Bible-in Damdawi Ngawlveina Bânsan Tûrin A Ṭanpui Thei Che Em?
Kum tin hian damdawi hman sualna pawh tiamin, damdawi chawhpawlh hmanna avângin mi maktaduai têlte chu an thi a. COVID-19 hripui lên chhûng hian chu chu a hluar lehzual a ni. Bible-a finna thuin mi tam tak chu damdawi ngawlveina hneh tûrin a ṭanpui a. He harsatna hi i do mêk a nih chuan he finna thu hian nang pawh a ṭanpui thei che.a
He thuziakah hian hêngte hi kan hmu ang
Engvângin nge ngawlveina hneh tûra Bible ṭanpuina kan zawn ang?
Mi thiamte chuan ngawlveina chu khawharna, rilru hahna, lungkhamna, leh rilru lam natna nên thûk takin a inzawm tlat tih an hmu chhuak a. Bible-in ngawlveina thlen theitu thilte hlawhtling taka do hneh tûra rinna nei tûrin a ṭanpui thei che. Pathian nêna inṭhianna nghet tak i neih theih dân a târ lang bawk. (Sâm 25:14) A ṭanpuina nên chuan nangmaha i chinfel theih loh tûr anga lang harsatnate pawh i hneh theih a ni.—Marka 11:22-24.
Ngawlveina bânsan tûra Bible ṭanchhan rahbi palite
1. Pathian Jehova hriat.b (Johana 17:3) Ani chu Siamtu leh tâwp chin nei lo thiltihtheihna lo chhuahna hnâr a ni a. Chu bâkah, ani chu hmangaihna ngah tak i Pa vâna mi a ni. Amah nêna inlaichînna ṭha tak nei tûr leh nangmah ṭanpui tûr chea, a chakna hman chu a duh a ni. (Isaia 40:29-31; Jakoba 4:8) A hmangaihna hlâwkpui i thlan chuan nakin hun ropui tak a tiam che.—Jeremia 29:11; Johana 3:16.
2. Jehova hnêna ṭanpuina dîl. Pathian hnênah ṭawngṭai la, “thianghlim leh [a] lawm tlâk” i nih theih nâna i ngawlveina bânsan tûra ṭanpui tûr chein ngên rawh. (Rom 12:1) A thlarau thianghlim, a nih loh leh a chakna hmangin ‘thiltihtheihna nasa tak’ a pe ang che. (2 Korinth 4:7; Luka 11:13) He thiltihtheihna hian i damdawi hmansualna bânsan tûr leh a duh zâwng nêna inmil ‘mihring thara’ inthuam chho tûrin a ṭanpui ang che.—Kolossa 3:9, 10.
3. Pathian ngaihtuahnaa i ngaihtuahna tihkhah. (Isaia 55:9) Ngawlveina laka fihlîm tûrin i ‘rilru thlarauva a thara awm,’ a nih loh leh i ngaihtuahna thlâk tûrin a ṭanpui ang che. (Ephesi 4:23) Pathian ngaihtuahnate chu Bible-ah a chuang a, chumi chhiar ziah chu a pawimawh hle. (Sâm 1:1-3) Bible zirtîrnate hre thiam tûra ṭanpuina dawn chu mi tam takin an hlâwkpui tawh a. (Tirhkohte 8:30, 31) Jehova Thuhretute chuan phûrawm taka a thlâwna Bible sawihona nei tûrin an sâwm che a. Bible sawite leh a zirtîrnate kan nunpui theih dân kan bihchianna hmun, kan inkhâwma lo tel tûrin kan sâwm bawk a che.
4. Ṭhian ṭha thlan. I ṭhiante chuan ngawlvei bânsan i tumnaah a ṭha zawng, a nih loh leh ṭha lo zâwngin nangmahah nghawng nasa tak an nei thei a. (Thufingte 13:20) Pathian chuan amah betute zîngah ṭhian ṭha tam tak a pe che a, anni nêna inṭhianna hlâwkpui tûrin a duh che a ni. (Sâm 119:63; Rom 1:12) I thil en te, ngaihthlâk te, a nih loh leh chhiar te chu i ṭhian kawmte ang an nih avângin intihhlimna pawh fîmkhur takin thlang ang che. Thil dik tih i tumna tiṭhuanawptu eng thil mah ti suh.—Sâm 101:3; Amosa 5:14.
Ngawlveina hneh tûra ṭanpui theitu che Bible chângte
Sâm 27:10: “Ka nu leh ka pa chuan mi kalsan ta si a, nimahsela LALPA chuan mi la pawm ang.”
“Ka pa ka hriat ngai loh avângin chu chuan chhûngrilah ruak nia inhriatna min neihtîr a. Pathian Jehova chu min hmangaihtu Mi tak tak anga ka hriat hnuah, nun awmzia ka chhar chhuak a, ka ngawlveina ka hneh thei ta a ni.”—Wilby-a, Haiti.
Sâm 50:15: “Tin, mangan nîah chuan mi ko la; ka chhanhim ang che.”
“He châng hian ka ngawlveina hneh tûra theih tâwp ka chhuah lai, leh thlêmna ka do hneh loh lai pawhin vawi tam tak min ṭanpui a ni. Jehova’n a thutiam a vawng reng ṭhîn.”—Serhiy-a, Ukraine
Thufingte 3:5, 6: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che.”
