Engkimtithei Ni Mah Se, Mite A Ngaihtuah

1, 2. (a) Jehova’n mite a cheibâwl dân leh mihring thuneitute’n mite an cheibâwl dân chu engtin nge a danglam? (b) He thuziakah hian eng nge kan sawiho vang?

THUNEIHNA chelhtute chuan mi dangte chungah an intilalin, an hnehchhiah ṭhîn a. (Matthaia 20:25; Thuhriltu 8:9) Jehova erawh chuan chutiangin a ti ngai lo! Ani chu Engkimtithei, lei leh vâna thiltithei ber ni mah se, ṭha famkim lo mihringte chu a ngaihtuah hle a ni. Ani chu ngilnei tak a ni a, kan rilru awm dânte leh kan mamawhte chu min ngaihsak a. Mi ṭha famkim lo leh theih chin tâwk nei kan ni tih a hriat reng avângin, kan tih theih aia tam ti tûrin min phût ngai lo.—Sâm 103:13, 14.

² Jehova’n a mite a ngaihtuah dân chu Bible aṭangin kan hria a. Entîrna pathum kan sawiho vang: Pakhatna, Jehova’n Puithiam Lalber Elia hnêna rorêlna thuchah sawi tûra hmangaihna nei taka tleirâwl Samuela a ṭanpui dânte. Pahnihna, Mosia’n Aigupta ram aṭanga Israel mite hruai chhuak thei lo tûra a inngaih laia a chunga Jehova dawhtheih dânte. Pathumna, Israel mite’n Aigupta an chhuahsan laia Jehova’n a ngaihsak dânte a ni. Hêng entîrnate aṭang hian Jehova chungchânga eng nge kan zir a, ani chu engtin nge kan entawn theih?

MIPA NAUPANG CHU A NGAIHTUAH

3. Zan khat chu, tleirâwl Samuela chungah eng thil danglam tak nge thleng a, eng zawhna nge kan zawh mai theih? (A thupui chunga milem en rawh.)

³ Samuela chuan naupangtê a nih lai aṭangin biak bûkah rawng a bâwl ṭan a. (1 Samuela 3:1) Zan khat chu, a mut hnuah, thil danglam tak a thleng a ni.a (Footnote en rawh.) (1 Samuela 3:2-10 chhiar rawh.) Tuemawin a ko niin a hria a. Samuela chuan kum upa tak Puithiam Lalber Elia koh niin a ngai a. Chuvângin, thuâwih taka thovin, Elia hnênah a tlân a: “Heta hi ka awm e, min ko va,” a ti a. Elia chuan: “Ka ko lo va che,” tiin a chhâng a ni. Chutianga ṭum hnih aia tam a thlen hnu chuan, Elia’n Pathianin Samuela a ko tih a hre ta a. Chuvângin, Elia chuan Samuela chu Pathianin a koh leh huna a sawi tûr a hrilh a, Samuela’n chutiang chuan a ti a ni. Engvângin nge Jehova’n Samuela kotu chu amah a ni tih a tîr aṭanga a hrilh loh? Bible chuan chu mi chungchângah engmah a sawi lo. Mahse, Jehova’n Samuela rilru awm dân a ngaihtuah avângin chutianga ti a ni thei ang.

4, 5. (a) Jehova’n Elia hnêna sawi tûr thuchah a pêk khân Samuela’n eng nge a tih? (b) He Bible thu hian Jehova chungchâng eng nge min zirtîr?

⁴ Samuela pakhatna 3:11-18 chhiar rawh. Jehova Dân chuan naupangte chu kum upa zâwkte, a bîk takin thuneitute zah tûrin a phût a. (Exodus 22:28; Leviticus 19:32) Chuvângin, Samuela ang naupangin zîng taka tho va, Elia hnêna, Pathian rorêlna thuchah khauh tak huaisen taka a va hrilh tûr han mitthla chu harsa tak a ni. Bible-in Samuela chuan “chu mi inlârna chu Elia hriattîr a hlauthâwng,” tih min hrilh a. Mahse, Pathian chuan Samuela kotu chu Amah a ni tih Elia a hriattîr a ni. Chuvângin, Eila chuan Samuela chu Pathian sawi zawng zawng hrilh vek tûrin a ti a. Elia thu zâwmin “engkim a hrilh fai ta vek a.”

