Vântirhkoh Chungnung Ber Mikaela Chu Tu Nge Ni?

Bible chhânna

Mikaela, sakhaw ṭhenkhatin “Mi Thianghlim Mikaela” tia an sawi hi Isua leia a rawn kal hma leh vâna a kîr leh hnua a hming a ni tih a chiang.a Mikaela chu Mosia thih hnuah Setana nên an inhnial a; chu bâkah, zâwlnei Daniela hnêna Pathian thuchah puang tûrin vântirhkoh pakhat a ṭanpui bawk a ni. (Daniela 10:13, 21; Juda 9) Mikaela chu Pathian rorêlna humhimna leh Pathian hmêlmate beihna hmangin “Pathian Ang Tu Nge Awm?” tih awmze nei a hming phuin a nung a ni.—Daniela 12:1; Thu Puan 12:7.

Isua chu vântirhkoh chungnung ber Mikaela a ni tia thutâwp siam a inâwm chhan ngaihtuah rawh.

• Mikaela chu “vântirhkoh chungnung ber”a ni. (Juda 9) He nihna “vântirhkoh chungnung ber,” awmzia hi “vântirhkohte lal” tihna a ni a, hei hi Bible châng pahnihah chauh a lang a ni. Chûng châng pahnihahte chuan mi pakhat chauh sawina thu mal hman a ni a, chu chuan chutiang chî vântirhkoh pakhat chauh a awm tih a sihhmuh a ni. Châng pakhat zâwk chuan tho leh Lal Isua chu “au thâwm nên, vântirhkoh chungnung ber aw nên . . . vân aṭangin a lo chhuk dâwn,” tiin a sawi a. (1 Thessalonika 4:16) Isua chu vântirhkoh chungnung ber Mikaela a nih avângin “vântirhkoh chungnung ber aw” a nei a ni.

• Mikaela chu vântirhkoh sipai rualte hotu a ni. “Mikaela leh a vântirhkohte chuan drakon,” Setana chu an do va. (Thu Puan 12:7) Ani chuan thlarau thil siamte chungah thuneihna sâng tak a chelh a, “hotu lian” tih leh “hotu ropui tak” tia koh a ni. (Daniela 10:13, 21; 12:1) Hêng nihnate hian Mikaela chu “vântirhkoh sipai rualte hotu” a nihna a tichiang tiin New Testament scholar David E. Aune-a chuan a sawi.

  Bible chuan vântirhkoh sipai rualte chunga thuneitu hming dang pakhat pawh a sawi a. “Lalpa Isua chu vân aṭanga ama vântirhkoh thiltithei takte nên meialh zînga a lo lan hunah . . . phuba a la ang,” tiin a sawi a ni. (2 Thessalonika 1:7, 8 Mizo Common Bible; Matthaia 16:27) Isua chu ‘vânah a kal a, vântirhkohho te, thuneihna te, thiltihtheihna te ama thu thua awmtîrin an awm a ni.’ (1 Petera 3:21, 22) Pathianin Isua leh Mikaela chu vântirhkoh thianghlimte hruaitu inel tûr atân a ruat tia sawi chu thil inâwm lo tak a ni. Chu aiin, chu hming pahnih Isua leh Makaela chuan mi pakhat chauh a kâwk tia thu tâwp siam chu a inâwm zâwk hle.

• Mikaela chu la awm ngai lo “buaina hun” chhûngin “a ding ang.” (Daniela 12:1) Daniela buah hian “ding” tih hi thilti tûra hma la tûr lal sawi nâna hman a ni ṭhîn a. (Daniela 11:2-4, 21) Isua Krista, “Pathian Thua” tia hriat bawk chuan “lalte Lal” a nih angin, Pathian hmêlma zawng zawngte chu a nuai bo ang a, Pathian mite chu a vênghim ang. (Thu Puan 19:11-16) Chu chu ‘leilung pian tirh ata tûn thlenga la awm ngai lo hrehawm nasa tak,’ chhûngin a ti ang.—Matthaia 24:21, 42.