Thai Liang Lim/E+ via Getty Images
NGAIHVEN RENG RAWH U!
Khawvêl Pumin A Buaipui Social Media leh Ṭhalaite
Kum 2025 khân khawvêl puma ram hrang hrangte chuan social media-in ṭhalaite chunga nghawng a neih dân an sawi a. Ram pakhat chuan kum 16 chin hnuai lamte chu social media hman a khap a, ram dangte pawhin chutianga hmalâkna neih chu an ngaihtuah ve bawk.
Tleirâwlte pawhin anmahni chungah nghawng ṭha lo a nei thei tih an hria chu a ngaihvenawm hle. April 2025-a tih chhuah, Pew Research Center-in United States-a zir chianna a neihah chuan, “ṭhalaite zînga a chanve vêl (48%) chuan [social media] site-te’n an kum rualpuite chungah nghawng ṭha lo tak a nei tih an sawi,” thu a târ lang.
Hrisêlna lama mi thiamte chuan social media-in ṭhalaite rilru lam hrisêlna a nghawng thu an sawi a. Nikum khân U.S. surgeon, Dr. Vivek Murthy-a chuan: “Ṭhalaite zînga rilru lama harsatna awm hi chinfel nghâl vat a nih loh chuan a hlauhawm thei a—chutianga harsatna a awm chhan ber pakhat chu social media vâng a ni,” tiin a sawi.
Engtin nge nu leh pate’n an fate chu social media hlauhawmna laka an vênhim theih ang? Bible chuan thurâwn ṭha tak tak a pe a ni.
Nu leh pate tih theih chu
Hêng Bible thu bulte hi ngaihtuah rawh.
“Mi remhria erawh chuan a kalna a en ṭha ṭhîn.”—Thufingte 14:15.
Social media-in i fate chungah nghawng ṭha lo a nei thei tih i hriat avâng maiin, hmantîr miah loh tûr niin ngai kher suh. I fate chu social media hman i phal hmain, hun bituk neia hmang tûr te, ṭhian ṭha nei reng tûr te leh, thil ṭha lote en lo tûr khawpin an puitling tâwk tih chian hmasa ang che.
Hriat belh nân, “Should My Child Use Social Media?” tih leh “Teaching Your Teenager Social Media Safety,” tih thuziak chu chhiar ang che.
“A ṭha thei ang berin in hun hmang ang che u.”—Ephesi 5:16.
I fate chu social media hmantîr i phal a nih chuan, a hman dân tûrah dânte siamsak la, chûng dânte’n a vênhim reng dân tûrte chu hrilhfiah ang che. Social media a hman dânah ṭanpui a ngai tih târ langtu nungchang lama inthlâk danglamna awmte chu hriat tum tlat ang che.
Chin tâwk neia hman a ngaih chhan, i fate’n an hriatthiam theih nân, he whiteboard animation Social-Network Hmanna Kawngah Fîmkhur Thiam Rawh tih video hi hmang ang che.
Nu leh pate’n an tih theihte chungchânga Bible ṭanchhan rawtna dangte hriat belh nân, “Hrisêlna Lama Mi Thiamte’n Social Media-in Ṭhalaite A Nghawng Hle Tih An Vaukhân—Bible-in Eng Nge A Sawi?” tih thuziak chu chhiar ang che.
Zir belh rawh
Bible chuan “hmachhawn harsa êm êm hun khirh” takah kan awm tih a sawi a. (2 Timothea 3:1-5) Chutih rualin, chûng hun khirh takte hmachhawn thei tûra min ṭanpuitu thurâwn ṭha tak takte pawh min pe bawk. He thuziak “Ṭhalaite Zîngah Rilru Hrisêlna Lama Harsatna A Pung—Bible-in Eng Nge A Sawi?” tihah hian nu leh pate leh an fate tâna Bible ṭanchhan thuziak 20 chuang târ lan a ni.