Sawrkâr Ei Rûkna A Tâwp Ngai Ang em?

Sawrkâr thuneitute ei rûkna hi sawhkhâwk pawi tak nei khawvêl pum huapa harsatna a ni a.a Entîr nân, COVID-19 hripui a lên chhûng hian, ram hrang hranga thuneitute chu hripui tuarte ṭanpuina atâna tih sumte mahni intihhausak nâna hmanga puh an ni a. Chûng ei rûkna chuan mite chu damdawia lama inenkawlna dawng thei lovin a siam a, chuvângin mi tam takin hrehawm an tuar a, an thih phah hial a ni.

Sawrkâra ei rûkna thleng ṭhîn chuan nghawng nasa tak a nei a. United Kingdom prime minister hlui David Cameron-a chuan heti hian a sawi a ni: “Khawvêlah hian ei rûkna a hluar êm avângin, khawi ram mah hi chumi lakah chuan an fihlîm lo a ni,” tiin.

Amaherawh chu, sawrkâra ei rûkna zawng zawng chu a thâwp thuai ang tih kan ring thei a ni. Engvângin nge? Pathianin a tih tûr Bible sawi hi lo chhinchhiah rawh.

Ei rûkna titâwp tûrin Pathianin hma a la dâwn tih kan hriat chhan

Bible chuan Pathianin a sawi he thu hi a chhinchhiah a ni: “Kei, Jehova hian rorêlna dik ka ngaina si a; rûkrûk leh fel lohna hi ka hua a ni,” tih hi.b (Isaia 61:8, New World Translation) Mi dangte eirûkna thiltih avânga mite hrehawm tawrh chu Pathianin a hria a. (Thufingte 14:31) Ani chuan heti hian min tiam a ni: “Retheite an hnehchhiah [avângin] . . . ka tho nghâl mai ang,” tiin.—Sâm 12:5.

Pathianin eng nge a tih ang? Sawrkâr ding mêkte tihhmasâwn aiin, “Pathian Ram” tia koh, a vân lam lalram hmangin chûngte chu a thlâk ang. (Marka 1:14, 15; Matthaia 6:10) Bible-in: “Vân Pathianin ram a rawn din ang a, . . . hêng ram [dang] zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi si a. (Daniela 2:44) Chutiang chuan, Pathianin tûn laia kan hmuh ei rûkna hi a titâwp ang.

Ei rûkna laka fihlîm sawrkâr

Pathian Ram sawrkâr hnuaiah ei rûkna a awm dâwn lo tih engtin nge kan hriat? A hnuaia thute hi ngaihtuah rawh.

1. 1. Thiltihtheihna. Lalram chuan Pathian Engkimtitheia hnên aṭangin thiltihtheihna a dawng.—Thu Puan 11:15.

   A pawimawh chhan: Mihring sawrkârte chu an khua leh tuite sum leh pai rinchhana hnathawk an ni a. Hei hian thamna, rûkrûkna, leh thudik sîksawina theihna hun remchâng a siam fo ṭhîn. Mahse, Pathian Engkimtitheia’n a ṭanpui avângin Pathian Ram chuan a khua leh tuite mamawh chu englai pawhin a pe reng thei ang.—Sâm 145:16.

2. 2. Rorêltu. Pathianin Isua Krista chu Lalrama Rorêltu atân a ruat.—Daniela 7:13, 14.

   A pawimawh chhan: Mihring rorêltu ṭha berte pawh thil dik lo engemawti tûrin miin a thunun thei a. (Thuhriltu 7:20) Chumi nêna inkalh takin, Isua chuan tham theih a ni lo tih a lantîr a ni. (Matthaia 4:8-11) Chu bâkah, hmangaihna dik takin a khua leh tuite chunga thilti tûrin a chêttîr reng ṭhîn a, an ṭhatna tûr a ngaisak tak zet bawk.—Sâm 72:12-14.

3. 3. Dânte. Pathian Ram dânte chu a ṭha famkim a, a zâwmtute tan hahdamna a thlen bawk.—Sâm 19:7, 8.

   A pawimawh chhan: Mihringte dân chu hnawk tak, phur rit, ṭha taka kenkawh loh, leh ei rûkna thlentu remchâng a ni fo ṭhîn. Kawng leh lamah, Pathian dânte chu a ṭangkaiin, hlâwkna thlentu a ni a. (Isaia 48:17, 18) Chu bâkah, hêng dânahte hian thiltih mai ni lovin, a tihtîrtu a tel a ni. (Matthaia 22:37, 39) Pathianin mite thinlung a hriat theih avângin, chûng dânte chu khawngaihna nêna kenkawh a ni em tih a hre thei a ni.—Jeremia 17:10.

Nakina lo awm tûr ei rûkna laka fihlîm sawrkâr chungchânga Bible thutiam zir belh tûrin kan sâwm a che.

• Pathian Ramah ei rûkna a awm ve ngai lohna tûr chhan dang pathum hriat nân, “Pathian Ram—Ei Rûkna Laka Fihlîm Sawrkâr” tih thuziak chhiar rawh.

• Pathian ram leh chumiin leilung atâna a thil tih tûr hriat belh nân Pathian Ram Chu Eng Nge Ni? tih video en rawh.

• Bible thutiamte i hlâwkpui theih dân hriat nân a thlâwna phûrawm taka Bible sawihona kan neih chu tem chhin rawh.