⁵ Chu thuchah chu beisei loh hulhual a ni lo. Tûn hmain, “Pathian mi pakhat” chuan chutiang thuchah chu Elia a lo hrilh tawh ṭhîn a. (1 Samuela 2: 27- 36) He Bible thu hian Jehova’n mite a ngaihsakzia leh a finzia min zirtîr a ni.

6. Pathianin tleirâwl Samuela a ṭanpui dân aṭangin eng nge kan zir theih?

⁶ Ṭhalai i ni em? I nih chuan, Bible-a tleirâwl Samuela chungchâng hian i harsatnate leh rilru vei zâwngte chu Jehova’n a hre thiam tih a târ lang a. I zak zumin, puitlingte hnêna thu hrilh emaw, i rualpuite laka danglam bîk taka awm emaw chu harsa i ti mai thei. Jehova’n ṭanpui che a duh tih i chiang thei a ni. Chuvângin, i rilru awm dân dik tak chu a hnênah ṭawngṭaiin hrilh ang che. (Sâm 62:8) Samuela te ang Bible-a entawn tûr ṭhalaite chungchâng chu ngun takin ngaihtuah rawh. I tawh ang harsatnate lo paltlang tawh i rualpuite emaw, kum upa zâwk unaute emaw chu bia ang che. An beisei loh tak kawnga Jehova’n a ṭanpui dânte chu an hrilh mai thei che a ni.

MOSIA A NGAIHTUAH

7, 8. Jehova’n Mosia rilru awm dân chu a ngaihsak tak zet tih engtin nge a târ lan?

⁷ Mosia chu kum 80 mi a nihin, Jehova’n chanvo harsa tak a pe a, chu chu Aigupta bâwih nihna ata Israel mite hruai chhuak tûrin a ni. (Exodus 3:10) Midian rama kum 40 chhûng berâm vênga a awm avângin, chu chanvo chu Mosia tân thilmak tak a ni thei ang. Mosia chuan: “Kei Pharaoa hnêna kala, Israela thlahte Aigupta ram ata zuk hruai chhuaktu atân chuan tunge maw ka nih le?” a ti a. Jehova’n Mosia chu: “I hnênah ka awm dâwn alâwm,” tiin a tiam a ni. (Exodus 3:11, 12) Israel mite zînga kum upate pawhin i thu “an lo ngaithla ang” tiin a tiam bawk. Chuti chung pawhin, Mosia chuan: “Mi ring duhin ka thu an pawm lo vang,” a ti a. (Exodus 3:18; 4:1) Dik tak chuan, Mosia’n Jehova sawi chu a sual thei tiin a sawi a ni! Mahse, Jehova chu Mosia chungah a dawhthei hle a. Thilmak tih theihna pawh a pe a ni. Dik tak chuan, Mosia chu chutiang thiltihtheihna nei Bible-a chhinchhiah zînga hmasa ber a ni.—Exodus 4:2-9, 21.

⁸ Chûng zawng zawng hnuah pawh, Mosia chuan chhuanlam a la siam a. Thusawi thiam lo tak a ni tih a sawi a. Chuvângin, Pathianin: “I kâ chu keiman ka awmpui zêl ang a, i sawi tûr chu ka hrilh zêl ang che,” tiin a hrilh a. A tâwpah, Mosia’n inrintâwkna a nei ta em? Nei lo, Pathian hnênah mi dang tîr tûrin a ngên a ni! Chuvângin, Jehova chu a thin a rim ta a. Mahse, Mosia rilru awm dân chu a la hriatthiampui reng a, a aiawha thusawitu atân Arona a tîr ta a ni.—Exodus 4:10-16.

