang,” tiin a sawi a. (Matthaia 25:31, 32) Engvângin nge berâm tak tak vêngtute chuan chûng rante chu an hlîr ang?
A tlângpui thuin, kêl leh berâmte chu chhûnah tlathotîr a ni ṭhîn a. Zânah chuan ram sakawlhte, rûkrute, leh khaw vâwt laka an him theih nân a huanga khung an ni ṭhîn. (Genesis 30:32, 33; 31:38-40) Huang chhûng an lo thlen chuan, dimdâwih ngai berâmte, abîk takin berâmnute leh a notête chu tharum thawh chîng kêlte’n a tihnat loh nân a hranga dah tûrin an hlîr ṭhîn a ni. Chu bâkah, All Things in the Bible tih lehkhabu chuan berâm vêngtuin “an no neih hun, hnutê sâwr hun, leh an hmûl meh hunahte” hian kêl zîng ata berâmte chu a hlîr ṭhîn bawk tih a sawi. Hmân lai Israel mite chuan berâmte chu an hmuh ṭhin a, an vên ṭhin avângin, Isua chuan kêl zîng ata berâm hlîrna tehkhin thu hi a hmang a ni. (wp15-E 01/01)