Sum leh Pai Hian Hlimna Dik Tak A Pe Em?

SONIA-I chu Spain rama piang a ni a. Naupang a nih laiin, a nu rualin Jehova Thuhretute inkhâwmnaah a inkhâwm ṭhîn a. Mahse, a lo ṭhan chhoh chuan England ram London khawpuiah insawnin, a tâwpah chuan pawisa pei punna hmunpuiah hna a thawk a ni.

Sonia-i chuan a hna chu a ngaina hle a. Sum tam tak hai lûtin, a dâwrtute sum tam tham tak tak a khawih bawk a ni. A hna chu a phûrawm hle a, an hnaah a hlawhtling hle bawk. Sonia-i chuan nî tin dârkâr 18 hna a thawk ziah a, a châng phei chuan zânah dârkâr hnih thum vêl bâk a mu lo. A hna chu a nun a ni hial a ni. Tichuan, vawi leh khatah engkim mai chu a inthlâk thleng ta rup mai a. Sonia-i chu a zeng ta—chu chu hna a thawhrim êm vâng a ni ngei ang. Chutih lai chuan kum 30 mi lek a ni.

A taksa khing leh lam chu a zeng vek a, doctor-te chuan a ṭawng leh theih dâwn leh dâwn loh pawh an hre chiang lo. A nu chu amah enkawl tûrin England-ah a kal ta thuai a ni. Sonia-i a han kal leh theih chuan, a nu chuan a hnênah: “Kohhran inkhâwmah ka kal dâwn a, nangmaha ka hnut chhiah theih loh che avângin, ka ruala i lo kal ve a ngai ang,” tiin a hrilh a. Sonia-i chuan kal ve a remti ta a ni. Chu chuan eng nge a rah chhuah?

Sonia-i chuan: “Ka thu ngaihthlâk apiang thu dik vek niin ka hria. A ropui hle a ni. Kingdom Hall-a ka kal hmasak ber ṭuma chibai min bûktu tam takte zînga pakhatin Bible min zirpui chu ka rem ti ta a. Tûn hmaa ka hmêl hriatte chuan min tlawh tawh lo mah se, kan ṭhian tharte chuan min hmangaihin, min ngaihsak hle a ni,” tiin a sawi a ni.

Sonia-i chu zawi zawiin a ṭawng leh thei a, thlarau lamah pawh nasa takin hma a sâwn bawk a ni. Kum khat pawh a tlin hmain, baptisma a chang ta a. A ṭhian tharte zînga tam tak chu hunbi kima Kristian rawngbâwltu an ni a, an hlimzia pawh a hmu bawk a ni. Ani chuan, ‘Anni ang nih ve chu ka duh hle mai. Pathian Jehova hnêna ka theih tâwk pêk ka duh ngawt mai!,’ tiin a inngaihtuah a. Tûnah chuan Sonia-i chuan hunbi kimin rawng a bâwl tawh a ni.

Sonia-i chuan a thiltawn aṭangin eng nge a zir? “Sum leh pai la lût hnem hle mah ila, hnathawhna hmuna rilru hahna leh hlauhthâwnna chuan min tilungngaiin, min tihlim lo hle a. Nuna thil pawimawh ber chu ka Pa vâna mi, Jehova nêna inlaichînna ṭha neih hi a ni tih ka hre ta. Tûnah chuan ka hlim tak zet tawh a ni,” a ti.

Tirhkoh Paula chuan: “Tangka sum ngainat hi sual tinrêng bul a ni si a; chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a,” tiin a ziak a. (1 Timothea 6:10) Sonia-i chuan hêng thute dikzia hi ama thiltawn ngei aṭangin a nemnghet thei a ni. (w09 9/1)