9. Engtin nge Jehova dawhtheihna leh ngilneihna chuan Mosia chu hruaitu ṭha ni tûra a ṭanpui?

⁹ He thuziak hian Jehova chungchâng eng nge min zirtîr? Jehova chuan Engkimtithei a nih avângin, Mosia tihlau tûr leh a thu âwih luihtîr tûrin a thiltihtheihna a hmang thei a. Chu aiin, Jehova chuan dawhtheihna leh ngilneihna lantîrin, a chhiahhlawh thuhnuairawlh tak leh inngaitlâwm tak chu a awmpui tûr thu chiang takin a hrilh zâwk a ni. Chu chu a hlâwkpui em? Hlâwkpui tak zet mai! Mosia chu Pathian mite hruaitu ropui tak a lo ni ta a. Jehova’n a chunga a tih ang bawkin, ani pawhin mi zaidam tak nih leh mi dangte ngaihtuah tlattu nih chu a tum a ni.—Numbers 12:3.

10. Jehova anga mi dangte kan ngaihtuah hian engtin nge kan hlâwkpui?

¹⁰ Kan tâna zir tûr chu eng nge ni? Pasal emaw, nu leh pa emaw, a nih loh leh kohhran upa emaw i nih chuan, mi dang chungah thuneihna engemaw chen i nei a. Chu mi avâng chuan, i nupui fanaute leh kohhrana mite chu i ngaihtuah a, an chunga ngilneihna leh dawhtheihna lantîrna hmanga Jehova i entawn chu thil pawimawh tak a ni. (Kolossa 3:19-21; 1 Petera 5:1-3) Pathian Jehova leh Mosia Ropui zâwk Isua Krista i entawn chuan, mi dangte’n pan nuam an ti chein, an rawn bia ang che a, tichuan, anni chu i tichak thei ang. (Matthaia 11:28, 29) An tâna entawn tûr ṭha pawh i ni bawk ang.—Hebrai 13:7.

THILTITHEI TAK NI MAH SE, MITE NGAIHTUAH TAK CHHANDAMTU A NI

11, 12. Engtin nge Jehova’n Israel mite chu Aigupta an chhuahsan laia him nia inhriatna a neihtîr?

¹¹ Krista pian hma kum 1513-a Israel mite’n Aigupta an chhuahsan lai khân anni chu maktaduai thum aia tam an ni mai thei a. An zîngah chuan naupang te, kum upa te, leh ṭhenkhat chu dam lo leh ramtuileilote an ni thei a. Chutiang mipui tam tak chuan ngaihsakna leh hriatthiamna nei tak Hruaitu an mamawh a ni. Mosia hmangin Jehova chu chutiang chiah chu a ni a. Chuvângin, Israel mite’n an in neih chhun an chhuahsan lai khân, chutiang chuan him nia inhriatna an nei a ni.—Sâm 78:52, 53.

¹² Engtin nge Jehova’n a mite chu him nia inhriatna a neihtîr? Israel hnamin Aigupta an chhuahsan lai khân, Jehova’n anni chu “inrâlring rengin” a awmtîr a. (Exodus 13:18) Chutianga an inrêlbâwl ṭhat êm avângin, Pathianin dinhmunte chu a thunun tih chiang takin an hre thei a ni. Jehova’n anni chu a awmpuiin, a kaihruaiin, a vênghim a ni tih an hriat nân “chhûnah chuan chhûmin,” zânah “mei êngin” a hruai a. (Sâm 78:14) A hnua thilthlengte avângin, Israel hnam chuan chutianga him nia inhriatna neih chu an mamawh a ni.

13, 14. (a) Engtin nge Jehova’n Israel mite chu Tuifinriat Senah a ngaihsakzia a lantîr? (b) Engtin nge Jehova’n Aigupta mite aia thil a tih theih zâwkzia a lantîr?

¹³ Exodus 14:19-22 chhiar rawh. Israel mite zînga awm angah han inchan teh. Tlân chhuahna tûr kawng a awm ta lo. Aigupta sipaite chu i hnung lamah, Tuifinriat Sen chu i hma lamah a awm a. Mahse, Pathian a rawn che ta. I hma lama awm ṭhîn chhûm ding chu, i hnung lama awm Aigupta mite nêna in inkârah a insawn ta daih a. Tûnah chuan, thimah an awm a; mahse i awmna lam chu êng mak takin a khat tlat mai! Tichuan, Mosia’n tuipui chungah a bân a’n phar a, khawchhak lam aṭanga thli na tak rawn tleh chuan râl lehlam thlengin kawng zau tak a siam ta a ni. Tichuan, nang leh i chhûngte, in ran neih zawng zawngte nên mipuiho rualin lei charah inkal ta nguah nguah a. Lei a diak lo leh a nal lo chu mak i ti mai thei. A ro va, a châr ṭhat tâwk avângin kal a awlsam a. Chuvângin, an zînga kal muang ber pawhin râl lehlam chu him takin a thleng thei a ni.

