Inkhâwmpui Program ‘Hmuha Hriat’ Theihte

Kum 130 chuang liam ta aṭangin, Jehova thuhretute chu kum tina neih ṭhin inkhâwmpuiahte an inhmukhâwm ṭhîn a. Tûnah chuan hêng program-ah te hian thusawi hrang hrang 40 aia tam a awm tawh mai bâkah, rimawi te, biangbiakna te leh, video-te a tel tawh bawk. Chuvângin, program chu a chhimtute’n an hlâwkpui a, tihchaka an awm theih nân fiah taka ‘hmuha hriat’ theih a nih a ngai a ni. (Luka 2:20) Khawi hmuna awmte pawhin chûng inkhâwmpuite chu an hlâwkpui theih nân, engtin nge i thawhlâwmte chu hman a nih?

Inkhâwmpui Neihna Hmun Tinah Audio/Video Chhuah Dân Tûr Siam A Ni

Khawthlang ram tam taka stadium-ah te leh (arena) puipunna-ah te chuan audio/video chhuah theihna a awm sa a. Mahse, chûng hmunte chu inkhâwmpuina atâna kan hawh hian, engvângin nge kan hmanruate chu hman kan duh ṭhin? World Headquarters-a Broadcasting Department-a thawk David-a chuan heti hian a sawi a ni: “Kan hmun hawh ṭhenkhatte chu ngaithlatute’n thusawi program bîk darkar ruk aia rei ngun taka an ngaihthlâk theihna tûr atâna duan a ni a. Entîr nân, infiamna hmunahte chuan chûng hmanruate chu mipui pung khâwmte tân thu puan chhuahna tawitê neih nân leh rimawi tawitê ngaihthlâkna atâna hman ber a ni. An video screen-te chu game score-te, faknate leh, replay-te tihchhuah nâna hman a ni a. Mahse, ngaithlatute chuan video-te chu rei tak chhûng an en theih a, dâwhsân aṭanga thusawite chu chiang tak leh fiah taka an hriat kan duh a ni.”

Inkhâwmpui neihna hmun tinte chu a inan loh avângin audio/video chhuah dânte chu tihdanglam a ngai ṭhîn a. Inkhâwmpuina hmun tûr thlan a nih vêleh, kan branch office-a Broadcasting Department-te chuan inkhâwmpuia tel tûra ngaih zât leh a hmuna ṭhutna awm zât azirin ṭhutna tûr hmun chu an ruat a. Tichuan, unaupate chuan thusawitute awmna tûr leh video screen-te dahna tûr chu ngaihtuahin, a inthlunzawm dân tûrte leh mitinte’n chu program chu an hmuha an hriat theih nâna an mamawhte chu an ngaihtuah bawk tûr a ni.

Audio/video chu ṭawng hrang hranga neih inkhâwmpuiahte chhuah a harsa lehzual a. Program chu ṭawng danga lehlin a nih dâwn chuan ṭawnglettute hnênah audio leh video chu pêk tûr a ni a, anni chuan chumi ṭawng hrethiamte hnênah radio channel hran hmangin an letling leh ang. Audio chu ṭawng hrang hrang pariat laia thawn chhuah ni mah se, a bîk taka duan media player-te avângin chu inkhâwmpuia lo tel zawng zawngte tân video chu a inmil vek a, a lawmawm hle. David-a chuan, “Hêng khâwl kal dânte hi a buaithlak em em a. Tin, hetiang khâwl thil khawih tûra inpete hian zir chianna tam tak an neih a ngai bawk,” tiin a sawi.

Branch office tam zâwkahte chuan kum tina hman ṭhin audio/video hmanruate chu an nei a. Chutiang dinhmunahte chuan, unaupate chuan chûng hmanruate chu inkhâwmpuina neih a nihna tûr hmunahte an thawn kual ṭhin. United States branch chuan inkhâwmpuina atâna hmanruate thawn chhuah nân kum tin $200,000a a hmang ṭhin. Hei hian hmanraw dangte leina tûr leh enkâwlna atâna kan mamawhte a titlêm. Canada inkhâwmpuinaa audio/video lam ṭanpuitu Steven-a chuan, “Kan audio/video team chuan nut te, bolt te, cord te, leh a part ho te chu a hnua program neih leh tûr atâna hman nghal theih tûrin fimkhûr tak leh uluk takin kan dah ṭha ṭhin,” tiin a sawi.

