Engtin Nge Thu Tlûkna Ṭha Ka Siam Theih Ang?

Bible chhânna

Bible chuan thu tlûkna siamnaa min ṭanpui tûrin kaihhruaina ṭha tak min pe a. Chu chuan ‘finna leh hriat thiamna’ nei tûrin min ṭanpui thei a ni. (Thufingte 4:5) Dinhmun ṭhenkhatah chuan, thu tlûkna ṭha ber min hrilh a. Dinhmun dangah erawh chuan thu tlûkna ṭha siam tûra min kaihruai theitu thurâwn min pe a ni.

He thuziakah hian hêngte hi a tel

• Thu tlûkna ṭha siam tûra nangmah ṭanpui theitu thurâwnte

• Ka thu tlûkna siam tawh chu ka thlâk leh tûr a ni em?

• Ka thlâk theih tawh loh thu tlûkna ṭha lo siam ta ila, engtin nge ni ang?

Thu tlûkna ṭha siam tûra nangmah ṭanpui theitu thurâwnte

• Hmanhmawh takin thu tlûkna siam suh. Bible chuan: “Mi remhria erawh chuan a kalna a en ṭha ṭhîn,” tiin a sawi a. (Thufingte 14:15) Hmanhmawh taka thu tlûkna i siam chuan thil pawimawhte chu i hmuh hmaih thei a ni. I duhthlan theihte ngun taka ngaihtuah nân hun hmang rawh.—1 Thessalonika 5:21.

• I rilru vei zâwng ṭanchhan chauhvin thu tlûkna siam suh. Bible chuan kan thinlung kan ring reng thei lo tih min hrilh a. (Thufingte 28:26; Jeremia 17:9) Entîr nân, kan thinur lai te, rilru hah lai te, mangan lai te, lunghnual lai te, dawhtheihna neih loh lai te, leh kan chauh hle laitein thu tlûkna ṭha siam a har thei a ni.—Thufingte 24:10; 29:22.

• Finna dîlin ṭawngṭai rawh. (Jakoba 1:5) Pathian chuan chutiang ṭawngṭainate chu chhân nuam a ti a. Ani chu a fate tâna ṭûl lo taka harsatna thleng theite pumpelh tûra duhsaktu ngaihsakna nei tak Pa a ni. “LALPA chuan finna a pe ṭhîn a, a kâ aṭang chuan finna leh hriat thiamna a lo chhuak ṭhîn a ni.”a (Thufingte 2:6) Chu finna chu a Thu, Bible aṭangin a pe ṭhîn.—2 Timothea 3:16, 17.

• 

  Zir Bingna nei rawh. Thu tlûkna ṭha siam tûr chuan thu rinchhan tlâk i mamawh a. Bible-in, “mi fingten an hriat a, an thiamna te a lo pun a” tia a sawi ang khân. (Thufingte 1:5) Khawiah nge thu ṭangkai leh rinchhan tlâk i hmuh theih ang?

  A hmasa berin, i thu ngaihtuahte chungchâng Bible-in a sawi chu en rawh. Min Siamtu chuan kan tâna ṭha ber tûr a hriat avângin, a Thu-ah thurâwn ṭangkai ber a chuang a. (Sâm 25:12) Thu tlûkna ṭha ṭhenkhat siam tûrin Bible-in dân, a nih loh leh thupêk ang chîin kaihhruaina chiang tak a pe a ni. (Isaia 48:17, 18) Dinhmun dang tam takah erawh chutiang chuan a pe lo. Chu aiin, thu bul angin kaihhruaina a pe zâwk a ni. Chu chuan mi dangte nên kan duh dân a inan loh hunah pawh thu tlûkna ṭha siam tûrin min ṭanpui thei a ni. Bible châng ṭangkai takte zawng hmu tûrin he website-a a thlâwna hmuh theih Bible ṭanchhan thuziakte, a nih loh leh thu leh hlate hmangin zir bingna nei rawh.b

  Thu tlûkna ṭhenkhat siam tûr chuan thu rinchhan tlâk dangte i bih chian a ngai thei a. Entîr nân,a bîk takin thil man to tak i lei hmain warranty leh pêkkîr leh a theih em tih chungchânga policy-te pawh tiamin thil siam chhuah leh a siamtu chungchâng i zir chian hmasak phawt a finthlâk ang. Chu bâkah, thil siam chhuah chu i mamawh tak a ni em tih i chian bawk tûr a ni.

