Mi Hausa leh Lazara Chu Tute Nge Ni?

Bible chhânna

Mi hausa leh Lazara hi Isua thusawi pakhata a changtute an ni a. (Luka 16:19-31) Chu a thusawia hêng mite hian pâwl pahnih an entîr a ni: (1) Isua hun laia Juda sakhaw hruaitu chapo takte leh (2) mi hnuaihnung; mahse, Isua thuchah chhâng lêttu mi rilru ṭha pute an ni.

He thuziakah hian hêngte hi a tel ang

• Isua’n mi hausa leh Lazara chungchângah eng nge a sawi?

• Chu a thusawi chu thilthleng tak tak a ni em?

• Chu a thusawi chuan hremhmun meidîl a awm tih thurin chu a thlâwp em?

• Mi hausa leh Lazara chanchin awmzia chu eng nge ni?

Isua’n mi hausa leh Lazara chungchângah eng nge a sawi?

Luka bung 16-ah Isua chuan nasa taka an dinhmun inthlâk danglam mi pahnih chungchâng a sawi a ni.

Isua thusawi khaikhâwmna chu hei hi a ni: Mi hausa tuemaw nuamsa takin a nung a. A kawngkhâr bulah kutdawh pakhat Lazara a awm a, mi hausa dawhkâna ei nawi tlate chu ei a duh a. Tin, Lazara chu a thi a, vântirhkohte’n an kalpui a, Abrahama ângchhûngah an dah a. Mi hausa pawh chu a thi a, phûmin a awm ta a ni. He thu-ah hian mi pahnihte hi thih hnua hriatna nei anga sawi an ni ve ve a. Mi hausa thi ta chu meia nghaisak tuarin a awm a, Abrahama hnênah Lazara’n a kut zung hmâwr tuiah chiaha, a lei tidai tûra tîr tûrin a ngên a. Abrahama’n mi hausa ngenna chu hnâwlin, tûnah chuan an dinhmun a inthlâk tawh a, chu bâkah an inkalpawh theih loh nân an pahnih inkârah leikak nasa tak a awm thu a hrilh bawk a ni.

Chu a thusawi chu thilthleng tak tak a ni em?

Ni lo. He thu hi Isua’n mite zirtîrna atâna a hman tehkhin thu mai a ni a. Tehkhin thu a ni tih mi thiamte chuan an pawm a ni. Entîr nân, Kum 1912-a tih chhuah Luther’s Bible-a thupui têah chuan hei hi tehkhin thu a nih thu târ lan a ni. Catholic Jerusalem Bible footnote chuan hei hi “mihring awm tak tak sawina ni lovin, tehkhin thu mai a ni,” tiin a târ lang.

Isua’n thih hnu piah lam nun chungchâng a zirtîr em? Mi ṭhenkhat chu an thih hnuah hremhmunah na tuara awmin, Abrahama leh Lazara chu vân ramah an awm a tihna a ni em? Thil tam tak hian hei hi a dik thei lo tih a târ lang.

Entîr nân:

• Mi hausa pa kha meialh tak taka tihhrehawm ni ta se, Lazara kut zung hmâwra tui chu a hûah a thâm ral vek dâwn lo vem ni?

• A hûah lo thâm ral ta lo pawh ni se, tui far khat lekin meialh tak taka awm mi hausa pa na tawrh chu a chhâwk ang em?

• Isua’n he tehkhin thu a sawi thleng hian tumah vânah an lâwn ngai lo tih chiang takin a sawi si a, engtin nge Abrahama chu vân ramah a awm theih ang?—Johana 3:13.

Chu a thusawi chuan hremhmun meidîl a awm tih thurin chu a thlâwp em?

Thlâwp lo. Mi ṭhenkhat chuan he thu hi a tak tak ni lo mah se, mi ṭhate vân ramah an kal a, mi sualte hremhmun meidîlaha nghaisak an ni tih entîrna a ni an ti.

Chutianga thu tâwp siam chu a inâwm em? Awm lo.

Hremhmun meidîl zirtîrna hi Bible-in mitthite dinhmun chungchâng a sawi nên a inmil lo. Entîr nân, mi ṭha thi ta zawng zawngte chu vân rama hlim taka awm ang leh mi sualte chu hremhmun meidîla nghaisaka awm angin a sawi lo. Chu aiin, Bible chuan: “Mi nungdamte chuan an la thi dâwn tih an hre si a, mitthite erawh chuan engmah an hre lo,” tiin chiang takin a sawi zâwk a ni.—Thuhriltu 9:5.

Mi hausa leh Lazara chanchin awmzia chu eng nge ni?

He thu hian mihring pâwl pahnih, nakin lawka nasa taka inthlâk thlengna tawngtu tûrte chungchâng a târ lang a ni.

Mi hausa chuan Juda sakhaw hruaitu “tangka ngaihlute” a entîr chiang hle a. (Luka 16:14) Anni chuan Isua thusawite ngaithla mah se, a thuchah ken chu an dodâl a ni. Hêng sakhaw hruaitute hian mipui vântlâng chu an ngainêp hle bawk.—Johana 7:49.

Lazara chuan Isua thuchah pawm a, Juda sakhaw hruaitute huat hlawh mipui vântlâng a entîr a ni.

Pâwl pahnihte dinhmun inthlâkna chu a nasa hle ang.

• Juda sakhaw hruaitute chuan Pathian duhsak hlawh niin an inngai a. Mahse, Isua thuchah ken an pawm duh loh avângin Pathianin anmahni leh an biakna chu hnâwlin mitthi ang an lo ni ta a ni. Anni chu Isua thuchah ken leh a hnungzuite thu hrilhna hmanga nghaisakin an awm bawk.—Matthaia 23:29, 30; Tirhkohte 5:29-33.

• Mipui vântlâng—an sakhaw hruaitute’n hun rei tak an lo ngaihthah tawhte—chuan duhsakna an dawng ve ta. Mi tam takin Pathian Thu ṭanchhan Isua zirtîrna chu an pawm a, an hlâwkpui bawk a ni. Tûnah chuan chatuana Pathian duhsakna dawn theihna hun remchâng an nei ta a ni.—Johana 17:3.