Hmanruate Neih leh Enkawl Dân

Audio/video hmanrua te hawh man chu a to hle a, chu bâkah, chûng hmanruate chu a tlângpuiin a ṭha tâwk lo va, enkawl ṭhat a ni lo bawk. Chuvângin, hmanruate chu kan lei tlângpui ṭhin a ni. Tûnah hian inchhûnga hman chi LED video wall measuring five by three meters (16 by 10 ft) chu $24,000 vêl a ni a, single 15-meter (50-ft) microphone cable chu $20 vêl a ni bawk. Chuvângin, Broadcasting chu Purchasing Department nên thawk dûnin eng hmanruate pawh ni se, an lei hmain ‘a man tûr an chhût,’ lâwk a ni. (Luka 14:28) Entîr nân, chu hmanrua chu mi eng zâtin nge hlâwkpui ang? Hmanraw thar lei chu mamawh phuhruk nâna tihtheih ṭha ber a ni em? Hmanruate dahna tûr hmun ṭha te, a enkawlna tûr bungruate leh khâwl khawih thiam inpe theite an awm em?

Audio/video hmanrua rei taka hman a nih theih nân leh thawhlâwmte chu ṭha taka hman a nih theih nân, hunbi neia enkawl leh siamṭhat zêl a ni. Hmanrua chu kan thawn chhuahnaah a chhiat loh nân bâwm ṭha taka dah a ni a, chûng bâwmte chu a ṭul anga siamṭhat reng a ni bawk.

Thu Hrilhna Ṭha Tak leh Program Felfai Tak

Thuhretu ni lote’n kan inkhâwmpuia audio/video ṭhatzia an hmuh hian an ngaihlu hle a. Entîr nân, inkhâwmpuina pakhatah chuan, khawvêla broadcasters lian bera thawktu pakhat chuan kan thuziakte leh thil tihlante ṭhatzia chu a sawi a. Inkhâwmpuinaa audio/video hmanrua buaipuitu Johnathan-a chuan, “Kan team-a tel zawng zawngte chu tlâwmngaia mahnia inpe leh thiamna nei bîk an ni lo tih a hriat chuan mak a ti hle a, ni khat leh a chanve chhûnga kan thiltih chu an company chuan ni nga chhûng an tih a ngaih tûr thu a sawi,” tiin a sawi. Inkhâwmpuina dang leha manager chuan, “Music leh video lama mi thiam tak takte pawh an lo kal tawh a, mahse, hetiang anga thiam hi ka la hmu ngai lo!” tiin a sawi.

Engtin nge inkhâwmpuia audio/video chhuahte chu i hlâwkpui? England rama chêng David-a ang hian i inhre mai thei. Ani chuan: “Kum 88 mi ka ni tawh a, inkhâwmpuite chu vawi tam tak ka lo chhim ṭhin tawh a. Mahse, tûnah chuan a hma zawng aiin kan inkhâwmahte chuan rilru pêk a awlsam lehzual a. Video ṭha tak takte avângin program zawng zawngte chu a kal tluang zâwk a, a thuchah te chu a chiangin a fiah hle a ni,” tiin a sawi. Nigeria rama chêng Micheal-a chuan, “Kan unaute tân thusawitu ṭawng hriat leh video-te hmuh chu a harsa tawh lo va, program neih laiin an rilru la pêngtu awm tawh lovin, ṭha takin rilru an pe thei tawh a ni,” tiin a sawi.

Kumina “Chanchin Ṭha chu Puang Rawh”! tih Regional leh Special Inkhâwmpuiahte a i tel hunah, he program hi ngaihthlâk leh en a nih theih nâna i ṭanpui theih dân ngaihtuah nân hun rei lote hmang ang che. In thawhlâwmte chuan, donate.jw.org kaltlanga thawhte pawh tiamin, inkhâwmpuite hlawhtling taka neih a nih theih nân min ṭanpui a ni. Kan lâwm e.