  Bible chuan “remruat lâwk lova thil tih a hlawhtling duh lo,” tiin a sawi a. (Thufingte 15:22) Chuvângin, thu tlûkna siam hmain, mi rinchhan tlâkte râwn ang che. Entîr nân, damdawi chungchânga thu tlûkna i siam hmain doctor râwn chu a finthlâk ang. (Matthaia 9:12) Dinhmun ṭhenkhatah chuan i dinhmun anga lo ding tawhte chu i be thei a ni. Mahse, thu tlûkna siamtu tûr leh chumi rah chhuah sengtu tûr chu—i mi râwn ni lovin—nangmah i ni tih hre reng ang che.—Galatia 6:4, 5.

• 

  Thil zawng zawng ngun takin bûk rawh. I chanchin lâk khâwmte ṭanchhanin duhthlan theihte i ziah chhuah theih bâkah, chûngte ṭhatna leh ṭhat lohnate pawh i ziak thei bawk ang. I thu tlûkna siamin sawhkhâwk a neih theihte chu ngun takin ngaihtuah ang che. (Deuteronomy 32:29) Entîr nân, engtin nge i thu tlûkna siamin nangmah, i chhûngte, a nih loh leh mi dangte a nghawng theih? (Thufingte 22:3; Rom 14:19) Hêng zawhnate hi Bible zirtîrnate mila i chhânna chuan thu tlûkna fing leh ṭha tak siam tûrin a ṭanpui thei che a ni.

• Thu tlûkna siam rawh. Kan hriat chian loh avânga thu tlûkna siam hreh châng kan nei thei a. Mahse, thu tlûkna siam harsa ti taka kan awm reng chuan, hun remchâng kan hloh thei a, a nih loh leh dinhmun duhawm lo takah kan awm phah thei a ni. Thu danga sawi chuan, thu tlûkna siam lova awm chu thu tlûkna ṭha lo siam ang tho a ni thei. Bible chuan hei hi thlai chîn nêna tehkhinin heti hian a sawi: “Thli pawisatu’n chi a tuh lâwng, chhûm enthlatu’n a seng hek lo vang,” tiin.—Thuhriltu 11:4.

Thu tlûkna ṭha ber pawh hi a ṭha famkim lo thei tih hre reng bawk ang che. Duhthlannaah chuan thil eng emaw chân a tel ṭhîn. Chu bâkah, hriat lâwk loh thilte a thleng thei bawk. (Thuhriltu 9:11) Chuvângin, i thil hriat ṭha ber chu hmang la, hlawhtlinna thlen thei tûr âwm ber chu thlang ang che.

Ka thu tlûkna siam tawh chu ka thlâk leh tûr a ni em?

Thu tlûkna siam tawhte hi a thlâk theih tawh loh tihna a ni lo. I dinhmunte a inthlâk thei a, a nih loh leh i thu tlûkna hmasa chuan beisei loh sawhkhâwkte a nei tih i hmuchhuak pawh a ni thei. Chuvângin, dinhmunte ennawn leha, rah chhuah ṭha thlen theitu duhthlanna dang siam chu a finthlâk thei a ni.

Amaherawh chu, duhthlanna ṭhenkhat chu thlâk tûr a ni lo. (Sâm 15:4) Entîr nân, Pathianin nupate chu an inneihna thutiam vawng reng tûrin a beisei a.c (Malakia 2:16; Matthaia 19:6) Inneihnaah harsatnate a lo awm hian, chingfel tûra kawng tinrênga theih tâwp chhuah tûr a ni a, inneihna tihtâwp mai tûr a ni lo.

Ka thlâk theih tawh loh thu tlûkna ṭha lo siam ta ila, engtin nge ni ang?

Kan za hian thu tlûkna ṭha lo siam châng kan nei a. (Jakoba 3:2) Kan inchhîrin, kan inthiam lo pawh a ni thei a, chu chu thil pângngai tak a ni. (Sâm 69:5) A nihna takah chuan, chutiang inthiam lohna chuan thil tisual nawn lo tûra min ṭanpui chuan thil ṭha tak a ni thei! (Thufingte 14:9) Mahse, Bible chuan rilru leh ngaihtuahna lama min tichhe thei a lutuka inthiam lohna nei lo tûrin thurâwn min pe a. (2 Korinth 2:7)d “LALPA chu lainatnaa khat, mi khawngaih thei tak” a ni tiin a sawi. (Sâm 103:8-13) Chuvângin, i thlâk danglam theih tawh loh thu tlûkna ṭha lote aṭangin inzir la, theih tâwp chhuahin dinhmun tiṭha chho thei tûrin ṭan la ang che.