¹⁴ Exodus 14:23, 26-30 chhiar rawh. Chutianga in kal lai mêk chuan, mi chapo tak leh â tak Pharaoa chuan nang leh i unau Israel mite chu a rawn ûm che u a. Tichuan, Mosia’n tuipui chungah a bân a han phar leh chuan, tui bang pahnih chu a chim ta a ni. Tui chuan Pharaoa leh a sipaite chu a chim pil ta vek a. Dam khawchhuak reng an awm lo!—Exodus 15:8-10.

15. He thuziak hian Jehova chungchâng eng nge min zirtîr?

¹⁵ He Bible thu hian Jehova chungchâng thil dang pawh min zirtîr a. Ani chu ruahmanna fel tak siamtu Pathian a ni a, chutianga a tih theihna chuan him nia inhriatna nei tûrin min ṭanpui a ni. (1 Korinth 14:33) A berâmte ngaina a, ṭha taka enkawltu berâmpu angin, Jehova chuan a mite chu tih tak zetin a ngaihsak a. Hmêlmate lakah him takin a vênghim ṭhîn. Chu chuan khawvêl tâwp kan hnaih lai hian amah rin nghehna min neihtîr a, thlamuanna nasa tak min pe a ni.—Thufingte 1:33.

16. Jehova’n Israel mite a chhan chhuah dân thlîr lêtna chu engtin nge kan hlâwkpui theih?

¹⁶ Tûn laiah pawh, Jehova chuan a mite chu a huhovin a la ngaihsak reng a. Amah nêna inlaichînna ṭha nei reng tûrin a ṭanpui a, an hmêlmate lakah a vênghim a ni. Nakin lawka lo thleng tûr hrehawm nasa takah pawh chutiang chuan min vênghim ang. (Thu Puan 7:9, 10) Chuvângin, naupang leh kum upa te, mi hrilsêl te, leh ramtuileilo te pawh ni se, Pathian mite chuan hrehawm nasa tak chhûngin engmah an hlauh a ngai lo ang.b (Footnote en rawh.) Dik tak chuan, an hlim zâwk ang! Isua’n: “En chho ula, dâk chhuak rawh u; in tlanna tûr chu a hnaih tâk avângin,” tia a sawi chu an hre reng ang. (Luka 21:28) Goga—Pharaoa aia thiltithei zâwk daih Ram inzawmkhâwmte—beihna an tawh hunah pawh, Pathian mite chuan Jehova’n a chhanhim ang tih an ring tlat ang. (Ezekiela 38:2, 14-16) Engvângin nge? Jehova chu a danglam ngai lo tih an hriat vângin. Ani chuan hmangaih tak leh ngaihsakna nei taka a mite Chhandamtu a nihzia a lantîr leh ang.—Isaia 26:3, 20.

17. (a) Jehova’n a mite a ngaihsak dân chungchâng Bible aṭanga kan zir hunah engtin nge kan hlâwkpui theih? (b) A dawta thuziakah eng nge kan sawiho vang?

¹⁷ He thuziakah hian, Jehova’n a mite a ngaihtuah dân, a kaihhruai dân, a chhanchhuah laia a ngaihsak dân leh ngil a neih dân entîrna ṭhenkhat kan hmu tawh a. Chûng thuziakte ngun taka i ngaihtuah hunah, tûn hmaa i hriat lohte chipchiar taka hre tûrin Jehova chungchâng engemaw hriat tum ang che. Jehova mizia duhawm takte tam lehzuala i zir chuan amah i hmangaihna leh i rinna chu a nghet zual sauh vang. A dawta thuziakah chuan chhûngkuaah, kohhranah, leh rawngbâwlnaah mite ngaihtuahtu nia Jehova kan entawn theih dân kawngte kan sawiho ang.