Retheihna Hi Pathian Lawm Hlawh Lohna Hriltu A Ni Em?
PATHIAN chuan hmân lai Israelte hnênah: “Mi rethei rêng rêng in awm hauh lo vang,” tiin a hrilh a. Chu chu mi retheite an ngaihsak dân tûr leh leibâ ngaihdam dân tûr chungchânga Dân a pêk vâng a ni. (Deuteronomy 15:1-5, 7-10) Chuvângin, Pathian Jehova’n malsâwmna a tiam avângin, Israelte zîngah chuan mi rethei an awm tûr a ni lo. Amaherawhchu, Israelte chuan malsâwmna an dawnna tûr chu Dân chu an zâwm lo.
Mahse, mi retheite chuan Pathian lawm an hlawh lo tihna a ni kher lo va, a hausate chuan Pathian lawm an hlawh tihna lah a ni hek lo. Pathian chhiahhlawh tam takte chu rethei tak tak an ni hlawm a. Zâwlnei Amosa chu ran rual vêngtu leh a ṭûl ang anga inhlawhfa ṭhîn mi rethei tak a ni. (Amosa 1:1, 7:14) Zâwlnei Elija hun laia Israel rama ṭâm a tlâk khân, ani chuan ṭâm chhûng zawnga mak tak maia chhangphut leh sahriak tlêmte nei rengtu hmeithai rethei tak khualchhawn thiamna chu a rinchhan a ni. Elija emaw, hmeithai emaw chuan an hausak phah lo; Pathian Jehova chuan an mamawh bulpuite chauh a pe a ni.—1 Lalte 17:8-16.
Hunin a rawn herchhuahpui hriat lâwk loh thilthlengte chuan mite chu retheihna khurah a tlâktîr mai thei a. Kawng chi hrang hranga chêtsualna leh natna chuan mi chu a hnathawhna ata engemaw ti chhûng emaw, a dam chhûng emaw a chawlhtîr thei a ni. Tin, thihna chuan fahrah leh hmeithai a awmtîr thei bawk. Chutiang dinhmun ṭha lo takte pawh chu Pathian lawm hlawh lohna târ langtu a ni chuang lo. Naomi leh Ruthi te chanchin chu Pathian Jehova’n retheite hmangaih taka a ṭanpui dân duhawm tak târ langtu a ni. An pasalte an thih avângin Naomi leh Ruthi te chu rethei hle mah se, Pathian Jehova’n mal a sâwm a, mahni inenkawl thei tûrin ruahmanna a siamsak a ni.—Ruthi 1:1-6; 2:2-12; 4:13-17.
Retheihna chu Pathian lawm hlawh lohna târ langtu a ni lo tih a chiang hle. Pathian Jehova chunga rinawmte chuan Lal Davida thu: “Naupang ka lo ni tawh a, tûnah tar ka lo ni ta a, nimahsela mi fel chu kalsana a awm ka hmu ngai lo va, a thlahte chaw khawn pawh ka hmu ngai hek lo,” tih chu an ring tlat thei a ni.—Sâm 37:25. (w09 9/1)
[Phêk 8-naa milem]
Naomi leh Ruthi chu rethei hle mah se, Pathianin mal a sâwmin, hmangaih takin a enkawl