“Hêng chângte hian mahni inrinchhan lova Jehova rinchhan tûrin min ṭanpui a. A chakna nên ka nun dân ka thlâk danglam thei a ni.”—Michele-a, Italy.
Isaia 41:10: “Hlau suh u, kei in hnênah ka awm si a; mangang suh u, kei in Pathian ka ni si a. Ka tichak ang che u a, a ni, ka ṭanpui ang che u; ka felna kut ding lamin ka chelh reng ang che u.”
“Damdawi hmang lova ka awm hian lungkhamna nasa tak ka nei ṭhîn a. He châng hian ka lungkhamna hneh tûrin Pathianin min ṭanpui ang tih min rinnghehtîr a, min ṭanpui rêng bawk a ni.”—Andy-a, South Africa.
Korinth thawn khat 15:33: “Bumin awm suh u; ‘Ṭhian sualte chuan nungchang ṭha an tikhawlo ṭhîn.’”
“Ṭhian ṭha lote hnên aṭangin damdawi ka hmêlhriat a, a ngawl ka vei ta a ni. Ka ṭhiante ka kawm tawh loh hnu leh ka ngaihsân zâwng nungchang thianghlim taka nungte ṭhiana ka siam hnuah chauh ka bânsan thei.”—Isaac-a, Kenya.
Korinth thawn hnih 7:1: “Tisa leh thlarau bawlhhlawhna zawng zawngah i intifai ang u.”
“Hêng thute hian ka tisa tithianghlim tûra bei chhunzawm zêl tûr leh ka ngawlveina nun leh mahni intihchhiatna hnuchhawn tûrin min fuih a ni.”—Rosa-i, Colombia.
Philippi 4:13: “Mi tichaktuah chuan engkim ka ti thei a ni.”
“Damdawi bânsan chu ka chakna mai chuan ka thei lo tih ka hria, chuvângin Pathian hnênah min ṭanpui tûrin ka dîl a. Ka mamawh chakna min pe a ni.”—Patrizia-i, Italy.
A taka thiltawnte: Bible ṭanpuinaa ngawlveina hnehin
Joseph Ehrenbogen-a chu tharum thawhna hmunah a seilian a, a hnuah zu, vaihlo, ganja, leh heroin ngawl a vei a. Uchuak taka a hman avângin vawi tam tak a thi ṭêp a ni. Bible-a thu pakhat chuan a inthlâk danglam thei tih a rintîr a ni. A chanchin chu “I Learned to Respect Women and Myself,” tih thuziakah chhiar ang che.
Dmitry Korshunov-a chuan a zu ngawl vei chu vawi tam tak bânsan a tum a. Hlawhtling tûra amah ṭanpuitu hriat nân, ‘Ka Nun Dân Ka Ning’ tih video chu en rawh
Bible-in ngawlvei enkawl nâna damdawia inenkawl a khap em?
Khap lo. Bible chuan: “Mi chakte chuan dâktawr an ngai lo va, mi bawrhsâwmte zâwkin an ngai,” tih a pawm a. (Matthaia 9:12) Chutiang bawkin, U.S. National Institute on Drug Abuse chuan: “Damdawi ngawlvei hi natna khirh tak a ni a, bânsan tûr chuan tumna, a nih loh leh duhna mai aia tam a ngai,” tiin a sawi. Pathian ṭanpuina pêk chu mi mal duhna eng ai pawhin a chak zâwk a. Bible thurâwn zâwma ngawlveina bânsantute pawhin damdawia inenkawlna chu an la mamawh reng a ni.c Entîr nân, pa pakhat Allen-a chuan: “Zu ka nghei ṭan tirh chuan ka taksa hi a na hle a. Chutah chiah chuan thlarau lama ṭanpuina mai bâkah, damdawi lama inenkawlna ka mamawh tih ka hre chhuak a ni,” tiin a sawi.
Bible-in ruih theih chî damdawia hman a khap em?
Khap lo. A nihna takah chuan, Bible-in zû chu damdawi atân, a nih loh leh thi tûr na tawrh chhâwk nân a hman theih tih a sawi a. (Thufingte 31:6; 1 Timothea 5:23) Mahse, zû ang bawkin nachhâwkna atâna hman damdawite chu a ngawlvei a awlsam hle. Chuvângin, hlauhawm thleng theite hriat leh doctor-te chawh damdawi hman kawngah fîmkhur thiam a pawimawh hle a ni.—Thufingte 22:3.
a He thuziak hian damdawi ngawlvei bânsan chungchâng thlûr bing mah se, Bible thu bul târ lante hi zû te, vaihlo te, ei leh in te, pawisa khelh te, saruak lem leh thuziak en te, a nih loh leh social media ang chî-a harsatna do mêkte ṭanpui nân a hman theih a ni.
b Jehova chu Pathian hming bil a ni. (Sam 83:18) “Jehova Chu Tu Nge Ni?” tih thuziak chu chhiar rawh.
c Ṭanpuina pe thei inenkawlna hmun te, damdawi in te, leh ngawlveite enkawlna hmunte tam tak a awm a. Mi tinte chuan duhthlan theihte chu fîmkhur taka chhûtin, eng ang inenkawlna nge ṭha ber tih thu tlûkna an siam tûr a ni.—Thufingte 14:15.